SAN MATEO 14
14
Juan Bautista apmatña
(Mr 6.14-29; Lc 9.7-9)
1Apleg'ak axta Herodes ekxénáxko aksok apkelané Jesús. Herodes axta wese' m'a yókxexma Galilea. 2Aptahak axta Herodes apkelpakhetchesa apkeláneykha apxéna Jesús s'e: “Juan el Bautista ko'o neyk apxátekhágwokmok. La'a apkepwagko nak apkelana aksok sempelakkaso nak agweta'.”
3Herodes axta apkeltémo emakpok Juan tén han apkeltémo kólyentemekxa yetlo kélpextete cadenas ma'a sẽlpextétamakxa. Kelán'a ekwesey Herodías axta keñamak aptaha Herodes xa, ektaha axta aptáwa m'a apyáxeg apwesey axta Felipe. 4Hakte aptemegkek axta Juan apkenagkama Herodes se'e: “Megkapayhawok xép etnehek aptáwa apyáxeg aptáwa.”#Lc 3.19-20.,#Lv 18.16; 20.21.
5Apmokók axta eykhe yakhek Herodes Juan, énxet'ák axta eyke apchekak, hakte apyókxoho énxet axta xeyenmak apwáxók aptaha Juan Dios appeywa aplegaso. 6Wokmek axta ekhem apteyekemxa wese' Herodes, néweyha axta Herodías étche nápakta'awo' énxet'ák ektaha axta apkeláneyeykha Herodes, leyawók agko' axta apwáxok Herodes, 7ekmámnaksoho agko' axta anhan aptemesásak appeywa apxéna egkések aksok elmaxneyakxa enxoho. 8Temék axta eyáneya Herodes ma'a ektahakxa axta eyáneya egken. Entahak axta eyáneya s'e:
—Heyakxegkeses ko'o xama sokpayhe Juan el Bautista apkátek hegkések.
9Teyekmek axta apwáxok Herodes, wánxa agkok apkeltamho axta kólmések, hakte ekmámnaksoho agko' axta aptemesásak appeywa nápakta'awo' ma'a énxet'ák ektaha axta apkeláneyeykha. 10Apkeltamhok axta kólyakténchesekxak apyespok Juan ma'a kañe' sẽlpextétamakxa; 11keñe axta kélakxegkesa xama sokpayhe apkátek, kélsakxések axta xa kelán'a étkok nak, keñe axta eksakxésa egken.
12Apkelwokmek axta Juan apkeltámeséyak, apsákxeyk axta anhan Juan aphápak, apchatawanyek axta anhan, keñe axta apkeltennáseykxo Jesús.
Jesús apkeléyak aptéyak cinco mil énxet'ák
(Mr 6.30-44; Lc 9.10-17; Jn 6.1-14)
13Xama axta apleg'a amya'a Jesús, keñe axta apxega apxakko', yántakpayhe axta apchántak apmahágko mók nekha. Wánxa agkok, apkelleg'ak axta eyke amya'a énxet'ák, apkelxegkek axta náxop apkemhágko. 14Xama axta apteyapwokmo Jesús kañe' yántakpayhe, apwet'ak axta énxet apxámokma, apyósekak axta apkelano, apkeltakmelchesekmek axta apkelháxamap apnaklo axta xa énxet'ák nak. 15Apya'aweykxeyk axta apkeltámeséyak aphakxa Jesús, hakte peyk axta kayaktések ma'a. Aptahak axta apcháneya s'e:
—Taxnakme', méko énxet se'e. Yána eltakhekxak énxet, yakwayam elmeyekxak ma'a nátegma, yakwayam enxoho nahan etegyagkok aptéyak.
16Aptahak axta apchátegmowágko Jesús se'e:
—Tásek neykhe exnakha aksa; kólmés kéxegke aptéyak.
17Aptahak axta apkelátegmowágko apkeltámeséyak se'e:
—Wánxa aksa negko'o apyetna cinco pan keñe ánet kelasma.
18Aptahak axta apkeláneya Jesús se'e:
—Helsántegkes ko'o.
19Keñe axta apkeltamho Jesús exnakha néten pa'at ekpayhe m'a énxet apxámokma axta. Apkelmeyk axta m'a cinco pan nak tén han ma'a ánet kelasma nak, apsekhákxók axta néten, apmések axta ekxeyenma apwáxok Dios, keñe axta apkelyepta m'a pan nak, apkelmeyásegkek axta anhan apkeltámeséyak, keñe axta apmelassa énxet'ák ma'a apkeltámeséyak. 20Apyókxoho axta aptókagkok ekwokmoho apkelyakkanakmo, apkelmákxeyk axta anhan pan nápakha'a apkeleymomap, doce axta wokmok kélxatmeyak ma'a. 21Cinco mil axta apyókxoho énxet'ák ektaha axta aptéyak xa, meyke kélyetseté kelán'ák tén han ma'a sakcha'a.
Jesús apxega néten yegmen
(Mr 6.45-52; Jn 6.16-21)
22Apkeltamhok axta Jesús elchenátwakxak apkeltámeséyak yántakpayhe natámen xa, apkeltamhok axta elyeykhekxak apmonye'e neyp yakwayam elwakxak ma'a mók nekha, keñe axta Jesús aphákxo m'a mók nekha yakwayam yának eltakhekxak énxet'ák. 23Xama axta appenchesa apkeláphaso énxet'ák, apkenátwokmek axta néten egkexe yakwayam enxoho etnehek nempeywa nelmaxnagko apxakko'. Apxakkok axta aphákxak Jesús ekyaktésa m'a, 24keñe axta ekwegkepákxo m'a yántakpayhe, neyseksók axta wákxak. Tegwokmek axta cha'a yegmen elyakyahayam ma'a yántakpayhe hakte kenmexchek axta exchahayam. 25Amonye elsaye axta apkelamhágkakxo Jesús apkeltámeséyak, néten yegmen axta apxegak. 26Xama axta apwet'a apkeltámeséyak apxega néten yegmen, apkelyegwakkek axta, kelpayheyha axta apatña'ák:
—¡Kélhagak enxegakmok! —axta aptahak apkelpakmeta.
27Aptahak axta apkelpakhetchesa Jesús se'e:
—¡Kólyennakteyásekxoho kélwáxok! ¡Náhelé', ko'o s'e!
28Aptahak axta apchátegmowágko Pedro s'e:
—Wese', xép agkok xa, yána ko'o xa axog néten yegmen amyógmak xa apkenmágkaxa nak.
29—Empoho, —axta aptahak apcháneya Jesús.
Aptekkek axta kañe' yántakpayhe Pedro, apxegkek axta anhan néten yegmen apyo'ókmo Jesús. 30Xama axta apyekpelcha ekyenna exchahayam, apchekak axta; aptahak axta apyennaktésawo appeywa peya eweywagkok se'e:
—¡Wese', hewagkas ko'o teyp!
31Ñohok axta apma apmek Jesús Pedro. Aptahak axta apcháneya s'e:
—¡Asexto' mey'áseyam xép! ¿Yaksak ektaha apya'ásekmo nak seyewagko ko'o awagkasek teyp xép?
32Xama axta apkelchántákxo yántakpayhe, massék axta exchahayam. 33Keñe axta apkeltekxeyágko aptapnák apmonye Jesús ma'a ektaha axta apkelchánte yántakpayhe. Aptahak axta apcháneya s'e:
—¡Nakso' neyke agkok xép aptaha Dios Apketche!
Jesús apkeltakmelcheseyam énxet apkelháxamap ma'a Genesaret
(Mr 6.53-56)
34Apkelyeykhákxeyk axta neyp wátsam ekpayhegwayam, apkelwokmek axta yókxexma Genesaret. 35Kélyekpelchawók axta Jesús apwokmo m'a yókxexma nak, payhekxeyk axta anhan amya'a xa yókxexma nak. Kélnaklókasek axta Jesús apkelháxamap, 36Kéltamhok axta yohok epaknegwomhok énxet apkelháxamap napwa'ék apchaklamap; apkeltakmelwokmek axta m'a apyókxoho ektahakxa axta appaknegweykmoho.
Lengua Sur (Enxet) New Testament © United Bible Societies, 1992.