مَتّی 28
28
زِنیابیئِن عیسی
1دُما شَمَه مقدّس، اِ شفق روژ اول هفتَه، مریم مَجدَلیَّه ئو مریم اَلاینِهَه چِن لَحَکِهَه بوئینِن. 2یِگِلی بیَ زمی‌لرزَه سخدی، اَرِیَگه یَکی اژ فریشدَه‌ل خداون اژ آسمو هاتَ هُار ئو چی ویرِ لَحَکِهَه ئو بَردِهَه اژ وَر پِل داءِ لا، ئو نیشتی اَرسر. 3رُی اَ فریشدَه چُی تَش‌بِریقَ مَجویجیا ئو جِنِک چُی وِئَر، اِسبی بیتی. 4قِلااورَل اژ ترس هاتِنَ رِکَه ئو چُی مِردیون‌ئون هات! 5اَسَه فریشدَه وِتیَ ژِنَل: «زِلَتو نَچو! مَذانِم گه هاینونِ مِنِی عیسی‌ی گه کیشیا اَر صلیب. 6او اَر ایرَه نیَ، اَرِیَگه هَراَ جورَ گه وِتی، زِنیا بیَ! بورِن سِیل کَن اَر جای گه او حیوَتوئی، 7اِسَه زِلِ‌زوی بِچِن ئو بوشِنَ شاگردَل او گه ”او اژ مِردیَل زِنیا بیَ ئو وِر اژ هُمَه مَچو اَرِه جلیل ئو اَر اورَه موئینینونی.“ دیَ وِتم‌ئونتو!» 8اَسَه ژِنَل وَه ترس ئو خَوشی فِرِه، هِرازِه اژ لَحَکِهَه چِنَ دِریر ئو هِرَ رَم چِن ویرِ شاگردَل تاگَه ایی اتفاقون‌ئون خَوَر دَن. 9ئو یِگِلی عیسی هاتَ وَرپیریو ئو وِتی: «سِلام!» ژِنَل هاتِنِ وَر ئو کَتِن اَر پال او ئو اوُ پِرَسی. 10اَسَه عیسی وِتی‌ئونو: «زِلَتو نَچو! بِچِن ئو بوشِنَ بِرالِم گه بِچِن اِرَه جلیل. اَر اورَه مِنَ موئینِن.»
قِلااورَل خَوَرَ میَرِن
11حِنی گه ژِنَل اَرنوم رئی بین، قِری اژ قِلااورَل چِن اِرَه شیَر، کُل ایی اتفاقَلونَ وِت اَرِه رِئیسَل کاهنَل. 12اون‌یش دُما یَگه جیَم بینَ گَرد شیخَل قوم ئو شورو کِرد، پیل فِرِه‌ئونی داءَ سَروازَل، 13وِتو: «بوشِنَ مردِم، گه ”شاگردَل او وَه شو هاتِن ئو وخدی گه ایمَه اِ خاو بیمو، جنازه‌ئو دُزی.“ 14ئو اَرّ ایی خَوَرَ برَسیَ گوش والی، ایمَه ووژمو قانیَ مِهِیمونی تاگَه اَرِه هُمَه مِشگِلی پیش نای.» 15اَسَه اونَل پیلو سَن ئو مِطابق اَ چیئَه گه وِتوئیون‌ئونو، اَنجومو دا. ئو ایی پاچا تاگَه ایمِرو اِنوم یهودیَل جار هاوِنتیَ.
مأموری کَلِنگ عیسی
16اَسَه اَ یازَه شاگردَ چِن اِرَه جلیل، اَرسر کوی‌ای گه عیسی وِتوئیتی‌ئونو. 17وخدی اَر اورَه عیسی‌ئو دی، اوُ پِرَسی. مِنتائای بِری شِکو کِرد. 18اَسَه عیسی هاتِ وَر ئو وِتی‌ئونو: «کُل قدِرت‌واختیار اِنوم آسمون ئو زمینو داسَ مِه. 19اِسَه بِچِن ئو کُل قومَل بِهَنَ شاگرد مِه ئو اونَل وَه نُم باوَه، کُر ئو روح‌القدس خُسِل تیَمید دَن 20ئو تیَلیمو دَن تاگَه کُل چیئَلی گه فِربونم‌ئون داینونَ، بارنَ جا. اِسگَه مِه کُلِ روژی تاگَه آخِر ایی دنیا هامَ گَرد هُمَه!»
@ 2024 Korpu Company