ማ̈ቶ̈ሳ 20
20
ዎይና ታ̈ኪልቲ̇ን ጋርታ̇ ኦ̈ዝ ኣሳን ሚሳ̇̈ሊ
1“ጾ̈ሳ̇̇ ካ̈ቲቲንዳ̇ ፌ ዎይና ታ̈ኪልቲ̇ን ጋርሲ̇ን ጪጋ̇ር ኦ̈ሳንዳ̇ቦ ኣስ ኮዪ ጌ̈ሽ ጌላፋ ኬስኪ̇ኖ ና̈ሳ ማይጻ̈ሬ። 2ፔቲ̇ ኣሳብ ፔቲ̇ ጋላስ ኦ̈ኖምቦ̇ ፔቲ̇ ዲና̈ራ ጪጋ̇ንዳ̇ቦ ጋ̈ሪ ሶ̈ሊንቲ̇ኖፖ̇ ዓኒ ኦ̈ዝ ኣሳን ኤኪ̇ ዬ̈ሪ ዎይኒን ጋርታ̇ ኦ̈ሳ ኤይዴ።
3“ና̈ሳ̈ዲ ጌ̈ሽ ዓይ̇ዚ ሳ̈ኣታ ጋልዳ̇ ኬስካ̇ሪ ኦ̈ሳ̇ ባዪዶን ሜላ̇ ጉካ̇ ጋልዳ ኤቂ̇ኖ ሜላ ኣሳን ዲጚዴ። 4ኢያር ኢንታ̇ኮ ‘ዪንታ̇ር ሉካ̇ሪ ቴ ዎይና ታኪልቲ̇ን ጋርታ̇ ኦ̈ብቴ ቴ ዪንታ̇ብ ማ̈ቃ̇ዝ ሚ̈ሺን ጪጋ̇ንዳ̇’ ጌይዴ። 5ኢንታ̇ር ኦ̈ሲን ቤሲ̇ን ሉኪ̇ዴ። ማ ና̈ሳ ዓታ̇ር ጋላስ ሌሂ ሳኣ̈ታ ጋልዳኬ ሳ̈ካሊ ሳኣ̈ታ ጋልዳ ኬስካ̇ሪ ዪና̇ ኢዝፌ̈ኒ ሜላ ኣሳን ኤኪ̇ ዬ̈ሪ ኦ̈ሳ ኤይዴ። 6ማ ጋላስ ታጶ ፔቲ̇ ሳኣታ ጋልዳ ኬስካ̇̇̈ሪ ሜላ ኣሳን ኤቂ̇ንዶ̈ን ዲጛሪ ኢንታ̇ኮ ‘ዪንቲ̇ ዓታ̇̈ቦ ጋላሲ̇ን ዎይ ኦ̈ሳ̇ ባዪ ኣብዛብ ዓይዲ ኤቂ̇ና?’ ጋ̈ር ኢንታ̇ ኦይጪ̇ዴ። 7ኢንታ̇ሬ ኢ̈ኮ ‘ኑ̈ብ ጪጋ̇ር ኑ̈ና ኦ̈ሲዝ ኣሲ ያሼ’ ጌይን ኢያር ኢንታ̇ኮ ‘ዓት ዪ̈ዲኮ ዪንታ̇ር ቴ ዎይና ታኪልቲ̇ን ጋርታ̇ ሉካ̇ሪ ኦ̈ብቴ̇’ ጌይዴ።
8ሳ̈ዚን ቃሚ̇ንዶን ዎይና ታኪልቲ̇ን ላ̈̈ዲ ኦ̈ዝ ኣሳን ኣላቃ̈ኮ ‘ኦ̈ዝ ኣሳን ጼይጋራ ዎሃ ዉርሲ ጋልዳ ዬ̈ዪ ኦ̈ሳ̇ ኤ̈̇ኖ ኣሳንፖ̇ ኤ̈̇ራ ቲ̈ኖን ዬሊ̇ዝ ዲራ̈ስ ዎ ኣሳንቦ ኢንቲ̇ ኦ̈ኖንኮን ኢንታ̇ብ ጪጋ̇ቤ’ ጌይዴ።
9“ታጶ̇ ፔቲ̇ ሳኣ̈ታባር ኦ̈ሳ̇ ኤ̈̇ኖ ኣሳን ዬ̈ሪ ፌ ቆሚ̇ን ቆሚ̇ን ፔቲ̇ ፔቲ̇ ዲና̈ራ ኤኪ̇ዴ። 10ኢንታ̇ፖ̇ ቲ̈ን ኦ̈ሳ̇ ኤ̈̇ኖ ኣሳን ዬ̈ሪ ኢንታ̇ፖ̇ ሺ ኤኪ̇ዛ ኢንታ̇ብ ማይጺንዶ̈ን፥ ኢንታባር ኢንታ̇ ቆ̈ሚን ቆ̈ሚን ፔቲ̇ ፔቲ̇ ዲና̈̇ራ ኤኪ̇ዴ። 11ኢንቲ̇ ሚ̈ሺ̇ን ኤኪ̇ ማ̈ቂ̇ኖፖ̇ ዓኒ ና̈ሳ ዎይና ታ̈ኪልቲ̇ን ላ̈ ጋልዳ ጉንዲሚሙታ̇፤ 12‘ዓን ዉርሲ ጋልዳ̇ ዬ̈ሪ ፔቲ̇ ሳኣ̈ታ ሙታ̇ ኦ̈ኔ፥ ኑ̈ኒ ጌ̈ሻ̇ፖ ኤ̈̇ር ኦማ ዬሊ̇ዝ ዲራ̈ስ ኣዋ ሶ̈ልባር ኦ̈ ዳ̈ቡሪ ፌ̈ሽኪ̇ኖን ኑ̈ብ ኢንታ̇ባር ዎልፌ̈ን ዎዛር ጪጋ̇̈ራ?’ ጌይዴ።
13“ዎይና ታ̈ኪልቲ̇ን ላ̈ዲ ኢና ኦ̈ኖ ኣሳን ጋርታ̇ፖ̇ ፔታ̇ናኮ ‘ቴ ላጋ̇̈ዶ! ቴ ኣባካር ኔ̈ብ ኢ̈ሲ̇ኖ ባዚ ባዬ̇፤ ኔ̈ናክ ታ̈ናክ ዎልኣ ሶ̈ሊንቲ̇ኖንዳ̇ ፔቲ̇ ጋላሳ̇ቦ ፔቲ̇ ዲና̈ራ ጪጋ̇ንዳ̇ ጋ̈ር ጊዳካ̇ያ? 14ዪ̈ኮታ̇ቦ ኔ̈ና ዬላ̇ዚን ኤካ̇ር ሉካ̇ቤ። ኔ̈ብ ኢሚ̇ኖንዲፌ̈ን ዓ̈ ና̈ሳ ጋሶባር ኢማ̇ንዳብ ቴ ዶሲኔ። 15ቴ ሚ̈ሽ ጌ̈ቲንባ̇ር ቴ ኮዪኖ ባዝ ኦ̈ንዳ ዳንዳኣባሳ? ዎይ ታ̈ኒ ሱ̈ቂታካ̇ይ ኢሚ̇ዝ ኣስ ማ̈ቂ̇ኖኮታ̇ቦ ኔ ቃናኣ̈ራ?’
16“ዪዚ ቲ̈ን ኣ̈̇ኖን ጋስ ማ̈ቂ̇ን ጋስ ዎን ቲ̈ን ኣ̈̇̈ሬ” ጌይዴ።
ዬሱ̈ሲ ፌ ዓይቃ̇ዚን ዓይ̇ዚ ሶ̈ሊዴ
ማ̈ርቆ̈ሳ 10፡32-34፤ ሉቃ̈ሳ 18፡31-34
17ዪኒ̇ፖ ዓኒ ዬሱ̈ሲ ዬሩሳ̈ላም ሉኪ̇̈ርዶሪ ጎይም ጋልዳ ፌ ታማ̈ራን ታጶ̇ ናምኣን ሙታ̇ ፌ̈ክ ሺ̈ሻ̇ሪ ኢንታ̇ኮ፥ 18“ኑ̈ኒ ዓት ዬሩሳ̈ላም ሉኪ̇̈ሬ፤ ኢና ቴ ኣሳ ናኣ̈ዲ ቄ̈ሳ ኣላቃንኬ ሙ̈ሳ ሂጋ̇ ታማ̈ርሲዝ ኣሳን ኩሽታ̇ ኣ̈ ኢሚ̇̈ንታ̈ሬ፤ ኢንታ̇ሬ ዓይቃ ፊርዳ ቴ ጋልዳ ፊርዲ̈ሬ። 19ኣይሁድ ዜር ማ̈ቃካ̇ዮ ኣሳንቦ ታ̈ና ኣ̈ ኢሚ̇̈ሬ፤ ኢንታ̇ር ቴ ጋልዳ ቃልዲ፣ ታ̈ና ጋራ̇ፊ፣ ሶቲ̇ ታ̈ና ዎ̈ሬ። ታ̈ናር ዓይ̇ዚ ቃምባር ዓይቃ ጋርታ̇ፖ̇ ዲንዳ̈ሬ” ጌይዴ።
ዛብዶ̈ሳ ናኣን ኢንዲ̇ን ጌሺኖ ጌሻ
ማ̈ርቆ̈ሳ 10፡35-45
20ኢናፖ̇ ዛብዶ̈ሳ ናኣን ኢንዲንዳ ፌ ናኣንባር ዎልኣ ዬሱ̈ሳክ ዬ̈ራ ኢ ቲ̈ን ቡቂንታ̇ራ ፔቲ̇ ባዝ ፌ̈ብ ኦ̈ምፔን ኢያ ጌሻዴ። 21ዬሱ̈ሳር ኢዝኮ “ኔ ኣብዝ ኮያራ?” ጌይዴ። ኢዛር ኢ̈ኮ “ኔ ካ̈ቲቲን ጋርታ̇ ቴ ናኣን ዓን ናምኣን ፔታ̇ና ኔ̈ብ ኡሻች ጎይ ፔታ̇ና ዓዲርስ ጎይ ዶኣምፔ̈ን ዎቲሼ” ጋ̈ዴ። 22ዬሱ̈ሲ ኢንታ̇ኮ “ዪንቲ̇ ጌሻዝ ባዚን ኣብዝኮ ኤሪባ̈ሴ፤ ቴ ኡሽካዝ ሜታ ጺዊን ዪንቲ ኡሽካ̇ንዳብ ዳንዳኢ̈ራ? ጌይን ኢንታ̇ር ኢ̈ኮ “ኣ ኑ ዳንዳኢ̈ሬ” ጌይዴ።
23ዬሱ̈ሳሬ ኢንታኮ “ኣ ኪን ቴ ኡሽካዝ ሜታ ጺዊን ዪንቲ̇ ኡሽኪ̈ሬ፤ ዎቲናካሬ ታ̈ቦ ኡሻች ጎይኬ ዓዲርስ ጎይ ዶኣምፔ̈ን ዎቲዛ̈ዲ ታ̈ና ጊዳካ̇ዬ፤ ዪን ቤሳ̇ን ኢሚ̇ንቲዛ̈ዲ ቴ ባ̈ባ̈ ኢንታ̇ብ ጊ̈ጊሲኖ ኣሳንቦ” ጌይዴ።
24ኣቲ̇ኖ ታጳ̇ ኢ ታማራን ዪኖ̇ ሲስካ̇ሪ ናምኣን ኢሻ̈ዳክ ጌ̈ዳዳክ ጋልዳ ዎይሊን ጎይሊዴ። 25ዬሱ̈ሲ ዎይን ፌ̈ክ ጼይጋሪ ኢንታ̇ኮ “ዓና̇ ኣላሚን ጋልዳ ዎ ዎርዣ ኣቂሲዝ ላ̈ን ፌ ዎርዣን ጋልዳ ጎዳ ማ̈ቃ̇ዚንዶ፥ ማ ሲልጣ̈ና ኢንታ̇ብ ዎ ኣሳን ዎርዣ ጋልዳ ፌ ዎልቃ̇ ቤይሳዚን ዪንቲ̇ ኤሪ̈ሬ። 26ዎቲናካሬ ዪንታ̇ ጊዳ̇ ዪ̈ፌን ማ̈ቃ̇ንዳብ ኮሺ̇ባ̈ሴ፤ ዪንታ̇ ጊዳ̇ ጴች ማ̈ቂ̇ ቦንቺንታ̇ንዳ ኮዪዝ ኣሲ ፌ̈ና ዪርክ ዎታሪ ዪንታ̇ብ ኣሽካ̇ራ ማ̈ቆ̇ ጋ̈ቤ። 27ዪንታ̇ ጋርታ̇ ኣላቃ ማ̈ቃ̇ንዳብ ኮዪዝ ኣሲ ዎኮ ዪንታ̇ብ ኣይላ ማ̈ቆ̇ጋ̈ቤ። 28ታ ኣሳ ናኣ̈ዳሬ ኣስ ማ̈ዳ̇ንዳብኬ ዎይሊንን ፋንዳቦ ኢንታኮታ̇ብ ቴ ሼምፒ̇ን ኣ̈ ኢማ̇ንዳብ ዬ̈ዶ̇ኬ ኣሲ ታ̈ና ማ̈ዳ̇ምፔ̈ን ቴ ዬ̈ካ̇ዬ” ጌይዴ።
ዬሱ̈ሲ ናምኢ ኣስ ኣፊ ዎቢኖን ፋዴ
ማ̈ርቆ̈ሳ 10፡46-52፤ ሉቃ̈ሳ 18፡35-43
29ዬሱ̈ሳኬ ኢ ታማ̈ራንኬ ዎልኣ ያ̈ሪካፖ̇ ኬስካ̇ር ሉካ̇ምባራ ዎይሊን ዎርዦ ኢ ዎሂን ዬ̇ዴ። 30ኢና ኣ̈ፊ ዎቢ̇ኖ ናምኢ ኣሲ ጎይ ቡጊድ ዶኢንዶ̈ሪ ዬሱ̈ሲ ዪኒ̇ባራ ኣ̈̇̈ሬ ጋ̈ዚን ሲስካ̇ሪ “ጎዳ̈ዶ! ዳ̈ዊታ ናኣ̈ዶ! ኑ̈ና ማ̈ራቤ!” ጋ̈ር ዉይሲዴ።
31ኣሳንር ኢንታ̇ኮ “ዚምዶኢብቴ̇!” ጋ̈ሪ ኢንታ̇ ቆዲ̇ን ኢንቲ “ጎዳ̈ዶ! ዳ̈ዊታ ናኣ̈ዶ! ዋ̈ዴ ኑ̈ና ማ̈ራቤ” ጋ̈ር ጉጃ̇ር ዉይሲዴ።
32ዬሱ̈ሲ ኤቃ̇ር ኢንታ̇ ጼይጋሪ ኢንታ̇ኮ “ቴ ዪንታ̇ብ ኣብዝ ዎታምፔ̈ን ዪንቲ̇ ኮዪ̈ራ?” ጌይዴ።
33ኢንታ̇ር ኢ̈ኮ “ጎዳ̈ዶ! ኑ ኣ̈ፊን ቤቃ̇ምፔን ኮዪ̈ሬ” ጌይዴ።
34ዬሱ̈ሲ ኢንታ̇ብ ሚጪ̇ንታሪ ኢንታ̇ ኣ̈ፊን ፊቲ̇ን ኢንታ̇ ኣ̈ፊን ኤሊ̇ባር ቤቃ̇ዴ፤ ኢንታ̇ሬ ኢ ዎሂን ዬዴ።
