Matteyo 23
23
Asario Yesu jio Ihumata Mijio Ettiyanak Ifahita iko Farisei
(Mar 12:38-39; Luk 11:43, 46; 20:45-46)
1Attati Yesu ikiana jio eluluŋ waati iko jio lejifak honyi jio, 2“Orutani ettiyanak ifahita iko Farisei imaji Mose. 3Tania, ihaniete luŋa erre 'daŋ hunne ittittoye isi jihatai. Ati, hèjifatiete ehanita hosi, nyio, ittittoye isi erre hunno obeŋi isi ihanie. 4Itakafie isi aati erre hunno oddiŋi te ewwahatio, buo obeŋi iyahi iluak isi ikafari erre hunia, ara duadi bu ta afialai ijiai. 5#Mat 6:1; Ehenita 15:38; Edasita 6:8Ihanie isi egemita hosi 'daŋ jio oŋida aati igonyuni. Asalani isi afokio hunne igioronierek ekenita hutto buk Hollum hunne iyyafatie isi ihomomite iko ihas hosi. 6Omunoi isi asegeri lettaha hutto masik gari iko hutto tua hasik emojiti. 7Omunoi isi elle ifuanyai aati isi ta abaŋi itua suk buo fe iloŋoi isi ‘Hettiyanani.’ 8Ati hèlaha luŋa iloŋoi itai ‘Hettiyanani,’ nyio, irata itai 'daŋ ellarak buo fe iwanata iko ettiyanani abotie ijiai. 9Hèlaha itai iloŋoti obo atulo jio afau ana jiojio, ‘Monye,’ nyio, iwanata itai iko Monye ettedou abotie ijiai. 10Hèlaha buo fe iloŋoi itai jio ‘Lamonye’ nyio, iwanata itai iko Lamonye abotie, inyi Olonyimoto. 11#Mat 20:26-27; Mar 9:35; 10:43-44; Luk 22:26Ijiara lia, alla agalik 'to 'daŋ tehiji hatai hétera luŋa ahegiamani hatai. 12#Luk 14:11; 18:14Lia, alla akaf 'to ahuan honyi ahide, itafiahaji adi; buo lia, elle itafiaha 'to ahuan honyi, akafi adi ahide.”
Ikiana Yesu onno Orroho te Etihanio Hosi Huattek
(Mar 12:40; Luk 11:39-42, 44, 52; 20:47)
13“Orroho adi jihatai bebe ettiyanak ifahita iko Farisei! Itai etihanak huattek hulo! Ihianana itai ekat ono Olobie ettedou jio aati, buo itai, ta ahuattek hatai, ibiaŋata ijiŋara, buo fe itihoto hia hulla awahi 'to ijiŋara. 14Orroho adi jihatai bebe ettiyanak ifahita iko Farisei! Itai etihanak huattek hulo! Imumuniete itai ehidahi buo fe ihorotiete asik hosi, buo ittata itihanio ahuattek te emojiti hunno ohodori 'to! Tania, obolo adi ettigemio jihatai agalik 'daŋ.
15“Orroho adi jihatai bebe ettiyanak ifahita iko Farisei! Itai etihanak huattek hulo! Illaŋata itai ariak, buo fe iluroto afauhien 'daŋ irumaniere atulo abotie, elle iruk 'to emojiti hatai. Buo elle irumana itai, inyiahata itai itasiruna inyi enyiahita arrihai irari aholo iferno ihuo itai.
16“Orroho adi bebe jihatai aŋodok arihok ŋodok hulo! Nyio, ijiatta itai jio, ‘Elle ittuŋo atulo ta Aaji emojit enne ittokon, obeŋ ettuŋo honyi ara ahode. Ati elle ittuŋo inyi ta ayyel onno owon 'to itua Haji emojit enne ittokon, ara ettuŋo honyi ahode.’ 17Itai aŋodok hullo obeŋi hossi hulo! Anani anna agalik 'to ta ayiji, ayyel kuyya Aaji Emojit enne ittokon, enne italibo 'to ayyel ahono Hollum? 18Ijiatta tai buo fe jio, ‘Elle ittuŋo atulo te etitiek ehumi, obeŋ ettuŋo honyi ara ahode. Ati elle ittuŋo inyi te esiorita hutto hide ititiek ehumi, ara ettuŋo honyi ahode.’ 19Itai aŋodok hulo! Anani anna agalik 'to ta ayiji, esiorita kuyya etitiek ehumi, enne italibo 'to esiorita ahuno Hollum. 20Lia, elle ittuŋo 'to te etitiek, ittuŋo inyi te etitiek ehumi iko te esiorita 'daŋ hunno owoni 'to ihide ititiek. 21Buo fe lia, elle ittuŋo 'to ta Aaji emojit enne ittokon, ittuŋo inyi buo fe tenyi iko to Hollum alla amanya 'to diya. 22#Isaya 66:1; Mat 5:34Buo fe lia, elle ittuŋo 'to tedou, ittuŋo inyi ta aseger ilohittok ono Hollum, buo fe tenyi elle itoŋo 'to diya.
23 #
Ehumak 27:30 “Orroho adi bebe jihatai ettiyanak ifahita iko Farisei! Itai etihanak huattek hulo! Isiatta itai aŋati etattomoni ono etamidihita jasi ihuo asamar, abasala iko enyara, buo ibasana erre ifahita hunna agalihini 'to 'daŋ; ihuo abisan ŋocio hiram, amehino, iko eruk. Oŋida luŋa ihaniete erre hunia buo ibiaŋata ibasana hunnomuk. 24Itai arihok aŋodok hulo! Iwajara itai ajaŋati addi jio asaŋ hunne imatati itai, buo idiloro akonnikonni.
25“Orroho adi bebe jihatai ettiyanak ifahita iko Farisei! Itai etihanak huattek hulo! Iwasata itai oruoŋ miolo iko ono oloŋet, buo atuajin ifuti iko erre hunne ihoruna itai horuna buo hunne iduhuna itai te eŋaru. 26Iyye a Fariseitanani oloŋodo olo! Illilla do atua miolo iko ono oloŋet, buo oruoŋite hosi adi ette buo fe libori. 27#Ehanita 23:3Orroho adi bebe jihatai ettiyanak ifahita iko Farisei! Itai etihanak huattek hulo! Irata itai ihuo elumio hunne ihumi ififis many ilamanarik to hide, buo atuajin ifuti iko ahoi buo ahuattek waati hunna amuyahi. 28Ihuo nyia buo fe irata itai to hosiere waati ihuo ayijok, buo atuajin hatai ifuti iko eyyata.
Ikilu Yesu Ettigemio Hosi
(Luk 11:47-51)
29“Orroho adi bebe jihatai ettiyanak ifahita iko Farisei! Itai etihanak huattek hulo! Ihuhumana itai elumio hekianak Hollum buo fe ihumata italaman elumio bisak. 30Buo fe ijiatta jio, elle emanya nyia hohoi to oŋitek huno hohonyiok hohoi, ebeŋ nyia hohoi eremik ittohoro ekianak Hollum hunyia ottohori isi. 31Ati itahutana itai, ta ahuattek hatai, jio irata itai lonyirok hulo attok hekianak Hollum. 32Tania, otuhonia yo erre hunyia itteri hohonyiok hatai ehanio. 33#Mat 3:7; 12:34; Luk 3:7Itai amunuok hulo, lonyirok munuok! Aŋai adi irisata itai afuatan iferno? 34Tania, efak adi ni jihatai ekianak Hollum iko alofiorojok buo ettiyanak ifahita. Ittohoro adi itai omuk hulosi, isihonia omuk ikrucehien, ibahiete omuk ihasik Imojiti, buo fe itarraciete hullomuk iborejin gala 'daŋ. 35#Etterita 4:8; 2 erre Eberien 24:20-21 Tania, irumana adi itai ettigemio te eram ono attohoro ono aati abisak hulo. Itterio ta attohoro ono Abele many jio ono Sakariya lonyi Berekiya linyia abahini ihiji ono etitiek ehumi iko Amaji Elibo. 36Eramak ni itai ahode jio, ottu adi ettigemio jio aati hulo ahana te eram ono attohoro hosi.
Abuaran Taji Yesu, Yerusalem
(Luk 13:34-35)
37“Yerusalem, Yerusalem! Ittohio iyye ekianak Hollum, buo fe irruoŋ ta amoruo leyak sayyo hunyia ifahu Hollum jihoi! Enyiahita omukajia hunyia awahari ni imosouniere aati hoi 'daŋ ta ahas hoŋ, ihuo enne imosouniere ahohoro ekiyehi honyi itua hiwwa, ati ibeŋ iyye ani iŋatak! 38Tania, idehini buo fe oyur adi Aaji hoi emojit enne ittokon. 39Eramak ni iyye, ibeŋ adi iyye inyiak igonyuna ani, many ijiari iyye jio ‘Hotomunoi lia ollo ottu 'to ta afure ono Lamonye.’ ”
© The Bible Society in South Sudan 2003