SIEMCHILBU 4
4
Kain leh Abel
1Tualeh Adam in azi Evi apawl a, agai a, Kain anei a, tuachiin “Mangpa apat in mikhat ka muta,” achi hi. 2Tualeh, amanu’n anaupa Abel anei kia a, Abel khu Belam ching mi ahia, hinanleh Kain pen lou hou mi ahi. 3Tualeh, tuazouin hichi ahing hia, Kain in Mangpa kung a lat ding in lou a haichi gate ahing tawi a. 4#Heb. 11.4Tualeh Abel in zong aganhon lah a pieng masa pente leh athau pente ahing tawi a, tualeh Mangpa’n Abel leh asil lat akipahpi hi. 5Hinanleh Kain leh asil lat akipahpi sih hi. Tuachi’n Kain alungthah seng seng a, amai amuol vawt hi. 6Tualeh Mangpa’n Kain kungah, “Bang dinga lungthah na hiei? tualeh bang dinga maimuol na hiei? 7Sil bawlhoi lachin hing kipompieh louding amah? Na bawl hoi sihleh khelna na kotlam ah akuol zing hi#Hebrew te Numei china ahi tualeh alunggul khu nang lam ahi dinga, atungah thu na nei ding hi”.
Tual thana masapen
8 #
Mat. 23.35; Luk. 11.51; 1 Jn. 3.12 Tualeh Kain in a anaupa Abel ahoupi a, tualeh hichi ahing hita a, lou a aum lai un Kain in anaupa akihaupi a athat ta hi. 9Tuachi’n Mangpa’n Kain kungah, “Na naupa Abel hei a um ahiai?” achi a; “Aman thei votsing, ka naupa chingpa kahi amah?” achi hi.
10 #
Heb. 12.24
Tualeh Aman, “Bang bawl a kinei natai le? Na naupa sisan aw lei akipat ka kung ah ahing kikou hi. 11Na khut akipat na naupa sisan na sang dinga, kam nakah leia kipat hamsiet na hita hi. 12Leitang nahaw chieng in zong ahoina ahing pephal nawn sih dinga, leitung ah vahvai leh taimang na hita ding hi”.
13Khumin, Kain in Mangpa kungah “Na hing gawtna ka thuoh zouding sang in anazaw hi”. 14Ngaivawi, “tunin leitung apat na hing notdohta a, na mitmu apat phuol ka hita ding hi. Tualeh leitung ah vahvai ka hita dinga, tualeh tambang ahi ding hi, ahing mutapou in ahing that ding uhi,” a chi hi.
15Tualeh Mangpa’n akung ah “tuachi ahileh koipou Kain that khu ale sagi in atung ah phuba lah ahi ding achia, tualeh koi in zong ama amu a atha louna ding in Mangpa’n Kain achiemte ta hi”.
Pasian theilou Kain hahlesuonte
16Tualeh Kain khu Mangpa umna akipat apawtdoh a, Eden suolam a Nod gam ah ateng ta hi. 17Tualeh Kain in azi apawl a, agai a, Enok anei hi. Tualeh khopi asiem a amin ding in atapa min puoin Enok ahisah hi. 18Tualeh Enok in tapa Irad anei a, Irad in Mehujael ahing a, Mehujael in Methushael ahing a, Methushael in Lamek ahing hi. 19Tualeh Lamek in zi ni anei a, khat min Adah ahia, adang pen min Zillah ahi. 20Tualeh Adah in Jabal anei a, ama khu puon inn a tengte leh ganta khawi mite suongpa ahi. 21Tualeh anaupa min Jubal ahia, ama khu kaiging leh theile tum mite zousie hingpa ahi. 22Tualeh Zillah in zong Tubal-Kain, sum-eng leh sia, hiemhei khengsiem mi anei a, Tubal-Kain naunu min Naamah ahi. 23Tualeh Lamek in azite “Adah leh Zillah kung ah ka aw ngai unlen, nou Lamek zite, ka thugen ngaikhie un, ahing suhliem ziehin mi khat ka that a, ahing suhnat ziehin tangval khat ka that hi. 24Kain phuba ale sagi a akilah ding leh Lamek phuba ale sawm sagi leh sagi a lah ahi ding hi,” achi hi.
Seth hahlesuonte
25Tualeh Adam in azi apawl kia a, tapa khat anei a, amin Seth ahisah hi. Aziehpen aman “Kain in athasa Abel thaheng ding Pasian in chihah dang ahing guotpieh ahita,” achi hi. 26Tualeh Seth in tapa khat anei a, amin Enosh ahisah hi. Tuahun a kipan in miten Pasian min law ahing pan uhi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.