लूका 19
19
लगान लैनै बारो जक्कई
1ईसु यरीहो सैहर मै सै होकै जा रओ हो। 2और देखौ, बहाँ जक्कई नाम को एक भौत सेट आदमी हो। बौ लगान बसूल कन्नै बारौं को मुखिया हो। 3और बौ ईसु कै देखनो चाँहै हो कै बौ कौन है? पर जादा भीड़ की बजै सै बौ देख ना सकै हो। कैसेकै बौ गटुआ हो। 4तब बौ ईसु कै देखनै के ताँई बौ अग्गे भाजकै एक गूलर के पेड़ मै चढ़ गओ। 5फिर जब ईसु उस जघै मै आओ तौ उसनै ऊपर देखते भए जक्कई सै कैई, “जक्कई जल्दी सै नीचे उतर आ कैसेकै मैंकै आज तेरेई घर रुकनो है।” 6बौ तुरन्त उतरो और खुसी सै ईसु कै अपने घर ले गओ। 7जब सब लोगौं नै जौ देखो तौ बे बड़बड़ाल लगे और कैललगे, “जौ एक पापी के घर पौंहनो बन्नै जा रओ है।” 8पर जक्कई खड़ो भओ और ईसु सै बोलो, “हे परभु ईसु, देख, मैं अपनी सैरी धन-दौलत को आधो हिस्सा गरीबौ कै दे दंगो और अगर मैंनै किसी को छल सै कुछ बी लओ है तौ उसकै चार गुना करकै लौहटा दंगो।”
9ईसु नै उस्सै कैई, “आज इस घर को छुटकारो भओ है, इसताँई कै जौ आदमी बी इब्राहिम को एक लौंड़ा है। 10#मत्ती 18:11और याद रक्खौ कै ‘मैं’ आदमी को लौंड़ा, इनके जैसे खोए भएऔं कै ढूंड़नै और उनको छुटकारो कन्नै आऔं हौं।”
दस नौकरौ की दासतान
(मत्ती 25:14–30)
11बे लोग जब इन बातौं कै सुन रए हे तौ ईसु नै उनकै एक दासतान सुनाई, कैसेकै ईसु ऐरूसलेम सैहर के धौंरे हो और बे सोच रए हे कै परमेसर के राज की सुरूआत अबी होनै बारी है। 12फिर ईसु नै कैई, “एक ऊँचे खानदान को सेट आदमी दूर देस कै चलो गओ, जिस्सै कै राजा बनकै बापस आ सकै। 13और जाने सै पैले उसनै अपने दसौं नौकरौ कै बुलाकै हर एक कै एक-एक सौने को रुपिया दओ, और उनसै कैई, ‘जब तक मैं ना लौहटौं, इनसै कोई ब्यापार करिओ।’ 14पर उसके सैहर के रैहनै बारे लोग उस्सै बैर रक्खै हे, इसताँई उनौनै उसके पीछे कुछ आदमिऔ सै जौ सन्देसो भिजबाओ कै, ‘हम ना चाँहै हैं, कै जौ आदमी हमरे ऊपर राज करै।’
15 “पर जब बौ राजा बनकै लौहट आओ, तौ ऐंसो भओ कै उसनै अपने नौकरौ कै जिनकै सौने के रुपिया दए हे, अपने धौंरे बुलबाओ जिस्सै कै मालूम करै कै उनौनै ब्यापार कन्नै सै का, का कमाओ है। 16तब पैले नै आकै कैई, ‘हे मालिक, तेरे रुपिया सै मैंनै दस और रुपिया कमाए हैं।’ 17तब उसके मालिक नै उस्सै कैई, ‘साबास अच्छे नौकर, तैनै अच्छो करो, कैसेकै तू इस छोटी सी बात मै भरोसेमंद रैहओ। तू दस सैहरौं को अधकारी होगो।’ 18फिर दूसरे नौकर नै आकै कैई, ‘हे मालिक, तेरे रुपिया सै पाँच और रुपिया कमाए हैं।’ 19फिर उसनै कैई, ‘तू बी पाँच सैहरौं को अधकारी होगो।’ 20फिर तीसरे नै आकै कैई, ‘हे मालिक देख, तेरो रुपिया जौ है, जो मैंनै गमछा मै बांधकै रखर खाओ है। 21कैसेकै मैं तेसै डरै हो, इसताँई कै तू कठोर आदमी है; जो तेरो ना है उसकै बी तू ले लेबै है, और जो तैनै बोओ बी ना है, उसकै बी काट लेबै है।’ 22मालिक नै उस्सै कैई, ‘अरे दुसट नौकर, जो तू कैरओ है उसई सै मैं तेरो फैसला करंगो, तू तौ जानैई हो कै मैं कठोर आदमी हौं, जो मेरो ना है उसकै बी ले लेबौ हौं, और जो मैंनै बोओ बी ना है, उसकै बी काट लेबौ हौं। 23तौ तैनै मेरो रुपिया बियाज मै काए ना दे दओ हो, जिस्सै जब मैं बापस आतो तौ सूत समेत उसकै ले लेतो।’ 24और जो लोग उसके धौंरे खड़े हे, बानै उनसै कैई, ‘बौ रुपिया उस्सै लेलो, और जिसके धौंरे दस रुपिया हैं उसकै दे दो।’ 25इस बात मै उनौनै उस्सै कैई, ‘हे मालिक, बाके धौंरे तौ दस रुपिया हैंई।’ 26#मत्ती 13:12; मरकु 4:25; लूका 8:18मालिक नै कैई, ‘मैं तुमसै कैरओ हौं, कै जिसके धौंरे है, उसकै और दओ जागो; और जिसके धौंरे ना है, उस्सै बौ बी जो उसके धौंरे है ले लओ जागो। 27#मत्ती 25:14–30पर मेरे बे दुसमन जो ना चाँहै हैं कै मैं उनके ऊपर राज करौं, उनकै हिंया मेरे सामने लाऔ और मार डारौ।’”
ईसु को ऐरूसलेम मै आनो
(मत्ती 21:1–11; मरकुस 11:1–11; यहून्ना 12:12–19)
28जे बात कैनै के बाद ईसु अग्गे चलतो भओ ऐरूसलेम सैहर की ओर जाल लगो। 29और जब बौ जैतून नाम पहाड़ मै बैतफगे और बैतनिया सैहर के धौंरे पौंचो, तौ बानै अपने दो चेला जौ कैह कै भेजे। 30“कै सामने बारे गाम मै जाऔ, और उसमै पौंचतेई एक गधईया को जमान बच्चा जिसमै कोई कबी सबार ना भओ है, बौ बंधो भओ मिलैगो, उसकै खोलकै हिंया लिआऔ। 31और अगर कोई तुमसै पूँछै, कै काए खोल रए हौ, तौ कै देईओ, कै परभु कै इसकी जरूरत है।”
32फिर उनौनै जाकै, जैसो उनकै बताओ गओ हो, उनकै बैसेई मिलो। 33और जब बे उस गधईया के बच्चा कै खोलई रए हे, तौ उसके मालिकौं नै उनसै पूँछी, “तुम इस गधईया के बच्चा कै काए खोल रए हौ?” 34उनौनै कैई, “जौ परभु कै चँईऐ।” 35और बे उसकै ईसु के धौंरे लिआए और अपने कुछ लत्ता उस बच्चा के ऊपर बिछा दए और ईसु उसमै बैठ गओ। 36जब ईसु जा रओ हो तौ लोग उसकी इज्जत कन्नै के ताँई अपने लत्ता सड़क मै बिछाते जा रए हे। 37ऐरूसलेम के धौंरे जब ईसु जैतून नाम के पहाड़ की ढलान मै पौंचो, तौ चेलौ की सैरी मंडली उन सब चमत्कार के कामौ के मारे जो उनौनै देखे हे, खुस होकै बड़े जोर सै परमेसर की बड़ाई करल लगी। 38#भजन 118:26 बे चिल्ला उठे कै, “धन्न है बौ राजा, जो परभु के नाम सै आवै है, सुरग मै सान्ति हो, और परमेसर की महिमा हो।” 39भीड़ मै खड़े भए कुछ फरीसिऔं नै उस्सै कैई, “हे गुरू अपने चेलौ कै डाँट।” 40ईसु नै उनकै जबाब दओ, “मैं तुमसै कैरओ हौं, अगर जे चुप रैहए, तौ जे पत्थर चिल्ला पड़ंगे।”
ईसु को ऐरूसलेम के ताँई रोनो
41जब उसनै धौंरे आकै ऐरूसलेम सैहर देखो तौ बौ उसकै देखकै रो पड़ो। 42और बोलो, “हे ऐरूसलेम के लोगौ, तुमरे ताँई भलो होतो कै तुम आज जौ जान लेते कै तुमकै सान्ति किस्सै मिलैगी पर अबी तुम उसकै समज ना सकौ हौ। 43पर बे दिन तुमरे सैहर के ऊपर आंगे, कै जब तेरे दुसमन लड़ाई कन्नै के ताँई चारौ लंग सै इखट्टे होकै तेकै घेर लंगे, और चारौ ओर सै तेरे ऊपर रुकाबट डारंगे। 44बे तेकै और तेरे बाल-बच्चौं कै चारदीवारी के भीतरई मार डारंगे, और पत्थर के ऊपर पत्थर बी ना छोड़ंगे कैसेकै परमेसर को भेजो भओ मसी तुमकै बचानै के ताँई तुमरे धौंरे आओ, पर बौ टैम तुमनै ना पैंचानो।”
ईसु मन्दर मै
(मत्ती 21:12–17; मरकुस 11:15–19; यहून्ना 2:13–22)
45फिर ईसु मन्दर की दैहरी मै गओ। तब बहाँ दुकानदारी कन्नै बारौं कै बाहार लिकारल लगो। 46ईसु नै उनसै कैई, “पबित्तर सास्तर मै लिखो गओ है, ‘मेरो घर पिराथना को घर होगो,’ पर तुमनै बौ डाँकुऔं को अड्डा बना डारो है।” 47#लूका 21:37उसके बाद बौ हर दिन मन्दर मै उपदेस देल लगो। मुक्ख पुजारिऔं और यहूदी सास्तरी और मुखिया लोग उसकै मार डान्नै की ताख मै रैहल लगे। 48पर कोई उपाय ना लिकार सके कै जौ किस तरै करैं, कैसेकै सबई लोग ईसु की बात बड़ी लगन सै सुनै हे।
New Life Compute Institute [NLCI] - CC BY-NC-ND 4.0