Matthew 27
27
Jesus imua Pilate
(Mrk 15.1; Luk 23.1-2; Jhn 18.28-32)
1Keualoko kahaka, namaakua hamakua ia ma nakama hamakua na{Jiu} la ehakaꞌoko ikaia Jesus imake. 2Kena nakama la esaisai nalima Jesus, ihakaꞌi kama la ikaha, noau aꞌe kama la ia Pilate, kama hamakua {kaumani} la.
Judas umake
(Act 1.18-19)
3Vahola, Judas umakino pela nakama hamakua la meikaia Jesus. (Judas nihaꞌali aꞌe Jesus i nakama hamakua la.) Kena kama la ualoha haeꞌo Jesus, kena iko kipukolu namoni la ivaꞌai muli aꞌe nakama hamakua la. 4Judas eme aꞌe, “Anau ehaisala. Anau ehaꞌali aku okou nokaa kama la nomake. Ia kama la sehimea esala epena.” Ia nakama hamakua la eme aꞌe, “Kemena ea i makou? Kena hemea aꞌoe soꞌoe.”
5Ia kena Judas upesia namoni la iloko hale kapu la, kena ihaele ikaha nohalave ua soia.
6Kena namaakua hamakua la uhanaopo namoni la, kena ikakala solakou, “Nakuaa kakou epui kakou isehapaa namoni nei ma namoni hale kapu la, maikinimea namoni nei esui kemake kekama.” 7Kena nakama la ehakaꞌoko hakoa iko namoni la isui keleꞌele emale ma {Pota}, meikanu namanu sili. 8Kela hea keleꞌele la emale ma Keleꞌele Puhaeꞌo.
9Kena nakakala kela Keakua nime aꞌe Jeremiah la uhamaoni,
“Nakama Israel eau aꞌe kipu kolu namoni,
Isui kelaa kama ikaa kama la imake.
10Kena imuli, alakama eko namoni la
Isui paupaꞌu {Pota}.
Ehau poi Keakua nikakala mai anau.”
Pilate evasili aꞌe Jesus
(Mrk 15.2-5; Luk 23.3-5; Jhn 18.33-38)
11Vahola, Jesus ukuu imua Pilate, {kaumani} haRome. Kena Pilate uvasili aꞌe Jesus, “Aꞌoe o kekuꞌu na{Jiu}?” Jesus evaꞌai aꞌe, “Kena aꞌoe eme mai na.” 12Ia kulana namaakua hamakua ma nakama hamakua na{Jiu} la ehai aꞌe Jesus, kama la sesui aꞌe nakakala lakou.
13Kena Pilate eme aꞌe Jesus, “Aꞌoe selono nakama la ehai aku aꞌoe?”
14Ia Jesus sevaꞌai aꞌe nakakala Pilate, kena kama hamakua {kaumani} la umasalo haeꞌo.
Keonohenua ehai aꞌe Jesus
(Mrk 15.6-15; Luk 23.13-25; Jhn 18.39–19.16)
15Hekau ma hekau, kulana keꞌai kePasova la, kama hamakua {kaumani} la euhu kekama iloko kelokapu, kekama kela keonohenua la hihai aia ihaakana la. 16Keualoko la, keonohenua la hakoa emakino laoi hekama iloko kelokapu la, kanamale esui Barabbas. 17Nakama la uhaꞌuku vamakahale kehale Pilate. Kena iko Pilate ime aꞌe, “Oai kekama okou hihai anau ihaakana, Barabbas, ma Jesus kekama emale ma keMesaea?” 18Pilate umakino pela namaakua hamakua la eau aꞌe Jesus i aia, maikinimea nakama la esano haeꞌo.
19Kulana Pilate enoho iluna keꞌina hakonukonu la, keꞌavana aia la eꞌave kakala nei, “Kiaꞌi kama la. Kama la ekonu kahi oia. Kepo la, anau eꞌike kama la iloko kemiki anau, kena anau ukipuaina haeꞌo.”
20Ia namaakua hamakua ia ma nakama hamakua na{Jiu} la eusuusu aꞌe keonohenua la iainoa aꞌe Pilate ihaakana Barabbas, kena ukaa Jesus imake. 21Kena Pilate evasili aꞌe keonohenua la, “Oai kekama koꞌolua na okou hihai anau ihaakana ma okou?” Keonohenua la ehaio aꞌe ma, “Makou hihai Barabbas.”
22Ia Pilate uvasili aꞌe hoi, “Anau memea pehe Jesus, kekama okou emale ma keMesaea la?” Nakama la uhaio aꞌe hakoa, “Kii kama na iluna {kolosi}.”
23Kena Pilate uvaꞌai aꞌe, “Hesala pehe kama nei epena?” Ia keonohenua la ehaio hamaloa, “Kii kama na iluna {kolosi}.”
24Pilate umakino pela nakama la sehalono nakakala aia. Emeia nakama la uꞌamaka nohakaukau. Kena Pilate eko kevai nosolo nalima aia imua namaisu keonohenua la, kena ime aꞌe, “Keakua selavaa kehakonukonu anau, maikinimea okou soꞌokou meikaa kama nei imake.”
25Keonohenua la usui aꞌe ma, “Poi makou ehaisala i kemake kama na, makou ma nakamaliꞌi makou la meihalono lihu.”
26Pilate uhaakana Barabbas, kena ime aꞌe napulepule aia la ilili kia Jesus. Kena Pilate eau aꞌe Jesus i napulepule aia la io nokii kama la iluna {kolosi}.
Napulepule ekokousua Jesus
(Mrk 15.16-20; Jhn 19.2-3)
27Napulepule Pilate la ehakaꞌi Jesus iloko hale kePraetorium, kehale Pilate. Kena napulepule la hakoa umumui hakiꞌe kevahi Jesus. 28Nakama la ehihai ikousua Jesus poi hekuꞌu. Ia kena nakama la eapaꞌe nosau naheheaꞌu Jesus la, kena iꞌahu aꞌe napamalo ekea malama iluna kama la. 29Napulepule la epenapena kehau manamana nohakau aꞌe iluna pohoulu Jesus, kena imea Jesus ikaohi kelaꞌau i kelima laua aia, kena imaoha ilalo nohamalu imua aia. Kena nakama la ekakala kousua ma, “Hamaha i kekuꞌu na{Jiu}.” 30Kena napulepule la usasavale aꞌe Jesus, kena iko kelaꞌau la ililiꞌi pohoulu kama la. 31Kulana nakama la nioki kekokousua aꞌe Jesus, nakama la eui keauꞌahu emea la ikaha ma kama la, ia kena iꞌahu muli aꞌe naheaꞌu aia la, kena ihakaꞌi kama la ikaha nokii kama la iluna {kolosi}.
Jesus ukii iluna {kolosi}
(Mrk 15.21-32; Luk 23.26-43; Jhn 19.17-27)
32Keualoko nakama la uo ikaha ma kemakaꞌina la, nakama la ekili kekama kemakaꞌina Cyrene, emale ma Simon. Napulepule la ekaohi kama la, kena ime aꞌe kama la iamo {kolosi} Jesus. 33Kena nakama la hakoa ukae i keꞌina emale ma Golgotha. (Eme ma, keꞌina naivi napohoulu.) 34Napulepule la eau aꞌe Jesus ke{uaen} ehilo ma namea emala iunu. Kama la eꞌamaka ke{uaen} la, ia sehiunu.
35Kena napulepule la ukii Jesus iluna {kolosi}, ia kena ikahao huhu kehaku, imakino lakou oai kekama meiko naauꞌahu aia la. 36Kena napulepule la unoho i keꞌina la, ilolosi kinokama Jesus la. 37Ia nakama la ekakaa nakakala nei iluna panahoa, KENEI JESUS, KEKUꞌU NA{JIU}, kena ihamau panahoa la i {kolosi} la iluna pohoulu Jesus, imakino keonohenua la hea kama la esala. 38Napulepule la ukii koꞌolua nakama eailalao iluna na{kolosi} hoi, nokuu kapili aꞌe Jesus; kama i kevahi laua, kena kelaa kama i kevahi selaua.
39Keonohenua la uo halaꞌa kapili keꞌina Jesus ekii la, kena ihaloko aꞌe naꞌalemaka lakou, kena ikakala hamemea aꞌe Jesus ma, 40“Aꞌoe emea maꞌoe elavaa keseu hale kapu la, kena iloko koukolu naaho, aꞌoe elavaa kehakuu muli. Pena aꞌoe hekama Keakua, konaꞌi soꞌoe. Kuu iho ikaha ma {kolosi} na.”
41Namaakua hamakua, nakama epolopolo nakuaa, ia ma nakama hamakua na{Jiu} la ekakala kokousua Jesus hoi, 42“Kama la ekonaꞌi alakama, ia selavaa kekonaꞌi soia. Poi kama la kekuꞌu Israel, kama la elavaa kekuu iho ikaha ma {kolosi} la, kena makou mehakina i aia. 43Kama la ehakina i Keakua, kena me mai pela aia o kekama Keakua. Pena Keakua ehihai kama la, kena hevahi Keakua kekonaꞌi kama la.”
44Kena koꞌolua nakama eailalao kela ekii iluna na{kolosi} kapili Jesus la ekakala lihu aꞌe ia Jesus hoi.
Jesus umake
(Mrk 15.33-41; Luk 23.44-49; Jhn 19.28-30)
45Keualoko kelaa la kea, kelaa la upouli, nokae kekolu keiahi. 46Keualoko la, Jesus uanaa hamaloa ma, “Eli, Eli, lama sabatani.” Eme pela, “KauAkua, kauAkua. Okea aꞌoe ekiaꞌi anau?”
47Alakama keonohenua la elono kama la nianaa, kena ime aꞌe, “Kama la eanaa aꞌe Elijah.” 48Kena hekama keonohenua la ukele nohasuu halevaꞌa iloko ke{uaen} emala, kena isai kemaka kelaꞌau, kena ihakuu aꞌe ma imiki Jesus ke{uaen} la.
49Ia alakama eme aꞌe, “Hakali imaka. Poi Elijah mehamai nokonaꞌi kama la.”
50Ia Jesus uanaa hamaloa, kena imake.
51Kena pamalo ekookoo iloko hale kapu la umasae ilakonu, eꞌamaka iluna, haele nosopo ilalo. Keꞌina la elulu henua, kena nahaku la umamaha haliꞌi. 52Nakaluma haku la uhoku, kena komaꞌi nakama ekapu Keakua umasiꞌe ikaha ma kemake, 53kena uo aꞌe ikaha ma nakaluma lakou la. Kena keualoko Jesus umasiꞌe ikaha ma kemake, nakama la uo i Jerusalem, kemakaꞌina ekapu na{Jiu}. Kena komaꞌi nakama keonohenua la uꞌike nakama la.
54Keualoko la, kepulepule hamakua, ia ma napulepule aia la ulolosi kinokama Jesus. Nakama la uꞌike kelulu henua la, ia ma nakama umake kela umasiꞌe ikaha ma kemake. Ia kena napulepule la umakaꞌu haeꞌo, kena ikakala ma, “Kama nei o kekama hamaoni Keakua.”
55Komaꞌi nahine ekuu hamao nomaka. Ala nahine kela nikakaꞌa ma Jesus i Galilee nokonaꞌi aia. 56Kela Mary Magdalene, Mary kina James laua ma Joseph, ia ma kehine Zebedee la.
Joseph uko kinokama Jesus
(Mrk 15.42-47; Luk 23.50-56; Jhn 19.38-42)
57Kulana keiahi, kela hekama kaukali Jesus ehaele aꞌe Jerusalem. Kemale aia la Joseph, hekama kemakaꞌina Arimathea. 58Joseph uhaele aꞌe ia Pilate noainoa aꞌe kinokama Jesus. Kena Pilate eme aꞌe napulepule aia la iau aꞌe kinokama Jesus la ia Joseph.
59Kena Joseph uhaele nokuli kinokama Jesus, kena imini kama la ma pamalo makahua. 60Joseph nihaa kaluma vahonei la i kevahi kuku la imua. Kena iko kama la ihamoe kinokama Jesus iloko kaluma la. Kena Joseph ehakaꞌape aꞌe kehaku elahi nopui kokoꞌa kaluma la, kena ihaele ikaha. 61Ia Mary Magdalene ia ma kela hine emale ma Mary enoho kapili aꞌe kokoꞌa kaluma la.
Napulepule elolosi kaluma haku la
62Ia kaiao, imuli kela keonohenua la uoki kekanakana keaho ekapu, namaakua hamakua ia ma naFarasi la uo nomaka Pilate. 63Nakama la eme aꞌe, “Kealiꞌi. Makou umanaku nakakala kama nukulaoi la, kulana aia niola. Kama la nime mai, ‘Imuli koukolu naaho, anau meimasiꞌe ikaha ma kemake.’ 64Kena haunalia napulepule aꞌoe la nololosi kaluma la, ikae keaho hakoukolu. Aoki nakama kaukali kama la ameo pela iailalao kinokama kama la. Esala pela nakama la amelavaa kenukulaoi aꞌe keonohenua la pela kama la umasiꞌe ikaha ma kemake, ihapaa nanukulaoi lakou ma nanukulaoi kama la imua la.”
65Kena iko Pilate ime aꞌe, “Ko nipulepule, okou uo. Okou emakino laoi kepui kaluma la.”
66Kena nakama la uo nopui kaluma la, kena ihamakino kehaku la,#27.66 kena ime aꞌe napulepule la ilolosi hamakonu keꞌina la.
© 1999, Wycliffe Bible Translators, Inc. All rights reserved.