ማ̈ቶ̈ሳ 23
23
ሙ̈ሳ ሂጋ̇ ታማ̈ርሲ̇ዝ ኣሳንኬ ፋራሳ̈ዋን ኢ̈ቲቲ
ማ̈ርቆ̈ሳ 12፡38-39፤ ሉቃ̈ሳ 11፡43-46፤ 20፡45-46
1ዪኒ̇ፖ ዎሃ ዬሱ̈ሲ ዎርዣ̈ብኬ ፌ ታማ̈ራንቦ ሶ̈ሊ̈ርዶሪ፥ 2“ሙ̈ሳ ሂጋ̇ ታማ̈ርሲዛንኬ ፋራሳ̈ዋን ታማ̈ርሳ̇ንዳቦ ሙ̈ሳ ቤሲ̇ን ጋልዳ̇ ዶኢኔ። 3ዪ̈ኮታ̇ቦ ኢንቲ̇ ዪንታ̇ክ ጋ̈ዝ ባዚን ዎይ ኦ̈ብቴ፤ ና̈ጊብቴ። ኢንቲ̇ ፌ ታማ̈ርሳዝ ባዚን ኦ̈ሳ ጋልዳ ፌ̈ሺ̇ባ̈ሶኮታ̇ቦ ኢንቲ̇ ኦ̈ዝ ባዚን ኦ̈ፒ̇ቴ። 4ኣሲ ቶ̈ካ̇ንዳ̇ብ ዳንዳ̇ኢባ̈ሶ ጴች ዴ̈ጻዝ ቶ̈ፊን ቃቻ̇ር ኣስ ቶ̈ሲ̈ሬ፤ ፌ̈ብ ፌ ቆም ጋልዳ ቶኪዛ ኣቲ̇ን ፌ ኩሺን ጊልኢንባራር ዎ̈ሻንዳብ ኮዪባ̈ሴ።
5ኢንቲ̇ ፌ ኦ̈ሲን ዎይ ኦ̈ዚንዳ ኣሲ ቤቃ̇ምፔ̈ኒ ጋ̈ሪዬ፤ ፌ ቃሳ̇ ጋልዳኬ ፌ ዴ̈ማ ጋልዳ̇ ቃቺ̇ዝ ባዝ ሙ̈ሳ ሂጋ̇ ማጻ̈ፋ ጋልዳፖ̇ ጢቅሳባር ዎ ማጻ̈ፋ ፌ̈ብ ሻክሺ ሲኪሲሬ፤ ፌ ኣፊላ ማጫራዳ ጳሪንሬ። 6ኢሳ̇ ቤስ̇ ጋልዳ̇ሬ ቦንች ቤስ̇ ጋልዳ ዶኣንዳ̇ቦ፥ ኣይሁድ ዎ̈ሳ ኬ̈ ጋርታ̇ሬ ቲ̈ን ዓ̈̇ር ቤስ̇ ኤ̈̇ንዳብ ኮዪ̈ሬ። 7ኣሲ ሺ̈ቂዝ ቤሳ̇ ጋልዳ̇ ኣሲ ዎይ ኢንታ̇ብ ሞ̈ኪንቲ̇ ሳሪምፔ̈ንኬ ‘ኣስታማ̈ራ̈ዶ!’ ጌዪ ኢንታ ጼይጋምፔ̈ን ኮዪ̈ሬ። 8ዪንታ̇ቦ ኣስታማ̈ራዲ ፔታ̇ን ሙታ̇ ማ̈ቂ̇ኖኮታ̇ብኬ ማ ዪንቲ̇ ዎይን ዎልኣ ኢሺኬ ጌ̈ድኬ ማ̈ቂ̇ኖኮታ̇ቦ ‘ኣስታማ̈ራ̈ዶ!’ ጌዪ ጼይጊንታ̇ፒቴ። 9ማ ኣፋ ዎ ዪንታ̇ ባ̈ባ̈ዲ ፔታ̇ና ኢያ ሙታ̇ ማ̈ቂ̇ኖኮታ̇ቦ ሳ̈ዝ ጋልዳ ኦ̈ናካር ‘ባ̈ቤ!’ ጌዪ ጼይጋፒቴ። 10ዪንታ̇ብ ኣስታማ̈ራዲ ፔታ̇ና ክርስቶ̈ሳ ሙታ̇ ማ̈ቂ̇ኖኮታ̇ቦ ‘ኣስታማ̈ሪ’ ጌዪ ጼይጊንታፒቴ። 11ዪንታ̇ ጋርታ̇ ዪንቲ ዎይንፖ̇ ሺዝ ና̈ሳዲ ኢ ዪንታ̇ቦ ኣሽካ̇ራ ማ̈ቆ̇ ጋ̈ቤ። 12ፌ̈ብ ፌ̈ና ሾክ ሾክ ዎቲዛ̈ዲ ኢ ዪርክ ጌይሬ፤ ፌ̈ና ዪርክ ዎቲዛ̈ዲ ኢ ሾክ ጌይሬ።
13“ኣሳ ቲ̈ን ኮሽ ማይጻር ቤንታ̇ንዳብ ኮዪዛን ሙ̈ሳ ሂጋ̇ ኣስታማ̈ራንኬ ፋራሳ̈ዋን! ዪንታ̇ ባዚ ኣዬ! ዪንቲ̇ ኣሲ ጾ̈ሳ̇̇ ካ̈ቲቲን ጋርታ̇ ጌላካ̇ይፌ̈ን ካሪን ዪብጺ̇̈ሬ። ዪንቲ̇ ዪንታ̇ ቆሚ̇ንዳር ጌሊባ̈ሲ ማ ጌላንዳብ ኮዪዛን ጌላካ̇ይፌ̈ን ካዪ̈ሬ።
14[“ኣሳ ቲ̈ን ኮሽ ማይጻር ቤንታ̇ንዳብ ኮይዛን ሙ̈ሳ ሂጋ̇ ኣስታማ̈ራንኬ ፋራሳ̈ዋን! ዪንታ̇ ባዚ ኣዬ! ዪንቲ̇ ኮሽ ማይጺ ቤንታ̇ንዳብ ዪንታ̇ ዎ̈ሳ ጳሪን̈ሬ። ኣስኒ ዓይቂ̇ኖ ማጫን ኣ̈ሊን ዎርባይሲ̈ሬ፤ ዪ̈ኮታ̇ቦ ዎይፖ̇ ሺ̈ዲዝ ፊርዶ ዪንታ̇ ዬሊ̇̈ሬ።]
15“ኮሽ ማይጻር ቤንታ̇ንዳብ ኮዪዛን ሙ̈ሳ ሂጋ̇ ኣስታማራንኬ ፋራሳ̈ዋን! ዪንቲ̇ ፔቲ̇ ኣስ ኣማ̇ንንዳቦ ባሃራ ጋልዳ̇ር ሳ̈ዝ ጋልዳር ዎይ ቢሪንቲ̇̈ሬ፤ ኢያ ኣማ̇ንኖፖ̇ ዓኒ ዪንቲ ኤካ̇ዝ ፊርዲምፖ̇ ናምኢ ኩሽ ፊርዳ ኤካ̇ምፔን ጊጊ̇ሲዛኮታ̇ቦ ዪንታ̇ ባዚ ኣዬ̇።
16“ዪንቲ̇ ዪንታ̇ ቆ̈ማ̇ብ ኣ̈ፊ ዎብዶ̈ሪ ሜላ ኣስ ቲ̈ኒዝ ኣሳን! ዪንታ̇ ባዚ ኣዬ! ዪንቲ̇ ‘ኣሲ ጾ̈ሳ̇̇ ኬ̈ባር ጫ̈ቄጌይንዶ ኣባካር ባዬ፤ ጾ̈ሳ̇̇ ኬ̈ን ጋርቶ̇ ዎርቂንባር ጫ̈ቄጌይን ፌ ጫ̈ቂምባር ኤ̈ንቲ̇̈ሬ’ ጌይሬ። 17ዪንቲ̇ ዳሻኬ ኣፊ ዎባ̇ን! ዎርቂምፔኬ ዎርቂን ጌ̈ሺ̇ዝ ጾ̈ሳ̇̇ ኬ̈ምፖ̇ ዎና̇ ሺ̈ራ? 18ማ ዪንቲ̇ ‘ኣሲ ዣ̈ርሻ ሺ̈ሺ̇ዝ ቤሲ̇ምባር ጫ̈ቄጌይን ኣባካር ባዬ̇፤ ዣ̈ርሻ ቤሲ̇ን ጋልዳ̇ ዣ̈ርሺንቲ̇ኖ ባዚምባር ጫ̈ቄጌይን ፌ ጫ̈ቂምባር ኤ̈ንቲ̇̈ሬ’ ጌይሬ። 19ዪንቲ̇ ኣ̈ፊ ዎባ̇ን! ዣ̈ርሻ ሺ̈ሺ̇ኖ ባዚምፔኬ ዣ̈ርሻ ሺ̈ቂኖ ባዚን ጌሻ̇ዝ ዣ̈̈ርሻ ቤሲ̇ምፖ̇ ዎና̇ ሺ̈ራ? 20ዪ̈ኮታ̇ቦ ዣ̈ርሻ ቤሲ̇ምባር ጫ̈ቂ̇ዛ̈ዲ ዣ̈ርሻ ቤሲ̇ምባርኬ ኢዝ ጋልዳ ዎ ባዚን ዎይምባር ጫ̈ቂ̇̈ሬ። 21ጾ̈ሳ̇̇ ኬ̈ምባር ጫ̈ቂ̇ዛ̈ዲ ጾ̈ሳ̇̇ ኬ̈ምባርኬ ኢዝ ጋርታ ዶኢዝ ጾ̈ሳ̇̇ባራ ጫ̈ቂ̇̈ሬ። 22ኣፎ ሳ̈ዚምባር ጫ̈ቂ̇ዛ̈ዲ ጾ̈ሳ̇̇ ዶኣዝ ዙፋ̈ኒንባርኬ ዙፋ̈ኒን ኢዝ ጋልዳ ዶኢዛ̈ባራ ጫ̈ቂ̇̈ሬ።
23“ዪንቲ̇ ኮሽ ማይጻር ቤንታ̇ንዳብ ኮዪዛን ሙ̈ሳ ሂጋ̇ ኣስታማ̈ራንኬ ፋራሳ̈ዋን! ዪንታ̇ ባዚ ኣዬ! ዪንቲ̇ ካር ጋ̈ላ̇ ጋልዳፖ̇፣ ኢንሲላ̈ላ ጋልዳፕኬ ኮሮ̈ሪማ ጋልዳፖ̇ ኣስራ̈ታ ኢሚ̇̈ርዶሪ ሂጋ̇ ማጻ̈ፋ ጋልዳ ዎ ሺ ኮሺ̇ዝ ባዛን ኣሺ̇ኔ። ዪንሬ ኪን ፊርዳ፣ ማ̈ሪቲኬ ጺሊ̇ቲ። ዪንቲ̇ ሴካ̇ንር ኣሻካ̇ይዶሪ ዓንር ኦ̈ንዳብ ኮሺ̇̈ሬ። 24ዪንቲ̇ ዪንታ̇ ቆማ̇ብ ኣ̈ፊ ዎብ̇ዶሪ ሜላ ኣስ ቲኒዛን! ዪንቲ̇ ኡሽኪ̇ዝ ባዛን ጋርታ̇ፖ̇ ጊላ̇ ዉኒናፌ̈ኖን ኬሲ ቶጚ̈ሬ፤ ጴች ጊማልፌ̈ኖዳ ቆ̈̈ሬ።
25“ዪንቲ̇ ኣሳ ቲ̈ን ኮሽ ማይጻር ቤንታ̇ንዳብ ኮዪዛን ሙ̈ሳ ሂጋ̇ ኣስታማ̈ራንኬ ፋራሳ̈ዋን! ዪንታ̇ ባዚ ኣዬ̇! ዪንቲ̇ ዋ̈ንጪንዲኬ ጋባቲን ጋሊ̇ን ጌ̈ሺ̇̈ሬ፤ ጋርሲ̇ንዳ ዪንቲ̇ ቡሪባርኬ ሱ̈ቃ̇ባር ሺ̈ሺ̇ኖ ባዝባር ኩሚኔ። 26ኣ̈ፊ ዎብ ፋራሳ̈ዋ̈ዶ! ኔ ቲ̈ኒታራ ዋ̈ንጪንዲኬ ጋባቲን ጋርሲን ጌ̈ሻ̇ቤ! ዪዚ ዪኒ̇ባራ ጋሊ̇ንዳ̇ር ጌ̈ዥጋ̈ሬ።
27“ዪንቲ̇ ኣሳ ቲ̈ን ኮሽ ማይጻር ቤንታ̇ንዳብ ኮዪዝ ሙ̈ሳ ሂጋ̇ ኣስታማ̈ራንኬ ፋራሳ̈ዋን! ዪንታ̇ ባዚ ኣዬ̇! ዪንቲ̇ ጋርታ̇ ዓይቂ̇ኖ ኣሳን ሜቃኬ ቄ ባዝ ዎይባር ኩማሪ ጋሊ̇ንዳ ቦ̈ርስ ቦቃባር ሜ̈ሻር ቆይሲሲኖ ጎሪ ማይጺ̈ሬ። 28ዪና̇ ኢዝፌ̈ኒ ዪንቲ̇ ዛ̈ና ኣሳ ቲ̈ን ጺላ̇ ኣስ ማይጻ̇ር ቤንቲ̈ርዶኒ ዪንታ̇ ጋርሲ̇ንዳ ኮሽ ማይጺዝ ኢ̈ቲ̇ቲባርኬ ዉጫባር ኩሚኔ።
29“ዪንቲ̇ ኣሳ ቲ̈ን ኮሽ ማይጻር ቤንታ̇ንዳብ ኮዪዝ ሙ̈ሳ ሂጋ̇ ኣስታማ̈ራንኬ ፋራሳ̈ዋን! ዪንታ̇ ባዚ ኣዬ̇! ዪንቲ̇ ናባን ዱ̈ፊን ጋልዳ̇ ኬ̈ ኬ̈ጺ̇̈ሬ፤ ጺላ̇ ኣሳን ዱ̈ፊን ቆይሲሲ̈ሬ። 30ዪንቲ̇ ‘ኑ̈ኒ ሚኖ ኑ ባ̈ቢንታን ኬል̇ባራ ዎኮ ዎኒ ኢንታ̇ባር ማ̈ቃ̇ር ናባን ኑ ዎባስዶ̈ን’ ጌዪ ሶ̈ሊ̈ሬ። 31ዪዚ ዪንቲ̇ ሚኖ ናባን ዎኖ ኣሳንቦ ናኢ ማ̈ቂ̇ኖን ዪንቲ̇ ዪንታ̇ ጋልዳ ማርኪቲ̈ሬ። 32ዪ̈ዲኮ ዪንታ̇ ባ̈ቢንታን ኤ̈̇ር ዉርሳካ̇ይ ኣሺ̇ኖን ዪንቲ̇ ዉርሲ̇ብቴ̇።
33“ዪንቲ̇ ሾ̈ሻን! ዪንቲ̇ ቂርጭቂርጫ ናኣን! ቴይቂ̇ባ̈ሶ ታማ ጋርታ̇ ጌላዚምፖ ዪንቲ̇ ዎዛ̈ርታ̇ር ቡ̈ታ̇ንዳብ ዳንዳኢ̈ራ? 34ዪ̈ኮታ̇ቦ ዓ̈ዲሼ ታ̈ኒ ና̈ባን፣ ኤራ ኣሳንኬ ኣስታማ̈ራን ዪንታ̇ክ ሚሻንዳ። ዪንቲ̇ ኢንታ̇ ጋርታ̇ፖ ፔታ̇ን ፔታ̇ናን ዎ̈ሬ፤ ፔታ̇ን ፔታ̇ናን ማስቃላ ጋልዳ ሶቲ̇̈ሬ፤ ማ ፔታ̇ን ፔታ̇ናን ኢንታ̇ ዎ̈ሳ ኬ̈ን ጋርታ̇ ቡኪ̇ ጋራ̇ፊ̈ሬ፤ ኢንቲ̇ ዎ ካታ̇ሚን ጋርታ̇ፖ ሜላ ካታማ ጋርታ̇ ሉካ̇ምፔ̈ን ኢንታ̇ ዳኪ̇̈ሬ። 35ዪኒ̇ኮታ̇ቦ ጺላ̇ ኣቤ̈ላ ሱ̈ምፖ ኤ̈̇ር ጾ̈ሳ̇̇ ኬ̈ ጋርታ̇ኬ ዣ̈ርሻ ቤሲ̇ን ጊዲ̇ን ጋርታ̇ ዪንቲ̇ ዎኖ ባራ̈ኪያ ናኣ ዛካ̇ራ̈ሳ ሱ̈ን ዬላ̇ር ሳ̈ዝ ጋልዳ ዉሊንቲ̇ኖ ጌ̈ሻ ኣሳን ሱ̈ ዎይን ጊሽ ጾ̈ሳ̇̇ ጎይላ ዪንታ̇ ጋልዳ ዬይሬ። 36ቴ ዪንታ̇ክ ኪን ጋ̈ሬ ዪ ዎይ ጾ̈ሳ̇̇ ጎይላ ዓታ̇ባሮ ኣሳ ዓ̈ ጋልዳ ዬይሬ” ጌይዴ።
ዬሱ̈ሲ ዬሩሳ̈ላም ካታሚንቦ ዬ̈ኪ̇ዴ
ሉቃ̈ሳ 13፡34-35
37ዬሱ̈ሲ “ኣ̈ሽ ዬሩሳ̈ላሜ! ዬሩሳ̈ላሜ! ኣ̈ሽ ናባን ዎዚንዴ! ኔ̈ክ ኪ̈ታ̇ር ሚሺኖን ሹችባር ቆጻ̇ዚንዴ! ኩቲን ፌ ናኣን ፌ ካ̈ፒ̇ን ጋርታ̇ ሺ̈ሻ̇ዚንዲፌ̈ን ታ̈ናር ኔ ናኣን ዎልኣ ፔታ̇ን ሺ̈ሻ̇ንዳብ ኣ̈ፊ̈ን ጎይ ኮዪና! ዎቲናካር ዪንቲ̇ ኢጺ̇ዴ። 38ዪዚ ዓኒ̇ሼ ዪንታ̇ ኣ̈ሊን ካይዝ ማ̈ቃ̇ ኣታ̇̈ሬ። 39ዪ̈ኮታ̇ቦ ዪንቲ̇ ‘ጎዳ ሱምምባር ዬይዛ ኢ ኣንጂንቲኖ̈ዳ’ ጌይዝ ዲራ̈ስ ዓኒ̇ፖ ጌዳ ዪንቲ̇ ታ̈ና ቤቂ̇ባ̈ሴ ጋ̈ሬ” ጌይዴ።
