MARK 14
14
Jisu Shwikerüchün Tedo Rhikelo
(Mt 26:1-5; Lk 22:1-2; Jn 11:45-53)
1Lo jonhvu siki Nkenkechwi lo Kebu no shümvu tseo tensü ketyü Nga gü nga titse binla. Lo tsükatsü peshükeda ju lo lesükeshatsin ju le nkuo Jisu ten pe dushvu kela rhi sola. 2Ai anyugun le kerao, “Temi le tha kevü kela kenshvu genyu nga higü ka we thyü loho,” tson sola.
Bethani Nyu Terzü Lope Jisu Yün kethyü
(Mt 26:6-13; Jn 12:1-8)
3Lo a-le Bethani nyu nyule ketyü gü Simon kanyu bin-o tyütsü kebin ka tenunyu nmme le terzü a-rün kegwa a-min ketsen Alabaster khin me sen gunryü, tson-o a-npvü bokholo njüo ja pe Jisu pe ge shü. 4Ai temi dan me le anyugun kenyü mvuo zo sola, “Nyu genyu terzü nke pe hihontse hü nla? 5Terzü hile jwenshülo doli tsishen soki-e hei pe thakendinyu a-gwünshvu kehü gü shwi shülo gwale!” tson-o anyugun le a-ge kenyo sola.
6Ai Jisu le, “Tson nyalo! Hagun le nyuthyüo a-kevü hü nla? A-le age tha kegwa nme thyü shüla sele. 7Lo kendinyu we hagun zen zin bin hünyo, tsügenyu hagun le lihi gwünkho kae tsüdan ge thakegwa thyünyü lo thyüshü logwa. Ai hagun le awe azen zin bin loho. 8A-le thyülo kegwa gü thyüshü laso; a-le nchwenyu akesun ronye rüchün-o terzü pe amin yünshü laso. 9Lo ale hagun ka zo tsentsü shüti, kazü aphu nyu jolokegwa zo pe me kezen aphu ka tenunyu higi rüla rüchünlo nrün genyu a-tho-e sin-o zoti.”
Judas Le Jisu Ten keshü N dokelo
(Mt 26:14-16; Lk 22:3-6)
10Tsüsika Iskariot Judas tsekethyü tseryü kenyhun che dan nyu nme le Jisu ten pe peshükeda ju ben nyu shü kela rüchün-o tsü ka gun. 11Lo anyugun le a-jo shakelo ka anyugun shekerhün thyüo raka pe a-tsü titse a-ka zoshüla. Tsontsin a-le thyülo kegwa gwünkho ka a-khipe anyugun ben nyu keshü rhi sola.
Jisu le Senthyükelonyu dan Zen-o Nkenkechwi Nga Gü Ngakelo
(Mt 26:17-25; Lk 22:7-14,21-23; Jn 13:21-30)
12Lo Kebu no shümvuo tensü ketyü Nga jon kerigü nyü anyugun le Nkenkechwi Nga tanyünyu dukeshvu jon nyü tsü, a-le senthyükelo nyu dan le a-ka, “Nle agun no gungü dikipon Nkenkechwi Nga gü nga nrün bin ndo keshü le nkendo la?”
13Tsügenyu a-le senthyükelo nyu mihvu nishüo au ka, “Hai rünyi nyida gü nyu gunlo nye, lo hai le temi nme le zü laki nme pen kehü hyulo ti. 14hai temi tsügü sithen gunlo nye; tson-o hai a-le keyü ka nyu yüo ka npugü ka, ‘Senkethyü gü le, ano senthyükelonyu dan zen-o Nkenkechwi Nga tyülo nrün bin ndo kenjü tsüle dikipon bin nla?’ tsonzo hü nle tsonshü nye. 15Tsonshülo a-le kahe tesoki ndo pe khwen kebin katsen nme tsin pe hai hishü ti. Lo hai le ka tsünyu tsü ngun genyu tha ndolo nye.”
16Tsontsin senthyükelo hvu le rünyi nyida gü nyu ryülo ntsin, a-le au ka kezo hontse bin-o hyulo. Tson-o au le tsünyu tsü Nkenkechwi Nga gü tsü ndolo.
17Lo ngwün lo ntsin, a-le tseryü kenyhun che dan zen gunryülo. 18Tson-o anyugun le chvütyü kebin ka Jisu le, “Ale hagun ka zo tsentsü shüti, hagun azen kerhün-o tyü kebin nyu nme le aten pe me ben nyu shüti!”
19Tsontsin anyugun le anyugun nyungwamvu sa tseo a-ka, “Ale le? Ale le?” tsonso.
20Lo a-le anyugun ka, “A-ben sen-o azen kentsin-o khun nyu keshü tseryü kenyhunche dan nme le. 21Kechamvule Temi Nyugü le nduka a-rüla thu kenjü hontse tinla ti sele tse bin kelasi genyu. Ai Temi Nyugü ten pe me ben nyu keshü gü we chi, thyülo tiso! Temi tsügü nnyu ryü kemvu we gwakvu nrün laryü!”
Npugü Kerüchün
(Mt 26:26-30; Lk 22:14-20; 1 Kor 11:23-25)
22Tson-o anyugun le tyütsü kebin ka a-le tensü khipen-o jochü shü, tson-o boshwenlo-o khipe anyugun tsüshüo, “Tyülo, higü hile amin güle,” tsonshü.
23Lo tsüsika a-le honpen gü khilo njüo, Sunggigü shwen shüo pe anyugun tsüshü, lo anyugun aphu tsü tsükü. 24Lo a-le anyugun ka, “Higü hile temi kechon genyu tsunchwikeryü Jopenron kelo azi gü le. 25Ale hagun ka zo tsentsü shü ti, ale Sunggigü keda nyu vain zü keshün tsü kemvuthen ale vain bin higü ge tsü sin loho so.”
26Tson-o anyugun le lü nme thyüshü njüo Oliv kazüthun ki nsin la.
Pitor Le Jisu Zan Zoshwimvula Nrün
(Mt 26:31-35; Lk 22:31-34; Jn 13:36-38)
27Lo Jisu le anyugun ka, “Hagun aphu akhe küla ti; kechamvule, ‘Ale tanyü kekhwen gü vüti, tson-o tanyü dan no tin tsenchvü lati,’ tson kethyü thu kenjü genyu. 28Tson-o ale rhünniso kela siki ale hagun mhundyü rio Galil ki gunla ti.”
29Ai Pitor le, “Kechanyu le aphu nkhelae awe tsonlo ho!” 30Tsükatsü Jisu le a-ka, “Ale nka zo tsentsü shü ti, nle ntsoje tero khun hvu ge kethyü mhundyü arüla zomvu gwünshen ge ti!”
31Ai a-le nra a-yhenthyüo, “Ano nzen-o sila lo tse so-e, ale nrüla zomvula loho.” Lo kechanyu-e tsühontse zo küla.
Jisu Le Getsemane Chwi Nyu Kehikethyü
(Mt 26:36-46; Lk 22:39-46)
32Tsüsika anyugun le Getsemane tsekethyü chwi nme nyu ryülo; tson-o a-le senthyükelo nyu ju ka, “Ale gü hi kebin ka hagun le hika hibin tse nye.” 33Tson-o a-le Pitor lo Johan lo Jakob tse pe a-sinlo njüo anyugun zen npha. Tson-o a-nyun kenjün thyü pe ketetsin thyülo la. 34Lo a-le anyugun ka, “Anyun kenjün thyü pe sigü zhüla sele. Hagun we hika bin-o khwen bin nye.”
35Tsüsika a-le ketu din npha gü a-mhun pvü nkhün tsügü kazü rünlo njüo, “Thyülo gwalo tegi kevü ja higü no a nrhi tinla lo,” tse kethyü kehi thyü bin.
36Tsüsika a-le, “Aba,” “Apvü! Nwe le tha aphu thyülo gwa. Nle akhoka honpen higü hi khilo la lo; ai akendo mvule nkendo thyülo chi.”
37Tson-o a-le tsüsika npha ryü ntsin, senthyükelo mishen dan le zhü kebin hyulo. A-le Pitor ka zo-o, “Simon, nle zhü tinla se ole? Nle tegikevü ja nme-e khwen bin lohola se ole? 38Hagun kesemen nyu yüla mvu nrün genyu khwen zin binlo, lo hizin binlo. Kapu gü kipon we thyünyü sabin nyo, ai thyümin kipon le kvu mvu bin laso.”
39Tson-o a-le ni npha gü ngüka jo hontseo hishü. 40Tsüsika ko a-le ni npharyü ntsin, anyugun le zhü kebin hyunilo. Anyugun le anyugun yhütyükho loho kebin genyu; anyugun le a-ka tha kezo-e rüchünlo shamvu la.
41Tsüsika a-le gwünshen ge gü ka anyugun ki npharyüo, “Ntsokae hagun le zhü lo rüyü bin zun ole.? Tsüle gwaso! A-gwünkho penla so! Hire, meno Temi Nyugü ten pe kemu nyu ben shüla titse binla so! 42Solo njüo tinla tile je. Hire, aten pe me ben nyu shü nrün gü le ryüo kekhonilo laso.!”
Jisu Tenkelo
(Mt 26:47-56; Lk 22:47-53; Jn 18:3-12)
43Lo a-le jotsü zoshü ketseka tseryü kenyhunche dan nyu nme Judas le, peshükeda ju lo lesükeshatsin ju lo pelü ju zen-o zhethon lo senkethü sen-o temi dan me zen whütse ryü. 44Lo a-ten pe me ben nyu shü nrün gü le tsü mhundyü tha zansü nme thyüshü titseo ale a-nbo keshü gü tsügü tsü lenye, hagun a-nrhisülo njüo a-khwen sa zen gunlo nye, tson zoshü la.
45Lo a-le ryü ntsin Jisu ka whütse ryüo a-ka, “Rabi,” tsonshüo a-nbo shü. 46Tsontsin anyugun le ryüo anyugun ben pe a-tenlo. 47Lo tsüka kebin nyu nme le a-zhethon sütholo njüo peshükedagü gogü duso ntsin a-nyetin nti thüla. 48Tsükatsü Jisu le anyugun ka, “Hagun le mehon seketyü nyu keten hontse zhethon lo senkethü pen-o aten ryü zhü le? 49Ale khenyütsen hagun zen-o Kershvuka nyu bin-o me senthyü bin hü, ai tsüka we hagun le atenlo mvu. Ai ketsinlesü jo no penlo nrün genyu,hihontse laso.”
50Tsonshü ntsin senthyükelonyu aphu a-khela njüo tin küla.
51Tsükatsü ponyu nme le linen phi nme nti khiben tseo a-sithen gunzhü. 52Lo mele a-nrhisülo ntsin a-le a-phi tsü khela njüo a-kenben nton tinla.
Jisu Zen-o Pelünyu Kehun Mhundyü nyu Kegun
(Mt 26:57-68; Lk 22:54-55,63-71; Jn 18:13-14,19-24)
53Tsüsika anyugun le Jisu zen-o Peshükeda tsingü kanyu gun; tsünyu peshükeda ju lo pelü ju lo lesükeshatsin ju le gü tsünyu kehun bin. 54Lo Pitor le a-ti sarimvu tseo a-sithen-o peshükeda tsingü ka sü nyu yüo rikhun dan zen-o mah ha bin. 55Lo tsükatsü peshükeda ju lo pelü ju kehun aphu Jisu dushvula nyüo a-ge kenku jünkezo füso; ai anyugun le tsü hyulo mvula. 56Kechamvule anyugun temi kechon le kenku jo zope a-nzhü so, ai anyugun jo tsüle kerhünlo mvu kela genyu.
57Tsükatsü peha le kenku jo zope a-nzhüo, ale a-jo kesha le, 58“Ale n-ben no kethyü Kershvuka gü hi borholao ben senmvu tseo jonshen nyü thyünilo ti,” tson zo kehü le. 59Tson-e anyugun jo kerhünlo mvula.
60Tsüsika peshükeda tsingü le anyugun dan nyu solo njüo, “Nle thame zonimvu ti ole? Hidan le tha ditsüki zope n ge shü bin nla?” tson-o a-ketso shü.
61Ai a-le matse gwünzin bin, lo thame zonishü mvula. Tsontsin peshükeda tsingü le a-ka, “Nle Kegwatsin gü Npugü Khrista ole?” tson-o a-ketso.
62Lo tsükatsü Jisu le, “Ele, ale tsügü le, lo tsüntimvule hisiki hagun le Temi Nyugü le kekvu gü njüzin kebin lo tsangge nmhu ge keryü hyuti!”
63Tsontsin peshükedatsin gü le a-phi sürhen-o, “N gun jo kecha füni pe nyu thyü tila? 64Hagun npvü-e a-le Sunggigü kenkhin jo kezo shalo la sele la. Hagun le nyu rüchün bin nla?”
Tsontsin anyugun aphu a-no silae gwa le tse kü sola.
65Tsüselo anyugun peha le nsü pe a-nye, lo anyugun le a-mhu jela njüo jenthün pe a-jen. Tson-o a-ka, “Segü le n jenshü yo zoshü shwi!” Tson-o rikhun nyu a-zenlo-o a-jü sola.
Pitor Le Jisu Rüla Zomvukela
(Mt 26:69-75; Lk 22:56-62; Jn 18:15-18,25-27)
66Tsükatsü Pitor le kasü tesizin kipon bin, lo peshükeda tsingü gonyu tenunyu nme le ryü. 67Tsügi le Pitor le mah ha kebin hyushüo a-nrilo-o, “Nko Nazaret Jisu zen hü amon?” tson.
68Ai a-le nmvu letseo, “Ale nle kezo shae mvu lo rüchün-e lomvu,” tsonlao a-le kasü hensin ki tin chwila. Tsontsin tsükatsü tero le khunla.
69Lo tsüsika ko gonyu tsügi le a-hyulo njüo a-khoka kebin dan ka, “Higü hiko a-pvünyu nme le!” tsonni so. 70Ai a-le nmvu letse zonila.
Lo tsüsi kheka tsüka kebin nyu dan le Pitor ka, “Nko a-pvünyu ketsinnyu nme le, nle Galilnyu nme laryü!” tsonni sola. 71Ai a-le swe-o, “Ale nle a-rüla zo kebin gü tsü shamvu le!”
72Tsonshü ntsin tero khun hvu ge la, tsüsiki nyu Pitor le himhundyü ki Jisu le a-ka, “Nle tero khun kenyhun ge mhundyü arüla zomvu gwenshen ge ti,” tsonkeshü jo tsü a-si rüchünlo. Tson-o a-le jo tsügü rüchün-o chü tinla.
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.