ወንጌል ዘሉቃስ 18
18
ምዕራፍ 18
ዘከመ ይደሉ ዘልፈ ጸልዮ
1 #
21፥36፤ ሮሜ 12፥12፤ ቈላ. 4፥2፤ 1ተሰ. 5፥17። ወይቤሎሙ በምሳሌ ከመ ዘልፈ ይጸልዩ ወኢይትሀከዩ። 2ወይቤሎሙ ሀሎ በአሐቲ ሀገር አሐዱ መኰንን ዘኢይፈርህ እግዚአብሔርሃ ወኢየኀፍር ሰብአ። 3#ዘፀ. 22፥22-23። ወሀለወት አሐቲ ዕቤርት በይእቲ ሀገር ወኮነት ትመጽእ ኀቤሁ ወትብሎ ኰንነኒ እምዕድውየ። 4ወአበያ ወአጐንደያ ወእምዝ ኀለየ ወይቤ እመ ኢይፈርሆ ለእግዚአብሔር ወኢየኀፍር ሰብአ። 5#11፥7-9። እትቤቀል ላቲ ከመ ኢታንጥየኒ ዛቲ እቤር ከመ ኢትምጻእ ወኢታስርሐኒ ዘልፈ። 6ወይቤሎሙ እግዚእነ ስምዑ ዘይቤ መኰንነ ዐመፃ። 7#መዝ. 80፥2፤ ማቴ. 24፥22። ኢይፈትሕኑ እንከ እግዚአብሔር ለኅሩያኒሁ እለ ይግዕሩ ኀቤሁ መዓልተ ወሌሊተ ወይትዔገሦሙኑ። 8#17፥22፤ ሮሜ 16፥20። እወ እብለክሙ ከመ ይፈትሕ ሎሙ ፍጡነ ወባሕቱ ወልደ ዕጓለ እመሕያው መጺኦ ይረክብኑ እንጋ ሃይማኖተ በዲበ ምድር።
በእንተ ፈሪሳዊ ወመጸብሓዊ
9 #
16፥15፤ ኢሳ. 65፥5። ወይቤሎሙ ለእለ ያጸድቁ ርእሶሙ ወይሜንኑ ቢጾሙ ወመሰለ ሎሙ ከመዝ። 10ክልኤቱ ዕደው ዐርጉ ቤተ መቅደስ ይጸልዩ ወአሐዱ ፈሪሳዊ ወካልኡ መጸብሓዊ። 11#ኢሳ. 58፥2፤ ማቴ. 5፥1። ወቆመ ፈሪሳዊ ወጸለየ ወይቤ አአኵተከ እግዚኦ ዘኢረሰይከኒ ከመ ባዕዳን ሰብእ ሀያድያን ወዐማፅያን ወእለ የሐውሩ ብእሲተ ብእሲ ወኢከመ ዝንቱ መጸብሓዊ። 12አንሰ እጸውም ሰኑየ ዕለተ በሰናብት ወአበውእ ዐሥራተ እዴሁ ለኵሉ ዘአጥረይኩ። 13#መዝ. 50፥3፤ 51፥3። ወመጸብሓዊሰ ቆመ እምርኁቅ ወኢፈቀደ ያንሥእ አዕይንቲሁ ላዕለ ውስተ ሰማይ ወጐድአ እንግድዓሁ ወይቤ ስረይ ሊተ እግዚኦ እስመ አነ ኃጥእ ዘኢይደልወኒ እቁም ውስተ መካነ መቅደስከ።#ቦ ዘኢይጽሕፍ «ዘኢደልወኒ እቁም ውስተ መካነ መቅደስከ» 14#14፥11፤ ኢሳ. 66፥2፤ ማቴ. 23፥12፤ 1ጴጥ. 5፥5። ወእብለክሙ አተወ ቤቶ ዝንቱ እንዘ ይጸድቅ እምዝክቱ እስመ ኵሉ ዘአዕበየ ርእሶ የኀሥር ወዘአትሐተ ርእሶ ይከብር።
ዘከመ ባረከ ሕፃናተ እግዚእ ኢየሱስ
15 #
ኢሳ. 49፥22፤ ማቴ. 19፥13-14። ወአምጽኡ ኀቤሁ ሕፃናተ ይግሥሦሙ#ቦ ዘይዌስክ «ወአንበረ እዴሁ ላዕሌሆሙ» ወርእዮሙ አርዳኢሁ ገሠጽዎሙ። 16ወጸውዖሙ እግዚእ ኢየሱስ ወይቤሎሙ ኅድጉ ሕፃናተ ይምጽኡ ኀቤየ ወኢትክልእዎሙ እስመ ለዘከመ እሉ ይእቲ መንግሥተ እግዚአብሔር። 17#ማር. 10፥13-16። አማን እብለክሙ ዘኢተቀበላ ለመንግሥተ እግዚአብሔር ከመ ሕፃናት ኢይበውኣ።
በእንተ ባዕል ዘተስእሎ
18 #
ማቴ. 19፥16-30፤ ማር. 10፥17-31። ወተስእሎ አሐዱ መልአክ ወይቤሎ ሊቅ ኄር ምንተ ሠናየ ገቢርየ እረክብ ሕይወተ ዘለዓለም። 19ወይቤሎ እግዚእ ኢየሱስ ለምንት ትብለኒ ኄር አልቦ ኄር ዘአንበለ አሐዱ እግዚአብሔር። 20#ዘፀ. 20፥12-17፤ ዘዳ. 5፥16-20፤ ኤፌ. 6፥2-3። ተአምር ትእዛዛቲሁ ኢትቅትል ነፍሰ ወኢትሑር ብእሲተ ብእሲ ወኢትዘሙ ወኢትስርቅ ወኢትኩን ስምዐ በሐሰት ወአክብር አባከ ወእመከ። 21ወይቤሎ ዘንተሰ ኵሎ ዐቀብኩ እምንእስየ እስከ ይእዜ። 22#ማቴ. 6፥20፤ 1ጢሞ. 6፥17-20። ወሰሚዖ ዘንተ እግዚእ ኢየሱስ ይቤሎ አሐቲ ተርፈተከ ሑር ወሢጥ ኵሎ ዘብከ ንዋየ ወሀብ ለነዳያን ወትረክብ መዝገበ ዘበሰማያት ወነዓ ትልወኒ። 23ወሰሚዖ ዘንተ ተከዘ ፈድፋደ እስመ ባዕል ውእቱ ጥቀ። 24ወርእዮ እግዚእ ኢየሱስ እንዘ ይቴክዝ ብዙኀ ይቤ እፎ ዕፁብ ለእለ ቦሙ ንዋይ በዊእ ውስተ መንግሥተ እግዚአብሔር። 25ይቀልል ይኅልፍ ገመል እንተ ስቍረተ መርፍእ እምባዕል ይባእ ውስተ መንግሥተ እግዚአብሔር። 26ወይቤሉ እለ ሰምዑ መኑ እንከ ይክል ድኂነ። 27#ኢዮብ 42፥2፤ ሉቃ. 1፥37። ወይቤሎሙ ዘበኀበ ሰብእ ይሰአን በኀበ እግዚአብሔር ይትከሀል።
ዘከመ ተስእሎ ጴጥሮስ ለእግዚእ ኢየሱስ
28 #
5፥11። ወይቤሎ ጴጥሮስ ናሁኬ ንሕነ ኀደግነ ኵሎ ወተሎናከ ምንተ እንጋ ንረክብ።#ቦ ዘኢይጽሕፍ «ምንተ እንጋ ንረክብ» 29ወይቤሎሙ አማን እብለክሙ አልቦ መኑሂ ዘየኀድግ ቤቶ ወአዝማዲሁ ወአኀዊሁ ወብእሲቶ ወውሉዶ በእንተ መንግሥተ እግዚአብሔር ። 30ዘኢይትዐሰይ ምእተ ምክዕቢተ በዝንቱ ዓለም ወበዓለምሰ ዘይመጽእ ሕይወተ ዘለዓለም።
በእንተ ሕማሙ ወሞቱ
31 #
ማቴ. 20፥17-19፤ ማር. 10፥32-34። ወነሥኦሙ ለዐሠርቱ ወክልኤቱ ወይቤሎሙ ናሁ ነዐርግ ኢየሩሳሌም ወይትፌጸም ኵሉ ዘጽሑፍ ውስተ መጻሕፍተ ነቢያት ላዕለ ወልደ ዕጓለ እመሕያው። 32#ኢሳ. 53፥7፤ መዝ. 21፥7። ወይሜጥውዎ ለአሕዛብ ወይሣለቁ ላዕሌሁ ወይጼዕልዎ ወይዌርቅዎ። 33#ዮሐ. 2፥19። ወይቀሥፍዎ ወይቀትልዎ ወይትነሣእ በሣልስት ዕለት። 34ወእሙንቱሰ አልቦ ዘለበዉ እምዘ ይቤሎሙ እስመ ስዉር ውእቱ ዝ ነገር እምኔሆሙ ወኢየአምሩ ዘይብል።
በእንተ ዕዉር ዘኢያሪሆ
35 #
ማቴ. 20፥29-34፤ ማር. 10፥46-52። ወእምዝ አልጺቆሙ ኢያሪሆ ሀሎ አሐዱ ዕዉር ይነብር ውስተ ፍኖት ወይስእል። 36ወሰሚዖ ድምፀ ሰብእ ዘየኀልፍ ይቤ ምንትኑ ዝ ዘእሰምዕ። 37ወይቤልዎ ኢየሱስ ናዝራዊ የኀልፍ። 38ወዐውየወ ወይቤ ኢየሱስ ወልደ ዳዊት ተሣሀለኒ። 39ወገሠጽዎ እለ ይመርሕዎ ከመ ያርምም ወዐውየወ ፈድፋደ ወይቤ ወልደ ዳዊት ተሣሀለኒ። 40ወቆመ እግዚእ ኢየሱስ ወአዘዘ ያምጽእዎ ኀቤሁ ወበጺሖ ኀቤሁ ይቤሎ ምንተ ትፈቅድ እግበር ለከ። 41ወይቤሎ እግዚኦ ከመ ይርአያ አዕይንትየ። 42#ማቴ. 9፥22። ወይቤሎ እግዚእ ኢየሱስ ርኢ ሃይማኖትከ አሕየወተከ። 43#መዝ. 145፥8። ወርእየ ሶቤሃ ወተለዎ ወአእኰቶ ለእግዚአብሔር ወርእዮሙ ኵሉ ሕዝብ ሰብሕዎ ለእግዚአብሔር።
