Lucas 14
14
Zezusi hã, sabadu na farizeu nhorõwa ãma aibâ te te ipesezé
1Tawamhã nimahã sabadu na, Zezusi hã ma tô ãzé, farizeu dama ipire nhorõwa u, isiré sa da. Tawamhã Zezusi hã te dasiwi 'madâ'â pese ni. 2Tame te aibâ hã isõ're na tihâiba, ihâiba duptoi mono hã. 3Tawamhã Zezusi hã ma tô sadanharĩ za'ra farizeu norĩ duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ zama, ãne:
— E i'ru zahi, sabadu na da te 're idapese za'ra mono da hã. E niwamhã mare di.
4Tane nherẽ, te te ãma siwi sada'âbâ õ di. Tahawa Zezusi hã aibâ ma tô pa'â. Ma tô pese. Taha pari ma tô oto tãma rob'ru. 5Tawamhã ma tô sadanharĩ za'ra, ãne:
— Ai'ra wa'wa hã duré niwamhã ate wa'wa powawẽ hã â zô ab're 're 'maiwaptã'ã wamhã, e waptu na wazere aba õ di za, ãne hã sabadu na romhâimana nherẽ.
6Tawamhã te te ãma siwi sada'âbâ waihu'u õ di.
Dawapu na dama 're idahâimana za'ra mono zé, duré danhorõwa u da te 're idawaibui wẽ mono zé
7Tawamhã Zezusi hã, sô idahãsi norĩ, dama ipire norĩ simasisizéb zô sima sô isõpré na te te a'madâ'â wamhã, ma tô rowasu'u na tãma ãma romnhimiré'é za'ra, ãne:
8— Ni'wa hã dasina damro wa, dato ihâimanazéb u asô hârâ aba wamhã, dama ipire norĩ simasisizém na asãmra aba tõ. E marĩ wa. Niwamhã asô ihârâ 'wa hã ni'wa te te po're pu'u õ'umnhasite, asipai u wa'aba dama ipire hã. 9Tawamhã asô ihârâ 'wa hã, te te aima nharĩ aba õ'umnhasite, ãne: “Ãhã ma, tãma ai'ré na.” Tawamhã te za aiwi tirowazé wa'wa. Taha pari dama iwapu nhamrazéb ãma asãmra aba õ'umnhasite. 10Tahawa, ni'wa asô hârâ wa'aba wamhã, da'rãsutu'u asãmra wa'aba. Ãne wamhã, asô ihârâ 'wa hã te za ai'mahârâ 'wa, ãne: “Ĩsiwaihu, ãwa we asãmra, danhamrazé iwẽ ãma.” Ãne wamhã, dama aipire ne te za aihâiba, sô idahãsi norĩ nho'a hã. 11E marĩ wa. Ni'wa hã 'râwi te te sina 're hâimo mono wamhã, 'Re ihâimana u'âsi mono hã te za te te 're sisém nomri. Tanei õ di, ni'wa hã 'râwi te te sina 're ti'awi mono wamhã, 'Re ihâimana u'âsi mono hã te za tãma pisutu, pire na 're hâimana mono da.
12Taha pari, Zezusi hã ma tô tinha, aibâ sô ihârâ ma, ãne:
— Abzuma wa'wa dasa hã duré niwamhã barana 're 'manharĩ mono wamhã, asiwaihu'u norĩ zô si 're aihârâ za'ra mono tõ, duré asisãnawã norĩ zô si, duré asiwadi norĩ zô hã, duré asababa isibro pese norĩ zô zama. E marĩ wa. Ta norĩ hã niwamhã duré asô hârâ waihu'u pese za'ra di. Tawamhã te za aima wa'âbâ za'ra, aihâimana wẽ na tãma i'manharĩ za'ra zé hã. 13Tazahã, dasa dama 're 'manharĩ mono wamhã, isibrob'õ norĩ zô si 're aihârâ mono, duré imorĩ wasété norĩ zô, duré imorĩ'õ norĩ zô, itob'a norĩ zô zama. 14Ãne wamhã, aima 're rowẽ uptabi mono di za. E marĩ wa. Ta norĩ hã niha te te aima wa'âbâ waihu'u za'ra õ wa, za. Tawamhã 'Re ihâimana u'âsi mono hã i'uwaibaba na 're ihâimana za'ra mono norĩ te te i'ahâiwa'utuzéb ãma si te za aima wa'â.
Dasa isa'ẽne, za ihâimanazé
Mateus 22.1-14
15Tawamhã aibâ, sa da, meza na dame isãmra hã, ãne te te wapari wamhã, ma tô Zezusihi ma tinha, ãne:
— Tãma 're rowẽ uptabi za'ra mono di za, saihuri da, isisimro norĩ ma hã, dasa isa'ẽne za ihâimana ãma hã, 'Re ihâimana u'âsi mono da'ãma 're isib'a'uwẽ mono zéb ãma hã.
16Tawamhã Zezusi hã ma tô romnhimiré'é na tãma rowasu'u, ãne:
— Aibâ hã ma tô robza'ra pese, dasa isa'ẽne hã te te 'manharĩ da. Da'ahâ uptabi na ma tô dazô hâ. 17Tawamhã bâdâ oto wisi wamhã, tite romhuri'wa hã ma tô satõ, sô ihârâ za'ra norĩ ma, te te tãma rowasu'u za'ra da, ãne: “We oto ai'aba'réi wa'aba! Uburé robza'ra pese di oto!”
18— Tane nherẽ, ma tô hâiba mono bâ tãma siwasu'u za'ra, si'u'razéb da. Imorĩ'rada hã ma tô tãma siwasu'u, ãne: “Ti'a wa 'mai'uipra. Tamomo wa za mo. Te sabui hâ. Tahawa, ma'ãpé ĩ'ruiwapari tõ.”
19— Ihâiba amo hã ma tô duré tãma siwasu'u, ãne: “Wa uipra za'ra imrotõ na powawẽ iba'u hã. Tamomo wa za mo te sabu za'ra da, te te romhuri wẽ za'ra zô. Tahawa, wa aiwi waptẽ, ĩ'ruiwapari tõ.”
20— Ihâiba amo hã te duré tãma siwasu'u, ãne: “Nimosi wa ĩmro. Tahawa ãma ĩmorĩ waihu'u õ di.”
21— Tawamhã romhuri'wa hã ma tô apâ sina siri. Tinhib'apito ma, ma tô rowasu'u pese. Tahawa, isib'apito hã sib'rui wa, ma tô tãma rob'ru, ãne: “Mo oto waptu na dazô 're aimorĩ, 'ri nhi'riti na, duré 'ri nhi'riti 'rare na, isibrob'õ norĩ hã we simroi mono da, duré imorĩ wasétére norĩ hã, duré itob'a norĩ hã duré ihi'ré norĩ zama.”
22— Taha pari, romhuri'wa hã ma tô tinha, tinhib'apito ma, ãne: “Apito, ĩma i'ruzé hã wa tô 'manha. Tane nherẽ, zahadu rob're za'ẽtẽ di.”
23— Tahawa, isib'apito hã ma tô duré tãma tinha, ãne: “Tane wamhã, ma'ãpé duré bâdâdi mono bâ dazô 're aimorĩ. Da'anhopẽtẽ mono wamhã, dama arob'rui mono, we dasi'aba'ré da, ĩnhorõwa hã 'masisi pese da. 24Tô sena wa za aima waihu'u za'ra wa'wa, ãne: Sô ĩhârâ 'rata za'ra norĩ hã ĩte dasa isa'ẽne te te ipibu za'ra da hã, mare di za!”
Zezusihi zazei'wa na, 're idanomro mono zé
Mateus 10.37-39
25Tawamhã nimahã bâtâ na, da'ahâ uptabi hã te Zezusihi zarina ai'aba'ré ni. Tahawa ma tô datẽme aipi'ra. Ãne te dama tinha:
26— Ni'wa hã ĩsiré 're morĩ da, we ĩtẽme morĩ nherẽ, ĩzawi nhipai u timama, duré tina, duré timro, duré ti'ra norĩ, duré tisisãnawã norĩ, duré tihidiba norĩ duré tihâimanazéb zama te te sima 're azawi mono wamhã, ta hã ĩsiré 're imorĩ da hã waihu'u õ di. 27Ni'wa hã tiza'ozé wedepo'o nhonhi'rãmi te te âri õ wamhã, duré ĩzarina 're morĩ õ wamhã, ta hã ĩsiré 're imorĩ da hã waihu'u õ di.
28— Ni'wa hã 'ri 'rãihâ te te 'ri da wamhã, e imorĩ'rata na za sãmra ã bâ a'â, te te sa'rata wẽ da, niha iwa'â hã za watobro zô, duré rob'uiprazé hã iwa za si'utõrĩ zô. 29Ãne hã ni'wa te te 'manharĩ õ wamhã, 'ri na'rata nhana'rada hã te te 'manharĩ nherẽ, 'ri hã te te uprosi waihu'u õ di za. Tawamhã uburé nasi te te i'madâ'â za'ra hã te za nasi ãma tito za'ra za. Ãne te za nasi tãma nharĩ za'ra: 30“Ã hã aibâ hã 'ri 'manharĩ na ma ãma sãna'rata. Tane nherẽ, te te 'ri 'manharĩ uprosi waihu'u õ di.”
31— Duré niwamhã apito hã, tite dasi'wapéi 'manharĩ'wa norĩ 10 miu na ihâiba za'ra ré dasi'wapé zô watobro da wamhã, tane nherẽ, i'wapéi'wa da hã, 20 miu na dasi'wapéi 'manharĩ'wa sada hâimana za'ra wamhã, e za a'â sãmra ã bâ, te te ãma rosa'rata pese da hã, 10 miu na te te ãma ai'uté waihu'u pese zô, 20 miu na ihâimana za'ra ãma hã. 32Ãne hã te te 'manharĩ õ wamhã, sada ihâimana ma hã romhâ na hâimana ré, te za tite romreme 'wapéi'wa hã itẽme satõ, apâ rowẽ na siré 're hâimana zahuré mono da, si'wapéi ãna.
33— Ãne za duré a norĩ wa'wa hã, uburé asibro hã 're rẽme za'ra wa'aba mono õ wamhã, ĩsiré 're anomro waihu'u aba mono õ di za.
Sa dasai warĩrĩzé
Mateus 5.13; Marcus 9.50
34Tawamhã Zezusi hã te duré dama rowasu'u, ãne:
— Sa hã iwẽ, dasai warĩrĩzéb da hã. Tane nherẽ, siwamnarĩ wamhã, e niha apâ i'manharĩzé hã, wẽ na apâ hâimana da hã. 35Ti'ai ma hã wasété di za, oto duré ti'ai wazarizé ma zama. Tawamhã taré te za oto me ni. Asimiparizé hã aima hâimana za'ra wa'aba wamhã, ma'ãpé wapari za'ra wa'aba!
© 2011, Wycliffe Bible Translators, Inc.