مَتّی 27
27
یهودا ووژَ مَکُشی
1حِنی گه روژا بی، کُل رِئیسَل کاهنَل ئو شیخَل قوم جیَم بین، نیشتِن اَر شورَ گَرد یَک گه عیسی بِکُشِن. 2اَسَه اوُنَ دس بُوئنیا بِرد ئو دائونَ گیر پیلاتُس والی.
3اَسَه وخدی یهودا، اَوَه گه عیسی دائیتیَ گیر، دیتی گه عیسی‌ئو مَکوم کِرد، اژ کِردَه ووژ پشیمونا بی ئو سی سکَه نُخِرِهَه داءِ دُما وَه رِئیسَل کاهنَل ئو شیخَل ئو وِتی: 4«مِه گنام کِردیَ ئو باعث بیمَ خوین بی‌گنای بِرِشی.» مِنتائای اونَل جوواوُ دا: «وَه ایمَه چَه؟ ووژتَ مَذانین!» 5اِسَه یهودا سکَه‌ل اِنوم معبد خدا رِشونی اَر زمین ئو چیَ دِریر ئو ووژ کیشیتیَ دارا. 6رِئیسَل کاهنَل سکَه‌لون اژ زَمی جیَم دا، وِتو: «شرعاً دُریس نیَ ایی سکه‌لَ بِرِشی اِنوم خزینَه معبد، اَرِیَگه پیل خوینَ.» 7دُما شور، وَه اَ پیلَ زَمی کویزَه‌گَرونی خِری تاگَه بِهَنیَ قورِسو بیگونَه‌ل. 8اَژونَسَ اورَه تاگَه ایمِرو مَشورَ وَه ’زمین خوین‘. 9هَراَ ایی جورَ، پیشگوئی اِرمیا پِخَمَر اَنجوم گِرت گه وِتوئیتی: «اونَل سی سکَه نُخِرَه‌ئو هیزدا، یانی نَسَخی گه بِری اژ بنی‌اسرائیل نائون اَر او، 10ئو اَوُنَ داءَ زَمی کویزَه‌گری، هُنَ گه خداون فرمائشت کِردوئیتیَ مِه.»
مِحاکمَه اَرتَک پیلاتُس
11اَسَه عیسی هوسیا اَر وَر والی. والی اَژی پِرسی: «آیا تو پاتِشا یهودیَلین؟» عیسی جوواو داتی: «تو ووژِت هُنَتَ وِت!» 12مِنتائای وخدی گه رِئیسَل کاهنَل ئو شیخَل قوم اتهامَلونی داءَ اَری، هُیچ جوواوا ناتی. 13اَسَه پیلاتُس اَژی پِرسی: «نِمَشتوئین چَنی اَرضد تو شاتیَ میَن؟» 14مِنتائای عیسی جُ‌جُ جوواو یِه اتهام‌یشا ناتی، هُنَ گه والی فِرَه بِلُجوئی هاتی.
15والی رسم داشدی گه اِنوم عِد یِه زندونی وَه خواس مردِم آزاد کِ. 16اَ موقَع زندونی مَشوری اِ زندو بی گه نُم باراباس بیتی. 17اَسَه حِنی گه مردِم جیَم بین، پیلاتُس پِرسیتی اَژینو: «کیتونَ مِ تاگَه اَرِنتو آزاد کَم، باراباس یاگَه عیسی مَشور وَه مسیح؟» 18پیلاتُس یَه وِتی اَرِیَگه مَذِناسدی رِئیسَل قوم یهود عیسی‌ئونَ اژ حَسوئی داسَ گیر او. 19هَمیش وخدی گه پیلاتُس نیشت اَر جاگا داوری، ژِنِهِه پِغومی اَرِه کِل‌کِرد، هُنَ گه: «تو کارتَ ایی پیا بی‌گناآ ناآشدوئی، اَرِیَگه ایمِرو خاومیَ بینا دی گه فِرَه عذاوِم داتی.» 20مِنتائای رِئیسَل کاهنَل ئو شیخَل قوم، جیَمیَتو راضی کِرد تاگَه آزادی باراباس ئو مرگ عیسی‌ئو بِ. 21اِسَه وخدی والی پِرسیتی: «کُماین اژ ایی دوءَ‌تون اَرِه آزاد کَم؟» جوواوُ دا: «باراباس.» 22پیلاتُس پِرسیتی: «اِسَه چِئِه عیسی، مَشورَ مسیح بِهَم؟» کُل وِتو: «بِکیشتی اَر صلیب!» 23پیلاتُس پِرسیتی: «اَرِه‌چَه؟ چه گَنی اَر هُمَه کِردیَسی؟» مِنتائای اونَل بِلِنگ‌تِر قارونو: «بِکیشتی اَر صلیب!»
24اَسَه وخدی پیلاتُس دیتی گه دیَر فادَه نِری، ئو جُ‌جُ زِلَه چِتی گه ناخواد بوءَ گالِ‌راو، آو هِستی ئو دَسَل ووژ اَر وَر مردِم شوریتی ئو وِتی: «خوین ایی پیا اَر مِل مِه نیَ. ووژتونَ مَذانینو!» 25مردِم کُل جوواوُ دا: «خوین او اَر مِل ایمَه ئو آیلَل ایمَه بو!» 26اَسَه پیلاتُس، باراباس اَرِه آزاد کِردِنی ئو عیسی شلاخ داتی، سپارتی تاگَه بِکیشِنی اَر صلیب.
عیسی تیزمَتَلَ مَهَن
27سَروازَل پیلاتُس، عیسی‌ئو بِرد اِنوم قِلا کاخ والی ئو کُل جَرخَه سَروازَل جیَم بینیَ دورا. 28اونَل عیسی‌ئو لُتا کِرد، چوخا کاوُنی کِردِ وَر 29ئو تاجی اژ دِرِکو چِنی ئو نائونَ سر ئو موزبِرَه‌ئونی داءَ دس راسا. اَسَه زُنیو دا اَر وَر، وَه تیزمَتَلا موئِتو: «درود اَر پاتِشا یهودیَل!» 30ئو تِفونَ ماآشدِ نوم‌رُی، موزبِرَه‌ئون اژ دَسَ مَسَن ئو مَکویون اِنوم سر. 31دُما یَگه تیزمَتَلو کِرد، چوخائون اژ وَر کَن، جِنِکَل ووژو کِردِ وَر. اَسَه بِردونَ دِریر تاگَه بِکیشِنی اَر صلیب.
اَر صلیب کیشین عیسی
32وخدی گه مَچیانَ دِریر، هاتِنَ وَرپیری پیای اژ اَل قیرَوان گه شَمعون نُم بیتی، نائون اَر مِل صلیب عیسی بِگِریِ کول. 33وخدی رَسین اَر جای جُلجُتا نُم، گه یانی جا کَپولِک، 34شِراوُنی داءَ عیسی گه وَه‌گَرد زردآوْ هاوِنتوئیَ یَک‌اِرا. وخدی عیسی طُم کِرد، نِهِستی خُرّ دِیتی. 35وخدی گه اوُ کیشی اَر صلیب، اَرِه بیَرا کِردِن جِنِکَلی، اِنوم ووژو تیروپِشکو آوشد 36ئو نیشتِن اَر اورَه تاگَه اَژی نگبونی کَنی. 37هَمیش، تصقیرنُامَه‌ئونی نا اَر بِلِنگ سر گه نُیسیائی: «یَسَ عیسی، پاتِشا یهودیَل.»
38دو مِلَه‌بگیریش‌َ گَرد او کیشیان اَر صلیب، یَکی اِ دس راس ئو یَکی‌تِر اِ دس چپ اوآ. 39کسَلی گه اژ اورَه کِلَ موئیان سِرَل ووژونَ مَلَکونا، ئو دُشمینونَ ما 40موئِتو: «تو گه مِهِستِت معبد بِرِمِنین ئو سه روژَ اِدوارَه باوژینی، ووژِت نجاد دَ! اَرّ کُر خدائین اژ صلیب بورَ هُار!» 41رِئیسَل کاهنَل ئو مَلِمَل تورات ئو شیخَل تیزمَتَلونَ مَهَرد، موئِتو: 42«کسَلی‌تِر نجاد داتی، مِنتائای نِمَتونی ووژ نجاد دِ! اَرّ پاتِشا اسرائیلَ، اِسگَه اژ صلیب باءَ هُار تاگَه ایمو باریمی‌ئون. 43او توکل اَر خداسی؛ اِسَه اَرّ خدا دوس دیرِتی، اِسگَه نجاد دِیتی، اَرِیَگه موئِتی ”مِه کُر خدام!“» 44اَ دو مِلَه‌بگیرَ گه وَه‌گَرد او کیشیائین اَر صلیب، هِرَ ایی جورَ دُشمینونَ مائون.
مرگ عیسی
45اژ سات دوازَه تاگَه سات سه دُمانیمَرو، تیَریکی کُل اَ وِلاتَ اِراگِرتی. 46نزیک سات سه، عیسی وَه دَنگ کَلِنگ دای داتی: «ایلی، ایلی، لَمّا سَبَقْتَنی؟» یانی «خداءِ مِه، خداءِ مِه، اَرِه‌چَه مِنِت وِل کِردیَ؟» 47بِری اژ مردِم وخدی یِئونَ شنَفت، وِتو: «هِناءَ مِهِئَه ایلیا پِخَمَر.» 48یَکی اژ اونَل هِرازِه رَمی ئو اَبری‌ای آوِردی، ژَن اِنوم شِراو تُرشیا ئو نا اَرسر چوئیکا ئو بِردیِ وَر دَم عیسی تاگَه خُرّ دِ. 49مِنتائای باقی وِتو: «بِیلِن تاگَه بوئینیم آیا ایلیا اَرِه نجادَ ماتی؟» 50عیسی یِگِلی‌تِر وَه دَنگ کَلِنگ دای داتی ئو روحِ ووژ تسِلیم کِردی. 51جاوارجا، پردَه معبد خدا اژ بِلِنگ تاگَه هُار بیَ دو کُتا. زَمی هاتَ لرزَه ئو کُچِکَل شیقا بِردِن. 52قورَل واز بین ئو لارَل فِرَه کسَل اژ مقدّسَل خدا گه مِردوئین، زِنیا بین. 53اونَل اژ قورَل اِرهاتِن ئو دُما زِنیابیئِن عیسی اژ مِردیَل، چِن اِرَه شیَر مقدّس اورشلیم ئو ووژون اَر فِرَه کسَل ظاهر کِرد. 54وخدی فرموندَه سَروازَل ئو کسَلی گه نگبونی عیسی‌ئونَ ما، زمی‌لرزَه ئو کُل ایی چیئِلونَ دی، زِلَ‌تِراقا بین، وِتو: «اِراسی او کُر خدا بی.»
55ژِنَل فِرِه‌یشی اَر اورَه بین ئو اژ دویرا سِیلونَ مَهَرد. اونَل هَراَ ژِنِلَ بینَ گه اژ جلیل هاتوئینَ دُم عیسی‌آ تاگَه خِلمت اَژی کَنی. 56اِنوم اونَل مریم مَجدَلیّه ئو مریم دا یعقوب ئو یوسف، ئو هَمیش دا کُرَل زِبِدی بین.
عیسی مَنِنِ قور
57باایوارَه، پیا ثرودمنی اژ اَل رامَه، یوسف نُم، گه ووژ شاگرد عیسی بی، 58چی اِرَه تک پیلاتُس ئو جنازَه عیسی هِستی. پیلاتُس فِربو داتی بیَنی‌ئون. 59یوسف جنازَه عیسی هیزداتی، ئو لو اِردا اِنوم کتون پاکی 60ئو نا اِنوم لَحَک نووئی گه اَرِه ووژ اِنوم کمر کوی تِراش دائیتی، ئو بَرد کَلِنگی پِل دا اَر دِراخِل لَحَکِهَه ئو چی. 61مریم مَجدَلیَّه ئو اَ مریمی‌تِرَ نیشتوئین اَر اورَه، اَر وَر لَحَکِهَه.
قِلااورَل لَحَک
62روژ دُماین، گه دُما ’روژ تیارِک دائِن اَرِه عِد پِسَخ‘ بی، رِئیسَل کاهنَل ئو شیخَل فرقَه فَریسی جیَم بین اَرتک پیلاتُس، وِتو: 63«اِاِ آقا! ها ویرمو گه اَ آم رِنگَرَ وخدی زِنی بی موئِتی، ”دُما سه روژ زِنیا موئم.“ 64اِسَه فِربو بِ گه تا روژ سِئِم، نگبونی اَ لَحَکَ بیَنَ، ناخواد شاگردَل بانی، جنازهِه بُئزِن ئو بوشِنَ مردِم گه او اژ مِردیَل زِنیا بیَ، گه وَه ایی جورَ ایی فن آخِرَ اژ فن اولینِهَه گَنتِرَ ماو.» 65پیلاتُس جوواوا دانی: «هُمَه ووژتو قِلااورَل دیرینو. بِچِن ئو اَ جورَ گه صِلاءَ مَذانینو، ویرتون اَری بوتی.» 66اَسَه چِن ئو بَرد لَحَکِهِئو میرِموم کِرد ئو قِلااورَلونی نا اَر اورَه تاگَه ویرون اَر لَحَکِهَه بو.
@ 2024 Korpu Company