Lukka 10
10
Yeesu goojeakta fii laadam ea damanamughuush
1Ng'atta ng'asheesu ghwaloat Ng'uttamiida fii suuk laadam ea damanamughuush, ak goojeakta gabadiinna iyyeenya, goosheedeawa niny, gaweay gil nyoo ea mujiini gil ea heeda wassean gasa niny gawa. 2Gwayeeshsha saawa, “Booga asaang'a ak ea ng'ay fuga gadiyeeda, amwaasha Ng'uttamiida bea booga goojeakta buuneeda jea ghwalach boagaaschi. 3Asi aweayeena; nea gong'ulayi aba gideaba geajeakteaydaneegwa dayeega gisilga jeeda suyeekka. 4Adiiduw ghoayaadi geadi shageeda, ghana sandakwajeanda, ghana geekka; nea adoakkeachcheewi siida aba naweeda. 5Nea gheeda wassean oweayi jeeda gidameeda ayeena, ‘Daba gheawi hoyyoo!’ 6Abeeda iimida balleanda hoyyoo hoowa, gayghwanyas hoyyooydeang'wa; ama mandana, abeeda gaygabikseegwa. 7Ak goopiidi gheawi, ak gooyeagiischi nea ghoaleayi gissugooneegwa, aba gideaba siida gadiiyi gahaguuw gidageattindaannyi; adooritteawi gheawi ak gooweay ghaaw nuut. 8Iyoahitti mujiineeda wassean sideaptaneegwa, ayaaga gissugooneegwa; 9oahhaabwa fuga miyean mida jeedida nea goorukusi fugiga gideaba, ‘Sugoochcheandumeeda Aseetta nineekkiiseegwa.’ 10Nea aba mujiineeda oweayi sean ak ea mwadeaptaneegwa, goosikchi naweadingaschi nea gooyeennyi, 11‘eara birjeanda mujiineedeang'wa noas geashangaasa geelalaksi iheengeagwa; ak gobiissi anala gideaba sugoochcheandumeeda Aseetta nineekiit.’ 12Gaydayeeshshineegwa, gayghoammu ghamilikghta muuchchi Sodooma eaweettida ea ghang'al mujiineetta.”
Mujiinajeega mandeawana masaweega
(Mat 11:20-24)
13“Shageada, Gorasiini! Shageada, Betsayda! Aba gideaba deamdeamanga ghayi sisin aba heedeang'wa inyeeda ghayi geesin aba Diro ea Sidon, gajea goolla gwaduukkuuna nea gookkwa guniyajeega ak goobiitpiida deareeda. 14Nea abeeda ghayghoammu ghamilikghta girgweaksiinda Diro ea Sidooni ea ghang'aleagwa. 15Nea ang'iing'i Gapernaumu, gigaasayi adiing'da geaw ea hiitta humng'eeda? Gajeahiing'daneay ea hitta uutta ng'eanyiida.” 16“Siida aleeyseegwa iit, gooleeysean iit aniini, nea dea heawaneegwa, ghaheawanaan aniini, nea dea heawanaan ghaheawa dea ghayi ajeakneani.”
Biiknooda Fuga alaadam ea damanamughuush
17Gabiigu Fuga alladam ea damanamughuush nea gahoosan, nea gwayeena, “Ng'uttamiida, eara meangeenda ghoawal ghaanyangaasa aba ghaawungaagu!” 18Gwayeeshsha saawa, “Ghadahaannyi Shattaani nea ghang'adaana humng'eeda gawuurji dadamandeeda. 19Asi ang'ulla, neagonnyeegwa gheambalmeeda jea oolleapsiinana ng'eanyi ichchipkeega ea udagilbajeega, ea uurda jea oopalana weajoochcheanda; nea manda gichchea gwahisseegwa. 20Asi adiidu gohoosannyi aba gidawalda gheang'deagwa meangeenda, ahoosana aba gideaba sung'waar gheawungeagwa aba humng'eeda.”
Hooseaneega Yeesu
(Mat 11:25-27; 13:16-17)
21Aba damandida gohoosan Gurorooda Ghaydiit ak gwayi, “Geabadischooweey Bwaabwa, Ng'uttamiida bea humng'eeda ea ng'eanyiida, aba gideaba gifnyi ng'asheesu fuga mideawa weaghumeeda ea gea mideawa fughareenga ak giihiimsi diibiga manang'i; Asaha Bwaabwa, ada gida igassiidi gil. 22Haleanjeassean nugoonan Bwaabwa; ak ea manda siinnal Balleanda geaghus Bwaabwa, ak ea manda siinnal Bwaabwa geaghus Balleanda ea siida wassean gasa Balleanda goohiimsa.” 23Gwayamsageaw ginealangaaschi ak goobalool aba makchcheameeda nea gwayeeshsha, “Ghang'wana gheanyanga daa ng'asheega oadaayi agooga! 24Aba gideaba geayeeshshineegwa, sibanga ea sugoodiga ghayi gagasa ghwadaa ng'asheesu oadaayiin ak ea mwadaaha, nea gagasa ghwayiiy gea oayiinyi ak amwayiinya.”
Gissigala siida miy bea Samariya
25Hean ghamiinaada diinagiida ak gwasimsim nea gwayeeshsha, “Ginealshoochcheanda, gay dasin naaha iijaadanyas eaweega manda muudeanooda?” 26Gwayeeshsha niny, “Geang'waar naaha aba jeeda deaweeda? heappi gissoamwandiin?” 27Ghwasha nea gwayeeshsha, “Bwariinya Aseetta was Ng'uttamiidaang'u aba guroroadaang'u sean, ea aba jeadaang'u sean, ea aba uurdaang'u sean, ea aba fughareadaang'u sean; ea giischeewoochchandaang'u gawuurji gida ibwariiydi geaw.” 28Gwayeeshsha niny, “Asi girgu huumwa; una sina ng'asheesu, abeeda gaynyasa giibinda.” 29Hean gagasa ghoahiimda doobiiwnattaannyi ak gwayeeshsha Yeesu, “Neada giischeewoochcheandeanyu ea ng'eaha?.” 30Ghwasha Yeesu nea gwayeeshsha, “Ghayi ghwararang'aana sih Yerusaleemu nea gawa Yerikko, ak goobissa geattinga mareanghooga, ak geareat hang'weakka nea geabwar, ak gaweay nea gwanung'usa heeda nea niriikghta ghami. 31Aba gheamamda ghwararang'aana naweedida ashoohoochcheanda dineeda Yahuudi; daa siidida ghwasajaadawa, 32eara siispa Laawi was bareannyeanda gweadu naweeda, ama hiitta howeani ghwadaa ak ghwasajaada. 33Ghwahidu siispa Samariya was bareannyeanda, gweadu naweeda ama hiitta hoowa mida siididean; ghwadaa ak ghabwayda, 34gaweesa ak ghwayeasha deanneaduutka nagheeda nea ghwayiin difaay ak ghwarat ama hiit gooding'da badayda digeeda ak ghwaat ea ghoahiitta gheeda roochcha rabasta ak ghoarear. 35Iimuchchu gageanu lappiyeeda suguura dinari iyyeenya ak ghoadaw siida bea gheeda ak gwayeeshsha, ‘Areara siisi, ama shoada gil aba gireerda, abeeda gaydannyiit iyeabiigu.’ 36Iing'ulayi heappi aba jeedeaba fiisu assamwaguun, giischeewoochcheandeaba siisi abissa geattinga mareanghoogean anneeda?.” 37Gwayeeshsha, “Dea ghwanyawa bwayda gil.” Gwayeeshsha Yeesu niny, “Eara ang'iing'i una ak gisindunu.”
Yeesu gabareassa Marta ea Mariya
38Iiduw nea gudeenda naweeda, gaweay ak ghwahitta jeemba gharang'i, mida gatmooni suguura Marta, ghwadeapta ak ghwaat Yeesu gheanyi. 39Abeeda gwanda hutpa ghaamwat suguura Mariya, apteada aba madeeda Yeesu nea gooleeysiit ginealshoadaanyi. 40Nea abeeda gwadeawiit Marta muuchchi aba gadiyoojiga saang'a; gaweesa niny ak gwayeeshsha, “Ng'uttamiida miduuppi gideaba ghwanung'wanaan hudiyya gadiyeeda nea gabwageawi? Rukusiina ghwaan ghaweadan. 41Ghwasha Ng'uttamiida nea gwayeeshsha, Marta, Marta gihashi nea gideawiidi aba ng'asheega saang'a; 42gidasigasa aagi akghwahit. Mariya aniloat gidamiy mwajeammu eegeandeawa.”
Datooga New Testament © Bible Society of Tanzania, 2009.