लूका परचा
परचा
लूका के दवारा लिखे गय हर संदेस नबा नियम के चारठे किताबन मसे अक्ठी हबै, जउन यीसु मसीह के जीवन के बारे हे वरनन करथै, उनखर मसे सब के संदेस कहे जथै, जेखर मतलब हबै “बढिहा संदेस।” ऊ मत्ती, मरकुस, लूका अउ यूहन्ना के दवारा यीसु के मिरतू के बाद लिखे गय रथै। लूका न सिबाय यीसु के जीवन के किस्सा लिखिस, बलुक उन यीसु के चेलन दवारा ओखर मिरतू अउ जिन्दा होय के बाद करे गय हर कामन के लिखे गय हबै, जउन प्रेरित के काम के किताब के जसना जाने जथै, कउनो सही टेम नेहको जानथै कि लूका के दवारा लिखे गय हर संदेस कब लिखे गय रथै, या कछो हइ लिखे गय रथै, पय जादातर बिदमान हइ बात लग सहमत हबै, कि हइ संभवत यीसु के पइदा के लगभग 70 साल बाद लिखे गय रथै।
लिखे बाले लूका हबै, जउन अक्ठी गुनिया रथै। भासा के लिखे अउ निस्तार करै के ओखर तरीका लग पता चलथै, कि ऊ अक्ठी पढेहर मनसे रथै। लूका यीसु के जीवन के सही बिस्तार लग लिखे चाहथै, घटना के उनखर तरीका लग गुठेथै, ताकि दूसरन के इके पढै लग फायदा होय। 1:1-3 ऊ यहूदी नेहको रथै। 4:10-14 अउ ऊ हइमेर लग लिखिस कि गैर यहूदी मनसे समझ सकै। हइ उहै मेर लग स्पस्ट रूप लग देखे गय हबै जब ऊ यहूदी रीति रिबाज के बिस्तार करथै। 1:8 लूका के दवारा लिखे गय हर संदेस यीसु के इस्राएल के टीमा करे हर मुकति करै बाले अउ सगलू मनसे जातिन के मुकति करै बाले के रूप हे प्रस्तुत करथै। लूका लिखथै कि यीसु के परभु के आतमा दवारा “गरीबन के लिघ्घो संदेस लामै” के निता बुलाय गय रथै। 4:18 अउ हइ संदेस सगलू मेर के जरूरत बाले मनसेन के निता अक्ठी सोच लग भरे हबै।
लूका के दवारा लिखे गय हर संदेस मत्ती अउ मर के किताबन के जसना हबै, काखे उन अक्ठिन मेर के बिसय अउ समान तरीका लग व्याख्या करथै। तीनठे किताबन मसे लूका, यूहन्ना बतिस्मा देय बाले के पइदा के बारे हे सब ले अधिक व्याख्या देथै। लूका छमा 3:3; 11:4; 17:3-4; 23:34; 24:47 अउ बिनती 3:21; 5:16; 6:12; 11:1-12; 22:32 बिसय हे जोर देथै।
रूप रेखा
1. लूका रचित संदेस कर भूमिका अउ लिखै के कारन गुठेथै। 1:1-4
2. यूहन्ना बतिस्मा देय बाले अउ यीसु कर जनम या बचपन। 1:5—2:52
3. यूहन्ना बतिस्मा देय बाले मनसेन कर सेबा। 3:1-20
4. यीसु कर बतिस्मा अउ परिक्छा। 3:21—4:13
5. गलील हे यीसु कर सेबा। 4:14—9:50
6. गलील हे यरुसलेम तक के यातरा। 9:51—19:27
7. यरुसलेम हे आखरी हप्ता। 19:28—23:56
8. परभु जिन्दा हुइके दिखाई देथै अउ स्वरग छो जथै। 24:1-53
The New Testament in Bhumiya Language The Word for the World International and © 2023 Bhilali Bhasha Samiti, Madhya Pradesh