लूकस 17
17
छमा नन्ना अरा पत्त'अना ही पत्त ता सिखाब'अना
(मत्ता 18:6,7,21,22; मर 9:42)
1फिन येसुस तंग्है चेलारिन बाचस, “पाप नन्ना ही चिबाख़ारना गुट्ठी बर'ओ दिम। लिकिन ओहरे अबड़ा नॆखा ती बर'ई। 2एका आलस ई सन्नी ती एकअम ओर्तोस गने पाप ही नंगु मन्दस, आसी ख़ेसेर नू जतन हें'अरकी समुदर नू मुलखत'अना चि'अना धर्मेसी चि'अना दंडे ती जुक्की र'ई। 3चिहुंक र'आ, निम्है भईस पाप नन्दस होले आसिन बुझा ब'आ, अरा आस खोबरारदस ती जियन किर्त'अदस होले आसिन छमा नना।#मत्ता 18:15 4अरा आस ओन उल्ला नू सात हॆल निंग्है बिड़दो नू पाप नन्दस ती सातो हॆल निंग्है गुसन बर'अरकी ब'अदस, ‘ऎन खोबरारदन जियन किर्त'अदन’ होले हूँ आसिन छमा नना।”
5बारो तइरकर उर्बासिन बाचर, “एमन कोड़हे बड़ियर पत्त'आ गे संगरा नना।” 6उर्बस बाचस, “निमा गे ओन्टा मनी बिहनी लेक्खा पत्त'अना रहचका होले हूँ, नीम ई तुंती मन्नन ब'ओर, ‘नीन चड़र'अय ती समुदर नू इदर'अय कलय’ होले आद निम्है पॆसकन मन'ओ दने।”
7उर्बस अउरिम बाचस, “निम्है ती नॆखय जॊंख़स र'अदस। आ जॊंख़स गोहला उइय्ना महले भेंडो ख़ापना ती ख़ल्ल ती एड़पा किर्रदस होले, आसिन नीम ब'ओर का ‘नीन लॆम कला मंडी ओना गे ओक्का?’ 8आस आसिन एन्ने ब'ओस, ‘एंगा मंडी सराजमा नना, एंग्है ओन्ना-मॊख़ना गूटी कड़मन भिड़'अरकी सुसर'अत र'आ, अरा अदही ख़ॊख़ा नीन हूँ ओनके मॊख़के।’ 9आ जॊंख़स उर्बासी पॆसकन नंजका चड्डे उर्बस आस गे धन्यवाद मल ब'ओस। 10एन्नेम नीम हूँ निमा गे पॆसका जम्मन नंज मुंजका ख़ॊख़ा एन्ने ब'अके, ‘ऎम लेड़पोंयहा जॊंख़म, एंग्है नन्ना नलखन लेका नंजकम।’”
येसुस दस खसरा रोगियारिन कोड़े नन्ना
11येसुस येरुसलॆम कालो बारी समारिया अरा गलिलेया मझी नू कालालियस। 12अरा आस ओन्टा पद्दा नू कोरना गनेम दस झन खसरा रोगियारिन ख़क्खियस। आर गेच्छम इज्जर ती 13चिच्चियारर ती बाचर, “अना येसु उर्बायो, एमन सोग्गे ऎरा, कोड़े नना।” 14आस आरिन ईरियस ती बाचस, “कला निमन नैगारिन ऎदके।” ख़ने कानुम कानुम आर कोड़े मंजर केरर।#लौव्य 14:1-32 15तहाँ अबड़र ती ओर्तोस ईरियस का “ऎन कोड़े मंजकन केरकन।” आस येसुस गुसन किर्रियस ती जॊर ती धर्मेसी ओहमा नंजस। 16अरा येसुसी ख़ेडमूली खत्तरस ती आसिन धन्यवाद नंजस। आस समारिया ता आलस रहचस। 17ख़ने येसुस बाचस, “एन्देर दसो झन कोड़े मल मंजर, होले अबड़ा नौ झन एसन केरर? 18एन्देर ई समारिया ता आलासिन अम्बर अउर नॆ हूँ धर्मेसी ओहमा नना गे मल बरचर का?” 19ख़ने येसुस आसिन बाचस, “चो'आ, कला। नीन एंगन पत्ताचकय आदिम निंगन नाड़िया।”
धर्मेसी राजी ही बरना
(मत्ता 24:23-28,37-41)
20जोक्क फरिसीर येसुसिन मेंजर, “धर्मेसी राजी इकला बर'ओ?” ख़ने आस आरिन बाचस, “धर्मेसी राजी नीम निम्है ख़न्न ती ऎरा ओंगना लेक्खा मल बर'ई। 21अरा आलर मल ब'ओर, ऎरा, इसन र'ई महले असन र'ई। धर्मेसी राजी गा निम्है मझी नू र'ई।”
22फिन आस तंग्है चेलारिन बाचस, “एन्ने बेड़ा बर'ओ का नीम मनवा ख़द्दन एंगा ओन उल्लन ऎरा बेद्दोर, लिकिन अदन ऎरा पोल्लोर। 23आलर निमन ब'ओर, ‘ऎरा, आस इसन र'अस महले असन र'अस।’ होले नीम असन अमके काला अरा आर ही ख़ॊख़ा अमके बोंगा। 24एन्देरगेका, बिजली एकासे मेर्ख़ा ही ओन कोड़ा ती आ कोड़ा गूटी लौकारनुम बिलची, अदिन आलर ऎरनर, अन्नेम मनवा ख़द्दन ऎन हूँ एंग्है उल्ला नू ऎथ्र'ओन। 25लिकिन अदहीन्ती मुन्द मनवा ख़द्दन एंगा गे बग्गे खिलपत चॊदना मनो अरा ई परिया ता आलर ती ऎन हींड़र'ओन। 26अरा एकन्ने नूहसी बेड़ा नू मंजा अन्नेम मनवा ख़द्दन एंगा बरना बेड़ा नू हूँ मनो।#उत्प 6:5-8 27नूहस कोहाँ डोंगा नू कोरना गूटी आलर ओंडर, मोक्खर, बेंज्रर, बिंजियर। ख़ने कोहाँ बहड़ी बरचा अरा ओर्मारिन नठाबाचा।#उत्प 7:6-24 28ईद लॊथसी बेड़ा नू एकन्ने मंजा अन्ने मनो। आलर ओंडर, मोक्खर, खिन्दियर पिटियर अरा मन्न मास इद्दर अरा एड़पा कमचर।#उत्प 18:20—19:2 29लिकिन लॊथस तंग्है एड़पातर गने सोदोम ती उरखस अउलम मेर्ख़ा ती चिच्ची अरा धूप पोस्सा अरा आर ओर्मारिन नटाबाचा। 30अन्नेम मनवा ख़द्दन एंगा बरना उल्ला हूँ मनो।
31अउला नॆ मेसगा मइय्याँ र'ओस, आस तंग्है जिनिस एड़पा नू र'ई ब'अरकी आस अदिन हो'आ गे अम्बोस एत्ता। अरा अन्नेम ख़ल्ल नू र'उस ख़ॊख़ा अम्बोस किर्रा, असलेक ती बोंगोस।#मत्ता 24:17,18; मर 13:15,16 32लॊथस तंग्आलिन सुरता नना का आद इकला किर्रे ईरिया।#उत्प 19:26 33नॆ तंग्है उज्जनन तंगा गे बने बछाब'अरकी उइय्या गे बेद्ददस आस धर्मेस गने जनमजुग ही उज्जनन एबस'ओस। अरा नॆ तंग्है उज्जनन चि'ओस आस धर्मेस गने जनमजुग ही उज्जनन ख़क्खोस।#मत्ता 10:39; 16:25; मर 8:35; लूक 9:24; यॊ 12:25 34ऎन निमन ब'अदन, एंग्है बरना उल्ला माख़ा इरिब आलर ओन्टा खटी नू ख़न्द्र'अत र'ओर, ओर्त होर'ओस ओर्त अम्बर'ओस। 35अन्नेम इरिब मुक्कर संगेम जता किन्द्र'आते र'ओर, ओर्त होर'ओ ओर्त अम्बर'ओ। 36[इरिब आलर ख़ल्ल नू र'ओर, ओर्त होर'ओस ओर्त अम्बर'ओस।”]#17:36 जोक्को ख़ेक्खा ता लिख्रका पच्चा पुथी गुट्ठी नू ईद जोड़रकी र'ई।
37चेलर येसुसिन मेंजर, “अना उर्बायो, ईद एक्सन मनो?” ख़ने येसुस आनाकिर्ताचस, “एक्सन मरी र'ई, असन गिद्हा गुट्ठी खुंड़र'ई। अन्नेम एसन पाप र'ई असन दंडे बर'ओ”
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.