ማ̈ቶ̈ሳ 22
22
ኢሳ̇ ጋርታ ጼይጊንቲ̇ኖ ኣሳን ሚሳ̇̈ሊ
ሉቃ̈ሳ 14፡15-24
1ዬሱ̈ሲ ኣሳንቦ ናምኢ ማ̈ቃ̇ር ሚሳ̇ሊባር ሶ̈ሊርዶሪ፥ 2“ጾ̈ሳ̇̇ ካቲቲ̇ንዳ ፌ ና̈ኣቦ ኢስ̇ ማስኪ̇ ዬርጋ̇ር ኣስ ጼይጊኖ ካ̈ታ ማይጻ̈ሬ። 3ካ̈ታ̈ዲ ጼይጊንቲ̇ኖ ኣሳን ኢሲ̇ን ጋርታ̇ ዬ̈ምፔ̈ን ኣሳንቦ ሶ̈ሎ ጌዪ ፌ ኣሽካራን ኢንታ̇ክ ሚሺዴ። ዎቲናካሬ ኣሳን ኢሲ̇ን ጋርታ ዬብዳ̇ ጌዪ ኢጺ̇ዴ።
4“ካ̈ታ̈ዲ ዓታ̇ር ማሃሪ ‘ጼይጊንቲ̇ኖ ኣሳንኮ ሉካ̇ሪ፤ ዓ̈ዲሼ ኢሳ̇ቦ ማስካ፥ ቴ ጌ̈ንንኬ ዱዲ̇ኖ ቴ ሜሃን ሹካ̇ ዎይ ባዝ ዬርጊ̇ኔ። ዪዚ ኢሲ̇ን ጋርታ̇ ዬብቴ̇ ጋ̈ሪ ሶ̈ሊብቴ̇’ ጌዪ ሜላ ኣሽካራን ጉጃ̇ር ኪ̈ታ̇ር ሚሺዴ።
5ዎቲናካሬ ኢንቲ̇ ኢ ጼይሲ̇ን ኣባካር ማይጺሳካ̇ይ ኣሻ̇ሪ ፔታ̇ና̈ዲ ፌ ዎት ጋዳ̇፥ ሜላ̈ዲ ፌ ዛላ ሉኪ̇ዴ። 6ማ ኣቲ̇ኖን ኢ ኣሽካራን ኤ̈̇ ቡኪ̇ ዎዴ። 7ዪና̇ ኢዝባራ ካ̈ታ̈ዲ ጎይሊሙታ̇ዶር ፌ ዎታ̇ዳ̇ራን ሚሻር ኢ ኣሽካራን ዎኖ ኣሳን ኢንታ̇ ዎሲዴ፤ ኢንታ ካታሚንዳር ታማባር ሚቺሺዴ። 8ኢ ዪኒ̇ፖ ዎሃ ፌ ኣሽካራንኮ ‘ዓዲሼ ኢሳ̇ ባዚ ዎይ ዬርጊ̇ንቲ ዉሪኔ፤ ጼይጊንቲ̇ኖ ኣሳን ኢሲ̇ን ጋርታ̇ ዬ̈ንዳቦ ቤይሲኖ ኣስ ማ̈ቂ̇ ቤንታ̇ካ̇ዬ። 9ዪ̈ኮታ̇ቦ ጎይ ኮካ̇ ጋልዳ ሉካ̇ሪ ዪንታ̇ብ ቤንቲ̇ኖ ኣስ ዎይ ዓና̇ ኢሲ̇ምቦ ጼይጊብቴ̇’ ጌይዴ። 10ኢ ኣሽካራንሬ ጎይም ጋልዳ̇ ሉካ̇ሪ ኢ̈ታር ኮሻ̇ር ማ̈ቂ̇ን ፌ̈ብ ቤንቲ̇ኖ ኣስ ጌይዛ ዎይ ሺ̈ሺ̇ን ኢሳ̇ ኬ̈ምባር ኩሚዴ።
11“ዎቲናካሬ ካ̈ታ̈ዲ ጼይጊንታ̇ር ዬይኖ ኣሳን ቤቃ̇ንዳብ ኬ̈ ጌላዚምባራ ኣሳን ጋርታ̇ ኢሳ̇ ኣፊላ ማኣካ̇ዮ ፔቲ̇ ኣሲ ኢና ዎዶን ቤቂ̇ዴ። 12ካ̈ታ̈ዲ ኢ̈ኮ “ታ ዳባ̇̈ዶ! ኔ ኢሳ̇ ኣፊላ ማኣካይዶራ ዎዛርታር ዓይዲ ጌሊ?” ጌይን ና̈ሳ̈ዳር ዚም ጌይዴ።
13“ካ̈ታ̈ዳሬ ፌ ኣሽካራንኮ ‘ኢ ኩሺንዲክ ኢ ቶሂን ቃቻ̇ሪ ዛ̈ና ሚ̇ን ጋርታ̇ ኢያ ቶጚብቴ̇ ኢና ኢ̈ብ ዬ̈ፊክ ኣቺ̇ ሙንትኬ ማ̈ቂ̇̈ሬ’ ጌይዴ።
14“ጼይጊንቲ̇ኖ ኣሳን ዎይሊን፤ ማራ̇ጺንቲ̇ኖ ኣሳን ጊላ̇” ጌይዴ።
ጊ̈ራ ጊ̈ሪዝ ጎይ ኦይጪ̇ኖ ኦይች
ማ̈ርቆ̈ሳ 12፡13-17፤ ሉቃ̈ሳ 20፡20-26
15ኢናፖ̇ ፋራሳ̈ዋን ሉካ̇ሪ “ዬሱ̈ሲ ሶ̈ላዝ ሶ̈ሊምባር ኑ ኢያ ዎዛ̈ርታ̇ር ኮራኔ?” ጋ̈ሪ ዎል ዎልኣ ዞሪንቲዴ። 16ፌ ታማ̈ራን ሄሮዶ̈ሳ ኣሳንባር ዎልኣ ዬሱ̈ሳክ ኪ̈ቲ̇ ሚሻሪ ኢ̈ኮ “ኣስታማ̈ራ̈ዶ! ኔ̈ኒ ኪን ኣስ ማ̈ቂ̇ኖንዲኬ ጾ̈ሳ̇̇ ጎይሚን ኪን ታማ̈ርሳ̇ዚንዶ̇ ኑ ኤሪ̈ሬ። ማ ኔ ኣስ ዎይ ዎልፌ̈ን ቤቂ̇ዛኮታ̇ቦ ኣሳብ ኢ̈ጫ̇ራ ኦ̈ዝ ባዚ ኣባካር ባዬ̇። 17ዓት ኔ ኑ̈ብ ሶ̈ሊኔ ኔ̈ብ ኣብዝ ማይጺራ? ቄ̈ሳ̈ራብ ጊ̈ራ ጊ̈ራንዳብ ኮሺ̇̈ርቤ ኮሺባ̈ሳ?” ጌይዴ።
18ዬሱ̈ሲ ኢንታ ዉጪን ኤራሪ ኢንታ̇ኮ “ዪንቲ̇ ኣሳ ቲ̈ን ዪንታ̇ ኮሽ ማይጺሲዝ ኢ̈ት ኣሳን! ታ̈ና ኣባብ ሶ̈ላባር ኮራንዳብ ኮዪ̈ራ? 19ዪንቲ̇ ጊ̈ራብ ጪጋ̇ዝ ሳንቲ̇ን ዓይ ኤሄ̈ር ታ̈ና ቤይሲንቴ” ጌይን ኢንታ̇ር ኢ̈ብ ፔቲ̇ ሳንቲ̇ ኤኪ̇ ዬይዴ። 20ኢያር ኢንታ̇ኮ “ዓና̇ ሳንቲ̇ን ጋልዳ ዎ ሚሲሊንዲኬ ኢዝ ጋልዳ̇ ጻ̈ፊንቲ̇ኖ ሱሚን ኦያ?” ጋ̈ር ኦይጪዴ። 21ኢንታ̇ር ኢ̈ኮ “ቄ̈ሳ̈ራዬ” ጌይን ኢያር ኢንታ̇ኮ፥ “ዓት ዪ̈ዲኮ ቄ̈ሳ̈ራኮን ቄ̈ሳ̈ራብ፥ ጾ̈ሳ̇̇̈ኮን ጾ̈ሳ̇̇̈ቦ ኢሚ̇ብቴ̇” ጌይዴ። 22ኢንታ̇ር ኢ ሶ̈ላ ዪ̈ባራ ጋራ̇ሚንታ̇ሪ ኢያ ኣሻ̇ር ሉኪ̇ዴ።
ዓይቃ ጋርታ̇ፖ̇ ዲንዲዝ ጎይ ኦይጪ̇ኖ ኦይች
ማ̈ርቆ̈ሳ 12፡18-27፤ ሉቃ̈ሳ 20፡27-40
23ሳዱቃን ዓይቂ̇ኖ ኣሳብ ዲንዳ ባዬ̇ ጌዪ ኣማ̇ኒዝ ኣሴ። ፔቲ̇ ጋላሲ ዪን ኣሳን ጋርታ̇ፖ̇ ፔታ̇ን ፔታ̇ናን ዬሱ̈ሳክ ዬ̈ር ኢያ ኦይጪ̇̈ርዶሪ፥ 24“ኣስታማ̈ራ̈ዶ! ሚን ሙ̈ሶ ጌይርዶሪ ‘ፔቲ̇ ኣሲ ማጫ̇ ኤካ̇ሪ ፌ ማጪ̇ን ጋልዳ̇ፖ̇ ናኢ ዬላካ̇ይዶር ዓይቄጌይን ኢ ኢና̇ኣዲ ኢ ማጪ̇ን ማሃሪ ኢ ቤሲ̇ን ኢ̈ብ ናኢ ዬሎ ጌይሬ’ 25ፔቲ̇ ኢንዲ ናእ ማ̈ቂ̇ኖ ታብዛ ኣሳን ኑ̈ክ ዎዶ̈ን ኢሻ ቲ̈ኖዲ ማጫ̇ ኤካ̇ሪ ናኢ ዬ̈ላካይዶር ዓይቂ̇ን ኢ ኢና̇ኣ̈ዲ ኢ ማጪ̇ን ማሂዴ። 26ናምኢ̈ዳሬ ዓይዚ̈ዳር ሉኪ̇ ታብዚ ዬሊ̇ዝ ዲራ̈ስ ዎይ ኢዞ ማሂ ኤካ̇ሪ ዎይ ናኢ ዬላካ̇ይ ዓይቂ̇ዴ። 27ዉርሲ ጋልዳ ኣሲንዳር ዓይቃ̇ዴ። 28ዪዚ ኣሳን ዪን ዎይ ኢዞ ኤኪ̇ኖኮታ̇ቦ ጊዳክ ዓይቃ ጋርታ̇ፖ̇ ዲንዳ ቃምባራ ዪን ታብዛን ጋርታ̇ፖ ኢዛ ዎ̈ቦ ማጫ̇ ማ̈ቃ̇̈ራ?” ጌዪ ኦይጪ̇ዴ።
29ዬሱ̈ሳር ኢንታ̇ኮ “ዪንቲ̇ ጌ̈ሻ̇ ማጻ̈ፋኬ ጾ̈ሳ̇̇ ዎልቃ̇ ኤሪባ̈ሶኮታ̇ቦ ባሊቲ̇̈ሬ። 30ኣሲ ዓይቃ ጋርታ̇ፖ̇ ዲንዲኖፖ̇ ዓኒ ኣፎ ኪ̈ታንቻ̇ንፌ̈ን ማ̈ቂ̇̈ርዶኬ ማጫ̇ ኤኪ̇ባ̈ሴ ማጫ̇ር ኢስቲባሴ። 31ዓይቂ̇ኖ ኣሲ ዲንዳዝ ጎይን ጾ̈ሲ̇ ዪንታ̇ብ ሶ̈ሊኖን ናባ̇ቢ ቤቃካ̇ያ? ዪና̇ሬ 32‘ታ̈ኒ ኣብራሃ̈ማ ጾ̈ሲ̇፣ ዪሳ̈ቃ ጾ̈ሲ̇፣ ዓይቆ̈ባ ጾ̈ሴ̇’ ጋ̈ዚንዶ። ጾ̈ሳ̇̇̈ዲ ሼምፓባሮን ጾ̈ስዶኬ ዓይቂ̇ኖን ጾ̈ስ ጊዳካ̇ዬ” ጌይዴ።
33ዎርዣ̈ዳሬ ዪ ሲስካ̇ሪ ኢ ቲሚርታ̇̈ባራ ዎይሊን ጋራ̇ሚንቲ̇ዴ።
ዎይ̈ፖ̇ ሺዝ ኪ̈ታ̇
ማ̈ርቆ̈ሳ 12፡28-31፤ ሉቃ̈ሳ 10፡25-28
34ዬሱ̈ሲ ሳዱቃን ሶ̈ሊዝ ባዝ ይሲ̇ኖን ሲስካ̇ሪ ፋራሳ̈ዋን ዎልኣ ፔታ̇ን ሺ̈ቂዴ። 35ኢንታ̇ ጋርታ̇ፖ̇ ፔታ̇ና ሙ̈ሳ ሂጋ̇ ኤሪዛ̈ዲ ዬሱ̈ሳ ፋ̈ጪ̇ ቤቃ̇ንዳብ ኮያሪ ኢ̈ኮ፥ 36“ኣስታማ̈ራ̈ዶ! ሂጋ̇ ዎይፖ̇ ሺዝ ኪቲ̇ን ዎኒ̇ያ?” ጌይዴ።
37ዬሱ̈ሳር ኢ̈ኮ “ ‘ኔ ጎዳ ጾ̈ሳ̇̇̈ዳ ፎቲ ቡ̈ዳባራ፣ ፎቲ ሼምፓባራ፣ ፎቲ ቆፊባራ ዶሳቤ’ 38ዪና̇ ቲ̈ኖንዲኬ ዎይፖ̇ ሺዝ ኪ̈ቲን ኢዞ። 39ናምኢንዳሬ ዪኖ̇ ኢዛ ማይጻ̈ሬ ኢዛሬ ‘ኔ ኔ̈ና ካዚንዲፌ̈ኒ ኣስ ዎይ ካቤ’ ጋ̈ዚንዶ። 40ሙ̈ሳ ሂጊ̇ንዲኬ ናባን ቲሚርታ̇ን ዎይ ናምኢ ኪታ̇ን ዓን ጋልዳ̇ ኤቂ̇ኔ” ጌይዴ።
ክርስቶ̈ሲ ኦ ናኣ?
ማ̈ርቆ̈ሳ 12፡35-37፤ ሉቃ̈ሳ 20፡41-44
41ፋራሳ̈ዋን ዎልኣ ሺ̈ቃር ዎዶን ዬሱ̈ሲ ኢንታ፥ 42“ዪንቲ̇ ክርስቶ̈ሳ ባዝ ኣብዜ ጌይራ? ዪንቲ̇ ኢያ ኦ ናኤ ጌይራ?” ጌይን ኢንታ̇ሬ ኢ̈ኮ “ኢ ዳ̈ዊታ ናኤ” ጋ̈ር ማሂዴ። 43ዬሱ̈ሳር ኢንታ̇ኮ “ዓት ዪ̈ዶኮ ዳ̈ዊቲ ጌ̈ሻ̇ ኣያ̇ና ኢያ ቲ̈ኒን ሶ̈ሊ̈ርዶሪ ዎዛ̈ርታ̇ር ኢያ ‘ጎዳ̈ዶ’ ጌዪ ጼይጌ? ኢ ጌይርዶሪ፥
44“ ‘ጾ̈ሲ̇ ቴ ጎዳ̈ኮ
“ቴ ኔ ጻላታን ኔ̈ብ ኣ̈ ኢሚ̇ዝ ዲራ̈ስ
ዓንዳ ታ̈ብ ኡሻች ጎይ ዶኣቤ ጌይዴ’ ጌይኔ።
45ዪዚ ኢ ዳ̈ዊቲ ፌ ቆሚ̇ን ኢያ ‘ጎዳ̈ዶ’ ጌዪ ጼይጊ̈ርኮ ክርስቶ̈ሲ ዎዛርታ̇ር ኢ̈ብ ናኢ ማ̈ቃ̇ንዳብ ዳንዳኢ̈ራ?” ጌይዴ። 46ፔቲ̇ ቃ̈ላ ኦ̈ናካር ኢ̈ብ ሶ̈ሊ ማሂኖ ኣሲ ባዬ̇፤ ማ ዪኖ̇ ኢዝ ቃሚ̇ምፖ̇ ኤ̈̇ር ኢያ ኣባካር ኦይች ኦይጫ̇ንዳብ ዳንዳኢኖ ኣሲ ኦ̈ናካር ባዬ̇።
