Matthew 28
28
Jesus uola muli
(Mrk 16.1-10; Luk 24.1-12; Jhn 20.1-10)
1Imuli keaho kapu, kahaka po keaho kela kapu la, Mary Magdalene ia ma kelaa hine emale ma Mary uo nomaka kaluma la.
2Keualoko la, keꞌina la elulu henua, maikinimea ke{enselo} Kealiꞌi uhaele iho ikaha ma kevaelani. Kama la ehaele i kaluma la nohakaꞌape kehaku la ikaha ma kokoꞌa kaluma la, kena inoho iluna kehaku la. 3Ke{enselo} la emasina poi heꞌemo. Ia naheaꞌu aia la emaꞌini lo. 4Napulepule kela elolosi kaluma la epole nomakaꞌu haeꞌo, kena imoe poi nikama umake.
5Ke{enselo} la ume aꞌe nahine la, “Okou isemakaꞌu. Anau emakino pela okou eo mai nomaka Jesus, kekama kela napulepule la nikii iluna {kolosi}. 6Kama la useai inei. Kama la umasiꞌe ikaha ma kemake poi kama la nikakala aku okou imua. Omai nomaka keꞌina kama la nimoe. 7Kena okou ikaꞌa vave nome aꞌe nakama kaukali aia la, ‘Jesus umasiꞌe ikaha ma kemake. Kena kama la uhaele imua okou i Galilee. Okou meiꞌike kama la i keꞌina la.’ Halono hea anau eme aku okou.”
8Nahine la emakaꞌu, ia ehihia hoi. Kena nakama la uhulo vave ikaha ma kaluma la nome aꞌe nakama kaukali Jesus la hea lakou elono.
9Vahola ia, Jesus ukili nahine la, kena ikakala hakaualeꞌa nakama la. Ia kena nahine la ukoukuli nokaohi nakapuae Jesus la, kena ihamalumalu kama la. 10Kena iko Jesus ime aꞌe nahine la, “Okou isemakaꞌu. Okou io nome aꞌe nakama kaukali anau la io aꞌe i Galilee. Nakama la meiꞌike anau i keꞌina la.”
Nakakala napulepule la
11Keualoko nahine la uo ikaha, napulepule kela nilolosi kaluma la uo i Jerusalem nome aꞌe namaakua hamakua la namea hakoa lakou eꞌike la. 12Kena namaakua hamakua la uꞌuku ma nakama hamakua na{Jiu} la. Nakama la ehakaꞌoko keau aꞌe napulepule la komaꞌi namoni, 13kena ime aꞌe, “Okou ime aꞌe keonohenua la pela nakama kaukali Jesus la eo aꞌe kuapo la, keualoko kakou nimoe la, noailalao kinokama Jesus. 14Niaina Pilate amelono nakakala nei, okou isehakekele. Makou somakou eailoa kekakala aꞌe Pilate.”
15Kena napulepule la uko namoni la, ia halono namaakua la. Kena nakakala nukulaoi lakou la ekoha i na{Jiu} la nokae keaho nei.
Jesus ehuli aꞌe aia i nakama kaukali aia la
(Mrk 16.14-18; Luk 24.36-49; Jhn 20.19-23; Act 1.6-8)
16Sehui ma kahi nakama kaukali Jesus la uo i kemouna i Galilee, i keꞌina Jesus nime aꞌe lakou ikaꞌa la. 17Kulana nakama la eꞌike Jesus, nakama la ehamalumalu kama la. Ia alakama nakama la sehakina hamaoni. 18Kena iko Jesus ihaele nome aꞌe nakama la, “Keakua uau mai namahi kevaelani ia ma namahi kemaalama nei la hakoa. 19Ia kena okou ikaꞌa i naonohenua hakoa i kemaalama nei. Aoaꞌo nakama la ikaukali anau. Haauꞌau kapu nakama la i kemale Kamana ia ma Kanakama ia ma Keanana Kapu. 20Aoaꞌo nakama la ihalono namea hakoa kela anau nime aku okou. Kena anau meinoho ma okou naualoko hamau, hanokae kehaoki kemaalama nei.”
© 1999, Wycliffe Bible Translators, Inc. All rights reserved.