Aba Vatowo 7
7
Mluwa tetelina
1E idigo kana,
‘Nowa, kom bogina agitem, tomota liliudi yaidi goi kom amta nuwogu ana , tauna kom mam bodao dedeoga goi kosowōya. 2Yoguyogu taagonaidi#7:2 Yoguyogu taagonaidi: Ame yoguyoguyadi Isileli tubunao madi tagona sikanidi. ituli ituli tamo tamo bolamo ainima aiyuwo be bovavina ainima aiyuwo dedeogayana goi kudodōidi. Yoguyogu vaatabudi#7:2 Yoguyogu vaatabudi: Ame yoguyoguyadi Isileli tubunao geya adi tagonamo sikanidi unana bomadi. ituli ituli tamo tamo bolamo tayamo be bovavina tayamo dedeogayana goi kudodōidi. 3Mánuwo tamo tamo nakae, yaidi goi bolamo ainima aiyuwo bovavina ainima aiyuwo kukabīdi kudodōidi bei poyapoya goi kuyavedi, e bei poyapoyayana ana madabokina goi sisusailamna. 4Moe nakae kuguinūwe unana maliyalina ainima aiyuwo mlidi kúwana bei aetune isou iwo maliyalina poti be nakae sabamgo poti. Kaga liliuna ma yawoidi poyapoya goi boi aoodugudi bei asamatedi. Tauna yoguyogu be mánuwo kudodōidi.’
5Tuwo kaga liliuna Yauwe iidigedi Nowa iguinuwedi.
6E kina go Nowayana ana tala bogina sikisi andedi (600) tutayana mluwa isowóduwo be poyapoya ilatao. 7Tuwo moitamo kidi Nowa ma natunao be monena be nakae natunao monediyao taiyao dedeogayana goi sisowoya mluwa pasina.#Mad 24:38-39; Luk 17:27; Ibe 11:7. 8Yoguyogu tamo tamo ituli ituli, taagonaidi be vaatabudi, mánuwo tamo tamo ituli ituli be nakae kaga liliuna poyapoya goi sidaladala tamo tamo ituli ituli, 9aiyuwo aiyuwo, bolamo be bovavina, sima dedeoga goi sisiu sima Nowa yaina nakae Yaubada ilovina. 10Tuwo maliyalina ainima aiyuwo bogina sikavava, e mluwa ima.
11E Nowa ana tala sikisi andedi (600) goi be tukówana aiyuwoina#7:11 Tukówana aiyuwoina: Ame nakona Novemba. be maliyalina seventin (17) goi moe isowóduwo. Amo maliyalinayana goi doelu liliudi iuwoosidi bwae gagaina poyapoya sinaena goi sikaubobóbwala be nakae yábana ikatupáeva,#2Pi 3:6. 12e kúwana gagaina isou ima poyapoya goi maliyalina poti (40) be nakae sabamgo poti (40).
13Amo maliyalinayana goi Nowa mana bodao dedeoga gagaina goi sisowoya. Moe tauyana ma monena natunao Semi, Em be Diyepeta be monediyao adi taito taiyao. 14Woiwoi tamo tamo, yoguyogu tamo tamo, kaga liliuna poyapoya goi sidaladala, mánuwo tamo tamo be nakae manumánuwo tamo tamo nakae taiyao sisowoya. 15Kaga liliuna neta maa yawoidi, e aiyuwo aiyuwo sima dedeogayana goi sisowoya sima Nowa yaina.#1Pi 3:20-21; 5:5. 16Tosowoyayadi moe bolamo be bovavina nakae Yaubada bogina Nowa ilovinae. E sisowoya ikavava, dedeogayana ana totom Yauwe ikatunibode.
17E mluwa idaudau maliyalina poti (40), e bwae ituko gagaina, ikaniku nakae dedeogayana iluwoi. 18Bwae ivakaigaga nakae poyapoya ana madabokina ilatao go, dedeogayana bwae yatana goi idoidoiye. 19Tuwaina bwaeyana itukotuko ana kadókana koya gagaidi liliudi poyapoya ana madabokina goi nakae ilataoidi. 20Bwaeyana ituko ina nakae ana tukotuko moe ovavasi koyayadi ilataoidi. 21Tuwo kaga liliuna maa yawoidi poyapoya goi sikamasa kówasa. Mánuwo, yoguyogu, woiwoi, manumánuwo be tomota liliudi nakae sikámasa. 22Kaga liliuuna poyapoya goi sikaaiyaka maa yawoidi, e sikámasa. 23Tauna nakae kaga liliuna maa yawoidi poyapoya goi kina Yauwe isamatedi. Madabokidi, tomota, yoguyogu, kaga liliuna sidaladala be mánuwo isamatedi. Geya kada tayaamo ikesa geya, go sem Nowa mana bodao aditava dedeoga goi sikaaiyaka.
24E bwae poyapoya iilatao maliyalina ana badabada tayamo andedi pipti (150).
© 2019, Wycliffe Bible Translators, Inc. All rights reserved.