Yohana 9
9
Yesu a̱ creng a̱tuba nu ba yin byin ba̱ a̱tutwan ni
1Yesu na̱ shyi i ka̱cyet ka a̱ si shya a̱ntyok a̱tutwan. Ba yin ku byin ba̱ a̱tutwan na. 2Na̱won pfong Yesu a a̱ ku zzim a̱ hywa, “Malam, a̱ka̱tukyya a̱nyan a̱mi a̱n byyi ban byin a̱ntyen a̱ni ba̱ a̱tutwan na? Ba̱tyyi nu ba a̱mi e, ki nu diccu nu?”
3Yesu a̱ hywa, “Da̱ a̱yin a̱ni ko ba̱tyyi nu a̱ yya a̱ka̱tukyya ba, ma ba ku byin ba̱tutwan na Ka̱za a̱ ga tyyei cet nka tazwa nu. 4Dolet zin tyyi ka̱ssi bu pfong a̱yin nu a̱ n tom ni, ka̱bvwa ka ri sai. Ka̱tuk a̱ ni kwwat a̱yin a̱ bo maai pfong ba. 5Ka̱ram ka n nin shyi i ka̱sa ka ni nzuk n yet ka̱bvwa sai ka̱sa ka.”
6Na̱ bu tyak ba̱ryat ba a̱ krok ba̱ncwwa a̱n nrung dibvang a̱ ku kon ni a a̱ssi na. 7A̱ hywa da̱ nu, “Nat i dudung Siluwam (nkpa yet ‘tom’), si tssu a̱ssi nwan na.” A̱ntyen a̱ywu a̱ ma̱n nat a̱ si tssu a̱ssi nu na a̱ nwa cyang a̱ bai.
8Ba̱nyet ba a̱ shyi i na̱sa na a̱ ku hywot ni bu kpikpit ba̱nyet a a̱ ka̱n ku cyang na̱ naai i a̱ hywa, “A̱ntyen a̱ni a̱mi a̱ na swat a̱ naai baa?”
9Ba̱yanyet a̱ hywa, “Nnu a̱mi,” ba̱yanyet a̱ ton da̱ nu ba, di ba̱nyet tai ba̱yaan a̱mi, se a̱ntyen a̱ywu nu a̱ bu hywa, “Nzuk a̱mi!”
10Ba ku zzim a̱ hywa, “A cong ni a̱ssi nwan na nan yrang?”
11Na̱ hywa da̱ mba, “A̱yin nu ban yei Yesu ni, nu a̱mi a̱ ta ba̱ncwwa a̱n nrung dirwap a̱n kon ni a a̱ssi a̱ hywa da̱ nzuk, ‘Nat si tssu a̱ssi nwan na, i dudung ba̱shekwot a ban yei Siluwam ni.’ N ma̱ nat meyang, a̱ n bu tyak bu tssu na, a̱ssi nzuk a a̱ yrang, n nwa cyang na̱bvwa.”
12Ba zzim, “A̱ shyi ke?”
Na̱ hywa, “N bvwo ba.”
Ba̱nyet Farisa zzim diwat ti ban creng a̱ntyok a̱tutwan a̱ywu ni
13Ba drok ba̱ a̱ntyok a̱tutwan nu a̱ nat i di ba̱nyet Farisa na. 14Ka̱tuk ka Yesu na̱ yin nrung dirwap ti a̱n creng a̱ntyok a̱tutwan nu ni a̱ yin yet nom pfwi ba̱nyet Yahuda. 15Mba ba̱nyet Farisa na a̱ bo si zzim a̱ntyen a̱ywu diwat ti na̱n shya cyang a ni. Na̱ hywa da̱ mba, “A̱ n kon dibvang a a̱ssi na, n tssu n nwa cyang.”
16Ba̱yanyet ka̱yat ba̱nyet Farisa ka a̱ hywa, “A̱yin nu a̱ yya-yya jini ni a̱ yet a̱nying Ka̱za ba, rot a̱ tssup twrang pfwi ji ba.”
Ma ba̱yanyet a̱ hywa, “Ka̱ a̱ yet a̱ntyok a̱ka̱tukyya, a̱nyan a̱ ku maai yya taka̱i mpfong a ni?” Ba bo nwa zok ba̱ mba-mba.
17Ba̱nyet Farisa na i bu zzim a̱ntyen a̱ywu a̱ hywa, “A hywa da̱ nu a̱ na̱ yrang a̱ssi na. To, a hywa da̱ a̱nzan na̱ yet?”
Na̱ hywa da̱ mba, “A̱ yet a̱ntyok tyyei ba̱ryat Ka̱za.”
18Ba̱cecet ba̱nyet Yahuda ba a̱ shim ka̱sak ka na̱ yin yen yet a̱ntyok a̱tutwan nu ma na̱ cyang naani ni ba, se ban tom a̱ yei ba̱tyyi nu ba, 19a̱ bu ba̱ zzim, “Ka̱won nyin a̱n kaa nini e? Yi hywa di nyyai ban ku byin a̱ cyang ba. A̱nzan na̱ yya na̱n cyang naanini?”
20Ba̱tyyi ba a̱ hywa, “Njit zi bvwo a̱ yet ka̱won njit, zi bu bvwo ba yin ku byin ba̱ a̱tutwan. 21Ma a̱yin nu a̱ ku yrang a̱ssi na ni zi bvwo ba, da̱ njit ba bvwo ka̱sak ka na̱n yya a̱n cyang nnani ni ba. Yi ku zzim; a̱ maai ya tyyei a, a̱ yet ka̱bawon ba.” 22Ba̱tyyi ba a̱ yin hywa a̱mi, rot ba yin pfong ka̱wun ba̱cecet ba̱nyet Yahuda ka. Rot ba yin hywa da̱ a̱yin nu ba shya na̱ hywa di Yesu a̱ yet Kristi ni ba ni ku bvwo cong i bat a̱duwa na. 23Nkpa yin byyi ba̱tyyi ba a̱n hywa, “Nu a̱ yet ka̱bawon ba, yi ku zzim.”
24Ba bo yei a̱yin nu ba yin byin ba̱ a̱tutwan a̱ywu nkrang a̱hwa, a̱ hywa da̱ nu, “Wrak Ka̱za shii i za tyyei ka̱ryong! Zi bvwo a̱yin a̱ni a̱ yet a̱ntyok a̱ka̱tukyya.”
25A̱ntyok a̱tutwan nu a̱ hywa, “N bvwo ka̱ a̱ yet a̱ka̱tuk a̱yin ba. Kyang a n bvwo ni, nzuk n yin cyang ba ma nnani n cyang.”
26Ba ku zzim, “A̱ bu yyi-yya na ni ba̱ nwan? A̱ bu yya ni a̱n yrang a̱ssi nwan na?”
27Na̱ hywa da̱ mba, “N wa n ka̱n ya tyyei, da̱ nyin ba rot a̱pfo i hok ba. Yi bu cat hok a ni n yya ni? Yi ma̱n cat ku tssup o?”
28Ba nwa ku pfwei ka̱ yemi a̱ hywa, “Nwan a̱mi ku tssup ka̱ yemi, njit Musa zi tssup. 29Zi bvwo Ka̱za a̱ yin dyat bu Musa, ma a̱yin a̱ni, zi bvwo ka̱rek ka na̱n hyok ni ba ma.”
30A̱ntyen a̱ywu a̱ hywa, “Hok kyang ka̱hat! Yi bvwo ka̱rek ka na̱n hyok ni ba, na̱ wa ni n yrang a̱ssi naa? 31Zi bvwo Ka̱za a̱ pfong a̱ka̱tuk ba̱nyet ba. Ka pfong ba̱nyet ba a̱ ka̱ tyong ni a̱ bo yya kyang a ka cat i. 32Nyyai i yya ka̱sa ka yi ka̱n hok a̱nyan na̱ yrang a̱ssi a̱yin na ba byin ba̱ a̱tutwan ni? 33A̱yin a̱ni a̱ si bu nyyai di Ka̱za ba a̱ maai a̱ yya kyang ba.”
34Ba hywa da̱ nu, “Nwan ma ba yi na̱ byin ka̱yat a̱ka̱tukyya, nwan ba cat ma̱ za zzek.” A̱ ku nyying i bat a̱duwa na.
Ba̱nyet a̱tutwan sang Tswa Ka̱za
35Yesu a̱ hok ka̱sak ka ba nyying a̱ntyen a̱ywu i bat a̱duwa na ni, a̱ cong a̱ si ku shya a̱ ku zzim, “A wrak Ka̱won A̱neywu rya nwan naa?”
36A̱ntyen a̱ywu a̱ hywa, “A̱ntyok ka̱ryi! A̱nyan a̱ yemi? N tyyei da̱ nu n ga ku ryi rya nzuk a.”
37Yesu a̱ hywa, “A wu ka̱n ku ryi; nu a̱mi a̱ bo ryat ba̱ nwan.”
38Na̱ ta̱gbok a̱ hywa, “N na̱ ryi rya nzuk a, A̱gwam.”
39Yesu a̱ hywa, “Shirya a̱mi ba da̱ nzuk i ka̱sa ka, ba̱nyet ba a̱ wi cyang a ni a̱ ga cyang, ba̱nyet cyang ba a̱ kpa a̱tutwan.”
40Ba̱nyet Farisa ba̱yaan ba shyi ka̱ yemi ba̱ nu a̱ hok kyang a na̱ hywa da̱ a̱ntyen a̱ywu ni, a̱ ku zzim, “A hwa di zi ma̱n yet ba̱nyet a̱tutwan meyang o?”
41Yesu a̱ hywa da̱ mba, “Yi da wu yet ba̱nyet a̱tutwan se nyin ba byyi hywak ba. Ma ka̱sak ka yin hwa di yi cyang ni, nkpa ya tyyi a̱ka̱tukyya nu.”
© 2011, Wycliffe Bible Translators, Inc. All rights reserved.