SIEMCHILBU 5
5
Adam suonte khanggui
1 #
Siem. 1.27,28 Tam Adam suonte kigelna laibu ahi. Pasian in mihing asiem niin Pasian bang in ana siem hi. 2#Mat. 19.4; Mak. 10.6Pasal leh numei in amauh asiem a aguolzawl a, amin Adam aphua hi, siem a aum niin. 3Tualeh Adam kum za leh sawmthum ahi in ama tawh kibang ama sunvawt tapa khat anei a, amin Seth ahisah hi. 4Tualeh Seth ahin nua in Adam kum zagiet adam nalai a, tanu tapate anei nalai hi. 5Tuachi’n Adam dam sung zousie kum zakuo leh sawmthum ahia, tuachiin ashi ta hi.
6Tualeh Seth kum za leh nga ahi in, Enosh ahing hi. 7Tualeh Seth in Enosh ahin nua in, kum zagiet leh sagi adam a, tanu tapate ahing nalai hi. 8Tuachi’n Seth dam sung kum zakuo leh sawm leh ni ahia, tuachiin ashi ta hi.
9Tualeh Enosh kum Sawmkuo ahi in, Kenan ahing hi. 10Tualeh Enosh in Kenan ahin nua in, kum zagiet leh sawm leh nga adam a, tanu tapate ahing nalai hi. 11Tuachi’n Enosh dam sung khu kum zakuo leh nga ahia, tuachiin ashita hi.
12Tualeh Kenan kum sawmsagi ahi in, Mahalalel ahing hi.
13Tualeh Kenan in Mahalalel ahin nua in, kum zagiet leh sawmli adam a, tanu tapate ahing nalai hi. 14Tuachi’n Kenan dam sung khu kum zakuo leh sawm khat ahia, tuachiin ashita hi.
15Tualeh Mahalalel kum sawmguh leh nga ahi in, Jared ahing hi. 16Mahalalel in Jared ahin nua in, kum zagiet leh sawmthum adam a, tanu tapate ahing nalai hi. 17Tuachi’n Mahalalel damsung khu kum zagiet sawmkuo leh nga ahia, tuachiin ashita hi.
18Tualeh Jared kum za leh sawmguh leh ni ahi in, Enok ahing hi. 19Tualeh Jared in Enok ahin nua in, kum zagiet adam a, tanu tapate ahing nalai hi. 20Tuachi’n Jared adam sung kum zakuo sawm guh leh ni ahia, tuachiin ashi ta hi.
21Tualeh Enok kum sawmguh leh nga ahi in, Mathuselah ahing hi. 22Tualeh Enok in Mathuselah ahin nua in, kum zathum sung Pasian toh azawhkhawm a, tanu tapate ahing hi. 23Tuachi’n Enok dam sung kum zathum sawmguh leh nga ahi. 24#Heb. 11.5; Jud. 1.14Tualeh Enok Pasian toh azawhkhawm a, aum tasih hi. Pasian in alahmang tah ziehin.
25Tualeh Mathuselah kum za leh sawmgiet leh sagi ahi in, Lamek ahing hi. 26Tualeh Mathuselah in Lamek ahin nua in, kum zasagi sawmgiet leh ni adam a, tanu leh tapate ahing hi. 27Tuachi’n Mathuselah adam kum zakuo sawmguh leh kuo ahia, tuachiin ashita hi.
28Tualeh Lamek kum za leh sawmgiet leh ni ahi in, tapa khat ahing a. 29Tualeh amin Noah aphua hi. “Ama mama in Mangpa hamsiet khum leitung zieh a, i khut nasep leh i gimnate ah hing hamuon va,” achi hi. 30Tualeh Lamek in Noah ahin nua in, kum zanga sawmkuo leh nga adam a, tanu tapate ahing nalai hi. 31Tuachi’n Lamek dam sung kum zousie kum zasagi leh sawmsagi leh sagi ahia, tuachiin ashita hi.
32Tualeh Noah kum zanga a upa ahi in, Shem, Ham leh Japheth ahing hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.