LUK 6
6
Sabbath Rüla Ketsokeshü
(Mt 12:1-8; Mk 2:23-28)
1Tsükatsü a-le Sabbath jon nyü me lojvü ki tsü kezhü ka, a-le senthyükelo nyu ju le low pwen nrhilo njüo anyugun ben nyu nrhikho tyü hü. 2Farisinyu dan le tsü hyushüo anyugun ka, “Hagun le nyuthyüo Sabbath jon nyü tejvü kemvu thyü hü nla?” tson sola.
3Tsontsin Jisu le anyugun ka, “David lo a-zen kehünyu ju le nduka nnyon kelo ka kethyü rü la hagun le swüshwi mvu ole? 4A-le Sunggigü kanyu yügü peshügü kemvu we tyü kethyü tejvü kemvu, pe mehi kethyü tensü tsü khipe tyü, tson-o khipe a-zen kehünyu jue tsüshü.”
5Tson-o a-le anyugun ka, “Temi Nyugü le Sabbath jon Npugü le!” tson.
Temi A-ben Kesi Nme
(Mt 12:9-14; Mk 3:1-6)
6Tsüsika Sabbath jon nme nyü a-le sinagog kanyu yügü me senthyü kethyü ka, tsünyu temi a-ben njüzin le kesi nme le bin. 7Tsügenyu lesü keshatsin nyu lo Farisinyu ju le a-le Sabbath jon nyüe me thyü kesherhün shü tile nmvu yo tsekethyü rüchün, lo a-kemu füo a-nri bin; kechamvule tsüdan le Jisu nkhin shü nyü kebin genyu. 8Ai a-le temi tsüdan kerüchün shalo njüo; a-le temi a-ben sikela gü ka, “So-o temi dan nyu binlo chi!” tsoshü. Tsüselo temi tsügü le sogü me mhundyü ka binlo la. 9Tsontsin Jisu le anyugun ka, “Ale hagun ka tha nme ketso nyü bin nyo; Sabbath jon nyü me ge thakegwa kethyü gü le, me ge tha gwakemvu kethyü le tejvü la? Mesi keni tile me boshvu tila?” 10A-le tsonshüo rani gü nri küshü njüo temi tsügü ka, “Nben ketoshü chi!” tson. Tson-o a-le a-ben ketoshüo a-ben thyü ngwa lo.
11Ai temi tsüdan we anyugun kenyümvu sao Jisu pe nyu thyüla logwa tiyo tse kethyü kenthon sola.
Apostel Thyü Nrün Genyu Mi Tseryü Kenyhunche Kejükelo
(Mt 10:1-4; Mk 3:13-19)
12Lo tsükatsü a-le hi titseo rincho ge gun, tson-o a-le tsangkezün jon aphu Sunggigü ka kehi thyü pe ti. 13Tson-o tsangkeben mün ka a-le senthyükelo ju kolo. Lo a-le tsüdan nyu mi tseryü kenyhun che kejülo-o tsüdan zan pe apostel letse tholo. 14Tsüdan zan le: Simon, kekhin ki a-zan pe PItor tho kela gü, lo a-sikezen gü Andria, lo Mathi, lo Thoma, 15lo Filip lo Bortholoma, lo Jakob lo Johan, lo Alfia nyugü Jakob, 16lo Simon a-yhen kethyü gü, lo Jakob nyugü Juda, lo Iskariot Judas kekhin ki Jisu ten keshü gü.
Jisu le Temi Danda Senkethyü
(Mt 4:23-25)
17Tsüselo a-le tsüdan zen tsenryüo kazü ketejon nme ka binlo; lo tsükatsü a-le senthyükelonyu jue kechonki, lo Judia aphu lo Jerusalem lo Tur lo Sidon kazü züda kho kipon kebin nyu temi kechon le a-jo nyü titse lo a-keho-e thyü ngwalo titse ryü. 18Lo nshün kemvu kapu no semen zen kehü nyue thyü n gwashü. 19Tsüselo temi tsüka kebin nyu aphu a-keju titse sola; kechamvule a-ge kekvu chwiryüo anyugun aphu thyü ngwa kelo genyu.
Jochü lo Nyungwakemvu dan
(Mt 5:1-12)
20Tsüselo a-le nyi sogü a-le senthyükelo nyu juka,
“Hagun tha kendinyu jochü kepvü ketsin,
kechamvule Sunggigü keda le hagun hon genyu!
21“Hagun ntsoka chü kehünyu le jochü kepvü ketsin,
kechamvule hagun le nnyülo nrün genyu!
“Hagun ntsoka nnyon kehünyu jochü kepvü ketsin;
kechamvule hagun gin nyülo nrün genyu!
22“Temi Nyugü genyu meno hagun ntsü nrün, lo hagun kenila lo hagun nkhin lo hagun le gwamvu le tseo hagun zan nke hüya tselo jochü kepvü ketsin. 23Hagun le tsünyü hagun sherhün lochi, tson-o hagun shekerhün nohao hagun shwagwün lochi; kechamvule hagun le tsangge tha kenrun nyu kechon hyulo nrün genyu. Anyugun pepvünyu le sidyükeshanyu kae tsühontse keryü genyu.
24“Ai hagun nnya kebin ju we chi;
kechamvule hagun le tha hagun
kerüchün hyulo kelasi genyu!
25“Hagun ntsoka hagun ginnyü kebin ju we chi;
kechamvule hagun le nnyon la nrün genyu!
“Hagun ntsoka nnyü kebin ju we chi;
kechamvule hagun le nyungwamvu lo
chün nrün genyu!
26“Temi aphu hagun shwen hü yatselo hagun we chi; anyugun pepvünyu jue kenku sidyükeshanyu dan ge tson kehü genyu.
Shwikerüchün nyu Keso
(Mt 5:38-48; 7:12)
27“Ai hagun a jo nyü kehünyu dan ka zoshü ti: hagun we hagun shwikerüchün nyu so gwalo, lo mele hagun shwinyü mvu kehünyu ge hagun jvü gwalo chi. 28Hagun le jochü pe mele hagun swetsü kehünyu tsülo; lo mele hagun nshwe kehünyu genyu kehithyü lochi. 29Mele njonto nme zin vülo kecha kipon-e pvükerü pe tsü shünye; lo temi nme le nphi selo titselo nmirün-e pe a-tsü tepen nya. 30Temi lihigüe nka tha hi yatselo, pe a-tsüshü chi; lo mele nhon se sen tinla yatselo hini nya. 31Lo mele hagun ge nyu thyüshülo hagun kenyü yo hagun ko me ge tsühontse thyü shü chi.
32“Lo hagun le mele hagun sokehünyu nti sohü kethyü we segü le hagun kegwa zo tila? 33Kemu nyue mele a-so kehünyu so kehü le la. Lo mele hagun ge a-jvü gwa kehünyu ge hagun jvü gwa kehü gwünzin we, segü le hagun kegwa zo tila? Kemunyue tsühontse kehü lela? 34Lo hagun le tha khipe hagun tsünilo nrün ketenyennyu tsü kehü gwünzin we, segü le hagun kegwa zo tila. Kemunyue tha khipe me tepu shüo hyuni kelo rüchün-o tha pe kemunyu tepu hünyo! 35Ai hagun we hagun shwikerüchün nyu solo, lo tsüdan ge hagun jvü gwalo, lo hagun le temi nme ge-e hagun shese nyao tha pe me tepulo chi. Tsonlo yatselo hagun le kenrun nyu tha kechon hyulo ti, lo hagun le ketetsotsin gü nyu thyülo ti; kechamvule a-le me shwennyü hü kemvunyu lo serikemvunyu ge-e a-jvü gwa kehü genyu. 36Hagun Pvü tsangge kebin gü le me njün kehü hontse hagun ko me shwinjün lochi.”
Me Nmu Kethyü
(Mt 7:1-5)
37“Hagun le me jo kera nya, tson yatselo me-e hagun jo kera loho; hagun le me nmu nya, tson yatselo me-e hagun nmu loho. Hagun le me hoshüla yatselo me-e hagun hoshü lati. 38Hagun le tha khipe me tsülo, tson yatselo me-e tha khipe hagun tsüti; tsüntimvule mele ndo sa, lo nyenketseryü, lo sen kedüe sin, lo sükelae pe hagun phi nyu shüshü ti. Kechamvule hagun le ndo keshü nyu me ko tsünyu ndoni pe hagun tsü nrün genyu.”
39Tsüsika a-le jokejvü nme pe anyugun ka zonishü, “A-yhütyü keponyu le tsontsin pe a-yhütyü keponyu zenlo gwa ole? Tson yatselo au mihvu nren kesin-o thakü nyu tsüla mvuti ole? Senkethyü gü nyeki senthyükelo gü le gonkvu mvu. 40Ai lihigüe tha lihikae gwatilo yatselo a-senkethyü gü hontselo ti.
41“Lo nle nyuthyüo n npvü nyhütyü ka senthün le kebin gü rüchün mvuo, n sikezengü yhütyü ka kerhu nri hü nla? 42Nmvue nle nyu thyüo n npvü nyhütyü ka senthün le kebin gü rüchün mvuo n sikezengü ka, ‘asikezen gü, ano nyhütyü nyu kerhu le kebin tsü kinla lo,’ tsonkethyü zolo gwa la? Nle kerokon kehü gü! N npvü nyhütyü nyu senthün kinla ri chi, tson yatselo nle n sikezen gü yhütyü nyu kerhu le kebin hyu tsentsü tseo kinla ti.
Senbin Le A-shaka Shalo Hü
(Mt 7:16-20; 12:33-35)
43“Tsüntimvule senbin kegwa nme le a-sha gwakemvu; lo senbin gwakemvu nme-e a-sha kegwa nshalo shwi hü mvu; lo senbin lihi-e mele a-sha ge a-shalo hünyo. 44Lo tsehü bin ge kherosha lülo hümvu; nmvue mele mvutsi bin ge vainsha lülo hümvu. 45Temi kegwanyu le a-nyun ki kebin a-hon khin nyu tha kegwa sen chwiryü hünyo; lo temi gwakemvu nyue a-hon khin gwakemvu nyu tha gwakemvu senchwiryü hünyo; kechamvule a-nyunki tha kechon le kebin tsü a-mün nyu zoshwi chwiryü kehü genyu.
Ka Kenyhun Kethyü Rüla
(Mt 7:24-27)
46“Lo hagun ai ale hagun no thyülo tse keshü gü thyümvuo aka, ‘Npugü, Npugü,’ tse hü ole? 47Temi lihigüe aki ryüo akhwen shalo, tson-o ajo thyüzen kehünyu, tsünyu le senyu hontse yo, ale tsü tsinpe hagun hishü ti. 48Tsünyu le kazü tso ntsun yügü tso soge a-ka thyükelonyu hontse le; tsonlo yatselo, zü le datsüryüo ka tsügü chünsen tinla titse so-e ka tsügü tsü le nnula loho; kechamvule ka tsüle thyü pe nkosa kela genyu. 49Ai lihigüe ajo nyülo-o thyüzen hü kemvu nyu le temi a-ka ketun senketse mvuo nnyon soge a-ka kethyünyu hontse; tsükatsü zü le datsüryüo ka tsügü chünso ntsin nren whütsela, tson-o tsügü tsü le nke nmhüla!”
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.