San Juan 14
14
Cataj Jesús se vaa maꞌa̱n soꞌ me chrej ya̱ a
1Ga̱a ne̱ cataj Jesús rihaan ta̱ranꞌ nij soꞌ a:
―Caꞌne̱ꞌ rá soj ga̱ suun ꞌnaꞌ xruꞌ nimán á. Cuchuma̱n rá soj ni̱ꞌyaj soj Yaꞌanj, ne̱ cuchuma̱n rá soj ni̱ꞌyaj soj manj á. 2Tucuá Réj me se vaa ndoꞌo rej ca̱yáán yuvii̱ ado̱nj. Sese ne vaa da̱nj, ne̱ me cheꞌé cataj xnaꞌanj ꞌu̱nj rihaan soj se vaa caꞌa̱nj ꞌu̱nj naquiꞌya̱j sa̱ꞌ ꞌu̱nj rej ca̱yáán maꞌa̱n soj, rá soj ga̱. 3Ne̱ cheꞌé se caꞌa̱nj ꞌu̱nj naquiꞌya̱j sa̱ꞌ ꞌu̱nj rej ca̱yáán soj, cheꞌé dan neꞌen soj se vaa caꞌna̱ꞌ uún ꞌu̱nj rihaan soj, ne̱ naca̱j ꞌu̱nj man soj a. Nda̱a síj, ga̱a ne̱ ca̱yáán rcuaꞌa̱a̱n ta̱ranꞌ níꞌ rej yoꞌ ado̱nj. 4Ne̱ a̱j neꞌen soj chrej uchiꞌ nda̱a rej caꞌa̱nj ꞌu̱nj na̱nj ado̱nj ―taj Jesús rihaan nij síí tucuꞌyón snana̱ soꞌ a.
5Ga̱a ne̱ cataj síí cuꞌna̱j Tomás rihaan Jesús a:
―Ne neꞌen núj rej caꞌa̱nj so̱ꞌ, maan Señor. Asa̱ꞌ caꞌve̱e queneꞌe̱n núj chrej uchiꞌ nda̱a rej caꞌa̱nj so̱ꞌ ga̱ ―taj Tomás, xnáꞌanj soꞌ man Jesús a.
6Ga̱a ne̱ cataj Jesús rihaan soꞌ a:
―Ma̱ꞌanj me guun chrej rihaan soj, ne̱ ma̱ꞌanj me nana̱ ya̱ cuno̱ soj, ne̱ ma̱ꞌanj me síí quiꞌya̱j ga̱a̱ iꞌna̱ꞌ nimán soj ado̱nj. Sese se̱ caꞌvej rá ꞌo̱ soꞌ canoco̱ꞌ soꞌ manj, ne̱ daj chiha̱a̱ míj se̱ cuchiꞌ soꞌ rihaan Réj Yaꞌanj a̱ maꞌ. 7Sese neꞌen ya̱ soj manj, ne̱ a̱j neꞌen soj man Réj Yaꞌanj ado̱nj. Dan me se asi̱j cuano̱ roꞌ, neꞌen soj man soꞌ na̱nj ado̱nj ―taj Jesús rihaan Tomás a.
8Ga̱a ne̱ cataj síí cuꞌna̱j Felipé a:
―Ti̱haán so̱ꞌ man Réé so̱ꞌ rihaan núj, ne̱ gu̱un ya̱ rá núj, Señor ―taj Felipé rihaan Jesús a.
9Ga̱a ne̱ cataj Jesús rihaan Felipé a:
―Felipe, síj queꞌe̱e̱ ndoꞌo güii cachéé ꞌu̱nj ga̱ nij soj, ne̱ me cheꞌé ne que̱neꞌén so̱ꞌ manj ga̱. Xa̱ꞌ síí neꞌen manj, tza̱j ne̱ soꞌ me síí neꞌen Réj Yaꞌanj ado̱nj. Asa̱ꞌ caꞌvee cataj so̱ꞌ se vaa me rá so̱ꞌ ti̱haán ꞌu̱nj man Réj Yaꞌanj rihaan so̱ꞌ ga̱. 10Ne amán rá so̱ꞌ se vaa yáán ꞌu̱nj ga̱ Yaꞌanj, ne̱ Yaꞌanj roꞌ, yáán soꞌ ga̱ ꞌu̱nj naꞌ. ꞌO̱ se xa̱ꞌ nana̱ aꞌmij, tza̱j ne̱ né na̱na̱ avii raa̱ ma̱ꞌanj me nana̱ yoꞌ maꞌ. ꞌO̱ se nu̱u̱ Réj Yaꞌanj nimanj, ne̱ soꞌ me síí ꞌyaj nu̱ꞌ suun sa̱ꞌ noco̱o ꞌyáá ꞌu̱nj ado̱nj.
11’Cuchuma̱n rá soj se vaa cuya̱a̱n vaa rá ꞌu̱nj ga̱ Réj á. Caꞌve̱e se ne amán rá soj niꞌya̱j soj man ma̱ꞌanj, tza̱j ne̱ cuchuma̱n rá soj snana̱j cheꞌé suun sa̱ꞌ noco̱o ꞌyáá ꞌu̱nj á. 12Ne̱ cuano̱ nihánj me se cata̱j yá ꞌu̱nj rihaan soj se vaa síí amán rá niꞌya̱j manj me se ase vaa suun sa̱ꞌ noco̱o ꞌyaj ma̱ꞌanj roꞌ, da̱nj ga̱a̱ quiꞌya̱j maꞌa̱n soꞌ uún na̱nj ado̱nj. Tza̱j ne̱ suun sa̱ꞌ noco̱o doj quiꞌya̱j soꞌ, cheꞌé se nucui̱ꞌ ꞌu̱nj rihaan Réj Yaꞌanj na̱nj á.
13’Ne̱ me maꞌa̱n rasu̱u̱n cachi̱nj soj cheꞌé se‑chu̱vií ꞌu̱nj, ne̱ nu̱ꞌ yoꞌ qui̱ꞌyáj cheꞌé soj ado̱nj. Nda̱a síj, ga̱a ne̱ veꞌé uxrá caꞌmi̱i̱ nii cheꞌé Réj Yaꞌanj, qui̱ꞌyáj na̱nj ado̱nj. 14Sese cachi̱nj soj ꞌo̱ rasu̱u̱n rihanj cheꞌé se‑chu̱vií ꞌu̱nj, ne̱ veé da̱nj qui̱ꞌyáj ado̱nj.
15’Sese ya̱ ya̱ aráj cochro̱j soj rihanj, ne̱ quiꞌya̱j soj nda̱a vaa caꞌnéꞌ ꞌu̱nj suun rihaan soj a. 16Ga̱a ne̱ cachi̱nj niꞌya̱j ma̱ꞌanj rihaan Réj Yaꞌanj, ga̱a ne̱ caꞌne̱j soꞌ ꞌó síí cuchi̱ꞌ rihaan soj, ne̱ ra̱cuíj ndoꞌo soꞌ man soj, ne̱ ca̱yáán soꞌ ga̱ soj nu̱ꞌ cavii nu̱ꞌ caꞌanj a. 17Dan me se Nimán Yaꞌanj me síí cuchi̱ꞌ rihaan soj, ne̱ ina̱nj nana̱ ya̱ rque̱ soꞌ man soj a. Tza̱j ne̱ se̱ guun nucua̱j nij síí noco̱ꞌ se‑chre̱j chumii̱ nihánj naca̱j nij soꞌ man Nimán Yaꞌanj a̱ maꞌ. ꞌO̱ se ne neꞌen nij soꞌ man soꞌ maꞌ. Tza̱j ne̱ soj me se neꞌen soj man soꞌ, cheꞌé se ya̱nj soꞌ ga̱ soj, ne̱ ꞌo̱ ca̱yáán soꞌ nimán soj ado̱nj.
18’Se̱ quináj maꞌa̱n soj qui̱ꞌyáj maꞌ. ꞌO̱ se caꞌna̱ꞌ uún ꞌu̱nj rihaan soj chugua̱nj. 19Nichrunꞌ caꞌa̱nj ꞌu̱nj, ne̱ se̱ queneꞌen uún nij síí noco̱ꞌ se‑chre̱j chumii̱ nihánj manj maꞌ. Tza̱j ne̱ queneꞌe̱n maꞌa̱n soj manj, cheꞌé se ꞌo̱ vaa iꞌna̱ꞌ ꞌu̱nj, ne̱ ga̱a̱ iꞌna̱ꞌ nimán soj ado̱nj.
20’Asa̱ꞌ queneꞌen soj manj ne̱ queneꞌe̱n soj se vaa cuya̱a̱n vaa rá ꞌu̱nj ga̱ Réj, ne̱ cuya̱a̱n ga̱a̱ rá soj ga̱ ꞌu̱nj, ne̱ cuya̱a̱n ga̱a̱ rá ꞌu̱nj ga̱ soj na̱nj ado̱nj. 21Síí nariꞌ nij suun caꞌnéꞌ ꞌu̱nj ne̱ uno nij suun yoꞌ roꞌ, me síí ya̱ ya̱ aráj cochro̱j rihanj chugua̱nj. Ne̱ cunu̱u ꞌe̱e̱ rá Réj Yaꞌanj man síí aráj cochro̱j rihanj, ne̱ ga̱a̱ ꞌe̱e̱ rá ma̱ꞌanj man soꞌ, ne̱ queneꞌe̱n soꞌ manj, qui̱ꞌyáj ado̱nj ―taj Jesús rihaan nij síí tucuꞌyón snana̱ soꞌ a.
22Dan me se caꞌmii síí cuꞌna̱j Judas rihaan soꞌ a. Tza̱j ne̱ né si̱j cuꞌna̱j Judas Iscariote me soꞌ maꞌ. ꞌÓ síí cuꞌna̱j Judas me soꞌ a. Dan me se xnáꞌanj soꞌ man Jesús, cataj soꞌ a:
―Me cheꞌé cataj so̱ꞌ cuano̱ nihánj se vaa queneꞌe̱n núj mán so̱ꞌ qui̱ꞌyáá so̱ꞌ, tza̱j ne̱ se̱ queneꞌen nij síí noco̱ꞌ se‑chre̱j chumii̱ nihánj mán so̱ꞌ ga̱ ―taj Judas, xnáꞌanj soꞌ man Jesús a.
23Ga̱a ne̱ cataj Jesús rihaan soꞌ a:
―Síí aráj cochro̱j rihanj me se cuno̱ soꞌ snana̱j, ne̱ cunu̱u ꞌe̱e̱ rá Réj Yaꞌanj man soꞌ, ga̱a ne̱ cuchi̱ꞌ rój rihaan soꞌ, ne̱ ꞌo̱ ca̱yáán rój ga̱ soꞌ ado̱nj. 24Xa̱ꞌ síí ne aráj cochro̱j rihanj, tza̱j ne̱ ne uno soꞌ snana̱j maꞌ. Ne̱ nana̱ caꞌmij cuno soj me se né ina̱nj snana̱j me yoꞌ maꞌ. Snana̱ Réj síí caꞌnéé manj rihaan chumii̱ nihánj me nana̱ caꞌmij cuno soj na̱nj ado̱nj.
25’Dan me se ya̱nj ma̱ꞌanj ga̱ soj, ne̱ caꞌmij nu̱ꞌ nana̱ nihánj rihaan soj ado̱nj. 26Tza̱j ne̱ vaa güii caꞌne̱j Réj Yaꞌanj man Nimán soꞌ cuchi̱ꞌ Nimán soꞌ rihaan soj cheꞌé se‑chu̱vií ꞌu̱nj a. Ne̱ ra̱cuíj ndoꞌo Nimán soꞌ man soj, ga̱a ne̱ tu̱cuꞌyón Nimán soꞌ nu̱ꞌ nana̱ man soj a. Ne̱ ninu̱j rá soj nu̱ꞌ nana̱ caꞌmij rihaan soj, quiꞌya̱j Nimán Yaꞌanj yoꞌ na̱nj ado̱nj.
27’Dan me se se xe̱j nu̱u̱ nimán ꞌu̱nj ta̱náj ꞌu̱nj rihaan soj, ne̱ se xe̱j nu̱u̱ nimán ꞌu̱nj rque̱j man soj, ne̱ se̱ tihaꞌ yuꞌunj ꞌu̱nj man soj nda̱a vaa ꞌyaj nij síí noco̱ꞌ se‑chre̱j chumii̱ nihánj maꞌ. Ya̱ ya̱ ga̱a̱ xe̱j nimán soj, quiꞌya̱j yá ꞌu̱nj ado̱nj. Taj cheꞌé nu̱u̱ xruꞌ nimán soj maꞌ. Se̱ cuchuꞌviꞌ nimán soj maꞌ. 28A̱j cuno soj nana̱ caꞌmij, se vaa cavi̱i̱ ꞌu̱nj quina̱nꞌ ꞌu̱nj, tza̱j ne̱ caꞌna̱ꞌ uún ꞌu̱nj rihaan soj ado̱nj. Sese si̱j aráj cochro̱j rihanj me soj, ne̱ guun niha̱ꞌ rá soj cuno soj nana̱ se vaa cavi̱i̱ ꞌu̱nj quina̱nꞌ ꞌu̱nj yan ya̱nj Réj Yaꞌanj asuun tza̱j á. ꞌO̱ se síí noco̱o doj mej Réj rihanj na̱nj ado̱nj.
29’Cuano̱ nihánj me se cataj xnaꞌanj ꞌu̱nj rihaan soj da̱j qui̱ránꞌ ꞌu̱nj rej rihaan níꞌ, ga̱a ne̱ asa̱ꞌ quisíj quiránꞌ ꞌu̱nj da̱nj, ga̱a ne̱ cuchuma̱n rá soj ni̱ꞌyaj soj manj chugua̱nj. 30Se̱ caꞌmij queꞌe̱e̱ doj nana̱ rihaan soj a̱ maꞌ. ꞌO̱ se da̱j doj caꞌna̱ꞌ Síí Chre̱e síí uun chij rihaan chumii̱ nihánj, ne̱ a̱ doj se̱ caꞌvee gu̱un chij soꞌ rihanj a̱ maꞌ. 31Tza̱j ne̱ me rá ꞌu̱nj queneꞌe̱n nij síí noco̱ꞌ se‑chre̱j chumii̱ nihánj se vaa aráj co̱chróó ꞌu̱nj rihaan Réj Yaꞌanj, ne̱ cheꞌé dan qui̱ꞌyáj nda̱a vaa caꞌneꞌ soꞌ suun rihanj ado̱nj. Canicu̱nꞌ caya̱ soj, ne̱ cavi̱i̱ níꞌ caꞌa̱nj níꞌ á ―taj Jesús rihaan nij síí tucuꞌyón snana̱ soꞌ a.
© Wycliffe Bible Translators, Inc. 2024 segunda versión electrónica