LUK 7
7
Jisu Le Tsiso Kedanyu Nme Gogü Thyüngwa Keshü
(Mt 8:5-13)
1Lo a-le zo hidan hi zopen pe temi nyetin nyu keshü siki a-le Kapernaum nyu gunla. 2Tsükatsü shüpahü tsiso kedanyu nme gonyu a-le sosa kehü nyu nme le ho-o si gü zhüla. 3Tsügenyu temi tsügü le Jisu rüla shalo ntsin Judanyu pelünyu peha nipe Jisu ki shüo a-no ryüo a-gogü si kenishülo tseo Jisu ka a-kenjü hi. 4Tson-o temi tsüdan le Jisu khoka ryülo ntsin anyugun kenjün hi tenge tseo, “Nle temi higü hi shwinjün shü züsa kethyü nmele. 5Kechamvule a-le temi sosa hünyo, tson-o a-le agun sinagog kae thyü pe agun tsü tse kethyü genyu,” tsonshü.
6Tsontsin Jisu le temi tsüdan zen gun. Tson-o gungü ka ti nrün le thonsari kemvu ka tsiso kedagü le a-pvünyu peha nipe a-ki shüo a-ka, “Npugü nle ryüo kenjün thyü bin nyalo; ale nno aka hensin nyu yüryülo kü mvu. 7Tsügenyu n ngükae nki ryü mvu laso; ai nle jo konme zoshüe agogü le gwalo ti. 8Ako kedanyu hensin nyu kehünyu nme, lo a hensin kie shüpahünyu le bin. Lo ale nme ka, ‘Nle gun nye,’ tsonshülo a-le ajo zen-o gun hünyo; lo kechanyu nme ka, ‘Ryülo,’ tsonshülo a-ko ryü hünyo; lo agonyu ka, ‘Nle tha higü hithyü shü re,’ tsonshülo a-ko tsüthyü pe atsü hünyo.”
9Jisu le jo tsü shalo-o, temi tsügü rüla sha pe a-dun thyüo, ranigü temi a-sithen kehü dan ka, “Hire, ale hagun ka zoshü ti, ale Israelnyu dan nyue a-ketenyen le hihontse kethyü keda hyu shwimvu!”
10Lo nikeshü dan tsüle gü ka tilo ntsin a-gonyu ho kebin gü tsüle gwalo kela hyulo.
Jisu Le Tenunyu Maginyu Nme Nyu Thyü Nrhün Keshü
11Tsüselo a-le thonsari kemvu ka Nain tse kethyü rünyi nme nyu gun; lo a-le senthyükelo nyue lo temi danda nme ko tse a-sin-o gun. 12Lo a-le rünyi tsügü chwida khonni gunzhü ntsin mele kesinyu nme pen chwizhü; lo kesi tsügütsü le a-jvü nyuche gü, lo tsügi-e maginyu nme; lo rünyi tsünyu temi kechon le tenunyu tsügi zen chwizhü. 13Tsüselo Npugü le a-hyushü ntsin shwipe a-nyun gwamvuo tsügi ka, “Nle chü nyalo,” tsonshü. 14Tson-o a-le tsüdan khonni npha gü simin gü kepen khin kesü shü; lo simin gü kepen nyu le sun tinla, tson-o Jisu le, “Ponyu, ale nka zoshü le, nle soryülo chi!” tsonshü. 15Tsonshü ntsin sikela gü le so-o jozo sola, lo a-le khipe a-jvü tsü nila.
16Tsügenyu temi aphu nshvu sao Sunggigü shwen-o, “Sidyükeshanyu keda nme le ndan nyu soryü laso! Lo Sunggigü le ryüo a-temi nri bin laso!” tson.
17Lo a-rüla higü hi zope Judia kazü aphu nyu lo rünyi tsü khoki kebin aphu no sha gunla.
Johan Baptist Gü le Lilonyu Nikeshü
(Mt 11:2-19)
18Tsüselo Johan le senthyükelonyu dan le tha tsü dan tsü aphu pe a-ka zo küshü. 19Tsontsin Johan le a-le senthyükelonyu mihvu kozen ryüo tsühvu nipe Npugü ka shüo au no, “Nle ryü titse kehü gü le, le agun no kecha nme khwen bin tila?” tsonkethyü ketso lotse zoshü.
20Tsügenyu temi tsühvu le gü, “Johan Baptist gü le ayi nipe nki shüle, a-le ayi no, ‘Nle ryü titse kebin gü le, le agun no kecha nme khweni bin tila?’ tson kethyü ketso shü lotse zoshü le!”
21Tsükatsü Jisu le, me kehokenyü, kethyükenyü lo gwakemvu kapu no nchün ndyü kehünyue kechon thyü kesherhün shü; lo a-yhütyü keponyu yhütyüe kechon thyü ngwa shü. 22Tson-o a-le tsühvu ka, “Hai gungü hai le kesha kehyu aphu pe Johan ka zoshü chi; a-yhütyü keponyu le tha hyulo bin laso, terotho nyue tsonchülo bin laso, nyun le ketyünyue thyünshünlo bin laso, a-nyetin gwakemvunyue thakhwenyülo bin laso, kesinyue thyü nrhünlo bin laso, Jolokegwa gü zope kendinyu hishü bin laso. 23Lo temi lihigüe age kenyunhvu mvushü kethyü gü le jochü kepvü tsin!”
24Tsüselo Johan lothyü keryü ju le tinla ntsin, a-le Johan rüla pe temi dan ka zo titseo, “Hagun le tehen nyu nyu nri titseo chwila? Tsangkenbu le whünkeni kehü nbo bin ole? Le hagun le Nyu nri titseo chwila? 25Temi a-phi a-nya kegwa sen kehü nyu ole? Temi a-phi a-nya a-min ketsen sen kehünyu lo ketegvüo yhun kehü nyu le kedanyu ka nyu bin kehü le! 26Ai hagun le nyu nri titseo chwiryü la? Sidyükeshanyu ole? Ele, tsekethyü zolo gwa! 27Lo tsüntimvule sidyükeshanyu nyeki gonkvu kethyü nme le, nduka a-rüla thu pe bin kenjü le : ‘Hire, nmhu kehyu mhundyü ale lilonyu nme nishü ti; lo a-le nmhundyü ki ntson ketsü ti, tson kehü gü tsü le a-le.’ 28Ale hagun ka zoshü tile, tenunyu ge yhun chwikeryü dan nyu Johan nyeki keda nme-e yhun soryü mvu; ai Sunggigü keda nyu we keshe güe a-nyeki gon.”
29Lo temi aphu lo khajana keshvunyu ju aphu Johan jo shao Johan Baptism pe anyugun baptaiz thyülo njüo, Sunggigü le njü le tse la. 30Ai tejvü kesha ju lo Farisinyu dan we anyugun baptaiz thyü mvuo anyugun npvü Sunggigü jo gü zenlo mvu laso.
31Jisu le zo sin-o, “Ano ntsokanyu keyhun hi lope nyu zen kendyü shülo gwa tila? Nmvue anyugun le nyu hontse kethyü dan me la? 32Anyugun le ntsenyu le hakethyü bin nyu khinyunyu ka, ‘Agun le khüli khun pe ha hi, ai hale dathyülo mvu laso.’ 33Tsühontse Johan me baptaiz kethyü gü le keryü le tensü tyümvu, lo vain zu ai tsümvu, laryü hagun le a-ka, ‘A-le tero gwakemvu gü zen hünyo,’ tsonla. 34Lo Temi Nyugü le ryü tha tyütsü laryü, hagun le a-ka, ‘Hire, ketyünyun, vain zü ketsü nyun nme, khajana keshvunyu, lo kemunyu pvü gü!’ tsonla. 35Tson yatse-e tsü lo kelonyu aphu Sunggigü thakesha le ketsin letse kethyü pe hishü laso.”
Jisu Le Farisi Gü Simon Kanyu Kebin
36Tsüselo Farisinyu nme le a-zen ho nyüo a-ko so. Lo a-le Farisi gü kanyu yügü tyütsü titse dunlo. 37Tsükatsü rünyi tsünyu tenunyu kemunyu nme le bin hü, tenunyu tsügi le a-le Farisigü kanyu tyütsü titse kebin shashüo alabaster terzü khin nme sen ryüo, a-sikipon bin-o chü bin. 38Tson-o a-yhüphu che pe Jisu pha nye nye tse bin, tson-o tsüsiki we a-shün pe a-pha shonlao a-pha nbo, lo a-le terzü lope a-pha nyen tsebin. 39Tsüselo Farisigü a-no ho lotse a-ko keshü gü le a-npvü a-nyunki a-nthon-o, “Temi higü hile sidyükeshanyu nme yatselo tenunyu a-kesü kebin gi hile kemunyu nme tsekethyü shalo zü le la!” tson bin.
40Tsontsin Jisu le a-ka zo, “Hire, Simon, ale nka jo nme zonyü bin nle!”
Tsontsin a-ko, “Zoshülo, senkethyü gü,” tson.
41Lo Jisu le, “Raka pe me nkhün kehü nyu nme le temi mihvu le a-pu pvü bin; au nme le doli tsi pvü, lo nme le henpvün tse pvü bin. 42Temi tsühvu le tha lope tepu tsü thyü loho kela genyu a-le tsühvu shwinjüo tepu tsü gwün kü pe au tsüla. Kha, tselo temi tsühvu digü le a-shwi pe a-sherhün kvu tila?”
43Simon le a-ka zo, “Kechon gwün pe a-ketsü gü le ti ado.”
Tsontsin Jisu le a-ka zo, “Nko rüchün sao zo laso.” 44Tson-o a-le tenugi kipon ranigü, Simon ka zo, “Nle tenunyu higi hi hyu bin amon? Ale nka nyu yükeryüka nle zü pe ano apha sü mvu; ai tenunyu higi we a-yhüphu che pe apha nye-o a-shün pe shonle. 45N we a nbo shwimvu, ai a-we ale nkanyu yüryü ntsin apha nbo bin-o ntsoka ti. 46N we terzü pe ape kae shümvu, ai a-we terzü pe a-phae yünshü. 47Tsügenyu hire, ale nka zoshü ti, a-kemu gonri kehü tsü jü pe a-tsü laso; a-le aso arüno sa kethyü genyu. Ai kerho jü pe ketsü gü le meso rho.”
48Tson-o a-le tenunyu tsügi ka, “Nkemu jü pe ntsüshü la sele nye,” tsonshü.
49Tsüselo anyugun a-zen-o tyütsü kebin nyu dan le kenthon-o, “Temi kemu jü pe tsüshü kehü higü hile temi nyu tsekethyü nyu nme la?” tson sola.
50Tsüselo a-le tenugi ka, “N ketenyen le nkenilo la sele nye; ndyüben-o gunlo!” tson.
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.