Wambeela 28
28
1Ezaaki ahimwiithanihaga Yakobo, ahimureelihaga, ahimulamulaga, wiira: <<Kumuteleve mwihiyana a oKanani.#28.1 Nluwa na Abarahamu, Harani, naali oPadani-Aramu (musewasewa wa oHarani). 2Odhowe oPadani-Aramu, wa Betuweli, amaayo babiiwa wamusakule mmohi mwa ahima a murogoriye Labani wi omutele oyene. 3Mulugu oowodha-wodha ooreelihe, oovahe ahima ajinji wi mwa we mukume malogo majinji. 4Mareeliho yaroromelihiwe ovahiwa Abarahamu ekale mwa we ni mwa anaawo. Elabo elena oliiwemo namadha, ekale yaawo. Si elena Mulugu emvahiliiye Abarahamu>>.
5Vevale Ezaaki ahimpaganyaga Yakobo. Oliye odhowaga oPadani-Aramu owaniwa wa Labani, mwaana a Betuweli muAramu, murogora a Rabeka, oyene aali amaaye Yakobo ni Esawu.
Esawu onomutela mwaana a Zhumayili
6Esawu ahinona wi ababe yahimureeliha Yakobo, omuruma oliye oPadani-Aramu wi wewo amusayele oneeriiye amutele. Ahiiwa wi ababe emureelihaga yahimwaaddelaga wi ahimuteleve muKanani. 7Vanoniliiye wi Yakobo ahiiwelela yoowoga ya ababe ni ya amaaye, ahimaruwaga odhowaga oPadani-Aramu, 8vevale Esawu fooniliiye wi ababe kayaafuna ahiyana oKanani. 9Mowindo, ahidhowaga wa Zhumayili, mwaana a Abarahamu, omutela Mahalati, murogora a Nebayoti, mwaana a Zhumayili, omvalaanyana ni ahiyana aaye yanniiyena.#28.9 Esawu vooniliiye wi ahiyana aaye waali ooddilu, ahimutela navili aaye wi aadhivelihe ababe. Yakobo ni Rabeka yahikalana dhoorusa dhijinji vaade mwaha wi kayaakwanihile waasuuziha ahima ohara malamulo ni dila dha Mulugu. Kayaakwanihile odheela mwa madhu naari moofwanafwaniha. Soofuneya mowaakwanela wi naabwinihe ahima eehu mmadhuni a Mulugu, vano teto yeeddege mundila Mwaaye ni osogolo waaye.
Mulugu onowooneyela wa Yakobo oBeteli
10Yakobo ahimaruwaga oBerexeba odhowaga oHarani.#28.10 Olapela wowaakwana makilomeeturu mazana matanu ni maraaru (800). 11Osiguwaga ahifiyaga vamburoni vevale vagoniligiiye. Ahithukulaga nibwe naaligi vevale osameeliha muru waaye, ogonaga. 12Ahirohaga, oonaga sikaadda egeemelihiwe vati ofiya odhulu. Angero a Mulugu yoogwelaga, ekitaga vevale.#28.12 Yooroha enatapulela wi Mulugu ahiiveleela wi akale Mulugu a Yakobo. Nyuba dha malobelo dha mudhidhi olene dhaali dhootaama ni sikaadda dhuulubale ni amilugu odhulu wiwa. Anameebedha yoogwela wi yaweebedhege amilugu amohi wewo odhulu.
13 Nabwiya aaligi odhulu wa sikaadda,#28.13 Odhulu wa sikaadda Naari wi: vakukuuve vaaye. wiira: <<Miyo gili Nabwiya, Mulugu a makolo aawo Abarahamu ni Ezaaki. Ginowuuvaha we ni anaawo elabo ela egoniliiwe. 14Ahima aawo enoodha ekale ajinji wona theya ya vati. Munoodha mmwadheyele dhipaddi dhaatedhene: Wewo onakumela nduwa ni wewo onadhoweliiwa, onakumela pevo ni wewo onadhoweliiwa. Mwa weevo ni anaawo enoodha ereelihiwe malogo maatene a elabo ya vati.
15<<Ebaribareene miyo gili ni weevo, gineerege wuwiing'anela onaadhowigiiwe wi guuwelelihedhe elabo elena. Kagidha guuhiya ofiyedha gaakwanelihe dhuuroromelihiimi>>.#28.15 Mulugu ahimuroromeliha omukameela Yakobo elabo eli yaatene waadhowigiiye. Amilugu amohi Yakobo yaanoniliiye yakalana kopolo mwiilaboni mweewa, baahi. Mulugu a ebaribari eehu kanna voogomela. Dasasanyile elabo yaatene. Oli mburo dhaatedhene. Onowaang'anela dhaatedhene. Ohunona dhaatedhene.
16Yakobo ahirurumuwaga, wiira: <<Ebaribareene Nabwiya, oli mburo olena, mbwenye miyo kaganona!>> 17Oovaga, ahiwogaga, wiira: <<Mburo olena bwa malavi! Vala vaade va Mulugu, ni mulago wa odhulu>>.
18Bebeheene Yakobo ahithukulaga nibwe nasameeligiiye agonaga, wiimesa wona etoonyihedho, ahikuthulelaga makura a mareeliho.#28.18 Orugunusa nibwe ni ohela makura waali mukalelo woomuthikela Mulugu, osasanya mburo wowuubusedha. Mabwe mamohiiwa <<mabwe owuubusa>> ehikalawoove ofiyedha peeno mwaha yaali elemeelelo eneeriwana.
19Yakobo ahithwa niburo ndde ndina nowi Beteli.#28.19 Beteli enatapulela vaade va Mulugu, naari wi nyuba ya Mulugu. Moone teto verisikulu 22. Wale-wale nluwa ndde neethaniwa Luzi.
20Yakobo ahilibelaga vevale, eeraga: <<Eera Mulugu akala ni miyo, agisogolela olenddo waaga, agivaha dhooja, ni dhoowara dhedho dhinafuniimi, 21giwelawo ngali mugumi, gifiya vaade va ababa mmurenddeleni, Nabwiya oneere akale Mulugu aaga.#28.20-21 Mowindo Yakobo ahivolowa mu nipangano ni Mulugu mwa oliyeene. Hiyo vano teto soofuneya niithongele mwa hiyo weekiihu akala Mulugu oneere okala Nabwiya eehu. Kaniroromele nipangano vaari va Mulugu ni abaabi eehu. Soofuneya nikale ahima a Mulugu wa hiyo weekiihu. 22Nibwe nenddi giimesiliimi wona etoonyihedho ya vaade va Mulugu gineerege ovaha yaneekumi ya dhaatedhene dhineerigiiye agivahege>>.
© 2015, Wycliffe Bible Translators, Inc. All rights reserved.