ल़ेह-पेन 3
3
काङबा कुच्या मिह च्यी़ टा़हक्यो
1ङ्यिहमा च्यी़ पत्रुस दाङ यूहन्ना ङ्यिहमागी छ्युजी सुमला सोल्वाङ ताप्केन्गी ती़हजीला छ्योखाङला डोॱराङ येहकें। 2छ्योखाङ नाहङला स्य़ूहगे मिहया़ ङ्याम्बु सेङ्यिम लाङज्येला क्येएँ यिहन्ज्युराङ काङबा कुच्या मिह च्यी़ला मिहया़गी खुर ख्योङदी ङ्यिहमा-टाहङमाराङ छ्योखाङगी ज़ेबु माएँ कोह ग्या़ला ज़्या़ तेर्को येहकें। 3ओहले पत्रुस दाङ यूहन्ना छ्योखाङ नाहङला स्य़ूहज्ये पेहक्यो थोङदी खोगी खुङ ङ्यी़ॱलाङ सेङ्यिम लाङसीन। 4ओहले यूहन्ना ङ्याम्बुराङ पत्रुसगी खोला या़हबु पेहती तासीन ओहले पत्रुसगी खोला, “ङ्यिहला ते़ ले!” म़ेदी मासीन। 5दि थे़दी खोगी च्यि रोहवा ज्योर्कें नि म़ेदी रेहवा पेहती तासीन। 6ओहले पत्रुसकी मासीन, “ङाह ङ्याम्बु सेर ङुलनी म़ेह। यिहॱनाङ, ङाह ङ्याम्बु च्यि येहबा, ओ़हदीॱराङ ख्येला तेर्कें। नासरतकी येशू मास्यीकागी छेनला लाहङदी सोङ!” 7दि म़ेदी पत्रुसगी खोगी योबा लाहक्पाला ज़ुङदे लाङसीन। ओ़हजेलाराङ खोगी काङबा दाङ काङबा-छी़ला स्युक ओहङसीन। 8ओहले खो ह्ओप लाहङदी डोज्ये छ़ूसीन ओहले खो फिर फिर छ्योङदे काहल्दी किन्ज्योला त़ेरा तेच्या फुल्गेराङ खुङ फे़बे ङ्याम्बु छ्योखाङ नाहङला स्य़ूहसीन। 9ओहले मिह थाम्ज्यीगी खोला किन्ज्योला त़ेरा तेच्या फुल्दी डोॱराङ पेहक्यो थोङसीन। 10ओहले मिहया़गी खोला छ्योखाङगी ज़ेबु माएँ कोह ग्या़ला सेङ्यिम लाङदे तेहक्यो मिह दिराङ यिहन म़ेदी खोला ङोह स्य़ेसीन। “काहन्डुमु पेहती डो ख़ूएँ काहल्बा?” म़ेदी मिहया़ याहम्जेनज्यी ने़दी ह्अ ल़ेहसीन।
छ्योखाङला पत्रुसगी मिहया़ला लोप्क्यो
11ओ़ह मिह पत्रुस दाङ यूहन्नागी तिङ ङ्या़क्यो थोङदी मिह थाम्ज्यी ज्यिबुराङ ह्अ ल़ेहदी सोलोमन माएँगी कोहम्ज्युरला छ्योङदी ओहङसीन। 12दि थोङदी पत्रुसगी मिहया़ला मासीन, “ए इस्राएली आदा-नो़हया़, दि तामला राहङ फ़ेबेॱया ह्अ ल़ेहदी च्यिबे ङ्यिहला टोङे पेहती ज़ी़ नाङगे? च्यि ख्या फे़बेया़गी ङ्यिहगी दि मिहला राहङगी ओङ दाङ छ्य़ेसेमगी पेहती डो ख़ूएँ ज़ोक्यो यिहन म़ेदी ने़उ दुबा? 13ओ़ह ल़ेहमु मिहम्बा, ओहराङगी चावा अब्राहाम, इसहाक दाङ याकूबकी किन्ज्योगी राहङला स्याहप्तो स्युहएँ येशूला चा़ जे नाङसीन। ख्या फ़ेबेॱयागीदी येशूला से कोहकें म़ेदी च्योल नाङसीन। पिलातसगी येशूला ताङज्ये छोल्गेमुॱआङ ख्या फे़बेया़गी माहताङ म़ेदी सुङ नाङसीन।#प्रस ३:१५ 14येशूनी नाम्पार-ताहक्पा दाङ क्येन म़ेहबागी मिह येहकें। यिहॱनाङ ख्या फे़बेया़गी येशूगी छापला मिह सेकें तिहक्च्येम्बा मिह च्यी़ला गा ताङदोङ म़ेदी सुङ नाङसीन।#मत्ती २७:१५-२३; मर्क १५:६-१४; लूक २३:१३-२३; यूह १९:१२-१५ 15मिहली नाङगेन्दीला गा ख्या फे़बेया़गी से नाङसीन। यिहॱनाङ किन्ज्योगी येशूला टोहङग्योलेगी ज़्याङ च्यु नाङसीन। दि तामदी ङ्यिहया़ पाङबु येह। 16येशूला तेहपा पेहक्यो सोङबे काङबा कुच्या मिहगी स्युक ज्योर्सीन। येशूगी छेन थे़दी खोगी सेमला तेहपा ओहङसीन ओहले खोगी तेहपागी पेहती ता़ह ख्या फे़बेया़गी खोला छाङबुराङ टा़हक्यो ज़ी़ नाङदेराङ येह।”
17“आदा-नो़हया़, ङाहला क्यी़ह येहबा, ख्या फ़ेबेॱया दाङ ख्या फे़बेया़गी पोम्बोया़गी येशू सु यिहम्बा म़ेदी ङोह मा़हस्येबा पेहतीराङ से नाङग्यो यिहम्बा। 18मास्यीकागी ओहप-क्याल खुर नाङ कोहच्ये येह म़ेदी किन्ज्योगी माहङबुराङ तोहङ यिहन्ज्यु लुहङतेम्बाया़ ङो़ले सुङ नाङग्यो स्याहल किन्ज्योगी दि ल़ेहमु जेती तेहन्दा डुप्च्यु नाङसीन। 19ता़हनी ख्या फे़बेया़गी सेमगी स्या़बा पेहती तिहक्पा पाङदी किन्ज्यो ङो़ले लो़ह नाङदोङ, ओहले किन्ज्योगी ख्या फे़बेया़गी तिहक्पा थाम्ज्यीराङ ता़ह च्य़ू नाङज्ये येह। दि ल़ेहमु पेहती ख्या फे़बेया़गी किन्ज्योलेगी यिहला लो तेहमु दाङ स्युक ज्योर्च्ये येह। 20ओहले किन्ज्योगी ख्या फे़बेया़गी तेहन्दाला तोहङलेराङ दाम नाङग्योकी थार्पा नाङगेन मास्यीकाला येहपाराङ ताङ नाङज्ये येह। मिह-रो़हराङ येशू यिहम्बा। 21यिहॱनाङ, नाम्पार-ताहक्पा लुहङतेम्बाया़गी सुङ नाङग्यो ल़ेहमुराङ किन्ज्योगी थाम्ज्यीराङ से़हया़ साम्बा ज़ो नाङगेन्गी ती़हजी माहलेप थु येशू स्यिहङगामलाराङ ज़्य़ू नाङ कोहज्ये येह। 22मोशागीॱआङ दि ल़ेहमु जेती सुङ नाङदी येहकें,
‘याहवेगी ख्याया़गी तेहन्दाला ख्याराङ क्यिहपाकी आदा-नो़हया़ नाहङले ङाह ल़ेहमुराङ लुहङतेम्बा च्यी़ ताङ नाङज्ये येह,
ओहले मिहरोगी ख्याया़ला च्यि च्यि सुङ नाङगे
ओ़ह थाम्ज्यी तामया़ ख्याया़गी ङ्यिहन कोहकें।#व्य १८:१५,१८
23ओहले ओ़ह लुहङतेम्बागी स्याहल मिहङ्यीहन्गे मिहया़दी
किन्ज्योगी राहङ मिहया़लेगी खा फे़ नाङज्ये येह
ओहले खुङया़ तोङदी डोज्ये येह’।”#व्य १८:१९
24“शमूएल दाङ खो तिङगी थाम्ज्यी लुहङतेम्बाया़गीॱआङ दाङ-तिहरीङ काहल तेहक्यो दि तामया़गी तेहन्दालाराङ माक्यो येहकें। 25ख्या फ़ेबेॱया ओ़ह लुहङतेम्बाया़ दाङ ओ़ह ताहम्ज्या ज़्या़क्योगी छार्क्यीनया़ यिहम्बा, किन्ज्योगी ख्या फे़बेया़गी चावा अब्राहाम ङ्याम्बु दि ल़ेहमु सुङदी ताहम्ज्या ज़्या़ नाङसीन, ख्यागी छार्क्यीन ङो़ले जाम्बुलीङगी थाम्ज्यीराङ मे़हमेया़गी मेलाम ज्योर्च्ये येह।#उत २२:१८ 26ख्या फे़बे ऱेह-ऱेहला राहङगी ङ्येहम्बा ल़ेहया़ ङो़ले लो़-ख्योङदी ख्या फे़बेया़ला ओ़ह मेलाम नाङज्ये सुङदी किन्ज्योगी राहङला स्याहप्तो स्युहएँ येशूला थाम्ज्यी म़ेदी तोहङले ख्या फे़बेया़साला ताङ नाङसीन।”
© 2023 (Active), Wycliffe Bible Translators, Inc. All rights reserved.