ल़ेह-पेन 2
2
नाम्पार-ताहक्पा थु फेप नाङग्यो
1यहूदीया़की पेन्तिकोस माएँगी छ्येपा लेप्केमु चो़वो छ्येवा येशूला यिह छ्य़ेगे मिह थाम्ज्यीराङ ग्या़ च्यी़ला छो़दी तेहती येहकें।#लेवी २३:१५-२१; व्य १६:९-११ 2ओहले याहङमे-याहङलाराङ स्यिहङगामले माहर ल्हा़बा स्युक छ्यिम्बुच्यी ओहङदी खुङ तेहक्योगी खाङबाला ल्हा़बागी क़ेगी काहङसीन। 3ओहले मेहगी च्येले ल़ेहमु खुङया़गी पोहला थोङसीन, ओहले बो बो पेहती ओ़हला येहकेन खुङ थाम्ज्यी थो़ला तेहसीन। 4ओहले खुङ थाम्ज्यीराङ नाम्पार-ताहक्पा थुगी काहङसीन ओहले खुङगी नाम्पार-ताहक्पा थु लाहमलेॱराङ ताम मा ख़ूएँगी ओङ ज्योर्ती राहङसा-राहङसा ताम साम्बाया़ माज्ये छ़ूसीन।
5ओ़ह ती़हजीला यरूशलेमला जाम्बुलीङकी ग्या़-ग्या़लेगी यहूदीया़ ओहङग्यो येहकें। 6ओहले ओ़ह ल़ेहमु क़े थे़गोराङ ओ़हला मिह माहङबुराङ जोम ओहङसीन। ओहले लेहमेन लेहमेन क्याहल-खापलेगी ओहङग्योगी यहूदीया़गी खुङ राहङ-राहङगी ताम ओ़ह स्याहप्च्यीया़गी माएँ थे़दी खुङया़ ज्यिबुराङ ह्अ ल़ेहसीन। 7ओहले खुङया़गी ह्अ ल़ेहदी मासीन, “च्यि दि ताम माएँ मिह थाम्ज्यी गालीलीया़ मिहम्बा ले? 8दि च्यि यिहम्बानी खुङ थाम्ज्यीगी ओहराङगी तामॱराङ माक्यो थे़उ दुबा! 9ओहराङनी देला माहङबुराङ क्याहल-खापकी मिहया़ येहबा– पार्थिया, मेदिया, एलाम, मेसोपोटामिया, यहूदीया, कापाडोकिया, पोन्टस, एशिया, 10फ्रिगिया, पाम्फिलिया, मिश्र, कुरेनी पोहला येहकेन्गी लिबिया क्याहल-खाप, रोम क्याहसा, 11क्रेट छोलिङ#२:११ छोलिङ : माक्योदी नेपालीला टापू यिहम्बा। ओहले दिगी तेहन्दादी छो-क्याहम्जो नाहङले थेन्ग्योगी सा काहङदोया़ यिहम्बा। दाङ अरब क्याहल-खापकी मिहया़ येहबा, ओहले ओहराङ नाहङला यहूदी क्यिहपागी मिहया़ दाङ यहूदीगी छ्य़ेला स्य़ूहक्यो लेहमेन क्यिहपागी मिहॱआङ येहबा। ओहले खुङया़गी ओहराङ राहङ-राहङगी तामला किन्ज्योगी जे नाङग्यो याहम्जेन छ्येवा छ्या़लेगी तेहन्दाला लोहङटी पेहकेन थे़उ दु।”
12ओहले खुङया़ ह्अ ल़ेहदी थामा थोमे पेहती राहङ नाहङदुङ, “दिगी तेहन्दा च्यि यिहम्बानी?” म़ेदी टी़हदाप पेहसीन। 13ओहले लाहला मिहया़गीदी, “दि मिहया़नी छ्याङगी ज़िक्यो दुबा!” म़ेदी स्ये़हन्डील पेहसीन।
पत्रुसगी मिह मिह-माहङया़ला लोप्च्युङ तेरक्यो
14ओहले पत्रुस ल़ेह-पेन च्यू़ज्यी ङ्याम्बु लाहङदी मिह थाम्ज्यीगी थे़गेन पेहती मासीन, “ए यहूदीयागी रो़हया़ दाङ यरूशलेमला ज़्य़ू नाङगेन्गी आदा-नो़हया़, देला च्यि काहल्ग्यो माएँ ताम ङाह ख्याला ङोह स्य़े च्य़ूएँ। ता़ह ङाहगी माज्ये पेहक्योगी ताम या़हबु पेहती सेन नाङदोङ। 15च्यिबेमाना ख्या फे़बेया़गी सेमला ने़क्यो ल़ेहमु दि मिहया़ छ्याङगी ज़ी़दी म़ेह। च्यिबेमाना ताहन्दा ङाटुगी छ्युजी कुह च्यी़राङ काहल्दी येहबा। 16यिहॱनाङ योएल लुहङतेम्बा लाहमले सुङ नाङग्योकी स्याहल दिराङ यिहम्बा,
17‘किन्ज्योगी सुङ नाङगु दु,
तिङमा ङ्यिहमाया़ला ङाह राहङगी थु मिह थाम्ज्यीगी थो़ला ल़ू तेर्च्ये येह,
ओहले खुङगी पुह पोहमोया़गी लुहङदेन स्येच्ये येह,
स्याराया़गी ज्याल्गा थोङज्ये येह,
के़हङगेनया़गी मिलाम थोङज्ये येह।#योए २:२८-३२
18यिहम्बा, ओ़ह ङ्यिहमाया़ला ङाहला स्याहप्तो स्युहएँ क्येप-ख्योवा दाङ पी़हम-पेहजाया़गी थो़ला ङाहगी नाम्पार-ताहक्पा थु ल़ू तेर्च्ये येह,
ओहले खुङया़गी लुहङदेन स्येच्ये येह।
19ओहले ङाहगी नामला याहम्जेन छ्येवागी ताक्छेनया़ तेन्ज्ये येह,
ओहले जाम्बुलीङला याहम्जेन छ्येवागी ल़ेहया़ तेन्ज्ये येह। पे यिहॱना़
ठा़, मेह, ओहले तिहपा ल़ेहमु मुक्पा तेन्ज्ये येह
20चो़वो छ्येवागी चा़ छ्यिम्बु दाङ ज़िज्यिद-च्येन ओहङगे म़ेदी तोहङले
ङ्यिहमा ना़-जुबे डोज्ये येह ओहले दायुम ठा़ ल़ेहमु माहर्मु डोज्ये येह।
21ओहले सुगी चो़वो छ्येवागी छेन लेहन्गे ओ़ह मिहया़ च्यी़राङ थार्च्ये येह’।”
22“इस्राएली आदा-नो़हया़, ङाहगी ताम सेन नाङदोङ। किन्ज्योगी येशू लाहमले ख्या फे़बेया़गी पाहरक्यीला ओङ छ्यिम्बुगी छ्या़लेया़ जे-नाङदी याहम्जेन छ्येवागी ताक्छेनया़ तेन नाङग्योदीनी ख्या फे़बेया़ला थुयी़राङ येहबा। ओ़ह ताक्छेनया़ लाहमले किन्ज्योगी नासरतकी येशूला राहङगीराङ ताङग्यो यिहम्बा म़ेदी दास्यी नाङसीन। 23किन्ज्योगी राहङगी रिहक्स्यी दाङ राहङगी ज़ोक्योकी च्याहम्दा ल़ेहमु जेते येशूला ख्या फे़बेया़गी लाहक्पाला च्योल नाङसीन, ओहले ख्या फे़बेया़गी येशूला मिह चोक्पाया़गी लाहक्पाला च्योल्दीमाराङ क्याहङस्यीङला च्याङदी से च्य़ू नाङसीन।”#मत्ती २७:३५; मर्क १५:२४; लूक २३:३३; यूह १९:१८
24यिहॱनाङ किन्ज्योगी येशूला टोहङग्योलेगी सोम्बो ज़्याङ च्य़ू नाङसीन। किन्ज्योगी येशूला टोहङग्योलेगी खा फे़ नाङसीन। च्यिबेमाना स्यिवागी येशूला राहङगी ओङ चो़ला ज़्या़दी ज़्या़ज्येला काले का़हबु येहकें।#मत्ती २८:५,६; मर्क १६:६; लूक २४:५ 25क्याहल्बु दाऊदगीॱआङ येशूगी तेहन्दाला दि ल़ेहमु म़ेदी सुङ नाङदी येहकें–
ङाहगी चो़वोला नाहम-माना ङाहगी दिनला थोङसीन,
चो़वो ङाहगी योबा ङो़ले ज़्य़ू नाङदी येह,
ओ़ह सोङबे ङाह मी़हज्यी़।#भज १६:८-११
26ओ़ह सोङगोराङ ङाह सेम ज्यिबुराङ काहसो येह।
ओहले क़ेहनाङगी लु लेहन्गे।
स्यिदी डो कोहॱनाङ ङाह रेहवाला थार्के।
27च्यिबेमाना राहङगी ङाहती सो-ला साप्स्यी तिहङला क्युर ज़्या़ नाङज्ये म़ेह,
राहङगी राहङदी नाम्पार-ताहक्पा मिहगी ज़ुबु
रुहल्दी डो च्य़ू नाङज्ये म़ेह।
28राहङगीराङ ङाहला मिहली साम्बा ज्योर्केन्गी लाहम तेन नाङदी येह,
राहङ ङाह ङ्याम्बु ज़्य़ू नाङगेमु ङाहगी सेम काहसोगी काहङगे।
29“ए आदा-नो़हया़, ओहराङगी चावा दाऊदकी तेहन्दाला ङाह ख्या फे़बेया़ला या़हबु पेहती प्रा साल ख़ूएँ। दाऊद टोहङसीन ओहले मिहया़गी खोगी फुङबु फुक्पाला तो़हसीन, ओहले ओ़ह फुक्पा तिहरीङ थु ङ्यिह ङ्याम्बुराङ येहबा। 30यिहॱनाङ क्याहल्बु दाऊद लुहङतेम्बा यिहन्गे, ओहले खोगी छार्क्यीनलेगीराङ मेहन्दा च्यी़ खोगी ज़्य़ू-ठिला ज़्य़ू च्य़ू नाङज्ये येह म़ेदी खोला क्यी़ह येहकें। च्यिबेमाना किन्ज्योगी खो ङ्याम्बु दि ताहम्ज्या ज़्या़ नाङदी येहकें।#भज १३२:११; २ शमू ७:१२,१३ 31किन्ज्योगी जे नाङगेन्गी छ्या़लेन क्याहल्बु दाऊदकी तोहङलेराङ ङे़स्यी स्य़े सिहन्दी येहकें। ओ़ह सोङबे थार्पा नाङगेन मास्यीका टोहङदे येहपाराङ सोम्बो ज़्याङ नाङज्ये येह माएँ ताम ङ्याम्बु डी़गे। येशू टोहङ नाङसीन यिहॱनाङ किन्ज्योगी मिहरोला टोहङग्यो छ्यालाराङ दि जाम्बुलीङला क्युर ज़्या़ माहनाङ ओहले मिहरोगी कुबुरॱआङ माहरुहल।”
32“ता़ह ओ़ह येशू मास्यीकालाॱराङ किन्ज्योगी टोहङग्यो ग्या़लेगी सोम्बो ज़्याङ च्य़ू नाङसीन। दि तामगी तेहन्दाला ङ्यिह थाम्ज्यीराङ पाङबु येह। 33ओ़ह सुङगोराङ किन्ज्यो याहपगी येशूला राहङ ङ्याम्बुराङ राहङगी योबा ङो़ले ज़्या़ नाङदी येह ओहले राहङगी ताहम्ज्या ज़्या़ नाङग्यो ल़ेहमु जेती येशूला नाम्पार-ताहक्पा थु नाङसीन। ओ़ह नाम्पार-ताहक्पा थुराङ चो़वो छ्येवा येशूगी ताहन्दा ओहराङ थो़ला ज़्या़ नाङदी येह, ओ़ह ताम ख्या फे़बेया़गी ताहन्दा थोङदी, थे़दी ओ़हङदीॱराङ येहबा। 34च्यिबेमाना दाऊद स्यिहङगामला फेप माहनाङ, यिहॱनाङ दाऊद राहङगीराङ दि ल़ेहमु सुङ नाङसीन–
‘याहवेगी ङाहगी चो़वोला सुङ नाङसीन,
ख्ये ङाहगी योबा ङो़ले तेहतोङ,#भज ११०:१
35नाहम थु ङाह ख्येगी टाहया़ला ख्येगी
काङबा चो़ला छ्यि च्य़ूज्ये म़ेह’।”
36“ओ़ह सुङगोराङ इस्राएलगी मिह थाम्ज्यीगी दि ताम ङोह स्य़े कोहकें– ख्या फे़बेया़गी क्याहङस्यीङला च्याङदी सेक्योगी येशूलाॱराङ किन्ज्योगी चो़वो दाङ थार्पा नाङगेन मास्यीका ङ्यिकाराङ ज़ो नाङसीन।”
37पत्रुसकी ताम थे़दी मिहया़गी सेम नाहसीन। ओहले पत्रुस दाङ लो़हलो ल़ेह-पेनया़ला खुङया़गी, “ए आदा-नो़हया़, ओ़हठी यिहन्सीमानानी ङ्यिह च्यि पेहतोङ ले?” म़ेदी टी़हसीन। 38ओहले पत्रुसगी मासीन, “ख्या थाम्ज्यीगी सेमगी स्या़बा पेहती तिहक्पा कोहङदागी तेहन्दाला येशू मास्यीकागी छेनला बप्तिस्मा लेहन्दोङ, ओहले ख्यागी किन्ज्योगी काबाप नाम्पार-ताहक्पा थु ज्योर्च्ये येह। 39दि ताहम्ज्यादी ख्या फ़ेबेॱया दाङ ख्या फे़बेया़गी पुह पोहमोया़गी तेहन्दाला ओहले था़-रिहङबु रिहङबु येहकेन थाम्ज्यीगी तेहन्दाला यिहम्बा, का़हन्दी का़हन्दीला चो़वो ओहराङ किन्ज्योगी क़े क्याहप नाङगे।”
40पत्रुसगी खुङया़ला माहङबुराङ तामया़ म़ेदी पाङबु तेर्सीन ओहले खुङया़ला या़हबु पेहती प्रा साल्दी मासीन, “दाङ-तिहरीङगी मिह ङ्येहम्बाया़ थो़ला बाप ओहङगेन ङ्य़ेहबा ङो़ले ख्या राहङगी राहङला थार च्य़ूदोङ।” 41ओहले मिह माहङबुगीराङ पत्रुसकी तामला यिह छ्य़ेदी बप्तिस्मा लेहन्सीन। ओ़ह ङ्यिहमु तोङरा सुमजे मिहया़ खुङया़गी टाहङजीला खेन पा़हसीन। 42ओहले खुङ ल़ेह-पेनया़ ङ्याम्बु लोप्कें, छोक्पा पेहकें, चो़वोगी डेन साहउ येहकें, ओहले सेम च्यी़ डी़दी नाहम माॱनाङ किन्ज्योला सोल्वाङ ताप्ती तेहको येहकें।
चो़वो येशूला यिह छ्य़ेगे मिहया़गी डोलु-तेहलु
43ल़ेह-पेनया़गी याहम्जेन छ्येवागी ल़ेहया़ पेहती माहङबुराङ ताक्छेनया़ तेन्गो येहकें। ओ़ह सोङबे मिहया़गी किन्ज्योगी ज्यिक्पा पेहको येहकें। 44चो़वोला यिह छ्य़ेगेया़ ग्या़ च्यी़ला जोम्दी तेहको येहकें, ओहले राहङ ङ्याम्बु येहकेन्गी से़हया़ मिह थाम्ज्यीला के़ह तेर्को येहकें।#ल़ेह ४:३२-३५ 45खुङ राहङगी स्यिहङया़, पेलाया़ चोङदी सु सुला च्यी़ज्यीगी कोहपु येहबा खुङया़ला थाम्ज्यीराङ के़हदी तेर्को येहकें। 46ङ्यिहमा-टाहङमाराङ खुङ छ्योखाङला जोम्गो येहकें, ओहले खाङबा-खाङबाला सेम च्यी़ डी़दी क़ेहनाङ दाङ ङ्येम्ज्युङ पेहती डेन साहउ येहकें, 47ओहले किन्ज्योला त़ेरा तेच्या फुल्गो येहकें। लेहमेन मिहया़गीॱआङ खुङया़ला या़हबु ऩेगो येहकें। ओहले थार्पा थोप्क्योया़ला चो़वोगी ङ्यिहमा-टाहङमाराङ टाहङजीला खेन पा़ह नाङगो येहकें।
© 2023 (Active), Wycliffe Bible Translators, Inc. All rights reserved.