लूकस 16
16
लूरगर ईरु-ख़ूजुसी जोक्खा ख़ीरी
1फिन येसुस तंग्है चेलारिन ई जोक्खा ख़ीरिन हूँ बाचस, “ओन्टा उरुब आलस रहचस, आसी ओर्त ईरु-ख़ूजू रहचस। अरा आलर उरुबस गुसन कालरकी आ ईरु-खूजू मइय्याँ बदी ठेकाबाचर का आस निंग्है खुर्जिन बुड़ाब'आ चि'आलदस। 2ख़ने आस आसिन मीख़ियस ती बाचस, ‘नीन एंग्है खुर्जिन नठाब'आलदस ब'अरकी निंग्है पत्त नू मेंजकादन, निंग्है नलख ही लेखा चि'आ, नीन ख़ॊख़ा एंग्है ईरु-ख़ूजू मल र'ओय।’ 3ख़ने आ ईरु-ख़ूजुस तंग्है ती बाचस, ‘ऎन एन्देर ननोन? एंग्है उर्बस गा एंगन ईरु-ख़ूजू नलख ती ओथ्र'आ लगदस। एंगा गा ख़ज्ज अरख़ा गे पया मल्ला, अरा तेम्बा गे हूँ लजरदन। 4ऎन अक्कु अक्कन का ऎन एन्देर ननोन, आस एंगन ईरु-ख़ूजू नलख ती ओथ्रना चि'अना ही ख़ॊख़ा हूँ आलर एंगन तम्है एड़पा नू परघ'ओर।’
5ख़ने आस तंग्है उर्बासी नहड़ा होच्चका आलारिन ओर्त ओर्त मीख़ियस। अरा मुन्दतासिन बाचस, ‘नीन एंग्है उर्बासी एका बग्गे नहड़ा मोक्कादय?’ 6आस बाचस, ‘सौ मन जैतून इसुंग।’ आस आसिन बाचस, ‘निंग्है खता ओन्द्र'आ अरा ओक्का ती चाँड़हे पचास लिख'आ।’ 7फिन आस नन्नासिन बाचस, ‘नीन एका बग्गे नहड़ा मोक्कादय?’ आस बाचस, ‘सौ मन गंहू।’ आस आसिन बाचस, ‘निंग्है खता ओन्द्र'आ अरा अस्सी लिख'आ।’
8ख़ने उर्बस मलदौ ईरु-ख़ूजुसी लूर आबोन ईरियस ती आसिन सहरारस। एन्ने ई परिया ता मल पत्त'ऊ आलर गा तम्है आलर मदहे नू धर्मेसी राजी गे जॊगे आलर ती लूरगर र'अनर। 9अरा ऎन निमन ब'अदन, ख़ॆख़ेल ही खुर्जी ती निमा संगेरिन कम'आ, एन्देरगेका एकाबारी खुर्जी निम्है ती अम्बर'ओ, होले ईर निमन जनमजुग ता एड़पा गुट्ठी नू परघ'ओर। 10एकास जुक्की नू पत्त'अना जॊगे र'अस आस बग्गे नू हूँ पत्त'अना जॊगे र'अस, अरा एकास जुक्की नू उजगो मल र'अदस आस बग्गे नू हूँ उजगो मल र'अदस। 11औंगे नीम ख़ॆख़ेल ता खुर्जी नू पत्त'अना जॊगे मल र'अदर होले नॆ निमन मेर्ख़ा ता मानिम खुर्जी नू पत्त'ओर? 12अरा नन्नर ही जिनिस गुट्ठी नू नीम पत्त'अना जॊगे मल मन्दर होले एकाद निम्है र'ई अदिन निमा नॆ चि'ओ? 13एका जॊंख़स हूँ ऎंड़ उर्बर ही सुसर नना पोलदस। आस गा ओर्तासिन हींड़'ओस अरा नन्नासिन चोन्हा ननोस, महले ओर्तस गने मेस्रका र'ओस अरा नन्नासिन ख़ाँड़'ओस। ई लेक्खम नीम धर्मेसी अरा ख़ॆख़ेल ता खुर्जी ही सुसर नना पोलदर।”
धर्मेसी पॆसका मल बदलर'ओ
(मत्ता 11:12,13; 5:31,32; मर 10:11,12)
14फरिसीर नॆ ढिबा ही चिबाख़ार'ऊ रहचर, आर इबड़ा कत्थन मेंजर ती येसुसिन भेसड़'आ हेलरर। 15ख़ने आस आरिन बाचस, “नीम आलर ही ऎरना नू गा दौ ऎथ्रदर, लिकिन धर्मेस निम्है जिया ता कत्थन अख़दस। एकाद आलर ही ऎरना नू कोहाँ र'ई आद धर्मेसी ऎरना नू ख़ाँड़ना र'ई।
16मूसासी पॆसका अरा धर्मेसी कत्था तिंगुर ही कत्था गुट्ठी यॊहन नूड़रत'उसी बरना गूटी तेंगरा। आ बेड़ा ती धर्मेसी राजी ही दौ कत्था तेंगर'आ लगी, अरा ओर्मर कोड़हे चिहुट ती अइय्या कोरनर।#मत्ता 11:12,13 17लिकिन मेर्ख़ा दरा ख़ॆख़ेल ही टाड़रना काना धर्मसी पॆसका ही ओन्टा कड़ी ही बदलारना ती सेब्बा र'ई।#मत्ता 5:18 18नीकइम तंग्आलिन अम्बदस ती नन्ना बेंज्रदस, आस नन्ना आली गुसन काना ही पाप नन्दस। अरा एकास अम्बरका आलिन बेंज्रदस आस हूँ नन्ना आली गुसन काना ही पाप नन्दस।#मत्ता 5:32; 1कोरि 7:10,11
उरुब आलस अरा कीड़ा लाजरस
19ओर्त उरुब आलस रहचस। आस लेपलेप अरा बग्गे दामी किचरी गुट्ठिन अत्तालियस ती उर्मी उल्ला सुख-सौंरत गने उज्जालियस। 20अरा लाजरस नामे ओन्टा कीड़ा आलस खसरा ती लिन्डरका ती आ उरुब आलासी चाली बली गुसन बिड़रका र'आ लगियस। 21अरा आस उरुब आलासी टिबुल ती खत्रका जुट्टा कट्ठा ती तंग्है कूलन उड़त'आ बेद्दालियस। अरा अल्ला गुट्ठी बर'आ ती आसी खसरा गुट्ठिन टाटालगिया। 22फिन आ कीड़ा आलस केच्चस केरस अरा मेर्ख़ा पैकर आसिन होच्चर ती अब्राहमसी कोरा नू ओकताचर। अरा आ उरुब आलस हूँ केच्चस अरा आसिन मंडियर। 23अरा आस चिच्ची गड्डी नू कलपारनुम मॆन ईरयस। ख़ने गेच्छान्ती अब्राहमसी कोरा नू लाजरसिन ईरयस। 24ख़ने आस चिच्चियारस ती बाचस, ‘अना बंग अब्राहम, एंगन सोग्गे ऎरा, अरा लाजरसिन तइय्या चि'आ का आस तंग्है अंगलिन अम्म नू बोथारकी एंग्है ततख़न कीरत'ओस, एन्देरगेका ऎन ई चिच्ची नू कलपार'आ लगदन।’ 25लिकिन अब्राहमस बाचस, ‘अना ख़द्द, सुरता नना नीन निंग्है उज्जना ही बेड़ा नू निंग्है दौ जिनिसन ख़क्खा चुकुरकय, अन्नेम लाजरस मलदौ जिनिसन ख़क्खियस। लिकिन अक्कुन आस इसन जिया सालना ख़क्खालदस अरा नीन गा कलपार'आ लगदय। 26ईद लेका मला, निंग्है अरा एंग्है मझी नू ख़ोड़ख़ा ख़ैड़ र'ई। औंगे नॆ हूँ इसलेक ती असन कट्टा बेद्दोर आर पोल्लोर काला, अरा असलेक ती इसन बर'आ बेद्दोर आर पोललोर बर'आ।’ 27ख़ने आस बाचस, ‘होले अना बंग, ऎन निंगन गोहरारदन का नीन लाजरसिन एंग्है बंगासी एड़पा तइय्या। 28एन्देरगेका एंग्है पांच भईर र'अनर, लाजरस आरिन तिगाब'ओस। एन्ने अम्बन मना का आर हूँ ई कलपारना अड्डा नू बर'ओर।’ 29लिकिन अब्राहमस आसिन बाचस, ‘आर गुसन गा मूसासी पॆसका अरा धर्मेसी कत्था तिंगुर ही पुथी गुट्ठी र'ई, अय्या ती आर मेन्नर नेकअन।’ 30अरा आ उरुब आलस बाचस, ‘अन्ने मला, बबा अब्राहम, लिकिन केच्कर ती नीकईम आर गुसन क'ओर होले, आर जियन किर्त'ओर।’ 31लिकिन अब्राहमस आसिन बाचस, ‘मूसासी पॆसका अरा धर्मेसी कत्था तिंगुर ही पुथी गुट्ठिन मल मेनोर होले, नीकइम केचका ती उज्जा चो'ओस ती आरिन तेंगोस होले हूँ आसिन मल मेनोर।’”
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.