Lucas 19
19
Zaqueu hã, danhib'apito ma rob'uiprazé arĩ ubumroi'wa
1Tawamhã Zezusi hã ma tô oto ãzé, Zerico na. Te oto ro'razâ, taha 'ri wa'õtõ na. 2Tawamhã tame te 're sãmra, aibâ isibro pe Zaqueu na isisi hã. Ta hã danhib'apito ma rob'uiprazé arĩ ubumroi'wa norĩ nhib'ihâ'a. 3Ta hã ma tô aré sima wẽ, ni'wa hã zô Zezusi te te 'madâ'â da. Tane nherẽ, sapore wa, te te 'madâ'â waihu'u õ di, duré da'ahâ uptabi wa. 4Tahawa, danhowa ma tô wara. Rob'rã figu wede na ma tô sai'u, taha wa'waibaba Zezusi hã za te te ro'razâri wa. 5Tawamhã Zezusi hã wede zahâpâ u oto wisi wamhã, hâimo ma tô rob'madâ. Tame ma tô Zaqueu 'mahâ, ãne:
— Zaqueu, ma'ãpé waptu na si'ra na. Wa ĩsima wẽ, ã bâtâ na hã asõrõwa ãma ĩnhamra da.
6Tawamhã Zaqueu hã waptu na ma tô si'ra. To sina ma tô 'mazé, tinhorõwa u. 7Tawamhã isõrõwa u isébré na, uburé da te 'madâ'â za'ra wamhã, ma tô dasima ãma wasété za'ra ni, ãne:
— E niha hã ma tô ãzé, aibâ iwasété nhorõwa u.
8Tawamhã Zaqueu hã hâiwi ma tô za. Wanhib'apito ma, ma tô tinha, ãne:
— Apito, ĩwapari! Isibrob'õ norĩ ma, wa za ĩnhibrom na aiwa ãma aipo'o. Ni'wai wi ãma ĩnhimisaihuri wamhã, wa za ãma tãma sisiwi, maparane si'uiwa na.
9Tahawa Zezusi hã ma tô tãma tinha, ãne:
— Ã bâtâ na hã, ãwa 'ri u ma tô danho'reptuzé hã we ãzé. E marĩ wa. Ã hã aibâ zama Abra'ãhã nhihudu 're hâimana mono wa duré. 10Ti'ai ãma Dasiré Ipodo hã ma tô wei mo, siwa'ru 're inomro mono zô 're rĩtĩ mono da, duré te te 're anho'reptui mono da.
Apito, duré 10 na tãma iromhuri'wa norĩ
Mateus 25.14-30
11Tawamhã Zezusi hã ma tô duré romnhimiré'é na rowasu'u, te te inharĩzém na te te iwapari za'ra norĩ ma. Zeruzalẽ 'rata 'râwi oto hâimana wa, ma tô ta norĩ hã ãma rosa'rata za'ra, 'Re ihâimana u'âsi mono da'ãma 're isib'a'uwẽ mono zé hã, za iwisi su'u na hã.
12Tahawa, Zezusi hã ma tô tãma rowasu'u za'ra romnhimiré'é na, ãne:
— Nimahã na aibâ hã, imama sipoto hawi a'uwẽ norĩ pire na 're ihâimana za'ra mono hawimhã, ma tô mo ti'ai wa'õtõ nho'u romhâ na uptabi 're ihâimana mono u, tame si'apito da, taha parip si apâ te te sina siri da, tirob u hã. 13Tawamhã morĩ wana ré, tite romhuri'wa norĩ 10 na ihâiba za'ra norĩ zô ma tô hâ. Hâiba mono bâ ma tô misisi rob'uiprazé isapotore ẽtẽ waipo pré oru 'manharĩ hã tãma sõmri za'ra. Taha pari ma tô tãma nharĩ za'ra, ãne: “Ma'ãpé ã hã rob'uiprazém na, marĩ hã ãma 'manharĩ za'ra wa'aba, ãma sisiwi za'ra wa'aba da, apâ we te ĩsina isirizéb u.”
14— Tane nherẽ, ite ti'ai wa'õtõ nho'õmo ãma hã, te te siwi 'ru ti. Tahawa ma tô isãmrazéb u ti'ai wa'õtõ nho'õmo amoi u dazatõrĩ za'ra, tame apito ma, te te nharĩ za'ra da, ãne: “Wa te wasima wẽ za'ra õ di, ã hã aibâ, wama isi'apito za'ra da hã.”
15— Tane nherẽ, apito hã ma tô pisutu, si'apito da. Taha pari aibâ hã ma tô apâ sina siri, tinhipti'ai u. Tawamhã tãma iromhuri'wa norĩ zô ma tô tihârâ za'ra, rob'uiprazé te te tãma isõmri za'ra norĩ zô, niha te te ãma tãma isisiwi za'ra zô, te te waihu'u da. 16Tawamhã imorĩ'rada hã ma tô itẽme wi. Ma tô tãma wasu'u, ãne: “Apito, rob'uiprazé isapotore ẽtẽ waipo pré oru 'manharĩ ĩma isõmri hã, wa tô ãma aima sisiwi, 10 na.”
17— Tawamhã isib'apito hã ma tô tãma tinha, ãne: “Wẽ uptabi di! A hã romhuri'wa i'aiwẽ! Marĩ surure nherẽ, sena na te ãma aihâiba. Tahawa 10 na 'ri wa'õtõ norĩ 'madâ'â'wa na te za oto 're aihâimana mo.”
18— Tawamhã maparane ãma ma tô duré itẽme wi. Ta hã ma tô duré tãma siwasu'u, ãne: “Apito, rob'uiprazé ĩma isõmri ẽtẽ waipo pré oru 'manharĩ hã, wa tô ãma aima sisiwi, imrotõ na duré.”
19— Tawamhã isib'apito hã ma tô tãma tinha, ãne: “Tane tô. Wa za aima pisutu, 'ri wa'õno hã imrotõ na, 're a'madâ'â mono da.”
20— Tawamhã romhuri'wa ihâiba amo hã ma tô duré itẽme wi. Ta hã ma tô duré tãma siwasu'u, ãne: “Apito, ãhãta ate rob'uiprazé isapotore. Zazahâ na, wa tô ubu. Taha pari wa tô simi'u. 21Wa tô aima ĩpahi, a hã aibâ i'aihâimana tete na ĩma aiwaihu'u pese wa, duré atei õ nherẽ, dawi 're i'azani mono na hã, duré nimame i'a're õ ãma 're i'aroptehâri mono na hã.”
22— Tawamhã isib'apito hã ma tô tãma tinha, ãne: “A hã romhuri'wa i'aiwasétére! Wa za ai'ãma rowairébé niha hã, ĩma inharĩzéb zarina. Aima ĩwaihu'u pese di pâ, ĩhâimana tete na hã duré ĩtei õ nherẽ, te dawi 're i'azani mono na hã duré te 're iroptehâri mono na hã nimame te 're irob're mono õ ãma. 23Tane ze te bâ, e niha bâ bété ĩte rob'uiprazé hã sẽrẽ õ di, rob'uiprazé ubumrozéb 're#19.23 Rob'uiprazé ubumrozé hã “Banco” na hã.. Tawamhã apâ we ĩwisi wamhã, wa aré ti'â, rob'uiprazé ubumrozé te te ãma ĩma isisiwizéb zu.”
24— Tawamhã i'rata isimasam norĩ ma, ma tô tinha, ãne: “Ma'ãpé rob'uiprazé isapotore tiwi wazere aba, 10 na rob'uiprazé tãma ihâimana ma, sõmri aba da.”
25— Tane nherẽ, ma tô siwi sada'â, ãne: “Apito, oro ite hã 10 na rob'uiprazé isapotore hã tãma hâimana siromo za'ra za.”
26— Tawamhã isib'apito hã ma tô duré tãma nharĩ za'ra, ãne:
— “Tô sena wa za aima waihu'u za'ra wa'wa, ãne: Ni'wai ma marĩ hã sa'ẽtẽ na hâimana wamhã, te za duré ãma tãma sisiwi, sa'ẽtẽ na tãma hâimana da. Tane nherẽ, ni'wai ma hâimana õ wamhã, suru na tãma hâimana nherẽ, te za tô tiwi wazere ni. 27Tahawa, ma'ãpé ĩnhitob'ru norĩ hã we simroi wa'aba mono, apito na tãma 're ĩhâimana za'ra mono da, te te sima iwẽ za'ra õ hã. Taha pari, ma'ãpé simroi wa'aba ĩnho're.”
Zezusi hã, Zeruzalẽ u oto iwisizé
Mateus 21.1-11; Marcus 11.1-11; Zuwã 12.12-19
28Tawamhã Zezusi hã ãne na te te tãma rowasu'u za'ra parimhã, isõwab za'ra ma tô oto mo, Zeruzalẽ u. 29Tawamhã Olivera ẽtẽ 'rãihâ nhisi 'rata Betifazé u, duré Betãnia u sihutu wamhã oto, Zezusi hã ma tô maparane sisõwa satõrĩ zahuré isiré 're inomro mono norĩ siré hã, 30te te tãma iroti zahuré ré, ãne:
— Mo oto ane wa'aba, 'ri wa'õno wanhowab za'ra ihâimana u. Azasi aba wi, te za awaru po'repore ihâiba tébre hã isõpẽtẽ 'wa za, butu wazi na isa, zahadu ni'wa ãma isãmra õ hã. Ta hã wasihui wa'aba za, we ĩma saprõni aba da. 31Ni'wa hã te te ãma asadanharĩ aba wamhã, ãne: “E marĩ da, te iwasihui wa'wa”, ãne tãma wasu'u wa'aba za: “Wanhib'apito te sô amnhasi”.
32Tawamhã oto neb zahuré wamhã, ma tô awaru po'repore hã sõpẽtẽ zahuré, Zezusi te te ãma tãma irowasu'u zahuré zéb zarina. 33Tawamhã awaru po'repore ihâiba té hã te te wasihu zahuré ré, te itede'wa norĩ hã sadanharĩ zahuré, ãne:
— E marĩ da, te awaru po'repore hã iwasihui wa'wa.
34Tawamhã ma tô sada'âbâ zahuré, ãne:
— Rowahutu'wa hã te sô amnhasi.
35Tahawa, awaru po'repore ihâiba té hã ma tô oto saprõni zahuré, Zezusihi ma. Ti'uza ihâpa na ma tô bazadâ zahuré. Zezusi hã ma tô duré pawaptob zahuré, iba nhisiwi ãma sãmra da hã. 36Tawamhã ãma morĩ wamhã oto, da'uza ihâpa na ma tô da te tãma waptâ za'ra, bâdâdi na. 37Tawamhã Zezusi hã ẽtẽ 'rãihâ Olivera na si'razéb u te te oto sina rosahutu wamhã, uburé da'ahâ uptabi na isazei'wa norĩ hã ma tô ãma sãna'rata za'ra ni, dato sina, 'Re ihâimana u'âsi mono ãma dawata za'ra mono na hã, duré damreme 'rãihâ sina, uburé marĩ dama i'manharĩ waihu'u'õ hã da te i'madâ'â za'ra zém na, ãne:
— 38Apito, Uburé Danhib'apito nhisi na we imorĩ hã, 'Re ihâimana u'âsi mono iwẽ hã te te tãma 're ipisutu u'âsi mono da si, iwẽ hã! Hâiwa ãma rowẽ u'â hã 're isa'wari mono da si. Duré 'Re ihâimana u'âsi mono ãma zama, 're wawata za'ra wa'aba mono, hâiwa ãma 're isãmra mono ãma!
39Tawamhã nima norĩ farizeu norĩ dawazari ihâimana za'ra hã ma tô Zezusihi ma nharĩ za'ra, ãne:
— Rowahutu'wa, ma'ãpé asazei'wa norĩ ma nharĩ za'ra na, hãsi mono tõ da.
40Tahawa Zezusi hã ma tô ãma sada'âbâ za'ra, ãne:
— Tô sena wa za aima waihu'u za'ra wa'wa, ãne: Ari'iwi si'aba'ré da wamhã, ẽtẽ norĩ hã te za hãsi, isibrob'reb za'ra.
Zezusi hã isiwa'õzé, Zeruzalẽ ãma pẽ'ẽzé wa
41Tawamhã Zezusi hã Zeruzalẽ u te te oto rob'umhutu wamhã, ma tô 'madâ, 'ri wa'õno hã. Tahawa ma tô aiwa'õ, ãma pẽ'ẽzé wa. 42Tahawa, ma tô tinha, ãne:
— Zeruzalẽ! Ãhã na aima waihu'u pese 'wa'âhã, sô i'asimnhasi na hã rowẽ aima hâimana da hã! Tane nherẽ, ãhã na hã, ta hã aima 'madâ'â waihu'u õ di, simi'uri na aiwi hâimana wa. 43Niwap si, bâdâ hã te za wi, asitob'ru norĩ hã wa'ra 'rãihâ te te siwi i'manharĩ na, za te te siwi i'ai'uirĩzé hã. Te za siwi ai'uirĩ ropâ, ai'a're si'uiwa na hã. 44Tawamhã ta norĩ hã te za uburé siwi aipru pese. Duré uburé aiwa 're isi'ubumroi mono norĩ zama te za siwi uprosi. Ẽne hã sisisiwi simi'wara õ di za oto, aima sadaihu'u õ wa, bâdâ 'Re ihâimana u'âsi mono we imorĩzé hã te te da'anho'reptu da hã.
Zezusi hã te te idazate mono zé, 'Re ihâimana u'âsi mono nhorõwa 'ri 'rãihâ hawi
Mateus 21.12-17; Marcus 11.15-19; Zuwã 2.13-22
45Tawamhã Zezusi hã ma tô ãzé, 'Re ihâimana u'âsi mono nhorõwa 'ri 'rãihâ u, 'ri 'wawi wa'ra 're. Tame ma tô ta hawi te te iwano'õ mono na sãna'rata, te te irowede za'ra norĩ hã. 46Ãne te tãma nharĩ za'ra:
— 'Re ihâimana u'âsi mono mreme na Ibaihâ Iwazé pese na rob'ui'éré hã te tinha, ãne: “Ĩnhorõwa hã te za da te dasiwi 're sisi, da te ĩwi 're irowaptẽrẽ za'ra mono zém na.” Tane nherẽ, a norĩ wa'wa hã ma tô isimisaihuri norĩ sima'urizém na asiwi i'manharĩ 'wa.
47Tawamhã bâtâ sidâpâsi, ma tô Zezusi hã te te dama 're rowahutu, 'Re ihâimana u'âsi mono nhorõwa 'ri 'rãihâ ãma hã, 'ri 'wawi wa'ra 're. Tane nherẽ, sasedoti norĩ nhib'ihâ'a norĩ hã, duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã duré dama roti'wa norĩ zama, ma tô sô 're sõpré, te te siwi wĩrĩ da hã. 48Tane nherẽ, te te siwi wĩrĩ waihu'u õ di, niha te te siwi iwĩrĩzé hã, te te sada 'masãmri za'ra õ wa, imreme hã da te 're wapari pese za'ra mono wa.
© 2011, Wycliffe Bible Translators, Inc.