Aba Vatowo 8
8
1E Yaubada Nowa, woiwoi liliudi be yoguyogu liliudi inuwaisidi kidi dedeoga gagaina goi sikaaiyaka. Tuwo yágira ietune itowo, tauna bwae iyápasa, e isousou. 2Yaubada doelu ikaubodedi, tauna adi dau sisayata. Kúwana yábana goi nakae ikaubode, tauna kuwanayana idoideo. 3Tuwo bwaeyana poyapoya goi isousou, e maliyalina tayamo andedi pipti (150) mlidi bwae bogina isou gagaina. 4Tuwo tukówana ainima aiyuwoina#8:4 Tukówana ainima aiyuwoina: Ame nakona Eipuru. go, maliyalina seventin (17) goi, e dedeogayana Ararata koyaina tayamo goi itomava. 5Bwaeyana nava isousou ana kadókana tukówana yawouna#8:5 Tukówana yawouna: Ame nakona Diyulai. go, maliyalina tayamo, e koyayadi dabadi sipóiya.
6E maliyalina ana badabada poti (40) mlidi Nowa dedeogayana ana windo ikatupáeve, 7boyoboyo tayamo ikabi, ietune ina. Tuwo boyoboyoyana iyova ina go, geya ikaluvileta, go sem iyovayova ana kadókana bwaeyana madabokina poyapoya goi iyápasa.
8E bunabuna tayamo ikabi, windo goi ikaiyovae ina bei iyagoi bwae poyapoya goi bogina iyápasa gea geya. 9E bunabunayana iyovayova go, bwae nava poyapoya ana madabokina iilatao, tauna geya itoboineyeta itowo. Tuwo ikaluvilamna ima dedeoga goi Nowa nimana iyosale bei bunabunayana itowo. Itowo go, Nowa ivaisiu dedeoga sinaena. 10Tuwo tauyana maliyalina ainima aiyuwo goi ituyáwata baige bunabunayana ikaiyovaemnei ina. 11Ina go, lavilavi ikaluvilamna ima dedeoga goi go, vagana iikatupe. E vaganayana Nowa igite, bogina iyagoi bwae bogina isou gagaina. 12Tuwo aiyuwoina maliyalina ainima aiyuwo goi ituyáwata baige bunabunayana ikaiyovaemnei ina go, geya ikaluvileta.
13E Nowa ana tala ana badabada sikisi andedi wan (601) go, tukówana vakuumgoina#8:13 Tukówana vakuumgoina: Ame nakona Okotomba. maliyalina vakuumgoina goi, e bwae poyapoya goi bogina iyápasa. E tauyana dedeoga ana kátava ikatubale, e imatavilavila, igite bwae madabokina poyapoya yatana bogina iyápasa. 14Niga tukówana aiyuwoina#8:14 Tukówana aiyuwoina: Ame nakona Novemba. maliyalina tuwentiseven (27) goi poyapoya ana madabokina bogina isayasaya.
15E Yaubada Nowa ilatuwoko, idigo kana,
16‘Nowa, kom ma natumowo, monem be natumowo monediyao dedeoga gagaina goi kosōu. 17E kaga liliuna maa yawoidi kovakedēdi sisou. Moe mánuwo liliudi, yoguyogu liliudi be kaga liliuna sidaladala. Madabokidi sisou sina poyapoya ana madabokina goi sisusáila gagaina.’
18Tuwo moitamo Nowa, natunao, monena be nakae natunao monediyao dedeogayana goi sisou. 19Kaga liliuna maa yawoidi, nakae kaga liliuna sidaladala, mánuwo liliudi nakae sisou. Idi souyana goi moe yoguyogu ituli ituli.
Nowa ina vininabeso tetelina
20E Nowa dídiya ikaudakodako, ana wowoina manuna. Iwodugu ikavava, yoguyogu taagonaidi ituli ituli be mánuwo taagonaidi ituli ituli maniyedi ikabidi, aba kasalayana yatana goi ikailagasidi igabudi ivakasavedi. Moe ina vininabeso ikasale Yauwe yaina. 21E yoguyogu aiigabudi mainidi dedevina ituko ina Yauwe yaina, e maininayana inove dedevina toina, ivauyaone go, toinina inuwonúwana kana,
‘Tomota idi yalagau nuwodi goi sigoyo adi bíbina kunu goi go, tuwo tomotayadi idi guinuwa pasidi geya tuwaina bei poyapoya abugoyai. Nakae geya tuwaina bei kaga liliuna maa yawoidi amtulidi nakae ame bogina aguinuwe.
22Poyapoya ame ina kaiyaka madabokina goi
bágula be dibayoya adi tuta,
tula be yaviyavi adi tuta,
losiye be kúwana adi tuta,
maliyalina be sabamgo geya sikavaveta.’
© 2019, Wycliffe Bible Translators, Inc. All rights reserved.