लूका 4
4
यीशुन परिक्षा
(मत्ती 4:1-11; मरकुस 1:12,13)
1यीशु पवित्र आत्मा माय परिपूर्ण एईन, यार्देन नदिरीन आवु; ताह आत्मा चालीह दिह वोर जेंगलामाय लीन गीयो; 2ता जागापूर शैतानाने ताह चाळीस दिह ताहवोर परिक्षा लीईल. ता दिहामाय यीशु कायीच खाइल नाहं. ओवतो टाइम पुरो इयील ताबाद. यीशुह जुलुम बुख लागिल. 3तेवी शैतान ताह कियील, “जर तू बोगवानान सोरो एय, तर ज्या देगडाह रूटू बोणणेन कि.” 4तेवी यीशु उत्तर आपील, “शास्त्रामाय लिखील हि, माणुह फक्त रूटांकेरीनुच जीवी इही नाहं.” 5ओवतो शैतान ताह जुलुम उपेर लीन गीयो, एने एक क्षणाम जगान आखा राज्य देखाडीन, 6शैतान ताह कियील, “मी ज्याह राजान अधिकार, एने वैभव तुवाह आप देह, कारण ज्या माहु आपील, एने मी ज्या ज्याह पोटीह ताह आपुह शकणे. 7केरीन तू माहु नमन केरही, तर हे आखा तारो एय.” 8यीशु ताह उत्तर आपतेन कियील, “शास्त्रामाय लिखील हि का, तू आपणा बोगवानाह नमन केर, एने ताचने भोक्ती केर.” 9तेवी तो ताह यरूशलेम माय लीन गीयो एने ता जागापूर मंदिरान उचां जागापूर लीन उबरीयेल किरील, एने ताह कियील, “केधी तू बोगवानान सोरो एय, ते बुंदे कुद जां. 10कारण शास्त्रामाय लेखील हि, तो आपणा स्वर्गदूताह हुकुम केरी, ता तुवाह वोचाड लेय, 11एने लिखील हि, ते तुवाह एने आपणो खोला विसी लेती, कि तारो पाय देगडाह लागणार नाहं.” 12यीशु ताह उत्तर आपतेन कियील, “शास्त्रामाय इही पुण लिखील हि कि: तू आपणो प्रभु बोगवानान परिक्षा पाडू नाहा.” 13ताहेरया शैतान तान आखा प्रकारान परिक्षा लेनेपुर; संधी जुळीताहपोर ताह सोडीन गीयो.
यीशुन सेवान सुरुवात
(मत्ती 4:12-17; मरकुस 1:14,15)
14पोशो यीशु आत्मान सामर्थ्या केरीन पुरो एईन गलील माय पोशा आवा, एने ता आखा भागाम यीशुन चर्चा एहू लागिल. 15यीशु तान आराधनालय माय जाइन संदेश आपणे लागिल, एने तान आखा बोडाई केरताला.
नासरेथ माय यीशुन अनादर
(मत्ती 13:53-58; मरकुस 6:1-6)
16पोशो तो नासरेथ माय आवा, जाहारी तो आत्युचने मोठू एनो एतो; एने आपणो नियमाहोस शब्बाथ एक दिह यहूदी आराधनालय जायीन वाचणे उब रेणो. 17ताहेरया तो शास्त्र डील वाचणेस उबरील रेणू तेवी, ताह यशाया भविष्यवक्तान पुस्तक आपणे माय आवा, तान ताहेरया पुस्तक उघाडील, तेवी ताह हे तीजागेन जुडील तामाय लिखील एता: 18“प्रभुन आत्मा मारामाय वास केरतीन हि, तान माहु अभिषेक किरील हि तान केरता कि मी गारीबांह सुवार्ता केणे जुव्ही तान माहु, बंदी मेलणारान सुटका एने आधलाह पोशो देखणु आवी घोषणा केरावी दाबिल जात हि ताहाच सोडवीन मोकलो, 19बोगवानान कृपेची घोषणा केरावी.”
20पोशो तान पुस्तक बंद केरीन आपणो दासाचा पोशा आपील; एने तो बुंदे बोहील आराधनालय माय आखान नेजर तापोर टोपीन रेणी एती. 21तेवी तान केणेंन सुरुवात केरील, “आज तुमूह होमलील शास्त्राचे वचन पुरो एय गीयो.” 22प्रत्येक माणहा तान वाहवा केरतीन, एता अनुग्रह मुया मायरीन जो हाजी वचन आविह एता, तापोर आखा चक्कित एय गीयो एता तो कियेल, “काय हा योसेफान सोरो नाहं हि?” 23पोशो यीशु ताह कियील, “निश्चय तुमूह माहु म्हण होमलाडहु हे वैद्या तू स्वतहाच हजो केर! कफर्णहुमात ज्या वार्ता आमु तार बारामाय होमलील हेते, त न्या हि केर” 24तेवी यीशु ताह कियील, “मी तुमूह खेरीच किथु कि काल्लोबी भविष्यवक्ताह आपणो गावाम मान्यता नाह हि. 25मी तुमूह खेरीच केथु, का एलियान दिहाम जेवी साडे तीन वोर्ह्या वोर आकाश बोंद एतो, न्यावोर का आखा देशामाय भयानक काल दुष्काळ पोडील इतू, तेवी इस्राएल माय मोक्त्यू विधवा एत्यू. 26पुण सिदोन भागामाय सारफथ न्यावाला एक विधवेला सोडीन, दिहीरा विधवे उगे एलीयाह मोकलील नाह एता. 27एने एलिया भविष्यवक्तान कालाम इस्राएल माय जुलुम कूण माणहे कुष्ठरोगी एता, पुण तामायरीन सिरीया माय रेणार नामानन व्यतिरिक्त दिहीरा शुद्ध किरील नाह एता.” 28ताहेरया यहूदयान जोला आराधनालयमा एता, हे होमलील, तेवी ताह जुलुम राग आवा, 29ते उबरीयेल रेणा एने ताह गावान बाहेर मोकलीन आपील, ते ताह डोंगरान सेन्डापूर लीन गीया जापोर तान गाव एता, जानकेरता कि ताह ता सेन्डापूररीन बुंदे टाकीन आपज्यू. 30पुण तो तामायरीन निकलीन आपणो वाटी निकलीन चालहु जात रिनो.
दृष्ट आत्मा लागिल माणहाह हुदारणेन
(मरकुस 1:21-28)
31पोशो तो गलीला मायरीन कफर्णहुमाम गावाह बुंदे आवा; एने शब्बाथ एक दिह संदेश आपुह लागिल. 32माणहे तान संदेशा पोर हिकाडणे पोर भोगलाय गीयी कारण तानकेरीन संदेश अधिकार किथी एतो. 33तान जागापूर प्रार्थना आराधनालय माय एक माणुह इतू, तामाय दुष्ट आत्मा रीगील इतू, तो मोठा आवाजामाय आयडील केतालू. 34“हे यीशु नासरी, तू आमरे उगेरीन काय अपेक्षा करने? काय तू आमरे केरता नाश केरणेन केरता आवा हि? मी तुवाह ओळखतेह हि का तू कूण हि, बोगवानान पवित्र माणुह हि” 35यीशु ताह जुलीन कियील, “ठावको रीवू, ज्यामायारीन बाहेर निकलो” ह्यापूर दुष्ट आत्मा ने ता माणहा माणहान ओगाण ताह आचुटूणु एने ताह काही हानी एतो तामायरीन बाहेर निकलील. 36आखा माणहे भोगलाईन एता, ते एक दिहराहे-यो बोलीह एता, “हे कोहलो वचन हि? अधिकार एने सामर्थ्यान ज्यो अशुद्ध आत्मा भी ज्यान हुकुम मानतेह, एने तामायरीन निकलीन जातेह.” 37ता भागाम आहणेपाहणे प्रत्येक जागापूर तान बारामाय सुवार्ता पोरचार एनी.
पतरसान हाहवूक एने दिहरा उंजू दुख्याऱ्याह हुदारणे
(मत्ती 8:14-17; मरकुस 1:29-34)
38तेवी यीशु प्रार्थना आराधनालय मायरीन निक्लीन शिमोनान घेर गीयो. शिमोनान हाहवूकीह जुलुम हेरी आवील एती. तेवी तो यीशुह मदत केरणे विनंती केरील. 39यीशु तीन आहने उबरील रेणू एने तान किचवानु जुलीन एने, ताप तिमायरीन निकलीन गीयो ती लगेज उभी रेणी एने तान सेवा केरूह लागिल. 40ताहेरया दीही बुडनु टाइम, ताऊखीर आलेग आलेग दुखा-यो एता, ता आखा तान आहने लीन आवा, तान आपणो आथ तां पोर मेलीन आखाह हाजो किरील. 41तामाय मोक्तामायरीन दुष्ट आत्मा आयेडतेन बाहेर दोवडतीन एती, “तू बोगवानान सोरो हि” पुण तान ताहाच जुल्यो आपील नाहं कारण ते ओळखतेह एता, तो मसीह हि.
आराधनालयाम पोरचार केरणेन
(मरकुस 1:35-39)
42जेवी दिह उगणेपूर तो निकलीन जेंगलामाय गीयो, तेवी माणहे समुदाय ताह होदणे केरीन तान आहनी आवा, एने आपणेमारीन जाहू नाहा केरीन ताह विनंती केरीन एता. 43पुण तो ताह कियील, “बोगवानान राज्यान सुवार्ता दिहरागावाम पुण केणेन हि, कारण माहु तान केरता मोकलील हि.” 44एने ज्याह प्रकारे तो यहूदी आराधनालय माय संदेश आपतेन रेणो.
Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.