U̍ku̍rɔ̍ yī Alɛrɔ̄ 19
19
Ipɔ̍ɔli ga Ɛ̍fɛ̄susi ge̍ ka Ɛrɔ̄ yī Ɔwɔ
1Yɛ̄grāa nīi Apo̍lōosi hɔ̄ la Ikɔ̍rīnti ma̍, Ipɔ̍ɔli ga hɛ̍ ajɛ yī ɛbɛ ɔla̍ā ārɛ̄ wā la Ɛ̍fɛ̄susi. O̍ ma̍ a̍chi̍kpo̍ yī Iji̍sɔ̄ɔsi ɛha̍ abɔ̍ɔ ma̍, 2o̍ che wa̍ ikpo̍ hīka ɛ̍lɛ nāa Uhu Ɔnɛ̄ɛhɛhi yī Ɔwɔ yɛ̄grāa nīi ɛ̍lɛ chɛ̄ku Ɔwɔ ma̍?
E̍ hīka aɛ̍lɛ i̍ po̍ hīka Uhu Ɔnɛ̄ɛhɛhi yī Ɔwɔ ɔ̍lɔ hɔ̄ o̍bo̍bū ni̍.
3Ipɔ̍ɔli che wa̍ ikpo̍ hīka yenyi ohōhu ɔlɛkana̍ nīi ɛ̍lɛ chī hu ma̍?
E̍ ka de ɔ̍ hīka ɔ̍lɔ - yenyi ohōhu nīi Ijɔ̍ɔn ɔ̍lɔ ka ma̍ nɛ.
4Ipɔ̍ɔli koko̍o de wa̍ bɛ̍ɛ̄nɛ̄ hīka, “Ala̍ ma̍ gɛ ko̍ō! Yenyi ohōhu yī Ijɔ̍ɔn ma̍ - iyī āchɛ nīi pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ ma̍ nɛ. Ijɔ̍ɔn chī koko̍o de āchɛ hīka ɛ̍lɛ ge̍ chɛ̄ku ɔ̄chɛ nīi - ɔ̍lɔ ge̍ē wā la okwi̍ihi yī anu̍ ma̍. Ɔ̄chɛ ɔ̍lɔma̍ anu̍ re̍ka Iji̍sɔ̄ɔsi a̍nɛ.”
5E̍ plɛ̍ɛ̄lā nūma̍ ma̍, e̍ hu yenyi la riyī yī Ādā Iji̍sɔ̄ɔsi bɛ̍ɛ̄nɛ̄. 6Ipɔ̍ɔli de abɔ̄ che wa̍ lɛhu̍ ma̍, Uhu Ɔnɛ̄ɛhɛhi yī Ɔwɔ wā dikpo̍ba̍ wā ɔpɔ̄ɔpɛ̄. E̍ gblāa abɔ̍ɔ ē ka ɔcha ɔlɛbɛ̍bi̍ ɛha̍, gblāa abɔ̍ɔ ē ka ɛrɔ̄ nīi Ɔwɔ tū wā ma̍ ɔpɔ̄ɔpɛ̄. 7Aa̍ wa̍a̍ gbajɛ la āchɛ igwo̍lɛpa.
8Ipɔ̍ɔli ē ga u̍nu̍ ogrēeyī yī Iju̍u ge̍ē kɛlā bāa ogrigri ma̍ de āchɛ abɔ̍ɔ. O̍ ta̍ahu̍ ba̍la aa̍, chikpo̍ nīi e̍ ge̍ē chɛ̄ lɛlā yī Ɔchwɔ̄lɛ̍ Oro̍ōre̍ yī Ɔwɔ. O̍ ya̍ i̍ngɔ̍ɔ lipu̍ yī ɔyɔ̍ɔ ɛta̍ ke̍e̍. 9Ūkpɔ̄tū yī āchɛ ɛha̍ yī wā de ngmu̍wɔ̍hu̍ ɔ̄kɔ̄kū, e̍ i̍ chikpo̍ ge̍ē chɛ̄ku Ɔwɔ ni̍. E̍ gblāa abɔ̍ɔ ē kɛlā abi̍ ku̍ Ɔpɔ̄pū yī Lɛlā Nīi Ādā Chabɔ̄ Ma̍ la īkprī yī āchɛ wa̍a̍. Ipɔ̍ɔli wā ge̍ ku̍ pīya ga u̍nu̍ yī Itra̍nusi la ɛbɛ nīi āchɛ ē gblāa ē kɛlā ɔha̍ kɛ̄ɛ ē ngū lɛlā ɔha̍ ma̍. O̍ ē kɛlā de wa̍, ē ta̍ ahu̍ ba̍la aa̍ abɔ̍ɔ. 10O̍ ya̍ i̍ngɔ̍ɔ lipu̍ yī lɛ̍yi̍ ɛpa ligbo̍ ligbo̍. Āchɛ wa̍a̍ nīi gblāa la ajɛ yī E̍siya ma̍, Iju̍u tūla Ɛchɛkɔcha plɛ̍ɛ̄lā yī Ādā cha̍cha̍.
Ayi̍ anāngrɔ̄ɔ yī Isiki̍fa
11Ɔwɔ yɛ ē ya̍ i̍mamachi̍ yɛ̄mɛ̄mɛ̄ gala abɔ̄ yī Ipɔ̍ɔli; 12kpɛ̍ɛ nīi e̍ ē bī a̍pu ongū arɛ ba̍la ɛjā otū ya̍ u̍ku̍rɔ̍ yī Ipɔ̍ɔli ge̍ē de āchɛ oku̍ iyē nīi iyē oko̍ōku̍ yī āchɛ ē de ē hīya aa̍. O̍ ē ya̍ nīi yapri̍ija ɔdwɔ̄bi̍ ē ngmɛ̍ɛchɛ ē hī āchɛ. 13Iju̍u ɛha̍ nīi ē gāa bɛ̍bɛ̍ ē ka aɛ̍lɛ ē nū yapri̍ija ɔdwɔ̄bi̍ hī āchɛ ma̍ chikpo̍ ge̍ē bī riyī yī Ādā Iji̍sɔ̄ɔsi ē nū yapri̍ija ɔdwɔ̄bi̍. E̍ ē ka ē tāa yapri̍ija ɔdwɔ̄bi̍ hīka, “Bū la riyī yī Iji̍sɔ̄ɔsi nīi Ipɔ̍ɔli ē kɛlā yī nū ma̍, alɔ koko̍o de ala̍ mɛ̍ hīka, yapri̍ija ɔdwɔ̄bi̍, ala̍ bīyɛchɛ hī ɔ̄chɛ nūma̍.” 14Ɔngrɔ̄ɔ ɔha̍ re̍ka Isiki̍fa; A̍dā Aligbe yī Iju̍u nɛ. Ayi̍ yī nū anāngrɔ̄ɔ ɛha̍ nīi lɛ āchɛ arāapa ma̍ ē nū yapri̍ija ɔdwɔ̄bi̍ i̍ngɔ̍ɔ.
15E̍ ya̍ i̍ngɔ̍ɔ ma̍, yapri̍ija ɔla̍ā da wa̍ bɛ̍ɛ̄nɛ̄ hīka, “Alɔ je̍ Iji̍sɔ̄ɔsi, alɔ chī jo̍ōkū yī Ipɔ̍ɔli. Ala̍ ma̍ - ānyɛ kpɛ̍ɛ nɛ ma̍/?”
16Ɔngrɔ̄ɔ nīi ē ku̍ yapri̍ija ɔla̍ā ma̍ wā la aa̍ ɔpɔ̄ɔpɛ̄, ya̍ tāa aa̍ kpɛ̍ɛ nīi o̍ de gla aa̍ ibi̍īyē ta̍. E̍ pla̍a iyē cha̍cha̍; aru̍ yī wā hīya bāa opuchɛpuchɛ ma̍, kpɛ̍ɛ nīi e̍ gwɛ̍ɛnya hī u̍nu̍ ɔla̍ā.
17Iju̍u wa̍a̍ tūla Ɛchɛkɔcha nīi gblāa abɔ̍ɔ la Ɛ̍fɛ̄susi ma̍ plɛ̍ɛ̄lā nūma̍ ma̍, e̍ de kpo̍ tūuhwi ɔlamu ɔlamu. E̍ de otūlichō de riyī yī Ādā Iji̍sɔ̄ɔsi gba̍a̍ bɛ̍ɛ̄nɛ̄. 18Āchɛ yɛ̄mɛ̄mɛ̄ nīi chɛ̄ku Iji̍sɔ̄ɔsi ma̍ gāa ge̍ de lɛlā ɔdwɔ̄bi̍ nīi e̍ ya̍ wa̍a̍ ma̍ ka hi̍yɛchɛ. 19Āchɛ ɛha̍ nīi - alija o̍bū ma̍ kpo̍ īpū yī ija yī wā ge̍ chīyēkū la ɔgbādu, de wa̍ kwɔla̍ la īkprī yī āchɛ wa̍a̍. E̍ ka ichi̍ yī okpo yī īpū ɛla̍ā wa̍a̍ ma̍, o̍ gbajɛ riba yī okpo u̍nu̍nɔ che u̍nɔ. 20Bū la ɔpɔ̄pū nūma̍, lɛlā yī Ādā ngrāa ga iyɔ̄bū iyɔ̄bū wɔhu̍ wɔhu̍ bɛ̍ɛ̄nɛ̄.
Lɛlā ogbōgbo yī Ɛ̍fɛ̄susi
21Lɛlā nūma̍ wa̍a̍ wā ge̍ ga ma̍, Ipɔ̍ɔli chikpo̍ ge̍ē ga la Imɛsɛdo̍niya ba̍la Igri̍isi, o̍bū ge̍ē ga gāa Ijɛru̍sālɛm. O̍ koko̍o de āchɛ hīka anɔ̍lɔ ge̍ gbajɛ ga abɔ̍ɔ mɛ̍, ɔ̍lɔma̍ anɔ̍lɔ ge̍ē gāa ge̍ē ma̍ ipwo̍gra yī Iro̍om i̍ngi̍ngɔ̍ɔ. 22O̍ de Iti̍mōti ba̍la Ɛra̍si̍tusi nīi āchɛ ɛtū ɔ̄ wɔbɔ̄ ma̍ tɛ̄rɔ̄ pīya ga Imɛsɛdo̍niya. Anu̍ ɔlɔjā jī hɔ̄ abɔ̍ɔ kpɔ̍ɔ̍ la ajɛ yī E̍siya.
23Yɛ̄grāa ɔla̍ā nīi lɛlā ogbōgbo ɔha̍ wā ge̍ hɔ̄ abɔ̍ɔ la Ɛ̍fɛ̄susi gba̍a̍ wu̍chē yī Ɔpɔ̄pū yī Lɛlā Nīi Ādā Chabɔ̄ Ma̍ a̍nɛ. 24Ɔngrɔ̄ɔ ɔha̍ nīi re̍ka Idimi̍trīyusi ma̍ ē bī isi̍li̍ba ē ya̍ ɔjā yɛ̄mɛ̄mɛ̄. Anu̍ ē bī isi̍li̍ba ē ya̍ ɔjā ɔha̍ bāa īgbla yī u̍nu̍ yī i̍kpe̍ēkū yī ɔwɔ ɔnɔ̄nyā yī wā nīi re̍ka A̍tɛ̄misi ma̍ a̍nɛ. U̍ku̍rɔ̍ yī nū ɔla̍ā ē bī ɛpiyabuna gba̍a̍ ge̍ē de alu̍ku̍rɔ̍ ɛla̍ā wa̍a̍. 25O̍ hī wā ɛra̍ wa̍a̍ ge̍ grēeyī tūla āchɛ ɛha̍ nīi ē ya̍ ita yī u̍ku̍rɔ̍ ɔla̍ā ma̍. Idimi̍trīyusi koko̍o de āchɛ ɛla̍ā bɛ̍ɛ̄nɛ̄ hīka, “Aɛ̍ɛya ami! Je̍ka aa̍ ala̍ wa̍a̍ jo̍ōkū hīka wɔdu yī alɔ ba̍la ɔjɛ̄ ga iyɔ̄bū yī alɔ wa̍a̍ bū la u̍ku̍rɔ̍ nūma̍ nīi alɔ ē ya̍ ma̍? 26Je̍ka aa̍ ala̍ yɛ amu ē po̍, chī gba̍a yɛ amu ē ma̍ lɔkɔ nīi ɔngrɔ̄ɔ ɔla̍ā nīi re̍ka Ipɔ̍ɔli ma̍ yɛ ē ya̍ ma̍? O̍ yɛ amu ē ka ē de āchɛ wa̍a̍ hīka i̍kpe̍ēkū wa̍a̍ nīi āchɛ̄ɛchɛ ɛ̍lɛ ē bī abɔ̄ yɔ̍ɔ̄ya̍ ma̍ ɔ̍lɔ i̍ ɔwɔ ni̍. O̍ ya̍ i̍ngɔ̍ɔ kpɛɛ nīi o̍ de ngmɛ̍rɛ̍ de ɔ̍ nīi o̍ de āchɛ ūkpɔ̄tū pīya kɔ̍ lɛlā yī nū ke̍e̍ amu la Ɛ̍fɛ̄susi ba̍la ajɛ yī E̍siya wa̍a̍ jimini mɛ̍. 27Bū la ɛbɛ ɔla̍ā, o̍ luhuhwi u̍ma̍ama kpɛ̍ɛji hīka lɛlā yī nū nūma̍ ge̍ē ya̍ nīi u̍ku̍rɔ̍ yī alɔ nūma̍ ē nāa riyī ɔdwɔ̄bi̍ gba̍a̍ bɛ̍ɛ̄nɛ̄. O̍ i̍ gba̍a i̍ngɔ̍ɔ ke̍e̍ ni̍; o̍ ge̍ē ya̍ nīi āchɛ i̍ ge̍ē chɛ̄ nāa u̍nu̍ yī i̍kpe̍ēkū ɔnɔ̄kɔ̄kū nūma̍ nīi re̍ka A̍tɛ̄misi ma̍ bāa ɔjɔ̄jā ma̍ ē gɛ ni̍ lachi̍lachi̍. Bū la ɛbɛ ɔla̍ā, rīgā ɔnɔ̄kɔ̄kū nīi hɔ̄ de A̍tɛ̄misi nūma̍ nīi Ale̍siya wa̍a̍ ba̍la ɔchamɔcha wa̍a̍ ē ya̍ otūlichō yī nū ma̍ ge̍ē chāajɛ ke̍e̍.”
28Āchɛ ɛla̍ā wa̍a̍ plɛ̍ɛ̄lā nūma̍ ma̍, o̍ ti̍ya aa̍ ūkpɔ̄tū tū kpɛ̍ɛ ji; e̍ gblāa abɔ̍ɔ ē tɔ̍ɔna gbōō bɛ̍ɛ̄nɛ̄ hīka, “A̍tɛ̄misi yī Ɛ̍fɛ̄susi - ɔwɔ ɔnɔ̄kɔ̄kū gba̍a̍ nɛ oo!” 29A̍tu̍tu̍ yī lɛlā ogbōgbo ɔla̍ā de ipwo̍gra ɔla̍ā wa̍a̍ ti̍yatū ɔlamu ɔlamu. Āchɛ ɛla̍ā de Ige̍yusi ba̍la Ari̍si̍tākusi nīi - Alimɛsɛdo̍niya āchɛ ɛpa yɛ ē tīkpo̍ tāa Ipɔ̍ɔli ma̍ ku̍. E̍ bī wā ga u̍nu̍ ogrēeyī ɔnɔ̄kɔ̄kū yī o̍gra ɔla̍ā. 30Ipɔ̍ɔli ma̍ chikpo̍ ge̍ē ngmɛ̍ɛchɛ ē hɛ̍ wā. Aɛ̍nɛ̍ yī nū āchɛ yī Iji̍sɔ̄ɔsi i̍ chɛ̄ de ɔ̍ ni̍. 31Aɛ̍ɛya yī Ipɔ̍ɔli nīi - alɛhu̍ yī ajɛ ɔla̍ā ma̍ gba̍a tɛ̄rɔ̄ ge̍ ra̍ābɔ̄ de ɔ̍ ka ɔ̍lɔ ge̍ e̍e ya̍akanya ga ga ɛbɛ ogrēeyī ɔnɔ̄kɔ̄kū ɔla̍ā ni̍. 32Ɛbɛ e̍e ti̍yatū rɛ abɔ̍ɔ. Āchɛ ɛha̍ ē ya̍ ojiya yī lɛlā ɔha̍ ga oe̍ ɔha̍, ɛha̍ ē chī ka ɔha̍ hɔ̄ɔ̄hɔ̄ i̍ngɔ̍ɔ bɛ̍ɛ̍. Wu̍chē oji̍ nɛ, āchɛ yɛ̄mɛ̄mɛ̄ i̍ je̍ ɔjā nīi hu̍ nīi āchɛ tu̍ grēeyī i̍ngɔ̍ɔ ma̍ ni̍. 33Āchɛ ɛha̍ ma̍ je̍ka Alɛsa̍nda ɔ̍lɔ ta̍tu̍tu̍ yī lɛlā ɔla̍ā a̍nɛ. Wu̍chē oji̍ nɛ, Iju̍u ɛha̍ ya̍ nīi Alɛsa̍nda wu̍ rɛ ga iyɔ̄bū. Alɛsa̍nda ya̍ wā la abābɔ̄ bɛ̍ɛ̄nɛ̄, yɛ ē chikpo̍ ge̍ē kɛlā de wa̍. O̍ chikpo̍ ge̍ē nyiyoko̍o yī Iju̍u. 34Āchɛ ɛla̍ā de jo̍ōkū hīka ɔ̍lɔ - Iju̍u nɛ ma̍, e̍ gba̍a nyɔ̄ la ojiya ɔla̍ā ɔpɔ̄ɔpɛ̄, “A̍tɛ̄misi yī Ɛ̍fɛ̄susi - ɔwɔ ɔnɔ̄kɔ̄kū gba̍a̍ nɛ oo!” E̍ ya̍ ojiya yī lɛlā nūma̍ la oje ɛpa ligbo̍ ligbo̍.
35Ɔlɛhu̍ ɔha̍ nīi - ikla̍aki yī ipwo̍gra ɔla̍ā ma̍ wā ge̍ chɛ̄rī kpɛɛ nyi wā ojiya ɔla̍ā bɛ̍ɛ̄nɛ̄. O̍ koko̍o de wa̍ hīka, “Aya̍alɛ̍fɛ̄susi! Ɔchamɔcha wa̍a̍ jo̍ōkū hīka, Alɛ̍fɛ̄susi ɛ̍lɛ - āchɛ odeyīrɛ u̍nu̍ yī A̍tɛ̄misi ɔnɔ̄kɔ̄kū nūma̍ ba̍la lɛchɔ̄ ɔla̍ā nīi ha̍ābɔ̄ bū la ichō ma̍ a̍nɛ. 36Ɔ̄chɔ̄chɛ i̍ ge̍ē ka hīka ɛjā nūma̍ ɛ̍lɛ - arīmɛ̄ nɛ īchāha̍ īchāha̍ ni̍. O̍ lɛ i̍ngɔ̍ɔ ma̍, ala̍ ā gboba̍ du̍mɔ̍ gɛ. Ala̍ e̍e ya̍ lɛlɛ̄lā ji̍gījigī ni̍. 37Āchɛ nīi ala̍ bī āā wā hɔ̄ ma̍ ma̍ i̍ chī nāa ɔjɔ̄jā abɔ̍ɔ la u̍nu̍ yī A̍tɛ̄misi ɔla̍ā ni̍. E̍ i̍ chī kɔ̄ka lɛlā abi̍ ku̍ i̍kpe̍ēkū yī alɔ ɔlɔjā ni̍. 38Idimi̍trīyusi ba̍la alu̍ku̍rɔ̍ yī nū ge̍ lɛ lɛlā ɔha̍ pīyeyīta̍ ɔ̄chɛ ɔha̍, o̍ ge̍ bī ga ɛbɛ yī lɛpɔ̄ hɛ̄ɛbɛ nīi e̍ ge̍ kɛlā ku̍ ɔ̍nyīnū abɔ̍ɔ. Ɔ̄chī yī lɛpɔ̄ hɔ̄, alɔ chī lɛ alihiyo. 39Ala̍ ge̍ chī chikpo̍ yī ɔha̍ gla ɔla̍ā ta̍, o̍ ngma̍ la ode ka la ogrēeyī yī alo̍gra wa̍a̍ lɔkɔ nīi lihɔ chikpo̍ ma̍. 40O̍ lɛ um uhuhwi u̍ma̍ama kpɛ̍ɛji nīi o̍ hɔ̄ ma̍ ma̍, ɔha̍ni̍ e̍ ge̍ē hī alɔ lɛpɔ̄ wu̍chē yī lɛlā ogbōgbo oli̍chɛ nīi hɔ̄ ma̍ ma̍! Alɔ i̍ chī lɛ ochi̍chi̍ ɔnɛ̄ɛhɛhi ɔha̍lɔha̍ nīi alɔ ge̍ē ka wu̍chē yī ɛbɛ ɔti̍yatū nūma̍ ni̍! Bū la ɛbɛ ɔla̍ā, alɔ i̍ lɛ lɛlɛ̄lā ge̍ē wa̍ābɔ̄ yī nū mɛ ni̍.” 41O̍ kwɛ̍ɛjī la lɛlā nūma̍ la ɔkɔ̄ka ma̍, o̍ ka nīi ē pīya wa̍a̍.
© 2020 Bible Society of Nigeria (second edition)