San Juan 15
15
Ase vaa ꞌo̱ chruun uvá roꞌ, da̱nj vaa Jesús, ne̱ ase vaa raꞌa̱ chruun uvá roꞌ, da̱nj vaa níꞌ a
1Ga̱a ne̱ cataj uún Jesús a:
―Ase vaa ꞌo̱ chruun uvá roꞌ, da̱nj vaa yá ꞌu̱nj, ne̱ Réj Yaꞌanj me síí tumé chruun uvá yoꞌ chugua̱nj. 2Ne̱ a̱ me maꞌa̱n ꞌo̱ raꞌa chruun yoꞌ ne rii chruj uvá, ne̱ aꞌnéj soꞌ man raꞌa yoꞌ na̱nj ado̱nj. Tza̱j ne̱ raꞌa chruun ma̱n chruj uvá raa̱ me se veꞌé aꞌneꞌ soꞌ man yoꞌ, ga̱a ne̱ cuma̱n doj chruj uvá raa̱ yoꞌ na̱nj ado̱nj. 3Dan me se ase vaa raꞌa chruun cachij sa̱ꞌ vaa soj, cheꞌé se a̱j cuno soj nana̱ caꞌmij rihaan soj ado̱nj. 4ꞌO̱ cu̱nuû rá nimán soj manj, ne̱ ꞌo̱ cu̱nuû ꞌu̱nj nimán soj a. Dan me se xa̱ꞌ raꞌa chruun uvá, tza̱j ne̱ se̱ caꞌvee cuma̱n chruj raa̱ maꞌa̱n ina̱nj yoꞌ a̱ maꞌ. Ne̱ ase vaa raꞌa chruun chruj uvá roꞌ, da̱nj vaa soj, ne̱ sese se̱ cuno sa̱ꞌ soj rihanj, ne̱ sese caꞌa̱nj yaníj soj rihanj, ne̱ se̱ caꞌvee quiꞌya̱j soj nda̱a vaa me rá Réj Yaꞌanj quiꞌya̱j soj maꞌ.
5’Dan me se ꞌu̱nj nihánj me maꞌa̱n chruun uvá, ne̱ soj me raꞌa catu̱u̱n avii xráá raꞌa ma̱nj na̱nj á. Ne̱ sese ꞌo̱ cuno̱ soj rihanj, ne̱ sese ꞌo̱ cu̱nuû ꞌu̱nj nimán soj, ne̱ quiꞌya̱j uxrá soj se vaa me rá Yaꞌanj quiꞌya̱j soj chugua̱nj. ꞌO̱ se sese se̱ racuíj ꞌu̱nj man soj, ne̱ se̱ guun nucua̱j soj quiꞌya̱j soj a̱ doj suun sa̱ꞌ maꞌ. 6Sese se̱ caꞌvej rá ꞌo̱ soꞌ ꞌo̱ cu̱nuû rá nimán soꞌ manj, ne̱ quiriꞌi̱j nii man soꞌ, nda̱a vaa ꞌyaj nii man raꞌa chruun yoꞌ a. Ne̱ canaco̱o̱ yoꞌ, ne̱ naquiꞌya̱j chre̱ꞌ nii man nij raꞌa chruun yoꞌ, ne̱ quiriꞌi̱j nii man nij yoꞌ rihaan yaꞌan na̱nj ado̱nj. Dan me se caca̱a̱ nu̱ꞌ nij síí vaa da̱nj na̱nj ado̱nj.
7’Tza̱j ne̱ sese ꞌo̱ cu̱nuû rá nimán soj manj, ne̱ sese ꞌo̱ cu̱nuû snana̱j nimán soj, ne̱ caꞌve̱e se me maꞌa̱n rasu̱u̱n gu̱un rá soj cachi̱nj soj rihanj, ne̱ rque̱j man soj chugua̱nj. 8Cheꞌé se uno soj rihanj, cheꞌé dan sa̱ꞌ uxrá aꞌmii yuvii̱ cheꞌé Réj Yaꞌanj a. Cheꞌé dan gu̱un nucua̱j soj quiꞌya̱j ndoꞌo soj suun sa̱ꞌ, ne̱ sese cuno̱ sa̱ꞌ soj rihanj, ne̱ ya̱ síí tucuꞌyón snana̱j me soj ado̱nj. 9Dan me se da̱j se ꞌe̱e̱ rá Réj manj roꞌ, da̱nj vaa ꞌe̱e̱ raj man soj chugua̱nj. ꞌO̱ cu̱nuû rá nimán soj se vaa ꞌe̱e̱ raj man soj á. 10Sese ꞌyaj soj suun aꞌnej rihaan soj, ne̱ ꞌo̱ ga̱a̱ ꞌe̱e̱ raj man soj a. Veé da̱nj ꞌyáá ꞌu̱nj, ne̱ ꞌyáá ꞌu̱nj suun aꞌneꞌ Réj Yaꞌanj rihanj, ne̱ ꞌo̱ ꞌe̱e̱ rá soꞌ manj ado̱nj.
11’Nu̱ꞌ nana̱ nihánj cataj xnaꞌanj ꞌu̱nj rihaan soj cheꞌé se me raj ga̱a̱ niha̱ꞌ uxrá rá nimanj ni̱ꞌyaj ꞌu̱nj man soj, ne̱ me raj ga̱a̱ niha̱ꞌ uxrá rá nimán maꞌa̱n soj uún a. 12Nihánj me suun sa̱ꞌ ya̱ aꞌnej rihaan soj cuno̱ soj á. Nda̱ꞌ rá se vaa ꞌe̱e̱ raj niꞌya̱j ꞌu̱nj man soj roꞌ, da̱nj ga̱a̱ ꞌe̱e̱ rá soj ni̱ꞌyaj soj tuviꞌ soj na̱nj á. 13Dan me se sese caꞌve̱j rá ꞌo̱ soꞌ nayo̱n soꞌ rihaan tuviꞌ soꞌ cavi̱ꞌ soꞌ cheꞌé tuviꞌ soꞌ, ne̱ si̱j ꞌe̱e̱ ya̱ rá man tuviꞌ me soꞌ a. Taj va̱j a̱ doj síí ꞌe̱e̱ doj rá man tuviꞌ rihaan síí caꞌve̱j cavi̱ꞌ cheꞌé tuviꞌ a̱ maꞌ. 14Ne̱ nij soj me se tuvij me soj sese cuno̱ soj suun caꞌnéꞌ ꞌu̱nj rihaan soj na̱nj ado̱nj.
15’Rej rihaan níꞌ me se se̱ cataj ꞌu̱nj se vaa se‑mo̱zó ꞌu̱nj me soj a̱ maꞌ. ꞌO̱ se mozó me se ne neꞌen soꞌ da̱j ꞌyaj síí ꞌni̱j raꞌa man soꞌ maꞌ. Xa̱ꞌ soj, tza̱j ne̱ a̱j cataj ꞌu̱nj se vaa tuvij me soj, cheꞌé se a̱j cataj xnaꞌanj ꞌu̱nj rihaan soj nu̱ꞌ se vaa cataj Réj Yaꞌanj rihanj ado̱nj.
16’Ne nari̱i̱ soj manj a̱ maꞌ. Tana̱nj ma̱ꞌán ꞌu̱nj narii man soj ne̱ cunéꞌ ꞌu̱nj man soj, yan cavi̱i̱ soj quiꞌya̱j ndoꞌo soj se vaa me rá Yaꞌanj quiꞌya̱j soj, ne̱ se̱ navij suun sa̱ꞌ ꞌyaj soj daj chiha̱a̱ míj maꞌ. Ne̱ cheꞌé se cunéꞌ ꞌu̱nj man soj, cheꞌé dan me maꞌa̱n rasu̱u̱n cachi̱nj soj rihaan Réj Yaꞌanj cheꞌé se‑chu̱vií ꞌu̱nj, ne̱ rque̱ soꞌ rasu̱u̱n yoꞌ man soj ado̱nj.
17’Nihánj me suun aꞌnéꞌ ꞌu̱nj rihaan soj, se vaa ga̱a̱ ꞌe̱e̱ rá soj man tuviꞌ soj á ―taj Jesús rihaan nij síí tucuꞌyón snana̱ soꞌ a.
Quita̱j riꞌyunj nij síí noco̱ꞌ se‑chre̱j chumii̱ nihánj man nij síí noco̱ꞌ man Jesús a
18Ga̱a ne̱ cataj uún Jesús a:
―Sese quita̱j riꞌyunj nij síí noco̱ꞌ se‑chre̱j chumii̱ nihánj ni̱ꞌyaj nij soꞌ man soj, ne̱ xca̱j soj cuentá se vaa asino ya̱a̱n quitáá riꞌyunj nij soꞌ man ma̱ꞌanj a. 19Sese si̱j ma̱n rihaan chumii̱ u̱u̱n nihánj me maꞌa̱n soj, ne̱ gaa ꞌe̱e̱ rá ꞌó nij síí noco̱ꞌ se‑chre̱j chumii̱ nihánj niꞌya̱j nij soꞌ man soj asuun tza̱j á. Tza̱j ne̱ narii ꞌu̱nj man soj se vaa ta̱náj soj se‑chre̱j chumii̱ nihánj ne̱ canoco̱ꞌ soj manj, ne̱ cheꞌé dan né si̱j noco̱ꞌ se‑chre̱j chumii̱ nihánj me soj cuano̱ maꞌ. Cheꞌé dan táá riꞌyunj nij síí noco̱ꞌ se‑chre̱j chumii̱ nihánj niꞌya̱j nij soꞌ man soj ado̱nj.
20’ꞌO̱ cu̱nuû rá soj nana̱ nihánj nana̱ cataj xnaꞌanj ꞌu̱nj rihaan soj se vaa né si̱j noco̱o doj me mozó rihaan se‑ruꞌve̱e̱ mozó maꞌ. Cheꞌé se canocoꞌ nij síí ta̱j riꞌyunj manj quiꞌya̱j nij soꞌ sayuun manj roꞌ, cheꞌé dan neꞌen soj se vaa nda̱a maꞌa̱n soj do̱ꞌ, canoco̱ꞌ nij soꞌ quiꞌya̱j nij soꞌ sayuun na̱nj ado̱nj. Ne̱ cheꞌé se ne cuno̱ nij soꞌ snana̱j, ne̱ cheꞌé dan neꞌen soj se vaa se̱ cuno nij soꞌ snana̱ soj a̱ maan ado̱nj. 21Dan me se quiꞌya̱j nij soꞌ nu̱ꞌ se nij yoꞌ man soj cheꞌé se‑chu̱vií ꞌu̱nj, cheꞌé se ne neꞌen nij soꞌ man síí caꞌnéé manj chugua̱nj.
22’Sese ne caꞌna̱ꞌ ꞌu̱nj, ne̱ sese ne caꞌmi̱j ga̱ nij soꞌ, ne̱ taj va̱j cacunꞌ tumé nij soꞌ tza̱j maꞌ. Tza̱j ne̱ cuano̱ nihánj me se natáꞌ ꞌu̱nj snana̱ Yaꞌanj rihaan nij soꞌ, ne̱ se̱ caꞌvee cata̱j nij soꞌ se vaa né si̱j ta̱j riꞌyunj man Yaꞌanj me nij soꞌ maꞌ. 23ꞌO̱ se síí ta̱j riꞌyunj manj roꞌ, soꞌ me síí ta̱j riꞌyunj man Réj Yaꞌanj na̱nj ado̱nj. 24Ne̱ suun sa̱ꞌ noco̱o quiꞌyáj queneꞌen nij soꞌ me se ne quiꞌya̱j a̱ ꞌó yuvii̱ suun sa̱ꞌ noco̱o vaa da̱nj maꞌ. Ne̱ sese ne qui̱ꞌyáj suun sa̱ꞌ noco̱o yoꞌ queneꞌe̱n nij soꞌ, ne̱ ne tumé nij soꞌ cacunꞌ tza̱j maꞌ. Tza̱j ne̱ ya̱j me se a̱j queneꞌen nij soꞌ nij suun sa̱ꞌ noco̱o quiꞌyáj, ne̱ quitáá riꞌyunj nij soꞌ mán ꞌu̱nj do̱ꞌ, man Réj Yaꞌanj do̱ꞌ na̱nj ado̱nj. 25Tza̱j ne̱ nihánj me se quisi̱j ya̱ nu̱ꞌ nana̱ nihánj nana̱ no̱ rihaan stucua̱nj xi̱i nij soꞌ síí cuꞌna̱j Moisés a: “Quitáá riꞌyunj rmaꞌa̱n nij soꞌ manj a”, taj stucua̱nj Moisés yoꞌ ado̱nj.
26’Dan me se caꞌne̱j ꞌu̱nj Nimán Yaꞌanj cavi̱i̱ soꞌ rej ya̱nj Yaꞌanj caꞌna̱ꞌ soꞌ rihaan soj, ne̱ ra̱cuíj ndoꞌo soꞌ man soj, ne̱ ina̱nj nana̱ ya̱ rque̱ soꞌ man soj a. Asa̱ꞌ caꞌnaꞌ Nimán Yaꞌanj rihaan soj, ga̱a ne̱ cata̱j xnaꞌanj soꞌ rihaan nij yuvii̱ cheꞌej ado̱nj. 27Ne̱ cata̱j xnaꞌanj maꞌa̱n soj cheꞌej, cheꞌé se asi̱j tacoo cachéé soj ga̱j ado̱nj.
© Wycliffe Bible Translators, Inc. 2024 segunda versión electrónica