مَرقُس 7
7
چَه آم نِجسَ مِهِه
1اِسگَه وخدی گه شیخَل فرقَه فَریسی وَه‌گَرد بِری اژ مَلِمَل تورات گه اژ شیَر اورشلیم هاتوئین، جیَم بین اَرتَک عیسی 2دییو گه بِری اژ شاگردَل عیسی وَه دَسَل نِجس، یانی نَشوریا، خوراکَ میرِن. 3اَرِیَگه فَریسیَل ئو هَمیش کُل یهودیَل، مِطابق رِسیم شیخَل تا وخدی گه دَسَل ووژو خو نَشورِن، خوراک نِمیرِن. 4وخدی اژ بازارَ مان، تاگَه ووژو خو شِفتِ‌شور نَهَن چیئی نِمیرِن. ئو رِسیمَل فِرِه‌ی‌تِریشَ مارِن‌َ جا، اِجور شورین پیالَه‌ل، دیگَل ئو حاجَتَل مسی ئو صندلیَل. 5اَسَه فَریسیَل ئو مَلِمَل تورات اژ عیسی‌ئو پِرسی: «اَرِه‌چَه شاگردَلِت مِطابق رِسیم شیخَل رفدار نِمَهَن، ئو وَه دَسَل نِجس خوراکَ میرِن؟» 6عیسی جوواو داتی: «اِشعیا پِخَمَر اِبارَه هُمَه ریاکارَل چَنی خو پیشگوئی کِردی! هُنَ گه نُیسیاءَ،
«”ایی قومَ وَه زوئونو قُرپَ ماوژِنَ مِه،
مِنتائای دِلو اژ مِه دویرَ.
7اونَل وَه باطل مِنَ مَپِرَسِن،
ئو تیَلیمو چیئی بِخِر اژ حکمَل بشری نیَ.“
8هُمَه فِربونَل خداتو ناسِ لا ئو رِسیم بشریَ مارینون‌‌َ جا.»
9اَسَه وِتیَ بینو: «هُمَه هَراَ زِرِنگی فِربو خدا ردَ مِهِینو تاگَه رِسیم ووژتو پایار بِهِینو! 10اَرِیَگه موسیِ پِخَمَر وِتی، ”عزّت بِن اَر باوَه دا ووژِت،“ ئو هَمیش ”هر کی دُشمین بیَ باوَه یا دا ووژ، باس بِکُشِری.“ 11مِنتائای هُمَه موشینو اَرّ کسی وَه باوَه یا دا ووژ بوشی: ”هر یاری‌ای گه اژ مِه وَه هُمَه مَرَسیا، وَخمَ، -یانی دامَسَ خدا-“ 12اِسَه هُنَ نِمِیلینو هُیچ کاری اَرِه باوِه ئو دای بِهِه. 13هُمَه هَرهُنَ وَه رسمِ‌رِسیم ووژتو، گه اونِلَ مِینونَ کسَلی‌تِریش، کلوم خدا باطلَ مِهِینو ئو کارَل فِرِه‌ی اِجور یَه اَنجومَ مِینو.»
14عیسی یِگِل‌تِر مردِم هِنا کِردی اَرِه تک ووژ ئو وِتی: «کُلتو گوش بِگِرنَ مِه ئو یَه بفیَمِن: 15هُیچی نیَ گه اژ در باءَ دَرین آم‌اِر، ئو بتونی او نِجس کِ، بلکِم اَ چیئَه گه اژ دَرین آمَ ماءَ دِریر اَوَه‌‌سَ گه نِجسَ مِهِیتی. 16[هر کی گوش اَرِه شِنَفتِن دیری، گوش بِگِری!]»
17دُما یَگه عیسی اژ مردِم جیا بی ئو چی اَرِه مال، شاگردَلی میَنا ایی مَتَلونَ اَژی پِرسی. 18عیسی وِتیَ بینو: «یانی هُمِه‌یش نِمَفیَمینو؟ مَر نِمَذانینو گه اَ چیئَه گه اژ دِرَ ماءَ دَرین آم‌اِر نِمَتونی او نِجس کِ؟ 19اَرِیَگه خوراک کارِ دل ئو گیو هُمَه نِری، بلکِم مَچو اِنوم لَم ئو اَسَه مَچوءَ دِریر.» هَرهُنَ عیسی وَه ایی قصَه کُل خوراکَل پاک اِلوم کِردی. 20ئو وِتی: «اَ چیئَه گه اِنوم آمَ ماءَ دِریر اَوَه‌‌سَ گه نِجسَ مِهِیتی. 21اَرِیَگه یوئنَنَ اَ چیئَه گه اژ نوم ئو اژ دل آم ماءَ دِریر: فگِرَل گَن، بی‌عصمتی، دُزی کِردِن، آم کُشتِن، زِنها، 22طَمَ‌داری، شرَباری، رِنگَری، خیزی، حَسوئی کِردِن، بُختِم، قُرات بیئین ئو نایونی. 23ایی گَنیِلَ کُل اژ نومَ ماءَ دِریر ئو آم نِجسَ مِهِه.»
ایمو ژَنی گه یهودی نوئی
24عیسی اورَه وِل کِردی ئو چی اَرِه هیال صور ئو صِیدون. چی اَرِه مالی؛ مِنتائای نِمِئستی کسی بِذانی گه هار اورَه. وَه ایی حالا نتونستی ووژ قام کِ. 25ژَنی گه دِت گُجَری روحِ گَن داشدی، وخدی شنَفتی عیسی هار اورَه، هِرازِه هات ئو کَت اَررُی پالی. 26اَ ژِنَ گه یهودی نوئی ئو اژ مردِم فینیقیَه سوریَه بی، لالکیَ عیسی گه مِلاکَتِهَه اژ دَرین دِتی باوژیَ در. 27عیسی وِتَ بی: «بِیل اول آیلَل سیر بوئن اَرِیَگه رُوا نیَ نُو آیلَل بِگِرین ئو باوژین اَر وَر سگَل.» 28مِنتائای ژِنَهَه جوواو داتی: «اَاَ، آقا، وَه ایی حالا سگَل‌یش اِ پا سِفِرَه اژ حُیردَه نُو آیلِلَ میرِن.» 29عیسی وِتَ بی: «وَه‌سونگَ ایی قصَه‌تَ، بِچُ گه مِلاکَت اژ دِتِت چیَ دِریر!» 30اَ ژِنَ وخدی رَسی اَر مال، دیتی گه دِتِهِه اَررُی رَختاوی وِلائِرا بیَ ئو مِلاکَتِهَه اَژی چیَسَ دِریر.
شِفا پیا کر ئو بِتِ‌بال
31عیسی اژ هیال صور گِلاهُاردی ئو اژ رئی هیال صِیدون چی ویرِ دریاچَه جلیل، اژ نوم هیال دِکاپولیس ردَ موئیا. 32اَر اورَه پیائونی آوِرد اَرِه تک عیسی گه هم کر بی ئو هم بِتِ‌بال. لالکیانَ عیسی تاگَه دس بِنتی اَر قِ. 33عیسی اَ پیا اژ نوم مردِم آوِردیَ دِریر ئو بِردِ پِنِه ئو کِلِکَل ووژ کِرد اِنوم گوشَل اَ پیا. اَسَه آو دَمی آوشدی ئو مالونی اَررُی زوئو اَ پیا. 34اَسَه ویر کِردی اَر آسمو، هِناسی کیشیتی ئو وِتی: «اِفَّتَح!» یانی «واز بو!» 35جاوارجا گوشَل اَ پیا واز بی ئو زوئونی آزاآ بی ئو تونستی راحت قصَه بِهِه. 36عیسی قِدَخَن کِردِنی گه وَه کسی نوشِن. مِنتائای هر چی ویشتِر قِدَخَنَ مَهَردِنی، ویشتِر ایی اتفاقونَ جارَ ما. 37مردِم اَخِنَ بِلُجوئیونَ ماهات گه موئِتو: «هر چی او کِردیِ خاصَ؛ کاری کِردیِ گه جُ‌جُ کرَلَ مَشتوئِن ئو لالَل قصَه مَهَن!»
@ 2024 Korpu Company