Yohana 10
10
A̱tsatsak a̱ntyok a̱tsaai
1Yesu a̱ bo hywa, “Ka̱ryong a̱mi n ya tyyei, a̱yin nu da̱ nwa ka̱nu a̱briga bvon-tsaap ka ni ba ma a̱ wrak i taga a̱ yet a̱tang ba̱ a̱ntyok a̱tsaai. 2A̱yin nu a̱ nwa ka̱nu nwai ka ni, nu a̱ yet a̱yin nu a̱ tsaai bvon-tsaap ji ni. 3Ka̱ hyok, a̱ntyok cam ka̱bvwa nu a̱ ni ku yrang i, bvon-tsaap nu ji bu pfong diwan nu ti ka̱sak ka na̱n za̱ yei ba̱ a̱yiyrek nji na ni, na̱ za̱ tun a̱ wruk i. 4Ka̱ram ka na̱n wruk ba̱ nji ni ka̱ kwwat ka̱son ka zi nan tssup, rot ba bvwo diwan nu ti. 5Ba ni tssup a̱yanyet ba, seko ba wa ku tyong, rot ba bvwo diwan nu ti ba.”
6Yesu a̱ ba̱ tyyei gan ji ni, ma ba hok a̱ bvwong ba.
Yesu a̱mi a̱ yet a̱tsatsak a̱ntyok a̱tsaai u
7Rot a̱mi Yesu a̱ bo hywa da̱ mba, “Ka̱ryong a̱mi n ya tyyei, nzuk a̱mi n yet ka̱nu bat nwai bvon-tsaap ka. 8Ba̱nyet ba a̱ yet ka̱son a̱ ba a̱ n wwon ni a̱ yet ba̱tang bu ba̱nyet a̱tsaai, ma bvon-tsaap ji ba̱ pfong ba. 9Nzuk n yet ka̱nu nwai ka. A̱yin nu a̱ hyok da̱ nzuk a̱ nwa ni a̱ ni shya sucet, a̱ ni nwa a̱ wruk, a̱ shya ka̱rek a̱tsaai. 10Kyang yaan cong da̱ a̱tang ba seko na̱ bu yyi a̱ hywat, ko na̱ byyan. Nzuk n ba ba ga shya sucet a̱ kpo shya ba̱gingang.
11“Nzuk n yet a̱tsatsak a̱ntyok a̱tsaai u. A̱tsatsak a̱ntyok a̱tsaai u a̱ na wrak sucet nu na sabo bu bvon-tsaap ji. 12Ma a̱tuba nu ba ku sook a̱tsaai u ni nu a byyi bvon-tsaap ji ba, ki a̱ ryi ka̱bvwu a̱yit ka bai a̱ na tyong a̱ wwon bvon-tsaap ji, ka̱bvwu a̱yit ka a̱ nyyai a̱ bu bvei bvon-tsaap ji a̱ za̱ wop. 13A̱ na tyong rot nu a̱ byyi bvon-tsaap ji ba. A̱ wa ma̱n tsaai a̱n cat zang, ba bvon-tsaap ji a̱mi na̱ kula ba̱ nji ba. 14Nzuk n yet a̱tsatsak a̱ntyok a̱tsaai u. 15Da̱ni da̱ A̱tyyi nu na̱ ni n bvwo ni a̱mi n ma̱ ku bvwo, a̱mi meyang n ni n bvwo bvon-tsaap nzuk ji zi ma̱ n bvwo. Kuma n dam kwu zihywak nji ba. 16Bvon-tsaap zaan n shyi ma ka̱n nwa i ka̱srong nzuk ka ba, dolet a̱mi n ba̱ ra n tyyi. Ba ni hok diwan nzuk ti, a̱ yet ka̱srong ka̱yring a̱ byyi a̱ntyok a̱tsaai a̱yring.
17“A̱tyyi nu a̱ n cat rot n dam wrak sucet nzuk a ba n ga bo kpo san brak. 18A̱yin a̱mi a̱ n ssang sucet a ba. Nzuk a̱mi n kpo wwat di shim nzuk. N maai kpo wrak a n bo maai kpo san brek i. Nkpa a̱mi A̱tyyi nu na̱ n tyyi yya na.”
19A̱cecet a̱ bo ta̱za ka̱yat ba̱nyet Yahuda ka tazwa ba̱ryat ka ni. 20Ba̱yanyet a̱ hywa, “A̱ byyi a̱ka̱tuk tswa, a̱ tyong jyik. A̱nzan a̱n byyi yin ku pfong?”
21Ma ba̱yanyet a̱ hywa, “A̱yin nu a̱ shyi bu a̱ka̱tuk tswa ni a̱n dyat ni ba. A̱ka̱tuk tswa a̱ ni yya ni a̱n yrang a̱ssi ba̱nyet a̱tutwan?”
Ba̱nyet Yahuda na rak Yesu
22Ka̱ram A̱swa Yrang Bat Ka̱za ka a̱ krang a̱ ba, ba̱nyet a̱ bo tung Urushalima, i dikwei yemi. 23Yesu a̱ bu shyi i cong ka̱rek ka ban yei Ka̱kposeyang Solomon ni ka̱yat bat Ka̱za ka. 24Ba̱nyet Yahuda i tung si ku krang tyyi a̱katyyi i hywa da̱ nu, “A ni swat za wwon-wwon ka̱yat a̱huhwa a? Za tyyei a̱zizrak ka̱ryong, ka̱ nwan yet Kristi nu.”
25Yesu a̱ hywa, “N wa ka̱n ya tyyei, ma yi ni shim ba. Nkyang a A̱tyyi nu na̱ tyyi n yya ni yet a̱gba̱dang shaida tazwa nzuk. 26Ma nyin yi shim ba, rot yi shyi i ka̱srong nzuk ka ba. 27Bvon-tsaap ji shyi i ka̱srong nzuk ka ni pfong diwan nzuk ti, n ma̱n ba̱ bvwo, ba n tssup. 28N ba̱ jyet sucet wityak, di ba bo byyi kwi ba; da̱ a̱yin da̱ ni ba̱ ngap an bvak nzuk ba. 29A̱tyyi nzuk u a̱ n dyi da̱ mba ni a̱ ra̱u koyan di cet, da̱ a̱yin na̱n shyi a̱ ni ba̱ ngap an bvak nu ba. 30Nzuk ba̱ A̱tyyi nzuk u zi yet ba̱ a̱yring.”
31Ba̱nyet Yahuda na i bu kok kpang nin ku mang. 32Yesu a̱ hywa da̱ mba, “N ka̱n yya a̱tsatsak nkyang ba̱gingang nying na A̱tyyi nu na̱ n tyyi yya na a a̱ssi nyin ni. A̱nzan nu ka̱yat nna yin cat n mang a?”
33Ba̱nyet Yahuda i hywa, “Zi na̱ mang rot a̱tsatsak nkyang u a yya ni ba, ma rot ryihywat a a yya Ka̱za mi ni. A̱neywu da̱ nwan ni a cat ya brak n yya Ka̱za!”
34Yesu a̱ hywa, “Ka̱yat Truwang nyin ka ba jem a̱ hywa, ‘Ka̱za a̱ hywa: Yi yet na̱za.’ 35Zi bvwo ba̱ryat Ka̱za a̱ yet ka̱ryong hat a̱ba̱da; Ka̱za a̱ bo yei ba̱nyet ba ka yin ba̱ tom di ba̱ryat ba ni na̱za. 36Wwon nzuk u Ka̱za ka wa n tssa a̱ tom ka̱yat ka̱sa ka ni, yi wu hywa di n yya Ka̱za ryihywat ho n hywa di n yet Ka̱won Ka̱za. 37Ki n yya pfong a A̱tyyi nzuk u na̱ yya ni ba, yi ryok n shim ba. 38Ma ki n ma̱n yya nkyang a A̱tyyi nzuk u na̱ yya ni, ko yi n shim ba, dolet yi shim nkyang a n yya ni, yi gi bvwo sa̱rei ka̱sak ka A̱tyyi na̱n shyi ba nzuk n ma̱n shyi ba̱ nu ni.”
39Ba bo cat ku pyyem, na̱ ba̱ shot.
40Yesu a̱ drok a̱ bo si byyek ncen Urdun na, ka̱rek ka Yohana na̱ yi yen yya baptisma nu ni, a̱ si yen swat ka̱ yemi. 41Ba̱nyet ba̱gingang a̱ cong da̱ nu, a̱ hywa, “Yohana a̱ yin yya a̱cecet nkyang ba, ma sa̱rei nkyang a na̱ yin dyat tazwa a̱yin kani ni na yet ka̱ryong.” 42Ba̱nyet ba̱gingang ka̱ yemi a̱ ku ryi ndya mba na.
© 2011, Wycliffe Bible Translators, Inc. All rights reserved.