U̍ku̍rɔ̍ yī Alɛrɔ̄ 18
18
Abɔ̍ɔ la Ikɔ̍rīnti
1Ɔla̍ā wā ge̍ ga ma̍, Ipɔ̍ɔli pīya bū la A̍ten ga ipwo̍gra yī Ikɔ̍rīnti. 2O̍ ma̍ ɔngrɔ̄ɔ ɔha̍ nīi re̍ka Akwi̍la ma̍ abɔ̍ɔ. Iju̍u nɛ; o̍ bū la Ipɔ̍ntūusi. O̍ e̍e chɔ̄cha bū la ɔcha nīi re̍ka I̍tāli ma̍; anu̍ ba̍la ɔnyā yī nū nīi re̍ka Iprisi̍la ma̍. Ɔchwɔ̄lɛ̍ ɔnɔ̄kɔ̄kū nīi re̍ka Ikla̍dīyusi ma̍ ka hīka Iju̍u wa̍a̍ ɛ̍lɛ ge̍ pīya hī Iro̍om anu̍ - ohu̍ nīi e̍ pīya a̍nɛ. Ipɔ̍ɔli gāa ga ɛbɛ yī wā. 3Aa̍ ba̍la anu̍ ē ya̍ u̍ku̍rɔ̍ ita ūkpo̍he ūkpo̍he ma̍, o̍ pīya hɔ̄ abɔ̍ɔ tāa aa̍. Ɔ̄pa̍ nīi e̍ ē bī ya̍ a̍ywɔ̍da̍ ma̍ nīi e̍ ē ya̍ u̍ku̍rɔ̍ yī nū bī bī iyī wā a̍nɛ. 4Ipɔ̍ɔli ē gāa u̍nu̍ ogrēeyī yī Iju̍u la Ɔ̄chī Ɔmyɛ̍nyɛ̍ myɛ̄grāa-myɛ̄grāa ge̍ē ta̍ahu̍ yī lɛlā ba̍la aa̍. O̍ ē chikpo̍ ge̍ē ya̍ nīi Iju̍u tūla Igri̍iki ge̍ē chɛ̄.
5Isa̍yi̍lāasi ba̍la Iti̍mōti bū la Imɛsɛdo̍niya wā ma̍, Ipɔ̍ɔli de ūkpɔ̄tū yī nū wa̍a̍ lā de ɛrɔ̄ yī Ɔwɔ la ɔkɔ̄ka bɛ̍ɛ̄nɛ̄. O̍ chikpo̍ ge̍ē chabɔ̄ tɛri̍tɛri̍ hu̍ Iju̍u wa̍a̍ hīka, Iji̍sɔ̄ɔsi ɔ̍lɔ - Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ a̍nɛ. 6Iju̍u i̍ chɛ̄ de ɔ̍ ni̍, chōo̍chē kɛlā abi̍ ku̍ ɔ̄ ma̍, o̍ gwō obubu hī ɔjā otūlibi̍īyē yī nū gblāa abɔ̍ɔ, ka de wa̍ hīka, “Ala̍ ge̍ pīyabi̍ hī Ɔwɔ, lɛfiyɛ yī ɔla̍ā - iyī ala̍ ɛlɛjā nɛ; i̍ ami ni̍. O̍bū la u̍ma̍ama, n ge̍ē pīya ē dikpo̍ ē ba̍ Ɛchɛkɔcha bɛ̍ɛ̄nɛ̄.” 7O̍ pīya hī wā ge̍ hɔ̄ la wɔlɛ̍ yī Ɛchɛkɔcha ɔha̍ nīi re̍ka Ita̍yi̍tɔ̄ɔsi Ijɔ̍si̍tusi ma̍. Ɔngrɔ̄ɔ ɔla̍ā - ɔ̄chɛ oya̍ otūlichō yī Ɔwɔ nɛ. Wɔlɛ̍ yī nū hɔ̄ ku u̍nu̍ ogrēeyī yī Iju̍u. 8Ikri̍pūusi nīi - ɔlɛhu̍ yī u̍nu̍ ogrēeyī ɔla̍ā ma̍, anu̍ ba̍la alwɔlɛ̍ yī nū wa̍a̍ de ɔtū che Ādā. Āchɛ yɛ̄mɛ̄mɛ̄ abɔ̍ɔ la Ikɔ̍rīnti nīi plɛ̍ɛ̄lā Ɔwɔ ma̍ chɛ̄ku ɔ̍, hu yenyi wa̍a̍.
9I̍chi̍chɛ ɔha̍ la otu̍, Ipɔ̍ɔli myɛ̍ma̍ ɔlɛbɛ̍bi̍ ɔha̍, Ādā wā ge̍ kɛlā de ɔ̍. O̍ ka ɔ̍lɔ ge̍, “Ipɔ̍ɔli be̍e! A ā pi̍ye̍mā lɛlā yī u la ɔkɔ̄ka ni̍. Ka kpɔ̍ɔ̍ ji; a ā tūuhwi ni̍. 10Ma̍a n hɔ̄ amu ba̍la awɔ. Ɔ̄chɔ̄chɛ i̍ ge̍ē ya̍ wɔ ɔjɔ̄jā mɛ ni̍. N lɛ āchɛ mwɛbɛ amu la ipwo̍gra nūma̍.” 11Ipɔ̍ɔli hɔ̄ abɔ̍ɔ lɛ̍yi̍ che ɔyɔ̍ɔ erīiyī ē ngū āchɛ yī Ɔwɔ lɛlā.
12Yɛ̄grāa nīi Aliro̍om de Iga̍liyo re̍ ɔchwɔ̄lɛ̍ yī Igri̍isi ma̍, Iju̍u wa̍a̍ grōoko̍o tū Ipɔ̍ɔli. E̍ ku̍ ɔ̄, bī ɔ̄ ga ɛbɛ yī lɛpɔ̄. 13E̍ koko̍o de Iga̍liyo ka ɔ̍lɔ ge̍, “Ma̍ ko̍ō, ādā! Ɔngrɔ̄ɔ nūma̍ ɔ̍lɔ yɛ amu ngū āchɛ lɛlā ɔha̍, yɛ amu ē ya̍ nīi āchɛ ge̍ē ya̍ otūlichō yī Ɔwɔ la ɔpɔ̄pū nīi lihɔ yī alɔ i̍ chikpo̍ ni̍ ma̍.”
14Ipɔ̍ɔli hu oko̍o kpa̍ ge̍ē kɛlā ma̍, Iga̍liyo hīyɔkɔ ɔpɔ̄ɔpɛ̄, da wa̍ hīka, “Ala̍ ma̍ ko̍ō! Lɛlā ɔla̍ā ge̍ re̍ka lɛlā ɔha̍ nīi i̍ ku kpakpa ni̍ kɛ̄ɛ lɛlā abi̍ ɔyɔ̍ɔ̄ya̍ ɔha̍ nɛ, n ge̍ chɛ̄ hīka n ge̍ē gbarɔ̄chi̍i̍ ē po̍. 15Onūma̍ - ahu̍lɛ̄lā yī oko̍o, ba̍la riyī ɔha̍, ba̍la lihɔ yī ala̍ Iju̍u nɛ ma̍, ala̍ ā de ka la abɔ̄ yī ala̍ ɛlɛjā gɛ; ma̍a ami i̍ ge̍ē hlɛ̍ɛ̄pɔ̄ yī lɛlā oli̍ngɔ̍ɔ ni̍.” 16O̍ nū wā ngmɛ̍ɛchɛ hī ɛbɛ ɔklɛpɔ̄ yī nū. 17Āchɛ ɛla̍ā ku̍ Iso̍sītɛnisi nīi - ɔlɛhu̍ ɔnɔ̄kɔ̄kū yī u̍nu̍ ogrēeyī yī Iju̍u ma̍, gwō ɔ̄ lijē la iyɔ̄bū yī ɛbɛ ɔklɛpɔ̄. Iga̍liyo i̍ hɛ̍ īkpīimi ɔlɛha̍ tū wā ni̍.
Ipɔ̍ɔli ku̍chē ga A̍ntīyɔ̄ɔki
18Ipɔ̍ɔli hɔ̄ abɔ̍ɔ la Ikɔ̍rīnti ɔ̄chī ɛmɛ̍ɛmla̍a o̍bū nīi o̍ wā ge̍ ta̍ āchɛ yī Iji̍sɔ̄ɔsi ɔhɔ̄lɛhi, tū wɔwu̍ pīya ga ɔcha yī Isi̍riya. Iprisi̍la ba̍la Akwi̍la yɛ tāa anu̍. O̍bū nīi Ipɔ̍ɔli hu ikpo̍ ma̍, o̍ choko̍o yī lɛlā ɔha̍ lēchi̍ lēchi̍, gbyɛka abɔ̍ɔ la Ikɛ̍nkrīye, de lɛhu̍ pla̍a okpukpru. 19E̍ gbajɛ ga ipwo̍gra yī Ɛ̍fɛ̄susi ma̍, o̍ pīya hī Akwi̍la ba̍la Iprisi̍la abɔ̍ɔ. O̍ pīya ga u̍nu̍ ogrēeyī yī Iju̍u ge̍ ta̍ ahu̍lɛ̄lā ba̍la Iju̍u abɔ̍ɔ. 20E̍ ka ɔ̍lɔ ge̍ hɔ̄ abɔ̍ɔ tāa aa̍ kpɛɛ o̍bū, o̍ i̍ chɛ̄ ni̍. 21O̍ ta̍ wā ɔhɔ̄lɛhi, koko̍o de wa̍ ka Ɔwɔ ɔ̍lɔ ge̍ chɛ̄, anɔ̍lɔ ge̍ē ku̍chē wā dikpo̍ ē ba̍ ɛ̍lɛ we̍. O̍ wā ge̍ tū wɔwu̍ pīya bū la Ɛ̍fɛ̄susi.
22O̍ gbajɛ ga Isi̍sari̍ya ma̍, o̍ pīya bū abɔ̍ɔ ge̍ da ogrēeyī yī āchɛ yī Ɔwɔ yī Ijɛru̍sālɛm o̍be. O̍ wā ge̍ ga pīya ga A̍ntīyɔ̄ɔki yī Isi̍riya. 23O̍ hɔ̄ abɔ̍ɔ chi̍i̍ ma̍, o̍ pīya. O̍ ga la ajɛ yī Igale̍siya ba̍la Ifri̍jiya wa̍a̍ tū āchɛ yī Iji̍sɔ̄ɔsi wɔbɔ̄ nīi e̍ ge̍ē lɛ brii.
Apo̍lōosi kɛlā yī Ɔwɔ abɔ̍ɔ la Ɛ̍fɛ̄susi ba̍la Ikɔ̍rīnti
24Ɔngrɔ̄ɔ yī Iju̍u ɔha̍ nīi re̍ka Apo̍lōosi ma̍ wā la Ɛ̍fɛ̄susi. E̍ ma ɔ̄ la ipwo̍gra nīi re̍ka Alɛsa̍ndriya ma̍. Oko̍o yī nū lwɔnyɛ lɛlā kpɛ̍ɛji. O̍ je̍ Īpū yī Ɔwɔ bāa ɔtɛri̍tɛri̍ ma̍. 25E̍ ngū ɔ̄ lɛlā la Ɔpɔ̄pū yī Lɛlā Nīi Ādā Chabɔ̄ Ma̍ hwɔhi hwɔhi. Lɛlā yī Iji̍sɔ̄ɔsi obī ka de āchɛ ma̍ lɛ ɔ̍ wɔnyɛ lēchi̍ lēchi̍. Lɛlā yī Iji̍sɔ̄ɔsi nīi o̍ ngū āchɛ ma̍ lɛ bāa otri̍di̍di̍ ma̍. Lɛlā yī yenyi ohōhu yī Ijɔ̍ɔn nīi o̍ chī jo̍ōkū ke̍e̍ a̍nɛ. 26O̍ kū abɔ̍ɔ ē kɛlā de āchɛ bāa ɔkpra̍kpra̍ ma̍ abɔ̍ɔ la u̍nu̍ ogrēeyī yī Iju̍u. Akwi̍la ba̍la Iprisi̍la ɔnyā yī nū plɛ̍ɛ̄lā ɔla̍ā nīi Apo̍lōosi yɛ ē ngū āchɛ ma̍, e̍ bī ɔ̄ pīya ga wɔlɛ̍ yī wā ge̍ ka ochi̍chi̍ yī Ɔpɔ̄pū yī Lɛlā Nīi Ādā Chabɔ̄ Ma̍ tɛri̍tɛri̍ de ɔ̍ wa̍a̍. 27Apo̍lōosi chikpo̍ ge̍ē pīya ē gāa Igri̍isi bɛ̍ɛ̄nɛ̄ ma̍, āchɛ yī Iji̍sɔ̄ɔsi abɔ̍ɔ la Ɛ̍fɛ̄susi tū ɔ̄ wɔbɔ̄. E̍ ta̍ īpū tɛ̄rɔ̄ hu aɛ̍nɛ̍ yī wā nīi gblāa la Igri̍isi ma̍ hīka, ɛ̍lɛ ge̍ ku̍ ɔ̍lɔ ba̍ ɔtū. O̍ gbajɛ gāa ma̍, āchɛ ɛla̍ā wa̍a̍ nīi Ɔwɔ ya̍ wā lɛhi nīi e̍ chɛ̄ku Iji̍sɔ̄ɔsi ma̍ o̍ tū wā wɔbɔ̄ kpɛ̍ɛji. 28Wu̍chē oji̍ nɛ, o̍ ta̍ahu̍ yī lɛlā la ɔgbādu ē de Iju̍u kla̍ oko̍o bū la ochi̍chi̍ yī lɛlā yī nū. O̍ chabɔ̄ bū la Īpū yī Ɔwɔ hu̍ wā tɛri̍tɛri̍ hīka Iji̍sɔ̄ɔsi ɔ̍lɔ - Ɔhɔ̍ɔnyɛta̍ Nīi Ɔwɔ ɔ̍lɔ Hōhu a̍nɛ.
© 2020 Bible Society of Nigeria (second edition)