JAHON 21
21
Jisu rui Kata Ziap Gaanv Chanei khou Lyanloumei
1Mi tangv hei, Jisu rui kata kaziap nunc khou Tiberia Zeiclat khou mi kumcna lyanlou dat khwan e. 2Simon Pitar, Naphinhmei Thomas, Galili tuang Kanamei Nathanael, Zebedi nac nei khatni baihmei ziap gaanv nei bam nchamc bam khwan e.
3Khoutei, “Ai khav nym tat ni he,” twna Simon Pitar rui kaniw khou sa the.#Luk 5.5
“Aniw ni nang thei lay tat ni,” twna kaniw rui sa the. Kumna kaniw hih tuangcna tat the. Tiki mi nungc zingbangc tei kaniw ramhkhat na sini nym tow mak khe. 4Tinggaanc pat pwkhou, Jisu duikhuangc khou tei ding bam khwan the. Tiki hei tei Jisu e twmei ziap nunc tei thay mak khwan e.
5Khoutei, “Alauc nunc, nangniw khang khav khat sini maek nah cho?” twna Jisu rui kaniw khou sa the.
“Maek ge,” twna kaniw rui daw the.
6“Nangniw tuang chiak tei hih tuang baanzat biak thangc tei phaic key tio, asaekc nym tow puni,” twna Jisu rui sa the. Kumna kaniw chiakc tei phaic key the. Khoutei khav mpeyna manclouna chiakc tei kaniw zay tat dat ngam mak khe.#Luk 5.6
7“Mi hei Poubauhmei de!” twna Jisu nzianmei ziap tei rui Pitar khou sa the. Hei tei Poubauhmei e twmei chu pwkhou, Pitar tei katuang thiula nuna dui khou cham key the. Kalam thu kamei pumtang bam khwan e. 8Baihmei ziap nunc tei khav manc padikloumei chiak tei zayna hih khou tei rui dui tin khou pat the. Kalam thu kaniw duikhuangc khou rui duh mak ge, chowbuk phay nei dou na de. 9Kaniw duikhuangc khou tei tat pat pwkhou, maithyn mai ruc khou khav lev ntyan asaekc lou bammei ta how the. 10Khoutei, “Nangniw ntaw nym kanmei khav tei asaekc laaguang o,” twna Jisu rui kaniw khou sa the.
11Simon Pitar hih khou tei kuna, khav rui padikmei chiak tei duikhuangc khou zay pat the. Mi khou tei khav daihmei rana, phay khat na riaknguna kathumh rap khwan e. Kum sini kaniw tuang chiak kaek mak ge. 12“Guang tu tho,” twna Jisu rui kaniw khou sa the. “Nang thow cho?” twna kaniw gaanv khat na sini thanv bauh mak khwan e. Hei tei Poubauhmei e twmei kaniw thay the. 13Jisu guangna ntyan tei laana kaniw khang tii the; khav tei ni tii muay the.
14Mi hei Jisu kamei ringcthau datmei tangv kaziap nunc khou lyanlou kathumhmei e.
Jisu khatni Pitar
15Kaniw tu tang pwkhou, “Jahon nac mpouh Simon, mi guayna khang suangc nang ata nzian daih?” twna Jisu rui Simon Pitar khou sa the.
“Ngguay, Poubauhmei, ai nang ta nzian e twmei nang thay e,” twna kamei rui daw the.
“Alauziu nac nunc ta makuatlou o,” twna Jisu rui kakhou sa the.
16“Jahon nac mpouh Simon, nang ata nzian daih?” twna luan neimei swna Jisu rui kakhou sa the.
“Ngguay, Poubauhmei, ai nang ta nzian e twmei nang thay e,” twna kamei rui daw the.
“Alauziu guay ta gaengclou o,” twna Jisu rui kakhou sa the.
17“Jahon nac mpouh Simon, nang ata nzian daih?” twna luan thumhmei swna Jisu rui kakhou sa the.
“Nang ata nzian daih?” twna thanv luan kathumh ti khou Pitar kalung katuakc thau the. Kumna, “Poubauhmei, nang ramh katana thay e; ai nang ta nzian e twmei nang thay e,” twna kamei rui sa the.
Jisu rui kakhou sa the, “Alauziu nunc ta makuatlou o. 18Ai rui nang khou kaling siakna sa tuang e: Nang alauc douc tei nang tuang sianlangv nang rana langvna, nang rui tat nii niimei bamv thangc tat re; tiki nang gaanvdaih key pwkhou, nang baanc kanei laamv ntyng patna meic baihmei rui nang tuang sianlangv langvlouna, nang tat nii makmei bamv thangc zay tat puni.” 19(Mi hei rui samei thu, Pitar kamei akumhmei ramthei theicna, Ravguangc hym tidaiclou puni cho twmei sa tuang e.) Mi tangv tei, “Athei lay o!” twna Jisu rui kakhou sa the.
Jisu khatni Baihmei Ziap Gaanv Khat
20Pitar karih pat khou, Jisu nzianmei baihmei ziap— twmei thu, zingbangc naptw tupui ganv khou tei, Jisu daeng khou dungc tuancna, “Poubauhmei, nang ta zuanctu nimeipu kiu thow cho?” twna thanv kanmeipu ta tei kathei khou how the.#Jhn 13.25 21Khoutei, “mi pu ti hei thu tabui sw puni?” twna Pitar rui Jisu khou thanv the.
22“Ai guang mak saanv kamei ringc bam khang ai ningmei e thei, hei tei rui nang khang tabui sw buna cho?” twna Jisu rui kakhou daw the.
23Kum tina, mi ziap tei theic ni tu hamh e twna chana puna pang khou tei rac lik sikh sik bam khwan e. Tiki Jisu rui samei thu kamei theic ni tu hamh e twna sa mak ge; tiki “Ai guang mak saanv kamei ringc bam khang ai ningmei e thei, hei tei rui nang khang tabui sw buna cho?” twna sa tuang de.
24Mi ziap kiu, mi guay hei sabammeipu khatni hyloumeipu hei the. Kumna kamei rui sa bammei hei kaling e twmei aniw thay e.
Latriaw
25Jisu rui taancloumei baih baihmei mpeyna nai di he. Mi guayna tei akhat khat swna hylou e thei, hyloumei latrik buk tei mi mbaanv khou hei lou chan lak ge twna ning e.
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.