Luka 17
17
Fikwakwaliso
(Mat 18:6-7,21-22; Mlk 9:42)
1Yesu hakawatamila awefusa wakwe, “Amagesa ku uwihi chawelu gokwija, ninga usungu wakwe iyakugagolosa geje! 2Haimwagila imunhu yuya nhanga yohigwe diwe dyo kusagila musingo yakwe na kugumigwa mubahali, kusuma kumwagilisa yumwedu wa wano wadodogi ku uwihi. 3Kilangisiseni, Nghona imunduguso kagolosa wihi mugombele, na yanghalamba mulekelele. 4Na iyakugolosela uwihi mikangha mufungate kwa ijuwa na kuya ukwako mikangha mufungate, na kugamba Nilamba, mulekelele.”
Dihuwi
5Awefusa hawamutamila iMundewa, “Chongesele dihuwi.” 6Na iMundewa kagamba, “Nhanga mowile na ihuwi ikefu fina imhule ye umheja, hamuwa mukudaha kuutamila umukuyu, ‘Uno ng'oka, ukahandwe mubahali,’ nawo hauwa ukufumila.”
Umulimo we mutogomi
7“No nani ukwenu yena imutogomi yekulima ama kudima ngholo, yakumugamba foyekuya kumugunda, ‘Wija chimwande, ikala udiye chakudiya?’ 8Togola! Nghemugamba, ‘Nyambikile chakudiya, ukiyohe unitogomele, mpaka nidiye na kunywa; noho nagwe udiye na kunywa.’ 9Togola, komugamba kwimage imutumwa yuya kosoko kagolosa goyalagisigwe? 10No nheifo na nyeye fomukufulusa kugolosa gose gomulagiswe, gambeni, ‘Aseye cha watogomi wechaka chambusi; chigolosa du yowile milimo yetu.’”
Yesu yakuwahonya wanhu ikumi wena ukoma
11Foyejayowa munjila kuluta Yelusalemu, yeja yapulutila Samalia na Galilaya. 12Na foyengilage muchijiji hakatang'anyila na wakoma ikumi, wemile hatali, 13hawenula majwi gawo na kugamba, “Yesu, Mundewa, uchonele ubasi.”
14Foyawonile yawagamba, “Mulute mukayonese kwa watambiki.” Na fowalutage hawahona. 15Kahi yumwedu wawo yakone fina kahona, hakoya kunyuma, yakumutunya Mulungu kwa dijwi ikulu, 16na hakakubita hamigulu ya Yesu, na kumwingha ilumbo. Naye hakowa Musamalia. 17Ninga Yesu hakagamba, “Siwahonyile ikumi? Awaya ikenda wowahe? 18Nghoneke yungi yowile na kumutunya Mulungu ninga imugeni ayu?” 19Hoyomugamba, “Inuka ulute, dihuwi dyako dikuhonya.”
Kwija kwa undewa wa Mulungu
(Mat 24:23-28,37-41)
20Foyosigwe na Mafalisayo, “Undewa we Mulungu ukwija milaki?” hakawabidula, “Undewa we Mulungu usikwija ne fitangilo fikiyonesa. 21Na hechaka munhu yegamba, ‘Langa auno hano,’ ama, ‘Auya.’ Kosoko langa, undewa wa Mulungu uwa mugati yenu.”
22Na kawatamila wefusa wakwe, “Majuwa gokwija, ugele womukamusulumila kona ijuwa dimwedu dye mwana we munhu, na musidyona.” 23Nawo wowatamila, “Langa kuya, ama langa kuno, munghalute,” kahi munghawandamile. 24Kosoko fina ulumwemwe foukumulika na kwasa ulanga kulawa ulwandi umwedu mpaka umonga, no nheifo Imwana we Munhu foyekuwa mwijuwa didyo. 25Ninga, kunghonga ikuhanangigwa yapate magayo mengi na kulemigwa ne wanhu wo ugele uwo. 26Fina foyowile mumajuwa ga Nuhu, no foikwija ikuwa mumajuwa ge Mwana we munhu 27Wanhu wendawodiya, wendawokunywa, wendawetola, wendawetoligwa mpaka dijuwa diya Nuhu dyoyengila musafina, na mafaluko hogekwija na kuwakoma wose.
28Kahi fina foyowa mumajuwa ga Lutu, wendawodiya, wendawekunywa, wendawogula na kwambasa finhu, wendawohanda, wendawojenga, 29ninga mwijuwa diya Lutu foyaleuke kulawa Sodoma homutonya moto kulawa kulanga na kuwalakasa wose. 30No nheifo foikwija ikuwa mwijuwa diya iMwana we munhu foyekwija yekiyonesa.
31“Mwijuwa didyo, iyowile munyumba muchanhya ne finhu fyakwe kugati yanghahulumuke na kufilonda; na nheifiya, yowile kumugunda yanghoye kunyuma. 32Gelegeleni dyalawanise kwe muke wa Lutu. 33Wowose yakuhananga kuchihonya ichidoga chakwe yakuchagilisa; na yoyose yakuchagilisa chidoga chakwe yakuchihonya. 34Nikumutamilani, muchilo chiya hokuwa na wanhu weli wagonile mwisasi, dimwedu, yumwedu kalondigwa na yumwedu kolekigwa. 35Wanawake weli wokuwa wakusaga hamwedu; yumwedu kolondigwa na yumonga kolekigwa. 36Wanhu weli wokuwa kumugunda; yumwedu kolondigwa na yumonga kolekigwa.” 37Baho howomwusa, Hoki Mundewa? Hakagamba, “Howuwile umufimba noho sikitang'anyila sinumba.”
Kaguru New Testament © Bible Society of Tanzania, 2008.