Lucas 13
13
E dawasété wi, te za 're dasipizari za'ra, e niwamhã õne haré te za 're dadâ'â za'ra
1Tawamhã taha bâtâ na, ni'wam norĩ tame ihâimana za'ra hã ma tô Zezusihi ma rowasu'u za'ra, Pilatu hã nima norĩ, Galiléia hawi a'uwẽ norĩ te te isimro na hã, danhimizama na 'Re ihâimana u'âsi mono ma, ãma tãma sõprub za'ra ré. 2Tawamhã Zezusi hã ma tô aibâ norĩ ma nharĩ za'ra, ãne:
— E te ãma irosa'rata za'ra wa'wa, Galiléia hawim norĩ ãma, danhipai u tiwasédé te te 'manharĩ za'ra wa, ãne hã te te irobzépata za'ra na hã. 3Mare di! Tô sena wa za ãne aima waihu'u za'ra wa'wa: Aiwasété na asisãmri za'ra wa'aba wa, 'Re ihâimana u'âsi mono u aipizari za'ra wa'aba õ wamhã, ta norĩ isi'utõrĩ ne, te za uburé ai'utõrĩ 'wa za. 4E niwamhã te duré ãma irosa'rata za'ra wa'wa, aibâ norĩ 18 na ihâiba za'ra norĩ isi'utõrĩ ãma hã, Siloé ãma 'ri 'rãihâ isisiwib za'ra sime wamhã. E ta norĩ hã danhipai u tiwasédé hã te te 'manharĩ za'ra wa, uburé Zeruzalẽ ãma 're idasi'ubumroi mono norĩ nhipai u. 5Mare di! Tazahã, aiwasété na asisãmri za'ra wa'aba wa, 'Re ihâimana u'âsi mono u aipizari za'ra wa'aba õ wamhã, aibâ norĩ isi'utõrĩ ne, te za tô uburé ai'utõrĩ 'wa za.
Rob'rã figu wede i'rãi õ
6Tawamhã Zezusi hã ma tô tãma rowasu'u za'ra, romnhimiré'é na, ãne:
— Aibâ te, uva 'ru wazarimhã, te rob'rã figu wede hã 're sa. Tawamhã nimahã bâtâ na ma tô mo, i'rã zô rĩtĩ da. Tane nherẽ, i'rã hã te te 'masãmri õ di. 7Tahawa, ma tô tinha buru 'madâ'â'wai ma, ãne: “Si'ubdatõ ma tô ĩ'ãma tiwahu, rob'rã figu wede u, i'rã zô nasi te sabui ré hã. Tane nherẽ, 'rãi õ u'âsi di. Tahawa, ma'ãpé sizâri, te te ro'wa'rutu tõ da!” 8Tane nherẽ, tãma buru 'madâ'â'wa hã ma tô sada'â, ãne: “Apito, a'â sa duré, misi wahum na. Wa za ti'a zu, imana wawimhã. Duré ti'ai wazarizém na wa za tãma ti'ai waza za. 9Wahub amo na 'rãi wamhã, wẽ di za. Oto 'rãi õ wamhã, te za ĩma i'ru za, te sizâri da.”
Zezusi hã, pi'õ isihâbâ te te ipesezé, sabadu na
10Tawamhã nimahã sabadu na Zezusi hã te duré dama rowahutu, Zudeu norĩ te, rowahutuzéb ãma. 11Tame te pi'õ hã dame tihâiba, 18 na ãma iwahu hâzé ré 're hâimana mono ré hã, wa'uburé iwa 're hâimana mono wa. Tahawa sihâpâ na te 're mo. Wãi wahutu waihu'u õ di. 12Tawamhã Zezusi hã te te 'madâ'â wamhã, dawa'wa u ma tô sô hâ. Ãne te tãma tinha:
— Pi'õ, aihâzé wi, te za oto asima iwẽ na 're aihâimana mo.
13Tawamhã tinhib'rada hã ma tô ãma tino. Tahawa awa'awi pesere ma tô wãi wahudu. Taha pari 'Re ihâimana u'âsi mono ãma te tiwata. 14Tane nherẽ, rowahutuzé 'madâ'â'wa hã ma tô tizahi, Zezusi hã sabadu na te te pese wa. Tahawa ma tô ãne dama tinha:
— Imrotõ na bâdâ hã te 're hâimana za'ra, romhurizéb da hã. Taha bâtâ na si te za we 're anomro aba mo, da te 're aipese za'ra wa'aba mono da hã. Mare di, sabadu na hã.
15Tawamhã Wanhib'apito hã ma tô sada'â, ãne:
— Aihâimana si'amoi pese na 're i'aihâimana za'ra wa'aba mono norĩ! E sabadu na, ate za'ra wa'wa powawẽ iba'u hã duré niwamhã awaru po'repore hã, wa'ra hawi 're wasihu za'ra wa'aba mono a bâ, â te te 're âhuri mono da, 're simroi wa'aba mono da hã. 16Tawamhã, ã hã pi'õ Abra'ãhã nhihudu hã, Satanasi 18 wahum na te te 're itété mono hã, e sabadu na te te pese ãna, te te 're itété mono wi hã.
17Tawamhã Zezusi hã ãne te te nharĩ wamhã, i'ruiwapari'wa norĩ hã ma tô aséb za'ra. Tane nherẽ, da'ahâ hã te ãma dasima rowẽ pese za'ra ni, marĩ iwẽ te te 're i'ab'manharĩ mono zém na hã.
Romnhamare mostarda na, isisi na romnhimiré
Mateus 13.31-33; Marcus 4.30-32
18Tawamhã Zezusi hã te duré dama rowahutu, ãne:
— E marĩ ne, aiwa 'Re ihâimana u'âsi mono da'ãma 're isib'a'uwẽ mono zé hã. E marĩ na, wa za ãma romnhimiré'é. 19Ta hã aiwa, romnhamare mostarda na isisi ne, aibâ tiburu ãma te te i'a're ne hã. Prédu wamhã, ma tô ti'rãihâ pese. Wede ne ma tô tihâiba. Tahawa, si norĩ hã ma tô tizasi hã sima 'manharĩ za'ra, ipanhipti na.
20Tawamhã ma tô duré dazadanharĩ zahu, ãne:
— E marĩ na, wa za duré ãma romnhimiré'é, 'Re ihâimana u'âsi mono da'ãma 're isib'a'uwẽ mono zém na hã. 21Ta hã aiwa pi'õ hã i'u'ẽtẽ wapu mapuzém na amnho trigu za te te iwazari ne sa'ẽtẽ na, uburé te te iwazari pese zéb u.
'Ridawa i're su'ure
Mateus 7.13-14,21-23
22Tawamhã Zezusi hã Zeruzalẽ u morĩ wa oto, ma tô te te dama rowahutu 'ri nho'õmo mono na, duré 'ri wa'õtõ mono na zama. 23Tawamhã ni'wa hã ma tô sadanha, ãne:
— Apito, e da'umro na si te za danho'reptuzé hã dasina uwaimrami za'ra ni.
Tahawa, Zezusi hã ma tô uburé dama tinha, ãne:
24— Ma'ãpé, sada 're asiptete za'ra wa'aba mono, 'ridawa i're su'ure na 're asisisi aba mono da hã. Tô sena wa za ãne aima waihu'u za'ra wa'wa: Da'ahâ na te za da te dasima 're wẽ za'ra, iwa 're danhisisi mono da. Tane nherẽ, 're danhisisi waihu'u mono õ di za.
— 25'Ri tede'wa hã nimahã na 'ridawa te te sitob da, sô wahutu wamhã, rowi te za aimasa wa'wa. Tawamhã te za nasi i'ridawa ta'a za'ra wa'wa sô. Ãne te za nasi asiwi i'mahârâ 'wa: “Apito, ãma wama 'ridawa za'ra na.” Tane nherẽ, te za ãne asada'âbâ za'ra wa'wa: “Ĩma aiwaihu'u za'ra wa'aba õ di. E ma hawimhã a norĩ wa'wa hã.” 26Tawamhã ãne te za tãma asiwasu'u za'ra wa'wa: “Wa norĩ hã wa tô asiré 're wasaihuri. Wate 'ri nhi'riti ãma te duré 're irowahutu mo.” 27Tane nherẽ, te za ãne aima nharĩ za'ra wa'wa: “Ĩma aiwaihu'u za'ra wa'aba õ di, nima hawim na hã a norĩ wa'wa. Mo oto uburé ĩnhiti ai'aba'réi wa'aba, marĩ iwasété si 're i'manharĩ za'ra wa'aba mono hã.” 28Tawamhã Abra'ã norĩ hã, Izaqui, Zaco duré uburé 'Re ihâimana u'âsi mono zadawa 'mahârâ'wa norĩ hã, 'Re ihâimana u'âsi mono da'ãma 're isib'a'uwẽ mono zéb ãma te za i'madâ'â za'ra wa'wa. Tane nherẽ, a norĩ wa'wa hã rob u te za asãmra wa'aba ni za. Tawamhã te za 're ai'ru'ru u'âsi wa'aba mo. Te za duré 're ai'wa hi sitete u'âsi za'ra wa'aba mo. 29Da'ahâ na te za aihutu ni, bâtâ pusizém hawimhã, duré bâtâ zasizém hawimhã, duré hâiwa nhimire hawimhã duré hâiwa nhimi'e hawib zama. Tawamhã ta norĩ hã te za ai'ubumro, saihuri da, 'Re ihâimana u'âsi mono da'ãma 're isib'a'uwẽ mono zéb ãma hã. 30Tahawa, ãhã na da'rãsutu'u 're ihâimana za'ra mono hã, imorĩ'rata na te za oto tihâimana za'ra za. Duré ãhã na imorĩ'rata na 're ihâimana za'ra mono hã, da'rãsutu'u te za oto tihâimana za'ra za.
Zezusi hã, Zeruzalẽ ãma ipẽ'ẽzézé
Mateus 23.37-39
31Tawamhã tô taha bâtâ pibuzém na awa'awi, nima norĩ farizeu norĩ hã ma tô 'râwi sina rotété za'ra Zezusihi u. Ãne ma tô tãma rob'ru za'ra:
— Mo oto aimorĩ ã hawi, nimomo. Apito Erodi hã te sima wẽ, te te aiwĩrĩ da.
32Tawamhã Zezusi hã ma tô asa tãma rob'ru za'ra, ãne:
— Mo oto ai'aba'réi wa'aba, tãma ĩzadawa wasu'u za'ra wa'aba da, wapsã wawẽre ne 're imorĩ ma, ãne: Ãhã na hã duré awẽmhã wa za wa'uburé hã dama anhamra. Wa za duré da'apese. Tawamhã si'ubdatõ bâtâ ãma wa za 'rãsutu, ĩnhimiromhuri hã.
33— Tane nherẽ, wa amnhasi ãhã na ĩmorĩ na te ãma uzusi da, duré awẽmhã, duré awẽ amo na hã. E marĩ wa. 'Re ihâimana u'âsi mono zadawa 'mahârâ'wa hã, da te 'maiwĩrĩ waihu'u õ wa za, Zeruzalẽ nhiti hã.
34— Zeruzalẽ, Zeruzalẽ, a hã te 're i'anhimroi mo, 'Re ihâimana u'âsi mono zadawa 'mahârâ'wa norĩ hã! Ẽtẽ na te duré 're i'anhimroi mo, 'Re ihâimana u'âsi mono timreme 'wapéi'wa te te atẽme 're i'azatõrĩ mono hã! Wa tô aré õne u'â te ĩsima 're wẽ u'âsi, uburé ai'ra norĩ hã te ubumro da, si'a hã ti'ra zawi te, 're ipapo za'ra mono ne. Tane nherẽ, asima wẽ za'ra wa'aba õ di. 35Tahawa, asõrõwa za'ra wa'aba na, ni'wa hã ãma sapa'a õ di za oto. Tô sena wa aima waihu'u za'ra wa'wa: Asiwi ĩ'madâ'â aba õ di za oto, ãne inharĩ za'ra wa'aba zéb u: “Uburé Danhib'apito nhisi na we imorĩ ma hã tãma 're irowẽ uptabi mono da si, iwẽ hã!”
© 2011, Wycliffe Bible Translators, Inc.