مَرقُس 6
6
بی‌ایمونی مردِم شیَر ناصرَه
1عیسی اورَه وِل کِردی ئو چی، ئو وَه‌گَرد شاگردَلی چی اَرِه شیَر ووژ یانی ناصرَه. 2وخدی روژ شَمَه مقدّس رَسی، عیسی اِنوم عَبادتگا یهود بِنیا نا اَر تیَلیم دائِن. فِرَه کسَل وخدی قصَه‌ل اوُ شنَفت بِلُجوئیو هات. اونَل موئِتو: «ایی پیا کُل یوئنَ اژ کو آوِردیَسی؟ یَه چه حکمتی کَ گه بَشخیاسیَ بی؟ ئو یَه چه مُجِزَه‌لی کَ گه وَه دس او اَنجومَ مَگِری؟ 3مَر هَراَ نجّارَ نیَ؟ مَر کُر مریم ئو بِرا یعقوب، یوشا، یهودا ئو شَمعون نیَ؟ مَر خُیَه‌لی اِ ایرَه اِنوم ایمَه زِنِه‌ی نِمَهَن؟» اَسَه زور اَر وَرو داشدی. 4عیسی وِتیَ بینو: «پِخَمَر بی‌قُرپ نیَ مَر اِنوم شیَر ووژ ئو اِنوم قوم ئو خویش ئو اِنوم مال ووژ!» 5او نتونستی اَر اورَه هُیچ مُجِزِه‌ی بِهِه بِخِر اژ یَگه دس ووژ نا اَررُی چَن مریض ئو شِفا دانی. 6ئو عیسی اژ بی‌ایمونی اونَل بِلُجوئی هاتی. ئو عیسی اِنوم آبادیَل اَ هِناسَ مَگیردیا ئو تیَلیمَ ماتی.
عیسی دوازَه رسول کِلَ‌مِهِه
7عیسی دوازَه شاگردِهِه هِنا کِردی اَرِه تک ووژ ئو اونَل دو اَر دو کِل‌کِردی ئو قدِرت‌واختیار دانیَ بی تاگَه روحَلِ گَن بِهَنَ دِریر. 8فِربو داءَ بینو: «اَرِه سفر، چیئی بِخِر اژ موزبِرَه وَه‌گَرد ووژتو هیزنیَن؛ نه نُو، نه تورَه ئو نه پیلی اِ پر شالتو. 9کِلاش بِهَنِ پاتو، مِنتائای کِراس زیاکی اِوَر نَهَن. 10ئو وِتیَ بینو: وخدی چینون اِنوم مالی، تاگَه وخدی گه هاینون اَر اورَه، بِمینِن اِنوم اَ مالَ. 11ئو اَرّ اِ جای هُمِه‌ئون‌ِ گِرد نِئیشت، یاگَه گوشونَ بی نَگِرتینو، وخدی اژ اورَه مَچینو، توز پالتو بِتَکِنِن، تاگَه شاتی‌ای بو اَرضد اُوُ گه خَضو خدا ماءَ سرو.» 12اَسَه شاگردَل کَتِنِ رئی ئو اَرِه مردِم موعظَه‌ئونَ مَهَرد گه باس توئَه کَن. 13اونَل مِلاکَتَل فِرِه‌ئونی اژ مردِم تار کِرد ئو مریضَل فِرِه‌ئونی وَه روین مسح کِرد ئو شِفا دا.
کُشتِن یحیی تیَمیددهندَه
14هیرودیس پاتِشا یَه شنَفتی، اَرِیَگه کُل جا نُم عیسی‌ئونَ مَشتاسیا. بِری اژ مردِم موئِتو: «یحیی تیَمیددهندَه اژ مِردیَل زِنیا بیَ ئو اَژونَسَ گه ایی قدِرتَل بِلُجوئیَ اَنجومَ مِ.» 15کسَلی‌تِرَ موئِتو: «ایلیا پِخَمَرَ.» بِریشی موئِتو: «پِخَمَری کَ اِجور پِخَمَرَل قدیم.» 16مِنتائای وخدی هیرودیس یَه شنَفتی، وِتی: «یَه هَراَ یحیاسَ گه مِه سرما بِری ئو اِسگَه اژ مِردیَل زِنیا بیَ!»
17اَرِیَگه هیرودیس ووژ فِربو دائیتی یحیی بِگِرِن ئو بوئنِنی ئو باوژِنیِ زندو. هیرودیس ایی کارَ اَرِه هیرودیا کِردوئیتی. هیرودیا ژَن فیلیپ، بِرا هیرودیس بی گه اِسگَه هیرودیس او حُاستوئیتی. 18یحیی وِتوئیتیَ هیرودیس: «شرعاً دُریس نیَ گه تو وَه‌گَرد ژَن بِرات بوئین.» 19هیرودیا اژ یحیی کینَت بِردوئیت‌ِ دل ئو مِهِستی او بِکُشی، مِنتائای نِمَتونستی. 20اَرِیَگه هیرودیس اژ یحیی زِلَه مَچیاتی، اَرِیَگه مَذِناسدی او پیا صالح ئو مقدّسی کَ ئو رایَت حالَ مَهَرد. هر وخد قصَه‌ل یحیی مَشتَفتی، تَپ اَرینَ مَشویاتی. وَه ایی حالا، وَه خَوشی گوشَ ماتیَ قصَه‌لی.
21دُماخِرِ مِجال خوئی رَسی. هیرودیس روژ وَه دی هاتِنی سور داتی ئو درباریَل ئو فرموندَه‌ل نظامی ووژ ئو کَلِنگَل جلیل دَوَت کِردوئیتی. 22وخدی دِت هیرودیا هات اِنوم مِجِلیس ئو بازی کِردی، هیرودیس ئو مِمونَل فِرَه خَوشو هات. اَسَه پاتِشا وِتیَ دِتَهَه: «هر چی آواخدِتَ بوش، تاگَه بیَمَ بینِت.» 23ئو هیرودیس قسم هُاردی ئو وِتی: «هر چَتی اژ مِه بِ، جُ‌جُ نِصمِ مملکتِم، میَمَ بینِت.» 24او چیَ دِریر ئو وِتیَ دای: «چَه اژ اوئِم بِ؟» دای جوواو داتی: «سر یحیی تیَمیددهندَه اَژینی بِت.» 25دِتَهَه هِرازِه وَه دو گِلاهُاردی اَرِه تک پاتِشا ئو وِتی: «اژ تونمَ مِ هَراِسگَه سر یحیی تیَمیددهندَه اَررُی مَجمه‌ی بِینَ بینِم.» 26پاتِشا فِرَه پَژار بی، مِنتائای اَرِه قسم ووژ ئو اَرِه یَگه اَر تک مِمونَل قصَه ناوتیَ دو، نِئِستی خواس او رد کِ. 27اَسَه هِرازِه جَلایی کِل‌کِردی ئو فِربو داتی سر یحیی باری. او چی سر یحیی اِنوم زندو بِریتی 28ئو سر یحیی اَررُی مَجمه‌ی آوِردی ئو داءَ دِتَهَه. اویش اَوَه داءَ دای. 29وخدی شاگردَل یحیی یوئنَ شنَفت، هاتِن ئو جنازه‌ئو هیزدا بِردو نائون اِنوم قور.
خوراک دائِن وَه پنج هزار نفر
30رسولَل گِلوناهُارد اَرِه تک عیسی ئو کُل کارَلی گه کِردوئیو ئو تیَلیمو دائی تیَریفون اَرِه کِرد. 31عیسی وِتیَ بینو: «وَه‌گَرد مِه بورِن بِچیم اَرِه جا خلوتِ چَفتی ئو گِری شَکَتی اِرکَن.» اَرِیَگه هاتِن ئو چیئِن مردِم اَخَ فِرَه بی گه مِجال خوراک هُاردِن‌یشو ناآشد. 32اَسَه ووژو تَنیا، وَه قائِق چِن اَرِه جا چَفتی. 33مِنتائای وخدی مَچیان، آمَل فِرِه‌ی اونَلو دی ئو شناسینو. اَسَه مردِم اژ کُل شیَرَل وَه پا پیا نائونِ دو چِنِ اَکو ئو وِر اژ اُوُ رَسین اَر اورَه. 34وخدی عیسی اژ قائِق هاتَ هُار، جیَمیَت فِرِه‌ی دیتی ئو دل اَر حالو سُتی، اَرِیَگه اِجور کاوِرَل بی‌شوئونی بین. اَسَه بِنیا نا اَر تیَلیم دائِنو ئو چیئَل فِرِه‌ی وَه بی یا دانی. 35دَم ایوارَه شاگردَل هاتِنی اَرِه تک ئو وِتو: «ایرَه جا چَفتی کَ ئو دیروخدیشَ. 36مردِم کِل‌کَ تاگَه بِچِن اَرِه آبادیَل ئو زمینَل ایی هِناسَ تاگَه چیئی اَرِه هُاردِن ووژو بِخِرِن.» 37عیسی جوواو دانیَ بی: «هُمَه ووژتو خوراک بیَنَ بینو.» وِتو: «یانی مِت بِچیم دوهیس دینار گه مِز دوهیس روژ عمِلِه‌ی کَ نُو بِخِریم ئو بِیمَ اونَ تا بیرِن؟» 38عیسی وِتی: «بِچِن بوئینِن چَن نُو دیرینو؟» چِن پِرسِ‌جوئو کِرد، وِتو: «پنج نون ئو دو گِلَه ماهی.» 39اَسَه وَه شاگردَل وِتی تاگَه مردِم دسَه‌دسَه بنیشِنِن اَررُی مَرِن. 40هُنَ، مردِم اِ دسَه‌ل صد نفری ئو پنجا نفری نیشتِن اَر زَمی. 41اَسَه عیسی پنج نون ئو دو گِلَه مایِهَه هیزداتی ئو سِیل کِردی اَر آسمو، نون ئو ماهی بِرَکت داتی. اَسَه نونَل کُت کِردی ئو داءَ شاگردَل تاگَه بِنِن اَر وَر مردِم؛ ئو دو گِلَه مایِهِ‌یش بیَرونا کِرد اِنوم کُلو. 42کُل هُاردون ئو سیر بین، 43ئو اژ دُما سِفِرَه نون ئو ماهی، دوازَه سَلَه پِر جیَمو کِرد. 44پیالی گه نونو هُارد پنج هزار نفر بین.
عیسی اَررُی آوا مَچوءَ رئیا
45عیسی هِرازِه شاگردَلی مجبور کِردی تا وخدی ووژ دیری مردِم مِرخصَ مِهِه، سُوار قائِقا بوئن ئو وِر اژ او بِچِن اَرِه شیَر بِیت‌صِیْدا اِ اَکو دریاچَه. 46عیسی دُما یَگه مردِم آوشدیِ رئی، ووژ چی اَرِه بِنار کوی تاگَه دوعا بِهِه.
47وخدی بیَ ایوارَه، قائِقِهَه رَسی اَر نومجا دریاچَه ئو عیسی اِ حشگی تَنیا بی. 48دیتی گه شاگردَل دیرِن وَه زور پاروءَ میَن، اَرِیَگه وا برعسکَ ماهات. سات نزیک سه نِصمِ شو، عیسی هَرهُنَ گه اَررُی آو مَچیاءَ رئیا چی ویرِ لا اُوُ، ئو هِستی اِلائو رد بو. 49مِنتائای وخدی شاگردَل عیسی‌ئو دی گه داشدی اَررُی آو مَچیاءَ رئیا، گُمونو کِرد روحی کَ. اَسَه قارونو، 50اَرِیَگه اژ دیئِن او زِلَ‌تِراقا بوئین. مِنتائای عیسی هِرازِه وَه‌گَردو قصَه کِردی ئو وِتی: «بیلا دل ئو دَرینتو داشدوئی، یَه مِنِم. زِلَتو نَچو!» 51اَسَه هات اَرِه تَکو اِنوم قائِق ئو وا هوسیاآ. اونَل فِرَه بِلُجوئیو هات، 52اَرِیَگه مُجِزَه نونَلو نَفیَموئی، بلکِم دِلو بوئیَ بَرد.
53وخدی رَسینَ اَکو دریاچَه، اِ وِلات جِنیسارِت هاتِنَ هُار ئو اَر اورَه قائِقِهِئو کیشیِ حشگی. 54اژ قائِق گه هاتِنَ هُار، مردِم هِرازِه عیسی‌ئو شناسی 55ئو هَراَ دو چِن اَرِه سِرُسَر اَ هیالَ ئو مریضَلو نا اَررُی تختَل، ئو بِردِنون اَرِه هرجا گه شنَفتو عیسی هار اورَه. 56وَه هر آبادی یا شیَر یاگَه اِ سر کِشت ئو کارَلی گه عیسی مَچیا، مردِم مریضَلونَ مَنیا اِنوم مِدونَل ئو مَلالکیانَ بی گه صِلا بِ هَر بِیلی دس بِنِن اَر پر چوخای؛ ئو هر کس دَسَ مَنیاتی شِفا مَگِرتی.
@ 2024 Korpu Company