MARK 13
13
Kershvuka Nkela Nrün
(Mt 24:1-2; Lk 21:5-6)
1Tsüsika a-le Kershvuka nyu chwiryü kejü ka a-le senthyükelo nyu nme le a-ka, “Senkethyü gü! Hire, tso hidan hi le tso nyu tsekethyü dan me layo no, lo ka tho-e nyu tsethyüo thyülo yono!”
2Tsontsin Jisu le a-ka, “Nle a-kethon keda hihontse kethyü hi hyu bin amon? Tso hidan hi boketola mvutseo tso nme-e no hika hi kesomin pvüo bin loho,” tson.
Kekevü Binzen Gü
(Mt 24:3-14; Lk 21:7-19)
3Tsüsika a-le OLiv kazüthun ge Kershvuka mhundyü zin bin kelo ka Pitor lo Johan lo jakob lo Andria nyugun le kebuo a-ki ryü. 4Anyugun le zo, “Hidan hile nyuche ka thyüla tiyo, lo nle tha hi aphu thyü nrün ka nyu lope zansü thyüshü mon? Tsü lope agun ka zoshü ta!” tson-o.
5Lo tsükatsü Jisu le anyugun ka zo, “Temi nme-e no hagun sa zen tinla mvu nrün genyu hagun petsü sa binlo chi. 6Tsükatsü temi kechon le azan sen-o, ‘Ale Khrista gü le,’ tson-o temi kechon sa zen tinla ti. 7Tson-o hagun le teri kega kethyü jo shakelo ka hagun nyun keyhunkerun la nya chi. Tsüdan tsü thyü mvula loho; ai tsügü tsü-e kenkhin gü mvuzun le. 8Temi dan me le kechanyu dan me shwinyü mvu soti, lo raja nme le raja kecha nme shwinyü mvu soti, lika hika kazüe nnun soti; lo chenda thyü ryü ti; tsüdan tsü le kenjün kethyü bin kezen sele. 9“Tson-e hagun petsü sa binlo nye; kechamvule mele hagun ten pe pelünyu kehun ka shüti; lo sinagog ka nyu hagun vüti; lo kedanyu lo raja nyu-e no shalo nrün genyu a genyu hagun no tsüdan mhundyü kae gun mvulo keshvu genyu. 10Tson-o jon kenkhin ti nrün mhundyü Jolokegwa gü zope temi kebin aphu hishü teri mvuloshvu. 11Lo hagun nrhisü zen gü me ben nyu shüla nrün ka hagun le nchwen nyu jozo nrün rüchün pe hagun nyun kenjün thyü nya nye. Ai tegi kevüja tsügü nyu hagun no zolo tse keshü gü tsü zolo nye; jo tsüle hagun le zo mvule Kenshün Kapu le zo nrün genyu. 12Lo tsükatsü a-tsagü le a-npvü a-sikezen gü ten shü ti, lo a-pvü le a-npvü a-nyu ten pe meno dushvu ti; lo me nyenyu le a-npvü a-pepvünyu shwinyü mvuo meno tsüdan dushvu ti. 13Lo azan genyu temi aphu no hagun ntsü ti; ai nyhen gungü tikelo gü we kenikelo hyulo ti.
Kenjünkethyü Kedatsingü
(Mt 24:15-28; Lk 21:20-24)
14“Tson-e hagun le ‘Tha gwün nrhu nrün gü Kentsü Kenche’ kethyü gü le binzü kemvu bin ka bin kethyü kehyu ka (swü kehünyu no tsü rüchün lo) tsüka Judia nyu kebin nyu no tin sen-o rincho ki küla. 15Lo ka soki kehünyu no kazü nyu nitsen nya, nmvue a-ka nyu tha khilo titseo niryü nya. 16Lo low nyu kehünyu ko no aphi khilo titseo nigun nya. 17Tson-e tsükatsü nyuphou kepvünyu lo a-nyu le a-ge tsü kehü nyu tse le kenjün thyü sa ti! 18Tsügenyu tsüno tsangseka tsü thyü mvu nrün genyu hagun hilo nye. 19Kechamvule tsükitsü Sunggigü le tha thyükeshü keritsin kanyu ryüo ntsoka keti kenjün thyü pe tsühontse kemvu, lo hisiki-e tsühontse lo keho thyü ryü nrün genyu. 20Lo Npugü le a-npvü tsangkeben jon tsüdan thyü kezü thyü shü kemvu we temi nme-e kenikelo hyulo ho; tson-e a-le a-npvü kejükelonyu dan genyu tsangkeben jon tsü thyü pe rhoshü ti.
21“Lo tsükatsü temi lihigüe hagun ka, ‘Hire, Khrista le hika bin nyo! Nmvue lika bin nyo,’ tson zo-e tenyen nya nye. 22Kechamvule Khrista kenku dan lo sidyükesha kenku dan le soryüo tha zansü lo tha ndun kethyü tho thyü pe me hio thyülo kegwathen kejükelo nyu-e sa zen tinla nrün genyu. 23Tson-e hagun petsü sa binlo; hire, ale nchwenyu tha aphu hagun ka zoshüla sele nye.
Temi Nyugü Le Niryü Nrün
(Mt 24:29-31; Lk 21:25-28)
24“Ai kenjün kethyü tsangkeben jon tsüdan tsü siki yhüko le zünla ti, lo shye le benshü mvula ti, 25lo tsangge shyenyü dan-e nrhi lati, lo tsangge tha kekvu dan sükenun shüti. 26Lo tsükatsü meno Temi Nyugü le a-kekvu keda sen, lo gingvü tseo nmhu ge ryü kezhü hyulo ti. 27Lo tsükatsü a-le a-lokethyünyu dan nishüo anyugun no kazü keni keti nyu-e lo tsangge keni keti ki-e tsangkenbu pezi dan ka a-le kejükelonyu ko zen ryüo kequen loti.
Kherobin Ge Senkethyü Jo
(Mt 24:32-35; Lk 21:29-33)
28“Lo hagun kherobin ge jokejvü gü ko shalo tare. A-nyü nrhila njüo a-nyü senni chwiryü kezhü ka tsang nyen chwiryü zhü kela shalo hünyo. 29Tsühontse hagun ko tha tsüdan thyü kebin kehyu ka a-kho nni laso, kakhin khoka bin laso, tson kethyü shalo nye. 30Ale hagun ka zo tsentsü shü ti, tha tsü aphu thyüla kemvuthen nje ntsenyü keyhun temi dan hi ndila loho. 31Tsang lo kazü ndila ti, ai ajo dan we ndila loho. 32Ai tsangkeben jon tsügü lo tegikevü ja tsügü tsü le Pvü gü nyeki temi nme-e lo tsanggelonyu lo Nyugü-e shamvu.
Temi Nme-e Shakemvu Jon Gü Lo Tegikevü jagü
(Mt 24:36-44)
33“Hagun petsü binlo, lo khwen-o nri binlo, lo hi binlo; kechamvule hagun le tsügü gwünkho tsü shabin kemvu genyu. 34Tsügü tsü le temi nme le a-ka khelao a-tho a-tsentsen khipe a-gonyu dan tenyen lao kakhin kekhwen gü-e no khwen petsü bin lo tse shü lao rünyi kecha nme ki gun kela hontse le. 35Tsügenyu hagun khwen petsü bin lo nye; kechamvule ka Npugü le ngwün ki tile, kheje nyu tsanglvu ka tile, tero kekhun ki tile, le lonyü tiyo a-le keryü gwünkho sha kemvu genyu. 36A-le whütse ryüo hagun le zhü kebin hyu yatselo kenshvu genyu. 37Lo Khwen ntsen binlo nye, tsekeshü jo hile ale temi aphu ka zo bin nyo!”
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.