ወንጌል ዘሉቃስ 19
19
ምዕራፍ 19
በእንተ ዘኬዎስ መጸብሓዊ
1ወቦአ ኢያሪሆ እግዚእ ኢየሱስ ወእንዘ የኀልፍ#ቦ ዘይቤ «ወአንሶሰወ» እምህየ። 2ናሁ ረከበ ብእሴ ዘስሙ ዘኬዎስ መልአኮሙ ለመጸብሓን ወባዕል ውእቱ። 3#ዮሐ. 12፥1። ወየኀሥሥ ይርአዮ ለእግዚእ ኢየሱስ ወያእምር ከመ መኑ ውእቱ ወኢያበውሖ ብዝኀ ሰብእ እስመ ሐፂር ውእቱ በቆሙ። 4ወሮጸ ቅድሜሁ ወዐርገ ዲበ ሰግላ ከመ ይርአዮ እስመ እንተ ይእቲ ፍኖት ሀለዎ ይኅልፍ። 5ወበጺሖ እግዚእ ኢየሱስ ህየ አንሥአ አዕይንቲሁ ወነጸሮ ወይቤሎ ዘኬዎስ አፍጥን ወረድ እስመ ዮም ሀለወኒ አዐል ቤተከ። 6ወአፍጠነ ወሪደ ወአግኀሦ ኀበ ቤቱ እንዘ ይትፌሣሕ። 7#15፥2። ወርእዮሙ ኵሎሙ አንጐርጐሩ ወይቤሉ ኀበ ብእሲ ኃጥእ ቦአ የዐል። 8#ዘፀ. 22፥1-9፤ 1ሳሙ. 12፥3። ወቆመ ዘኬዎስ ወይቤሎ ለእግዚእነ ናሁ መንፈቀ ንዋይየ እሁብ ለነዳያን ወእመሂ ቦ ዘገፋዕክዎ እፈድዮ ህየንተ አሐዱ#ቦ ዘኢይጽሕፍ «ህየንተ አሐዱ» ትርብዕተ። 9#13፥16፤ ገላ. 3፥7። ወይቤሎ እግዚእ ኢየሱስ ዮምሰ ሕይወት ኮነ ለሰብአ ዝንቱ ቤት እስመ አንተሂ ወልደ አብርሃም አንተ።#ቦ ዘይቤ «ለዝንቱ ቤት እስመ ውእቱሂ ወልደ አብርሃም ውእቱ» 10#ሕዝ. 34፥16፤ ማቴ. 18፥11፤ 1ጢሞ. 1፥15። እስመ መጽአ ወልደ ዕጓለ እመሕያው ይኅሥሥ ወያድኅን ዘተኀጕለ።
በእንተ እለ ነሥኡ ምናናተ
11 #
ማቴ. 25፥14-30። ወእንዘ ይሰምዑ ዘንተ መሰለ ሎሙ ወይቤሎሙ እስመ ቅሩብ ውእቱ ለኢየሩሳሌም ወይመስሎሙ ከመ ሶቤሃ ታስተርኢ መንግሥተ እግዚአብሔር። 12ወይቤ አሐዱ ብእሲ ክቡር ሖረ ብሔረ ርኁቀ ይንሣእ ሎቱ መንግሥተ ወይሰወጥ። 13ወጸውዐ አግብርቲሁ ዐሠርተ ወወሀቦሙ ዐሠርተ ምናናተ ወይቤሎሙ ተገበሩ እንከ እስከ አአቱ። 14#ዮሐ. 1፥11። ወሰብአ ሀገሩሰ ይጸልእዎ ወፈነዉ ተናብልተ ድኅሬሁ እንዘ ይብሉ ኢንፈቅዶ ለዝንቱ ይንግሥ ላዕሌነ። 15ወእምዝ ሶበ አተወ ነሢኦ መንግሥተ አዘዘ ያምጽእዎሙ ለአግብርቲሁ እለ ወሀቦሙ ወርቆ ከመ ያእምር ዘከመ ተገበሩ። 16ወመጽአ ቀዳማዊ ወይቤሎ እግዚኦ ምናንከ ዐሠርቱ ወዐሠርተ ምናናተ ረባኅኩ። 17#ማቴ. 25፥21፤ 16፥10። ወይቤሎ እግዚኡ ኦ ገብር ኄር ወምእመን ዘበውኁድ ምእመነ ኮንከ ዲበ ብዙኅ እሠይመከ ተሠየም ላዕለ ዐሠርቱ አህጉር። 18ወመጽአ ካልኡሂ ወይቤሎ እግዚኦ ምናንከ ኀምስቱ ወኀምስተ ምናናተ ረባኅኩ። 19ወይቤሎ ሎቱኒ አንተኒ ተሠየም ላዕለ ኀምስቱ አህጉር። 20ወመጽአ ሣልሱኒ ወይቤሎ እግዚኦ ነያ ምናንከ እንተ ኀቤየ ጠብለልክዋ ወአንበርክዋ ውስተ ሰበንየ። 21እስመ ፈራህኩከ እስመ አአምረከ ከመ ዕፁብ ብእሲ አንተ ወትነሥእ ዘኢያንበርከ ወተአርር ዘኢዘራዕከ ወታስተጋብእ ዘኢዘረውከ። 22#1ሳሙ. 1፥17፤ ማቴ. 12፥37። ወይቤሎ እግዚኡ በከመ ቃልከ እኴንነከ ኦ ገብር እኩይ ወሀካይ ተአምረኒኑ ከመ ብእሲ ዕፁብ አነ አነሥእ ዘኢያንበርኩ ወአአርር ዘኢዘራዕኩ ወአስተጋብእ ዘኢዘረውኩ። 23ወለምንት ኢያግባእከ ወርቅየ ውስተ ማእድየ ወለልየ አነ አቲውየ እምአስተገበርክዎ ምስለ ረባኁ። 24ወይቤሎሙ ለእለ ይቀውሙ ህየ ንሥኡ እምላዕሌሁ ዘንተ ምናነ ወሀብዎ ለዘቦቱ ዐሠርቱ ምናናት። 25ወይቤልዎ እግዚኦ አኮኑ ቦቱ ዐሠርቱ ምናናት። 26#8፥18፤ ማቴ. 13፥12፤ ማር. 4፥25። ወይቤሎሙ እብለክሙ ለኵሉ ዘቦ ይሁብዎ ወይዌስክዎ ወለዘሰ አልቦ እለሂ ቦ የሀድይዎ። 27ወባሕቱ ለእልክቱሰ ጸላእትየ እለ ኢይፈቅዱ እንግሥ ላዕሌሆሙ አምጽእዎሙ ዝየ ወርግዝዎሙ በቅድሜየ።
ዘከመ ዐርገ እግዚእ ኢየሱስ ኢየሩሳሌም
28 #
ማር. 10፥32። ወዘንተ ብሂሎ አመልአ ቅድመ ወዐርገ ኢየሩሳሌም። 29#ማቴ. 21፥1-11፤ ዮሐ. 12፥12-16። ወሶበ በጽሐ ቤተ ፋጌ ወቢታንያ ኀበ ደብር ዘስሙ ኤሌዎን ፈነወ ክልኤተ እምአርዳኢሁ። 30#ማር. 11፥2። ወይቤሎሙ ሑሩ ሀገረ ዘቅድሜክሙ ወበዊአክሙ ትረክቡ ዕዋለ እሱረ ዘኢተጽዕኖ ሰብእ ፍትሕዎ ወአምጽእዎ ሊተ። 31ወእመቦ ዘይቤለክሙ ለምንት ትፈትሑ በሉ እግዚኡ ይፈቅዶ። 32ወሐዊሮሙ እለ ተፈነዉ ረከቡ በከመ ይቤሎሙ። 33ወፈትሑ ዕዋለ ወእንዘ ይፈትሑ ዕዋለ ይቤልዎሙ አጋእዝቲሁ ለምንት ትፈትሕዎ ለዕዋል። 34ወይቤሉ እግዚኡ ይፈቅዶ። 35ወነሥእዎ ወወሰድዎ ኀበ እግዚእ ኢየሱስ ወረሐኑ አልባሲሆሙ ዲበ ዕዋል ወአጽዐንዎ ለእግዚእ ኢየሱስ ዲቤሁ። 36ወእንዘ የሐውሩ ነጸፉ አልባሲሆሙ ውስተ ፍኖት። 37ወበጺሖሙ ኀበ ሙራደ ዐቀብ ዘደብረ ዘይት አኀዙ ኵሎሙ አርዳኢሁ ይትፈሥሑ ወይሰብሕዎ ለእግዚአብሔር በዐቢይ ቃል በእንተ ኵሉ ኀይል ዘርእዩ። 38#መዝ. 117፥26፤ ማቴ. 21፥1-11፤ 2፥14፤ ዮሐ. 12፥13። እንዘ ይብሉ ቡሩክ ዘይመጽእ በስመ እግዚአብሔር ወቡሩክ ንጉሠ እስራኤል ሰላም በምድር#ቦ ዘይቤ «ሰላም በሰማይ» ወስብሐት በአርያም። 39ወቦ እምፈሪሳውያን እለ ይቤልዎ በማእከለ ሕዝብ ሊቅ ገሥጾሙ ለአርዳኢከ። 40#ዕን. 2፥11፤ 2ጴጥ. 2፥16። ወአውሥኦሙ ወይቤሎሙ እብለክሙ ለእመ አርመሙ እሉ እሎንቱ አእባን ይኬልሑ። 41#2ነገ. 8፥11፤ ዮሐ. 11፥35። ወበጺሖ ርእያ ለሀገር ወበከየ ላዕሌሃ። 42#ዘዳ. 32፥28፤ ኢሳ. 59፥8። ወይቤላ ሶበሰ ተአምሪ ዮም ሰላምኪ ወባሕቱ እምይእዜሰ ተሰወረ እምአዕይንትኪ። 43#ኢሳ. 29፥3፤ መዝ. 21፥22። ወይበጽሐኪ መዋዕል አመ የዐግቱኪ ፀርኪ ወይትአየኑኪ ወየሐጽሩኪ ወያስተጋብኡኪ እምኵለሄ። 44#ማቴ. 24፥2። ወይነፅኁኪ ለኪ ወለውሉድኪኒ ምስሌኪ ወኢየኀድጉ እብነ ዲበ እብን በውስቴትኪ እስመ ኢያእመርኪ መዋዕለ ሣህልኪ።
ዘከመ ሰደዶሙ ለእለ ይሠይጡ ወይሣየጡ በቤተ መቅደስ
45 #
ማቴ. 21፥12-17፤ ማር. 12፥15-19። ወቦአ ምኵራበ ወሰደደ ኵሎሙ እለ ይሠይጡ ወይሣየጡ በቤተ መቅደስ ወገፍትዐ ማእዳቲሆሙ ለመወልጣን ወመናብርቲሆሙ ለእለ ይሠይጡ ርግበ። 46#ኢሳ. 56፥7፤ ኤር. 7፥11። ወይቤሎሙ ጽሑፍ ዘይብል «ቤትየሰ ቤተ ጸሎት ይሰመይ» ወአንትሙሰ ረሰይክምዎ በኣተ ፈያት ወሰረቅት። 47#21፥37። ወኵሎ አሚረ ይሜህሮሙ በምኵራብ ወየኀሥሡ ሊቃነ ካህናት ወጸሐፍት ወሊቃናተ ሕዝብ በዘይቀትልዎ። 48ወኀጥኡ ዘይሬስይዎ እስመ ኵሎሙ ሕዝብ ይሰቀሉ በአፅምዖቱ።
