Lukka 11
11
Yeesu ghoanaal buuneeda mooshta Aseetta
(Mat 6:9-13; 7:7-11)
1Eaweechcha ghamwaash Yeesu Aseetta, ama ahiit goobearsa ginealaneanagi bea jeeda ginealangaaschi nea gwayeeshsha, “Ng'uttamiida, anaaleasa mooshta Aseetta gawuurji gidanaalda Yohaana ginealangaaschi.” 2Gwayeeshsha saawa, “Iyoamwaashchchi Aseetta goyeennyi,
‘Ghweandeanya gheawungaagu nung' eakghaambiida.
Nung' ghwahidu sugoochcheandumeadaang'u.
3Goaneasa daghwardeanya galeagasean;
4samseasa riing'eagaasa, gawuurji gidasisammiisiindi
siida mideawa sileedeanya; ak ea adiigalleassa jeeda simsimda.’”
5Gwayeeshsha saawa, “Gajeang'eaha aba jeedeang'wa mideawa siittuupchi, jea gaweesa bugusteaweeda ak gwayeeshsha, ‘Siideaduupcheewi, nung' dalaajaneey mukkaattaji samwagu; 6aba gideaba nihissean siidi eaduupcheewi ak ea meandeawani gichchea dayiin mwadeadaannyi;’ 7ak gaygwaayeeshsha siitta mida gahiin, ‘Adiideawiichchean, sijapchi gidaghuut ak ea sililli sea diibigeasu, mwammuusi dang'eat dagoonnyi gil?’ 8Geayeeshshineegwa, mayghang'eat ghoadaw gil earappeadooda duupchiin ak gayghang'eat ghoadayda halanjeasean gasa siisi aba gideaba mabuurnana giidiktiksiinda musooda. 9Ak geayeeshshineegwa, amusischcheena ak Gajeegooneegwa; agassa, ak gajadaaha; agulgula gidaghuut, ak gajejeasseegwa. 10Aba gideaba siida wassean musiischi gajeattaw, nea siida gaseadayyi gayghwadaa, nea siida gulgul gidaghuut gajeejeassa. 11Gajea ana ghwaani, aba jeedeang'wa ama mus balleandaannyi ghweayeanda, ghoadaw ichchibooda; 12ghana iimus burung'nyeanda jea ghoadaw udagilba? 13Agooga fuga munyas, iyoanaldunu gichchea oattawda diibigeagwa haleanjeeda miyaas, abeeda Ghweandeang'wa mida humng'eeda mwanala muuchchi ghoadawda Gurorooda Ghaydiit fukka musa ninyiin!”
Yeesu ea Beelsebuuli
(Mat 12:22-30; Mark 3:20-27)
14Hean goruutta meangeenda manda ghuutta; damanda ritteawa meangeenda, deagheatta gabalool siitta manda ghuuttean, ak ghahamng'eanyi buuneeda. 15Hean gwayi buuneeda mwaatkwa, “Gooruutta meangeenda aba uurda Belsebuuli, meangeenda diitta hawiin;” 16nea Mwaatkwa, gwasimsim, nea geegasa ghoahiimda gwadeagooda leabu humng'eeda. 17Nal gidabaloola jeesinga nyaawa, gwayeeshsha saawa, “Iing'uchchi sugoochcheanduumeemba ng'anyiinagi abeeda sugoochcheandumeeni ea maygahuuweada, nea gheeda dardaawaat gayghoabeada. 18Ak eara Shattaani ibalaksa ak gang'uchchi geaw, abeeda sugoochcheandumeedaannyi gaygamajeegiittaan? Ak goorukuttaydiin gideaba aniini gearuutti meangeenda aba uurda Belseebuuli? 19Ama iyearuutti meangeenda aba uurda Belsebuuli, diibigeagwa goruuttiideawa ng'eaha? Aba sareani gaygoorgweakseegwa fugeagwa. 20Ama iyearuutti meangeenda aba uurda Aseetta abeeda ghoanalli gideaba sugoochcheandumeeda Aseetta nihissegwa. 21Gheeda ng'edeeda hoauur, biissa gwandeawa dabitta, iifur gheannyi, halanjeadaannyi sean gaygaba hoyyoo; 22ak geaghus iiweesa siida burdeawa uurda ak ghabwar ea ghwajoar, abeeda gayghoareat dabittaannyi sean bea ng'uchcheeda, ak gwalakkiisa fugaaschi. 23Siida meandeayeewani washteanyu gil, nea dea meaweamuudayeewani goodearriida.
Biiknooda Meang'nyeandeenda muy
(Mat 12:43-45)
24“Meang'nyeandeenda iiritteawa siida gwaneaydooschi aba ng'eanyiida manda beega gagaseada heechchea gafuufa; raay gwayi, ‘Gaydabiiksa gheenyu ealeabu.’ 25Iihitta ghwadaa nea siippuus ak ea sittamdaam. 26Iidaaktunu gayghamwaghaada meangeenda ispwa munyasseewa niny muuchchi, ak gaweay goobiida jeedida; ak giibindeaba siitta gajeamuy ea ghwanaawa diitta ghayi bea mwadiin.”
Hoseaneega huumwa
27Damandida duuw gabaloolean, ghwajaat ghuut gatmu aba jeedeaba emeetta nea gwayeeshsha, “Ghang'wana jeeda jiilneey ea gidinga ireeri!” 28Hean gwayeeshsha, “Ghang'wana fukka iiy ng'asheega Aseetta nea ghoang'waayiin!”
Gassooda ng'asheega deamdeameadi
(Mat 12:38-42)
29Iiduw nea nibassa geat emeettuw, gwayeeshsha, “Jeachcheeng'su jeachcheenga munyas gil; gaseadayi gwadeagooda ak ea manda gwadeagooda, jea ehhiimsa geaghus gwadeagooda ghayi bea Yoona. 30Gida ghayi waseatta Yoona gwadeagooda aba heeda fuga Ninawi, ea gichchea ghoawaatta Balleanda Siida gil aba jeachcheeng'su. 31Gatmooda was sugoochcheanda leabu Wilooda ng'eanyiida biyeara gayghwahidu eaweeda jea ergweaksiina fugeaba jeachcheeng'su ak gaygoorgweaksa; niny gwaleabu heeshsheagi ak ghwaan goleeysiit weaghumeeda Sulemaani, nea hiji ging'ulayi, gwanda dea haweewa Sulemaani. 32Gay ghapka fuga Ninawi eaweeda girgweaksiindeaba jeachcheeng'su ak gaygoorgweaksa; nea gwaduukkuuna ng'asheega iiyiiy ng'asheega rukkwiisa Yoona, nea ging'ulayi, aba hiji gwanda dea haweewa Yoona.
Gheaboong'nyeanda saseeda
(Mat 5:15; 16:22-23)
33“Manda siida jea ghoayeat gheaboong'nyeanda ak ghwayiin heeda funyaat ghana gwadukteawa dahuuda, iissa geayiin uhuuda ghamarda ak abeeda fuga buwa gah gayghwadaa weeshinda. 34Gheaboong'nyeanda saseeda gheang'da; gheang'daang'u iimiy abeeda eara saseadaang'u gaygwanda heedeesh; ama abeeda amasnu, abeeda saseadaang'u gwanda jeeda misaneeda. 35Asi amilmiliitta adiiduw ghoaw weeshinda mida jeadaang'u misaneeda. 36Asi saseadaang'u sean iimida weeshinda nea manda hiji misana, gaygaweeshiit saseadaang'u sean, gawuurji gilabwaanyi gheaboong'nyeanda aba weeshindaannyi.”
Yeesu ghoahaakta Farisayajeega ea ginealshoodiga deaweeda
(Mat 22:1-36; Mark 12:38-40)
37Damani duugabaloolean, gaguursa siyagi was Farisaayu ghwahidu gheannyi gweagiischi, gawa ak gweagiischi. 38Ghahamng'eanyi Farisayajeandida iidaa gweagiischi nea miigoohuun geadi. 39Gwayeeshsha Ng'uttamiida niny, “Agooga Farisayajeega iissa gohhuunnyi badayda bayookta ea dea gweeriida, nea jeesinngeagwa ghwannyiit mareanghumeeda ea munyinnda. 40Fuga dasheahi! Dea sin gea jarooda miidea sin eara geaba jihii? 41Asi oattawa haleanjeeda sisappa geadi bea ghadoweeda bea jih; abeeda gayghammiidu haleanjeessean aba heedeang'wa. 42Asi Farisayajeega ashageada! Agooga aba gideaba ghoattaydi aba jeeda gilattamanamughuush bea haleanjeedeang'wa iissa ghoattaydi akkaleala, aba seenga hamuumayga ea sooktayda ea seenga suuk bea nyeanyiida, nea ghoanung'waadi ng'asheega doobiiweadi ea bariinyeega Aseetta; ng'asheesu gammiiseegwa sinooda, nea maroosseegwa ng'asheega suurja. 43Farisayajeega ashageada! aba gideaba ghoabwariinyi oppitpiidana horgajeega madeeda aba jeeda gealga sinnealshachcheewa nea geekkeattooscheeweegwa aba naada. 44Ashageada! Aba gideaba nowuurjeewi bung'eadinga mwadaajiida, sik badahuukka buuneeda nea mwanala.”
45Ghwasha siyagi aba diinagoodiga ak gwayeeshsha, “Ginealshoochcheanda, iininyaashtunu ea ning'eawweasa eara aseasa.” 46Hean gwayeeshsha, “Eara agooga diinagoodiga ashageada! Aba gideaba goossareenayi buuneeda sareenda meammu easaar, nea agooga ea mwoasadi sareeni eara aba monneenagi. 47Ashageada! Aba gideaba goosnayi bung'eedinga sibanga nea ghweanigeagwa ea fuga ghayi nuus gil. 48Nea agooga gowoschi muushoodiga gideaba ghoamwaschi gadiyeeda ghweanigeagwa, aba gideaba saawa gwanuus, ak goosinnyi agooga bung'eadinga nyaawa. 49Ak gwayi weaghuumeeda Aseetta, ‘Gaydeajeakta sibanga ea giijasoodiga ak gaygwanuuseada mwatkwa nea geesawan,’ 50nea foojeanda sibanga sean, geahhiida ghang'eada dea sisna sindeetta ng'eanyiida, ak gajeegasa aba heedeaba jeachcheeng'su, 51ghang'eada gihiideayda foojeanda Habiili ea gagul foojeanda Sakkariya, ghayi sinuuksa dageascheeda heeda wagiida ea heeda Ghaydiit. Asi humwa gil geayeeshshineegwa, gajeegasa aba heedeaba jeachcheeng'su. 52Diinagoodiga ashageada! Aba gideaba nogeandi gissittinna gidaghuutta fughareeda, nea agooga ea miyooweayeena gah, nea fuga weay gah eanoakghuumnyi.” 53Iiduw nea ghabeawa hoowa, gwaneaweesa muuchchi ng'oorshoodiga ea Farisayajeega ak geasassat nea geennyeari ng'asheega saang'a, 54geebassa nea geegasa ng'asheanda ramwasaat jea gwaleabu ghuuttaanyi.
Datooga New Testament © Bible Society of Tanzania, 2009.