LUKA 2
2
Jisua suak thu
(Mt 1.18-25)
1Kha laia khan, rêng Kaisara Augasta’n Rom sorkâr ram op murdia irhming irziak hrangin thu a pêka. 2Hi irteppui masa tak hi Suria rama Kurinia, Ramoptu#2.2: Ramoptu ti hi Governor tia ei lei ihmang ngai kha a ni a ni laia a ni. 3Mi tinin mâni khua chita irhming irziak hrangin an fea. 4,5Josefa khom Davida in sûngkua le a’rchia mi a ni sikin, a dôngma hual Mari inrâi chum te tem leh khan Galili ram Nazaret ata Judai rama, Davida suakna Bethlehem khuaa irhming irziak hrangin an fea. 6Khan Bethlehem-a an om laiin nâi nei zoro’n a hong de tâka. 7Nâi lutîr pasal a neia, puanin a tuama, khualbûka an inleng ta no sikin sa bu pêkna khênga an inzâl ta.
Beralpuhai le vântîrtônhai
8Kha rama belrapuhaiin belra an ena, zâna an riak nghaa. 9Rengpa itîr vântîrtôn an makunga a zuang inlâra, Rengpa roiinpuina khan an kôl kha a êl invâr phuta, an chi tak taka. 10Vântîrtôn khan an kuang, “Chi no unglân, irngai roi, mi tin ta hranga Thurchi Sa râifânom tak tak nangni ki zuang intung pe kêng. 11A vuan hin nin ta hrangin Davida khuaa saninhringtu a suak ta, Reng Krista chu, 12Khan, hi hi nin ta hranga irsinsiana hrang chu a ni; nâitesen, puana tuam, sa bu pêkna khênga zâl hmu nin ti,” a tia. 13Voikhat rengin vântîrtôn kôla khan irvân mipuihai an zuang om mur tâka, Pathian an inpâka.
14“Anchungtaka khin Pathian roiinpui takin om sianlân,
Irnênga a lômhai kuang irngeina lêng ri se,” an tia.
15Khan, vân vântîrtônhaiin an rotsan le chu belrapuhai khan, “Thoi, Bethlehem-a fe ei ti, Rengpa’n thu a ni ihril, zuang tung kha lei va en rei,” an tia. 16Khanchu inrang takin an fea, Mari le Josefa, sa bu pêkna khênga nâitesen zâl kha an va hmua. 17An hmu’n chu nâitesen thurchi vântîrtôn insîr kha an hrila. 18An hriatpu dôrin belrapuhai thu’nsîr kha ar khêl an ti tak taka; 19Mari khan kha thuhai kha a lungrîla ngaitua’n a vong chiana. 20Vântîrtôn ihrilhai ang dênin itinrêng an hmu le an inhriat sika khan, belrapuhai khan Pathian chôiindôm le inpâk pumin an kîr nôk tâka.
Jisua irhming an phua
21Khan, a sertan hrang nikhua sûn riat a hong chukin chu, sula a om mân daia angin a lei iphua tâk irhming Jisua ti kha an phua tâka.#Lev 12.3; Lk 1.31
Nâitesen Jisua Tempila an hruai
22Mosia dân anga an irthiang nî a hong chukin chu Josefa le Mari’n an nâite Pathian kuang inhlan hrangin Jerusalema an fepuia.#Lev 12.6-8 23Rengpa dân thua, “Nâi lutîr pasal ka chu Rengpa dongtum hrang a ni,” ti a nia.#Fes 13.2,12 24Khan, Rengpa Dân angin vasu inhni mani, phervali mani, irbôlna’n an inhlan hrang a ni.
25Jerusalema khan mi inkhat, ar hming Simeona a oma. Ama kha mi fel le sakhua mi tak a nia, Israelhai irtharngamtir hrangtu kha a thîr maia; a chunga Irtha Irthiang a om. 26Rengpa chonginkung Mesia a hmu mâka chu thi no ni tih a inkung a ni. 27Irtha hruaiin Simeona Tempila a fea, Dân anga a chunga tho hrangin a nu le pa’n nâite Jisua kha, Tempila an hongpuia. 28Simeona’n nâite a poma, Pathian kuang lômthu an sîra.
29“Rengpa, atûn ni thu ang ngêtin,
ni suak hi irtharngam takin ni infetir hrang a ni tâka.
30Ni saninhringna chu ki mit ngeiin ki hmu tâka.
31Mi tin hmu hranga ni isiam kha.
32Jentailhai kuang ni vâr inlangtir hrang le ni mi Israelhai roiinpuina hrang chu,”
a tia. #Isa 42.6; 49.6; 52.10
33A nu le pa khan nâitesen chungchâng a insîr kha ar khêl an ti oka. 34Simeona khan anni kha sat a vura, a nu Mari kuang, “Irngai roh, Israel laia mi tamtak siata tûk hrang le inngîr suakna hrangin, hi nâite hi inkung a ni, Pathian irsinsiana, mi tamtakin an isêl sup sup hrang ni a ti. 35Nang khom khandai isun angin ni milung la na a ti, mi tamtak lungrîl sûng inlang la nih a ti,” a tia.
36Deipu inkhat, ar hming Anna, Fanuela nâinu, Asera nam, a sân a tar tâk a oma. A pasal leh kum sari an irsen hnungin, 37Kum sômriatminli a meithâi tâka. Ama khan Tempil rotsan loiin bu a nghei hena, sûn zân chongchaiin Pathian a biak ngai. 38Kha lai khan ama kha a fea, Pathian kuang lômthu an sîra, Jerusalem sansuakna sabeituhai kuang nâitesen thurchi kha an sîr tâka.
Nazaret khuaa an kîr
39Rengpa dân angin thil an tho zoi zit hnunga khan Galili rama, an khua Nazaret-a khan an kîr nôk tâka.#Mt 2.23 40Nâitesen khom kha a’rsôn maia, a vâr tîr tîra, Pathian lungkhamna a chunga a om maia.
Nâipang Jisua Tempila
41A nu le pahai kha kum tin Jerusalema Ferkân kût hmang hrangin an fe ngaia,#Fes 12.1-27; Dhn 16.1-8 42Ama kha kum sômhleihni a niin, dân angin kût hmang hrangin an hong fepuia. 43Kût ar zoiin chu, an kîr tâka, nâipang Jisua chu a nu le pa inhre loiin Jerusalema a la riaka. 44A rualhai laia fe ni a ti; tiin sûn khat an fe hnungin, an urênghai le an rualhai kuang an zonga. 45Khan khom hmu mahaia, zong pumin Jerusalem tiang an hong kîr nôk tâka.
46A sûn thum ni’n chu Tempila, irchutirtuhai kuang lei toiin an hong hmu tâka; an thu a lei irngai le lei irdonhaiin an va hmu tâka. 47A vâr le a sâm theizia an inhriatin a sân ar khêl an tia. 48A nu le pa khomin an hong hmu’n chu a sân ar khêl an tia, a nu khan, “Bonga, itho mo hianga ni ni ilo? Ni pa leh irthatâk vîkin nang kin izong mai tâk kêng,” a tia. 49“Itho mo nin ni izong? Ka pa ina ki om ti nin inhriat loi ma ni?” a tia. 50Khannisianlân, a sâm dân kha a’rngaina lam chang inhre mahai. 51Khanchu, an kuang Nazaret-a fea, an thu zômin a oma, thil omzia hai murdi a nu’n a lungrîla a vong chiana.
52Khan, Jisua kha taksa tiang le vârna tiang a hong irsôn tîr tîra, Pathian le mihriam inrenna le kanna a dong tîr tîr tâka.#1 Sam 2.26; Thuv 3.4
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.