Lucas 23
23
Zezusi hã, Pilatuhu nho're isabzé
Mateus 27.1-2,11-14; Marcus 15.1-5; Zuwã 18.28-38
1Taha pari, uburé ma tô tiwahutu za'ra. Zezusi hã te oto siwi saprõ, Pilatuhu u. 2Tame ma tô siwi wasu'u wasété, ãne:
— Ã hã aibâ hã romanu norĩ zada, te te da'awada'uri wasété ré, wa tô wasiwi sõpẽtẽ ni. Ma tô te te dawi 're azawi, rob'uiprazé arĩ hã apito Cézaha ma, da te 're sõmri za'ra mono tõ da. 'Râwi te duré 're siwasu'u, Danho'reptui'wa da, 'Re ihâimana u'âsi mono te te ipisutu na hã, duré apito na zama.
3Tahawa, Pilatu hã ma tô sadanha Zezusi, ãne:
— E a hã, Zudeu norĩ nhib'apito.
Tahawa, Zezusi hã te asa tãma tinha, ãne:
— A hã te inha, tane na hã.
4Tawamhã Pilatu hã ma tô tinha sasedoti ipire norĩ ma, duré da'ahâ uptabi na idahâimana za'ra norĩ ma, ãne:
— Marĩ i'upa te ãma sãmri õ di, iwasédé te ãma ihiri da hã, ã hã aibâ ãma hã.
5Tane nherẽ, sadawa za'réi ãna te nharĩ za'ra ãne:
— Õ hã ma dawi ro'wa'rutu a'uwẽ norĩ 'remhã, uburé Zudéa ãma hã. Galiléia ãma ma tô tinhimiroti na ãma sãna'rata. Ta hawi ma wei wi oto ãwa.
6Tawamhã Pilatu, ãne hã te te wapari wamhã, ma tô anha, Zezusi hã Galiléia hawib zô.
7Tawamhã Zezusi, apito Erodi te te 're irob'madâ'â mono zém hawim na, Pilatu hã te te waihu'u wamhã, ma tô ti'ru, Zezusi hã da te dasiwi itẽme saprõni da, Erodihi u. Ta hã, taha bâtâ mono na hã te Zeruzalẽ ãma nhamra. 8Tawamhã Erodi hã, Zezusi te te 'madâ'â wamhã, toi uptabi di, iwasu'u hã te te 're wapari mono wa, duré te te i'madâ'â da si, te te sima 're wẽ mono wa, duréi pese. Te duré te te sima 're wẽ, isõ'a marĩ dama i'manharĩ waihu'u õ hã te te 'manharĩ da, Zezusi hã. 9Tahawa, Erodi hã ma tô sadanharĩ ahâ. Tane nherẽ, Zezusi hã te te ãma sada'âbâ õ di. 10Tawamhã sasedoti ipire norĩ duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ dame ihâimana za'ra hã, ma tô mreme tete na iwasédé hã ãma hiri za'ra, Zezusihi ãma.
11Tawamhã Erodi duré ite dasi'wapéi 'manharĩ'wa norĩ hã ma tô Zezusihi ãma tiwa'ẽ za'ra. Ma tô duré ãma tito za'ra. Da'uza ihâpa iwa'âbâ za'ẽne ma tô tãma sẽrẽ za'ra. Taha pari ma siwi ti'ru, apâ Pilatuhu u da te dasiwi saprõni da. 12Taha bâtâ na hã, Erodi norĩ Pilatuhu me hã, tisiwaihu'u na ma tô sima tihâimana zahuré, iwana ré hã tinhitob'ru na sima 're hâimana zahuré mono nherẽ.
Zezusi hã da te dasiwi wĩrĩ da, Pilatu te te ãma dazazei wa, te te tãma ipisutuzé
Mateus 27.15-26; Marcus 15.6-15; Zuwã 18.39–19.16
13Tawamhã Pilatu ma tô sitẽme da'rã'õtõ, sasedoti ipire norĩ hã duré roti'wa norĩ hã, duré uburé idahâimana za'ra norĩ zama. 14Ãne ma tô tãma nharĩ za'ra:
— Ã hã aibâ hã ma we asiwi i'ãwisi 'wa ĩtẽme. Iwasédé te ãma asiwi ihiri 'wa, romanu norĩ zada, te te ida'awada'uri wasété na hã. Tahawa asõ'a za'ra wa'aba, wa tô sadanharĩ pese. Tane nherẽ, marĩ i'upa hã te ãma sãmri õ di, iwasédé ãma asiwi ihiri aba zéb zarina hã. 15Erodihi zama marĩ i'upa hã te te ãma sõpẽtẽ õ di. Tahawa ma tô apâ wei watẽme satõrĩ za'ra. Tawamhã, ã hã aibâ hã marĩ te te upai õ di, taha zarina da te dasiwi iwĩrĩ da hã. 16Tahawa, taré wa za ti'ru, da te 're pré'é mono da. Taha parimhã wa za tãma rob'ru, oto morĩ da.
17[Pascoa na dato nhisi 're hâimana mono sidâpâsi, Pilatu hã ma tô dazazéb 're, 're isimasa mono hã misi si te te 're azani, da te tiwi 're iwaptẽrẽ za'ra mono zéb zarina.] 18Tawamhã dahârâ na ma tô sãna'rata za'ra ni. Uburé ma tô tahãsi ni, ãne:
— Da te dasiwi wĩrĩre, ã hã aibâ hã. Barabasihi si, wama wazere za'ra na.
19(Barabas hã dazazéb 're, ma tô sẽrẽ ni, Zeruzalẽ ãma romanu norĩ zada, te te da'awada'uri wasété wa, dasi'wapé iwatobro u'âbâ, duré te te da'maiwĩrĩ wa.)
20Tawamhã Pilatu hã ma tô sima wẽ, Zezusihi ma, te te rob'ru da, oto morĩ da. Tahawa ma tô duré apâ timreme na dama sahu, da'ahâ uptabi na idahâimana za'ra ma hã. 21Tane nherẽ, ma tô dahârâ 'rãihâ na tahãsi u'âsi ni, ãne:
— Wedepo'o nhonhi'rãmi na sasõmri! Wedepo'o nhonhi'rãmi na sasõmri!
22Tawamhã si'ubdatõ ãma Pilatu hã ma tô duré dama tinha, ãne:
— E marĩ i'upa te te 'manharĩ bâ. Marĩ i'upa hã te ãma sõpẽtẽ õ di, taha zarina da te dasiwi iwĩrĩ da hã. Wa za ti'ru, taré da te dasiwi 're pré'é mono da. Taha parimhã, wa za tãma rob'ru za, morĩ da oto.
23Tane nherẽ, hârâ nhiptete na te waptẽrẽ u'âsi za'ra, Zezusi hã wedepo'o nhonhi'rãmi na da te dasiwi sasõmri da. Tawamhã idahãsi u'âsi zé hã ma tô siptete na tihâiba. 24Tahawa Pilatu hã wa'a wa, ma tô oto rowairébé, da te dasima iwẽ za'ra zéb zarina, te te dama 'manharĩ da. 25Tawamhã aibâ ma, ma tô oto rob'ru, da te dasima iwẽ za'ra ma. Ta hã aibâ hã ma tô sẽrẽ ni, romanu norĩ zada te te da'awada'uri wasété wa, dasi'wapé watobro wa, duré te te da'maiwĩrĩ wab zama. Tazahã, Zezusi hã ma tô tãma 'ru za'ra, da te dasima iwẽ za'ra zéb uwaibaba da te tãma rob'manharĩ za'ra da.
Zezusi hã, wedepo'o nhonhi'rãmi na da te dasiwi isasõmrizé
Mateus 27.32-44; Marcus 15.21-32; Zuwã 19.17-27
26Tawamhã dasi'wapéi 'manharĩ'wa norĩ hã ma tô oto siwi saprõ, Zezusi hã. Bâdâdi na te te siwi saprõni ré, ma tô siwi sõpẽtẽ, Simau na aibâ nhisi hã. Ta hã Cireni na 'ri nho'õmo nhisi hawimhã, ma tô da'razâ, a'ubuni hawi. Tawamhã ma tô siwi pa'â. Taha pari ma tô wedepo'o nhonhi'rãmi hã tãma hiri za'ra, te te duri da, Zezusihi zarina.
27Tawamhã da'ahâ uptabi na ma tô Zezusihi zarina dasi'ré. Dawazarimhã, te nima norĩ pi'õ norĩ hã dame ai'aba'ré, wawa sina duré pẽ'ẽzé uptabi za'ra sina, Zezusihi ãma. 28Tawamhã Zezusi hã ma tô itẽme aipi'ra za'ra. Te tãma nharĩ za'ra, ãne:
— Pi'õ norĩ, Zeruzalẽ ãma 're i'ai'ubumroi wa'aba mono hã, ĩ'ãma ai'ru'ru wa'aba tõ. Asisô si te za 're ai'ru'ru wa'aba mo, duré ai'ra norĩ zô zama. 29E marĩ wa. Bâdâ hã te za iwa waptãrã, za da te inharĩ za'ra zéb da hã, ãne: “Pi'õ i'ra waihu'u'õ norĩ ma si, 're rowẽ uptabi za'ra mono di, niwa i'ra tãma ipoto za'ra õ norĩ ma hã, duré niwa ti'ra te te iwapsõmri za'ra õ norĩ ma zama.” 30Ãne te za duré nharĩ za'ra ni za, ẽtẽ 'rãihâ ma: “Wanhisiwi airere'e aba!” Tawamhã te za duré nharĩ za'ra ni za, sa'a ma, ãne: “Uburé wazuwa za'ra wa'aba.” 31E marĩ wa. Ãne hã wede iwede wapti'i ma, da te 're rob'manharĩ za'ra mono wamhã, e niha te za bété 're romhâimana, wede iwede 'ré norĩ ma hã.
32Tawamhã Zezusihi me, ma tô aibâ norĩ hã saprõni zahuré ni, da te pãrĩ da. Ta norĩ hã rowasété 'manharĩ'wa zahuré. 33Tawamhã Da'rãihi na romnhisi u oto sihutu wamhã, tame ma tô Zezusi hã sasõmri ni, wede po'o nhonhi'rãmi na. Rob'manharĩ wasété 'wa norĩ zama ma tô isiré sasõmri zahuré ni, ihâiba amo hã isimire niwĩ duré ihâiba amo hã isimi'e niwĩ.
34Tawamhã Zezusi hã Timama wi ma tô rowaptẽ, te te siwi isasõmri norĩ ãma, ãne:
— Ĩmama, iwasédé hã ãma 'madâ'â za'ra tõ, te te i'manharĩ za'ra zé hã te te waihu'u za'ra õ wa.
Tawamhã Zezusihi uza na ma tô ãma sima aipé, ẽtẽ zapotore i'ui'éré ré hã te te nasi sima sãmra wa, isisi nasi iwairébé zarina. 35Zezusi norĩ simnhatã ré hã, ma tô dasiwi 'madâ'â ni. Tawamhã Zudeu norĩ ma roti'wa norĩ hã ma tô Zezusihi ãma tiwa'ẽ za'ra, ãne:
— Oro te te 're da'anho'reptui mono za, pé ãhã na awa'awi hã 'râwi sisõ'reptu, tô sena Danho'reptui'wa da, 'Re ihâimana u'âsi mono te te ipisutu wamhã.
36Dasi'wapéi 'manharĩ'wa norĩ hã te duré nasi itẽme sina rotété za'ra. Te duré nasi ãma tiwa'ẽ za'ra. Uva 'rãi wa'u isé iwa'âbâ surure hã ma tô duré nasi tãma wẽ za'ra. 37Ãne te nasi tãma nharĩ za'ra:
— A hã, tô sena Zudeu norĩ nhib'apito wamhã, ma'ãpé 'râwi asisõ'reptu na.
38Zezusihi 'rã nhisiwimhã, te rob'ui'éré hã da'o, ãne: “Ã hã Zudeu norĩ nhib'apito.”
39Tawamhã rowasété 'manharĩ'wa ihâiba amo hã isiré isa'o hã ma tô Zezusihi ma tinha, te te ãma wasété sina, ãne:
— Oro a hã Danho'reptui'wa za. Ma'ãpé 'râwi asisõ'reptu na, duré wa norĩ hã wanho'reptu na.
40Tane nherẽ, ihâiba amo hã ma tô timreme tãma pẽtẽ, ãne:
— Tô'ã. E 'Re ihâimana u'âsi mono hã asima pipa ã bâ, isiré atâ'â da, da te aima pisutu nherẽ. 41Wama hã rob'manharĩ pipa pisudu hã te i'uwaibaba na tihâiba. E marĩ wa. Wa norĩ hã marĩ iwasété uptabi hã wa te 're a'manharĩ mono wa. Tanei õ di, õ hã. Marĩ iwasédé te te 'manharĩ õ di.
42Taha pari, ma tô Zezusihi ma oto tinha, ãne:
— Zezusi, ma'ãpé ĩ'ãma aipo're pu'u za, apito na oto 're aihâimana mono wamhã.
43Tawamhã Zezusi hã ma tô asa tãma tinha, ãne:
— Tô sena wa za aima waihu'u, ãne. Ã bâtâ na te za oto ĩsiré 're asãmra mo, rowẽ uptabi ãma 'Re ihâimana u'âsi mono 'rata.
Zezusi hã, ipẽ'ẽ si'utõrĩzé
Mateus 27.45-56; Marcus 15.33-41; Zuwã 19.28-30
44Tawamhã oto abzuma wa'wa, robra hã ma tô rob'upsi, uburé daro mono bâ, si'ubdatõ bâtâ pibuzéb u bâdâ isiprazéb u. 45Taha ré hã, bâdâ te te rob'uiwẽ õ di. Tawamhã zazahâ ihâpa ma tô hâihaipo'o iwa'wa, 'Re ihâimana u'âsi mono nhorõwa 'ri 'rãihâ ãma hã. 46Tawamhã Zezusi hã ma tô mreme 'rãihâ na Timama 'mahâ, ãne:
— Ĩmama, asib'rata wa ãma aima tisõ, ĩpẽ'ẽzani hã.
Tawamhã ãne te te nharĩ pari, ma tô oto pẽ'ẽ hai'utõ. 47Tawamhã ãne iromhâimanazé dasi'wapéi 'manharĩ'wa norĩ wada'uri'wa te te 'madâ'â wamhã, ma tô 'Re ihâimana u'âsi mono ãma tiwata, ãne:
— Tô sena tô, ã hã aibâ hã 're imorĩ wẽ!
48Tawamhã ta hã iromhâimanazé, da te 'madâ'â za'ra da, uburé tame da te i'ubumro hã da te 'madâ'â za'ra parimhã, ma tô oto ropé ni, robzei'õ uptabi wa, danho'utu wi dasihâ za'ra mono sina. 49Tazahã, Zezusihi siwaihu'u norĩ, duré pi'õ norĩ Galiléia hawim haré isiré 're inomro mono norĩ hã, ma tô romhâ na ãma tinhopré, uburé iromhâimanazém na hã.
Zezusi hã, da te isẽrẽzé
Mateus 27.57-61; Marcus 15.42-47; Zuwã 19.38-42
50Tawamhã aibâ te 're hâimana, Zuzé na isisi hã. Ta hã aibâ 're imorĩ wẽ, duré i'uwaibaba si 're ihâimana mono, duré Zudeu norĩ ma roti'wa norĩ siré 're ihâimana mono. 51Tane nherẽ, ta hã tisiré norĩ te te ãma saze za'ra õ di, te te siwi irowairébézém na hã, duré uburé marĩ te te i'manharĩ za'ra zém na zama. Ta hã, 'ri nho'u Arimatéia hawimhã, Zudéa ãma, duré 'Re ihâimana u'âsi mono da'ãma 're isib'a'uwẽ mono zéb zô 're isimipari mono. 52Ta hã ma tô mo Pilatuhu u, Zezusihi hâiba te te tiwi waptẽrẽ da. 53Tawamhã Pilatu hã te te tãma 'rui wa, ma tô si'ra, Zezusihi hâiba hã. Zazahâ ihâirã na ma tô ubu. Taha pari, ma tô tisẽ, ẽtẽ zahâpâ ab're siromo wa, niwa ni'wa, da te iwa isẽrẽ õ ãma. 54Ãne hã romhuri zahârizém na ma tô uburé tiromhâiba. Duré romhutu di, dawa'utuzé sabadu iwa iwaptã'ãzéb u hã.
55Tawamhã pi'õ norĩ, Galiléia hawim haré Zezusihi siré 're inomro mono norĩ hã ma tô ai'aba'ré ab're u, Zuzéhé siré. Ab're hã ma tô siwi 'madâ, Zezusihi hâiba, da te isẽrẽzé hã. 56Taha pari, ma tô ai'aba'ré, 'ri tẽme. Tawamhã wedewa'u isadaze hã ma tô sada sa'ra pese za'ra, te te ãma siwi hâiba u'ré da. Tawamhã sabadu na ma tô oto tiwa'utu za'ra, 'Re ihâimana u'âsi mono nhimiroti zahi na rob'ui'éré zarina.
© 2011, Wycliffe Bible Translators, Inc.