Génesis 4
4
Caín jín Abel
1Jee nkixiꞌ Adán jín ñasɨ́ꞌɨ́‑ɨ Eva, jee nna̱nise̱ꞌya ña jee nsi̱káku ña se̱ꞌya yɨ́ɨ́ ña jee nsi̱kúnání ña maa Caín. Jee nkachiꞌ ña: “Íyó ɨɨn te̱e nu̱u̱nꞌ ni̱ꞌ, chi nyɨ̱tuvi I̱toꞌoꞌ‑ó nuꞌuꞌ.”
2Jee kuíre nsi̱káku tuku ña se̱ꞌya ña Abel ñaniꞌ Caín. Jee nkuvi Abel ɨɨn te̱e náka sa̱na̱ꞌ, jee Caín nkuvi ɨɨn te̱e yɨ́tíñú sátíñú nu̱u̱nꞌ ñuꞌún.
3Jee nkenta tiempúꞌ ña̱na̱ka Caín sava rá tataꞌ nsa̱ꞌá‑a ya̱ so̱ko̱ꞌ‑o nu̱u̱nꞌ I̱toꞌoꞌ‑ó. 4Sunisaá Abel ña̱na̱ka‑a nu̱u̱nꞌ I̱toꞌoꞌ‑ó rá se̱ꞌya sa̱na̱ꞌ ya̱ kúvi ya̱ xíꞌnañúꞌún ka̱ꞌ jín ya̱ laꞌlɨꞌ ka̱ꞌ #4:4 Áxí káchíꞌ‑ó: jín xe̱ꞌen rátíꞌ. ñaꞌniꞌ‑i vá nso̱ko̱ꞌ‑o vá. Jee nkuva̱ꞌa iniꞌ I̱toꞌoꞌ‑ó nne̱ꞌyá‑a Abel jín ya̱ nsókoꞌ re̱ꞌ. 5Soo ntu nkúváꞌa iniꞌ‑i nne̱ꞌyá‑a Caín jín ya̱ nsókoꞌ re̱ꞌ. Saájee nka̱yu̱ꞌ nasɨ́kuitɨꞌ xi̱ni̱ꞌ Caín, jee nna̱kunta kini nu̱u̱nꞌ re̱ꞌ. 6Saájee nkachiꞌ I̱toꞌoꞌ‑ó nu̱u̱nꞌ re̱ꞌ:
“¿Na̱kui chi káyúꞌ xi̱ni̱ꞌ nú? Jee, ¿na̱ kuvi chi nákunta kini nu̱u̱nꞌ nú? 7Retánꞌ ya̱ váꞌa saꞌá nú, ¿á ntu íyó nuva̱ꞌa iniꞌ nú rúja? Soo retú ntu saꞌá nú ya̱ váꞌa jee íyó yatin kua̱chi jín nú kuéntáꞌ íñɨ́‑ɨ yuvéꞌí nú níyo iniꞌ‑i néꞌyá‑a nó kosoꞌ‑o nó, soo íyó kuneí nú kajiaꞌ nú kua̱chi vá.”
8Jee nkachiꞌ Caín nu̱u̱nꞌ ñaniꞌ re̱ꞌ Abel ya̱ kɨ̱ꞌɨ̱nꞌ ráa nu̱u̱nꞌ kuꞌúꞌ. Jee sáá ya̱ íñɨ́ ráa nu̱u̱nꞌ kuꞌúꞌ, yukuán ntɨɨn Caín ñaniꞌ re̱ꞌ Abel ñaꞌniꞌ re̱ꞌ maa. 9I̱ña̱jée ni̱ka̱tu̱ꞌún I̱toꞌoꞌ‑ó Caín:
―¿Né núꞌ íyó ñaniꞌ nú Abel?
Jee nna̱xiníkó Caín:
―Ntu jíníꞌ‑nꞌ. ¿Sáre si̱kɨ̱ꞌ nuꞌuꞌ ví ya̱ kúmí ni̱ꞌ ñaniꞌ ni̱ꞌ rúja?
10Jee nkachiꞌ I̱toꞌoꞌ‑ó nu̱u̱nꞌ‑u:
―¿Nákuí ya̱ nsa̱ꞌá‑n rúja? Ni̱ñɨ̱ꞌ ñaniꞌ nú kákua̱chi‑i ne̱ nu̱u̱nꞌ ñuꞌun nu̱u̱nꞌ ñatɨ‑ɨ, ya̱ saꞌá náaꞌ ni̱ꞌ kua̱chi. 11Jee ne̱ vitan kino̱o nú kosoni̱nu nú ya̱ tavaꞌ ni̱ꞌ nó nu̱u̱nꞌ ñuꞌun yaꞌá ya̱ niꞌi‑i ni̱ñɨ̱ꞌ ñaniꞌ nú ya̱ ñaꞌniꞌ nú. 12Jee sáá satíñú nú nu̱u̱nꞌ ñuꞌun, ntu̱náꞌ tataꞌ taji tuku‑u ka̱ꞌ nu̱u̱nꞌ nú. Vitan jee kakanuun nú nɨꞌɨ ñɨ̱vɨ́ jee nkóo nu̱u̱nꞌ kuneeꞌ nú.
13I̱ña̱jée nkachiꞌ Caín nu̱u̱nꞌ I̱toꞌoꞌ‑ó:
―Mánasɨ́ ka̱ꞌ tu̱nóꞌó xinóꞌo nú nuꞌuꞌ nsú kua̱ꞌ kuneí ni̱ꞌ keꞌneꞌ iniꞌ ni̱ꞌ maa. 14Vitan ntavaꞌ nú nuꞌuꞌ nu̱u̱nꞌ ñuꞌún yaꞌá jee ñasɨꞌ nú ya̱ váꞌa táji nú nu̱u̱nꞌ ni̱ꞌ jee kakanuun ni̱ꞌ ñɨ̱vɨ́ jee nkóo nu̱u̱nꞌ kuneeꞌ ni̱ꞌ. Jee sukuán néni ɨɨn ya̱ naniꞌinꞌ‑i nuꞌuꞌ jee kaꞌniꞌ‑i nuꞌ.
15Soo nna̱xiníkó I̱toꞌoꞌ‑ó nu̱u̱nꞌ‑u:
―Néni ɨɨn ya̱ kaꞌniꞌ nó naxinóꞌo ni̱ꞌ maa u̱xa̱ꞌ íchí ka̱ꞌ.
I̱ña̱jée ntee I̱toꞌoꞌ‑ó ɨɨn seña Caín sáva sú néni ɨɨn ya̱ naketáꞌán jín‑i nka̱ꞌníꞌ vá maa.
16Jee nkene Caín yukuán nu̱u̱nꞌ nkaꞌanꞌ‑a jín I̱toꞌoꞌ‑ó jee ña̱kuneeꞌ‑e nu̱u̱nꞌ ñuunꞌ Nod ya̱ káá ichi kénta nka̱niiꞌ nu̱u̱nꞌ káá ñuunꞌ Edén.
Rá se̱ꞌya ichiyúkúnꞌ Caín
17Jee nkixiꞌ Caín jín ñasɨ́ꞌɨ́‑ɨ, jee nna̱nise̱ꞌya ña, jee nsi̱káku ña se̱ꞌya ña Enoc. Jee ñakɨnꞌ re̱ꞌ ɨɨn ñuunꞌ ya̱ nsi̱kúnání re̱ꞌ Enoc kua̱ꞌ naní se̱ꞌya re̱ꞌ. 18Nkaku Irad ya̱ kúvi se̱ꞌya Enoc, Irad nkuvi tátáꞌ Mehujael, Mehujael nkuvi tátáꞌ Metusael, jee Metusael nkuvi tátáꞌ Lamec.
19Lamec ni̱yo u̱vi̱ꞌ ñasɨ́ꞌɨ́ re̱ꞌ: ɨɨn ráa naní Ada jee inka ka̱ꞌ naní Zila. 20Jee nsi̱káku Ada se̱ꞌya ña naní Jabal, ya̱ kúvi re̱ꞌ tátáꞌ jííꞌ rá ñɨvɨ nééꞌ veꞌi sayo saꞌma jee kúmí ráa xi̱ni̱kɨ̱ꞌ. 21Jee ñaniꞌ Jabal naní Jubal, tátáꞌ jííꞌ ntáká rá ñɨvɨ sáꞌá yaaꞌ jín ya̱ naní arpa jín xi̱kiꞌli. 22Jee nsi̱káku Zila se̱ꞌya ña naní Tubal‑Caín, jee suvi nkuvi te̱e náteñuꞌunꞌ ka̱a jee nsa̱ꞌá re̱ꞌ ntáká nu̱u̱nꞌ rá nantíñú jín ka̱a bronce jín ka̱a hierro. Ni̱yo ɨɨn ku̱ꞌva Tubal‑Caín naní Naama. 23Jee nkachiꞌ Lamec nu̱u̱nꞌ rá ñasɨ́ꞌɨ́ re̱ꞌ, Ada jín Zila:
“Teso̱ꞌo rán ta̱chi̱yuꞌú ni̱ꞌ.
Rá ñasɨ́ꞌɨ́ nuꞌuꞌ Lamec,
chusoꞌo va̱ꞌa rán ya̱ kachiꞌ ni̱ꞌ nu̱u̱nꞌ rán.
Ñaꞌniꞌ ni̱ꞌ ɨɨn te̱e jie̱ꞌe̱ꞌ nstu̱fíꞌ‑i nuꞌuꞌ,
jín ɨɨn te̱e súchí jie̱ꞌe̱ꞌ ya̱ njiáꞌa‑a nuꞌuꞌ nsa̱ꞌá xátɨ́‑ɨ nuꞌuꞌ.
24Retuan nanikó Ndiosíꞌ naxinóꞌo re̱ꞌ u̱xa̱ꞌ íchí ɨɨn ñɨvɨ ya̱ kaꞌniꞌ‑i Caín,
jee nuꞌuꞌ, Lamec, nanikó ni̱ꞌ naxinóꞌo ni̱ꞌ u̱ni̱xiko xa̱ꞌu̱nꞌ u̱vi̱ꞌ (77) íchí ɨɨn ya̱ kaꞌniꞌ‑i nuꞌuꞌ.”
25Nni̱kó tuku Adán nkixiꞌ re̱ꞌ jín ñasɨ́ꞌɨ́ re̱ꞌ, jee nsi̱káku ña ɨɨn se̱ꞌya ña ya̱ nsi̱kúnání ña Set, jee nkachiꞌ‑i: “Nna̱tají Ndiosíꞌ ɨɨn ka̱ꞌ se̱ꞌya nu̱u̱nꞌ ni̱ꞌ ya̱ nna̱kunasɨꞌ‑ɨ nu̱u̱nꞌ Abel ya̱ ñaꞌniꞌ Caín maa.”
26Sunisaá Set ni̱yo ɨɨn se̱ꞌya re̱ꞌ ya̱ nsi̱kúnání re̱ꞌ Enós. Ne̱ sa̱a nka̱jiéꞌé néñu̱ꞌun ráa Ndiosíꞌ ya̱ kuvi re̱ꞌ I̱toꞌoꞌ ráa.
© 2022, Wycliffe Bible Translators, Inc. All rights reserved.