JAHON 20
20
Jisu Ringcthau Dat Kanmei
(Met 28.1-8; Mrk 16.1-8; Luk 24.1-12)
1Neidak tuang reymei nungc, laukhwan khwanzingh tinggaanc nthan mak khou, Magadaleni Meri tarou khou guang the. Kumna tarou kaimun roukham tauc tei laa ganclou bammei ta how the. 2Kamei Simon Pitar khatni Jisu nzianmei ziap daeng khou pak guangna, “Kaniw rui Poubauhmei ta laa tat kan the, tabui thangc lou kanna cho thay mak khe,” twna sa the.
3Pitar khatni baihmei ziap khat tei tarou thangc tei tat the. 4Kaney tei pak tat nchamc tuang e, tiki baihmei ziap tei Pitar suangc pak huna, tarou khou tei guang rey the. 5Kamei nkhum keyna zauc pwkhou pheynuaih tei how the; tiki kamei kalungc thu gut mak khe. 6Kathei khou Simon Pitar pak guangna, kamei tarou lungc khou gut the. Mi khou tei pheynuaih tei keylou bammei ta how the. 7Kapy khou kasiatcloumei pheyzai tei ni how the. Hei tei pheynuaih tei lev keylou kariu mak ge, mi langv tei kazih langclou bam khwan e. 8Mi tangv tei baihmei ziap, tarou khou guang reymeipu tei ni kalungc khou gut the, kumna hei tei howna lwm the. 9Tiki kamei theihmei khou rui ringcthau dat puni twna Nthanmei Latrik khou hyloumei tei kabah thay mak he. 10Kumna ziap nunc tei kaniw bamv thangc tat dat kan the.
Jisu rui Kata Magadaleni Meri khou Lyanloumei
(Met 28.9-10; Mrk 16.9-11)
11Meri tei kapna tarou paengc khou ding bam khwan e. Kamei kapna kapna nkhum keyna tarou khou tei ntyn gut the. 12Khoutei kauh baanchara gaanv nei phey mphwanmei piuna, Jisu pumc nziloumei bamv khou tei gaanv khat rui kapy biak thangc, gaanv khat rui kaphay biak thangc dungc bammei ta how the.
13“Meicpuile, nang tabui swna kap bam tu cho?” twna kaney rui sa the.
“Kaniw rui aPoubauhmei ta laa tat kan the, kata tabui thangc lou kanna cho, ai thay mak khe,” twna kamei rui daw the.
14Khoutei kamei thei karih pat pwkhou, Jisu ding bammei ta how the; tiki hei tei Jisu e twmei kamei thay mak khwan e.
15“Meicpuile, nang tabui swna kap bam tu cho? Nang thow ta phu bam tu cho?” twna Jisu rui kakhou sa the.
Mi pu tei pikwan taanhmei lana khuang e twna ningna, “Kaipouc, nang rui kata laa tat tuang e thei, kata tabui thangc lou kan tu cho dinclou o, ai kata laa dat kan ni e,” twna sa the.
16Khoutei Jisu rui, “Meri” twna kaw the.
Kamei karih patna, “Rabboni” twna Ibri lat rui sa the. (Mi kabac kiu thu, “Dinhpouc” twna e.)
17Jisu rui kakhou sa the, “Ata kahi riu, ai aPu daeng thangc ku mak he. Nang achana nunc daeng thangc tei tatna, aPu khatni kaniw Pu, aRacguangc khatni kaniw Racguangc daeng thangc ai ku dat puni the twna kaniw khou salou ti tho.”
18Kumna Magadaleni Meri tei tatna kamei rui Poubauhmei ta how kanmei khatni Poubauhmei rui kakhou saloumei guay tei ziap nunc khou raclou the.
Jisu rui Kata Kaziap nunc khou Lyanloumei
(Met 28.16-20; Mrk 16.14-18; Luk 24.36-49)
19Mi neidak tuang reymei nungc zingbangc tei, ziap nunc tei, Jihudimei kapy nunc ta ping lana, kaikhamv mbanghlouna kainung khou bam khwan e. Khoutei Jisu guangna kaniw pang khou dingna, “Nangniw khou chuzaenghmei nai diu!” twna sa the. 20Mi hei salou lana kabaanc kanei lev kanaek tei kaniw khou lyanlou the. Poubauhmei ta how lana ziap nunc tei neihlamei padik the. 21Khoutei, “Nangniw khou chuzaenghmei nai diu! Apu rui ata ndiuloumei kumcna, ai ni nangniw ta ndiulou the,” twna sa dat re. 22Khoutei kaniw khou kathiu la mbunlouna, “Bumaengh Nthanmei laa tho,” twna sa the. 23“Nangniw rui meic nunc paap kuaklou e thei, kaniw paap tei kuaklou the; nangniw rui kuaklou mak ge thei, kaniw paap tei kuak mak ge,” twna sa the.#Met 16.19; 18.18
Jisu khatni Thomas
24Ziap ruhna kanei pang khou gaanv khat, twmei thu Naphinhmei Thomas tei ziap nunc daeng khou Jisu guang khou tei bam mak khwan e. 25Kum tina, “Aniw Poubauhmei ta how the!” twna baihmei ziap nunc tei rui kakhou sa the.
Tiki, “Kabaanc khou zuatpi zam tei how mak ge thei khatni mi zam khou tei khatni kanaek khou tei abaanc kahilou tangh mak ge thei, ai lwm mak ge,” twna kamei rui kaniw khou sa the.
26Zaeng tachat tangv, ziap nunc tei kainung khou bam dat khwan e, kumna mi pang khou tei Thomas ni bam khwan e. Kaikhamv guay tei taanlou de, tiki Jisu guangna kaniw pang khou dingna, “Nangniw khou chuzaenghmei nai diu!” twna sa the. 27Khoutei Jisu rui Thomas khou sa the, “Mi khou hei nang baanc kahi tho, kumna abaanc ti hei zauc tho; nang baanc haamv patna anaek khou hei kahi tho. Lwmsi dat ri tho, lwm tho!”
28Khoutei, “APoubauhmei! ARacguangc!” twna Thomas rui sa the.
29“Nang ata howpui zaeng rui lwm tu cho? Ata how makna lwmmei nunc tei sangaymei nunc e!” twna Jisu rui kakhou sa the.
Mi Gaychamv hei Hymei lam
30Mi buk khou hylou makmei, Jisu rui kaziap nunc hu khou taanclou kanmei sw-nchinmei taanv mpeyna nai he. 31Tiki Jisu hei Khrista, Ravguangc Nac Mpouh e twmei nangniw lwm khang,#lwm khang: Baanhhy baibal asaekc khou lwm bam khang twna hylou e. kumna lwmmei paan rui nangniw kazanc khou ringhmei laa khang mi guay hei hylou tuang e.
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.