LUKA 22
22
1 #
Thama 12.1-27. NA rĩrĩ, gĩathĩ kĩa mĩgate ĩrĩa ĩtarĩ mĩĩkĩre ndawa ya kũimbia, o kĩrĩa gĩĩtagwo Bathaka, nĩgĩakuhĩhĩirie. 2Nao athĩnjĩri-Ngai arĩa anene na aandĩki-marũa magacaragia ũrĩa mangĩmũũragithia; nĩ gũkorũo nĩmetigagĩra kĩrĩndĩ.
3Nake Shaitani agĩtonya thĩinĩ wa Judasi ũrĩa wetagwo Mũisikariota, nake nĩ ũmwe wa arĩa ikũmi na erĩ. 4Nake agĩĩthiĩra, agĩthiĩ ndundu na athĩunjĩri-Ngai arĩa anene na anene a makanga, mecirie ũrĩa angĩhota kũmũneana kũrĩ o. 5Magĩgĩkena, makĩrĩkanĩra nake atĩ aheo mbia. 6Nake agĩĩtĩkĩra, agĩcaria hĩndĩ njagĩrĩru ya kũmũneana kũrĩ o kĩrĩndĩ gĩtarĩ ho.
7Naguo mũthenya ũrĩa wa mĩgate ĩtarĩ mĩĩkĩre ndawa ya kũimbia ũgĩkinya, nĩguo ũrĩa wa gũthĩnjwo Bathaka. 8Nake Jesu agĩtũma Petero na Johana, akĩmera atĩrĩ, Thiĩi, mũgatũthondekere Bathaka tũmĩrĩe. 9Makĩmũũria atĩrĩ, Ũkwenda tũkamĩthondekere kũ? 10Nake akĩmera, Rĩu-rĩ, mwatonya itũũra-inĩ, nĩmũgũtũngwo nĩ mũndũ ũkuuĩte ndigithũ ĩĩ maĩ; mũhikĩrei, mũtonye o nyũmba ĩrĩa egũtonya. 11Na mwĩre mwene nyũmba ĩo atĩrĩ, Mũrutani egũkũũria atĩrĩ, Nyũmba ya ageni ĩĩ ha, ĩrĩa ndĩrĩrĩĩra Bathaka hamwe na arutwo akwa? 12Nake nĩekũmuonia nyũmba nene ya igũrũ ĩĩkĩrĩtwo indo: thondekerai Bathaka ho. 13Nao magĩthiĩ, magĩkora o ta ũrĩa aamerĩte: magĩgĩthondeka Bathaka.
14Nayo thaa yakinya, agĩikara thĩ, nao atũmwo magĩikara hamwe nake. 15Akĩmera atĩrĩ, Nĩ kwĩrirĩria ndĩĩrirĩirie kũrĩa Bathaka ĩno hamwe na inyuĩ itananyarirũo: 16nĩ gũkorũo ngũmwĩra atĩ ndigacoka kũmĩrĩa o nginya rĩrĩa ĩkahingio ũthamaki-inĩ wa Ngai. 17Nake akĩiyũkia gĩkombe, na aarĩkia gũcokeria Ngai ngatho, akiuga atĩrĩ, Kai gĩkĩ, mwĩgayanie arĩ inyuĩ: 18nĩ gũkorũo ngũmwĩra atĩ, kuuma rĩu ndigacoka kũnyua ya maciaro ma mĩthabibu o nginya rĩrĩa ũthamaki wa Ngai ũgoka. 19Agĩcoka akĩoya mũgate, na aarĩkia gũcokeria Ngai ngatho, akĩwenyũranga, akĩmane, akiuga atĩrĩ, Ũyũ nĩguo mwĩrĩ wakwa ũkũneanwo nĩ ũndũ wanyu: ĩkagai ũũ nĩ getha mũndirikanage. 20#Jer 31.31-34.Ningĩ no taguo, maarĩkia kũrĩa, akĩmane gĩkombe kĩu akiuga atĩrĩ. Gĩkombe gĩkĩ nĩkĩo gĩa kĩrĩkanĩro kĩrĩa kĩerũ thĩinĩ wa thakame yakwa, o ĩrĩa ĩgũitwo nĩ ũndũ wanyu. 21#Thab 41.9.No rĩrĩ, guoko kwa mũndũ ũrĩa ũrĩngunyanĩra kwĩ haha hamwe na niĩ, o metha-inĩ ĩno. 22Nĩ gũkorũo ti-itherũ Mũrũ wa Mũndũ nĩegũthiĩ o ta ũrĩa ũhoro wake wathĩrĩirio: no mũndũ ũrĩa ũkũmũkunyanĩra, kaĩ ũcio arĩ na haaro-ĩ! 23Nao magĩitĩka kũũrangania o ene nĩ ũrĩkũ wao ũngĩĩka ũndũ ũcio.
24 #
Mat 18.1; Mar 9.34; Luk 9.46. Ningĩ gũkĩgĩa ngarari kũrĩ o atĩ nĩ ũrĩkũ wao ũngĩtuwo mũnene kũrĩ arĩa angĩ. 25Nake akĩmera atĩrĩ, Athamaki a Ndũrĩrĩ nĩmetũũgagĩria igũrũ rĩa andũ ao; nao arĩa mamaathaga, nĩo metagwo Ateithania. 26#Mat 23.11; Mar 9.35.#Mat 20.25-27; Mar 10.42-44.No kũrĩ inyuĩ nĩgũtige gũtuĩka ũguo: no rĩrĩ, ũrĩa mũnene kũrĩ inyuĩ nĩatuĩke ta ũrĩa mũnyinyi, na ũrĩa wathanaga nĩatuĩke ta ũrĩa ũtungatanagĩra. 27#Joh 13.12-15.Nĩ ũndũ-rĩ, nĩ ũrĩkũ mũnene, nĩ ũrĩa ũikaraga metha-inĩ kũrĩa, kana nĩ ũrĩa ũrehage irio? Githĩ ti ũrĩa ũikaraga metha-inĩ kũrĩa? No niĩ-rĩ, ndũire na inyuĩ ndĩ ta ũrĩa ũrehanagĩre irio.
28Inyuĩ-rĩ, nĩ inyuĩ mũtũire hamwe na niĩ magerio-inĩ makwa; 29na nĩndĩkĩtie gũtua atĩ nĩngamũhe ũthamaki, o ta ũrĩa Awa nake aatuire atĩ nĩaka’he niĩ ũthamaki, 30#Mat 19.28.nĩ getha mũkarĩagĩra na mũnyuagĩre metha-inĩ yakwa ũthamaki-inĩ wakwa; ningĩ nĩmũgaikaragĩra itĩ-cia-ũnene, mũtuagĩre mĩhĩrĩga ĩrĩa ikũmi na ĩĩrĩ ya Aisiraeli cira.
31Simoni, Simoni, atĩrĩ, Shaitani nĩahoete atĩ aheo inyuĩ amũthũngũthie o ta ũrĩa ngano ĩthũngũthagio: 32no niĩ-rĩ, nĩngũhoeire, nĩ getha gwĩtĩkia gwaku gũtigathire: nawe warĩkia kũgarũrũka, ũcoke ũũmagĩrĩrie ariũ a Ithe witũ. 33Nake akĩmwĩra atĩrĩ, Mwathani, nĩndĩĩhaarĩirie tũtwarane nawe korokoro-inĩ, o kinya tũkuanĩre nawe. 34Nake Jesu akiuga, Ngũkwĩra atĩrĩ, Petero, atĩ ngũkũ ndĩrĩgamba o ũtukũ ũyũ, ũtakaanĩte gatatũ atĩ ndũnjũĩ.
35 #
Mat 10.9,10; Mar 6.8,9; Luk 9.3; 10.4. Nake akĩmoria atĩrĩ, Rĩrĩa ndamũtũmire mũtarĩ na tũmondo twa mbia kana mburungo, kana iratũ-rĩ, gwĩ kĩndũ mwaagire? Makiuga atĩrĩ, ’Ca, gũtirĩ. 36Nake akĩmera atĩrĩ, No rĩu, ũrĩa wĩ na kamondo ka mbia nĩathiĩ nako, o na mburungo nayo o taguo: nake ũrĩa ũtarĩ na rũhiũ rũa mbaara nĩendie kabuti gake agũre. 37#Isa 53.12.Nĩ gũkorũo ngũmwĩra atĩrĩ, Ũhoro ũyũ wandĩkĩtwo ndũrĩ hingo ũtekũhingio harĩ niĩ, atĩrĩ, Nĩaataranĩirio hamwe na arĩa aagarari watho; nĩ gũkorũo maũndũ marĩa maandĩkĩtwo ũhoro wakwa nĩ hĩndĩ marahingio. 38Nao makiuga atĩrĩ, Mwathani, ta rora, haha nĩharĩ hiũ igĩrĩ cia mbaara. Akĩmera atĩrĩ, Nĩciiganĩte.
39Nake akiumagara, agĩthiĩ kĩrĩma-inĩ kĩa Mĩtamaiyũ, o ta ũrĩa aamenyerete gwĩkaga; arutwo nao makĩmũrũmĩrĩra.
40Na aakinya ho akĩmera atĩrĩ, Hoyagai atĩ mũtigakinye magerio-inĩ. 41Agĩtigana nao, agĩthiĩ ta harĩa mũndũ angĩhota gũikia ihiga; agĩturia ndu akĩhoya, 42akiuga atĩrĩ, Awa, akorũo wenda-rĩ, ’thengeria gĩkombe gĩkĩ: ĩndĩ ti ũrĩa ngwenda niĩ, no gwĩkwo o ũrĩa ũkwenda wee. 43Na mũraika akĩmuumĩrĩra oimĩte Igũrũ, akĩmuongerera hinya. 44Nake agĩtubunyĩka mũno, agĩcoka akĩhoya mũno makĩria; nayo njoya yake ĩgĩtuĩka ta mataata manene ma thakame, magĩtaata thĩ. 45Nake okĩra, aarĩkia kũhoya, agĩthiĩ harĩ arutwo, akĩmakora makomete nĩ ũndũ wa kĩeha, 46akĩmera atĩrĩ, Mũkomete toro nĩ ũndũ kĩ? Arahũkai na mũhoe, nĩ getha mũtigakinye magerio-inĩ.
47Na rĩrĩ, o akĩaragia-rĩ, gũgĩũka andũ gĩtutu, nake ũrĩa wetagwo Judasi, ũmwe wa acio ikũmi na erĩ, nĩwe wamatongoretie; agĩthengerera Jesu amũmumunye. 48No Jesu akĩmũũria atĩrĩ, Judasi, kaĩ ũgũkunyanĩra Mũrũ wa Mũndũ na kũmũmumunya? 49Nao arĩa maarĩ hamwe nake mona ũrĩa gwaitĩka gwĩkwo, makĩmũũria atĩrĩ, Mwathani, nĩũkwenda tũmaikie rũhiũ? 50Na ũmwe wao agĩikia mũndũ warĩ ngombo ya mũthĩnjĩri-Ngai ũrĩa mũnene rũhiũ, akĩmũtinia gũtũ kwa ũrĩo. 51Nowe Jesu agĩcokia akiuga atĩrĩ, Rekei ũhoro ũkinye hau; akĩmũhutia gũtũ, akĩmũhonia. 52Nake Jesu akĩũria athĩnjĩri-Ngai arĩa anene, na anene a makanga arĩa a hekarũ, o na athuri arĩa mekĩte mamũnyite atĩrĩ, Anga mũgĩũkĩte mwĩ na hiũ na ndotono, ta arĩ mũtunyani mũkũnyita? 53#Luk 19.47; 21.37.Hĩndĩ ĩrĩa ndĩratindaga na inyuĩ hekarũ-inĩ, mũtiigana kũndwarĩrĩra moko, mũ’nyite: no ihinda rĩrĩ nĩrĩo rĩanyu, na rĩa wathani ũrĩa uumĩte nduma-inĩ.
54Nao makĩmũnyita, makĩmũruta hau, makĩmũtwara kwa mũthĩnjĩri-Ngai ũrĩa mũnene. Nowe Petero akĩmũrũmĩrĩra arĩ haraya. 55Nao maarĩkia gwakia mwaki o nja gatagatĩ, na gũikara thĩ hamwe, Petero nake agĩikara thĩ harĩ o. 56Na ndungata ĩmwe ya mũirĩtu ĩkĩmuona aikarĩte ũtheri-inĩ, ĩkĩmũrora wega, ĩkiuga atĩrĩ, Mũndũ ũyũ o nake oima hamwe na mũndũ ũcio. 57Nowe agĩkaana, akiuga atĩrĩ, Mũirĩtu ũyũ, ndimũũĩ. 58Na kahinda kanini gaathira, mũndũ ũngĩ akĩmuona, akiuga atĩrĩ, Wee nawe ũrĩ ũmwe wao. Nake Petero akiuga atĩrĩ, Mũndũ ũyũ, ndirĩ wao niĩ. 59Na ta ihinda rĩa thaa ĩmwe rĩathira, mũndũ ũngĩ nake akiuga agwatĩirie atĩrĩ, Ti-itherũ mũndũ ũyũ nake oima na mũndũ ũcio, amu nĩ Mũgalili. 60Nowe Petero akiuga atĩrĩ, Mũndũ ũyũ, ndiũĩ ũrĩa ũkuuga. Na kahinda kau o akĩaragia-rĩ, ngũkũ ĩkĩgamba. 61Nake Mwathani akĩĩhũgũra, akĩrora Petero. Nake Petero akĩririkana ũhoro ũcio wa Mwathani, o ũrĩa ekũmwĩrĩte atĩ, Ngũkũ ĩtanagamba o ũtukũ ũyũ, ũrĩkorũo ũngaanĩte maita matatũ. 62Agĩkiumagara, akĩrĩra mũno.
63Nao andũ arĩa maanyitĩte Jesu makĩmũnyũrũria na makĩmũhũra. 64Magĩcoka makĩmuoha maitho na tama, makĩmũũria atĩrĩ, Ta ragũra, nũ wakũgũtha? 65Na makĩmũcambia na maũndũ mangĩ maingĩ, makĩmũrumaga.
66Na rĩrĩ, o rĩmwe gwakĩa, kĩama gĩothe gĩa athuri a cira gĩkĩũnganio, gwata athĩnjĩri-Ngai arĩa anene, o na aandĩki-marũa; nao makĩmũtwara kĩũngano-inĩ kĩao, makiuga atĩrĩ, 67Ũngĩkorũo nĩwe Kristo, twĩre. Nowe akĩmera atĩrĩ, Ingĩmwĩra, mũtingĩĩtĩkia: 68na ingĩmũũria ũndũ, mũtingĩnjokeria. 69Ĩndĩ kuuma rĩu, Mũrũ wa Mũndũ nĩagakorũo aikarĩte guoko-inĩ kwa ũrĩo kwa Ngai Mwene hinya. 70Nao othe makĩmũũria atĩrĩ, Hĩ! Wee ũkĩrĩ Mũrũ wa Ngai? Nake akĩmera atĩrĩ, Nĩ inyuĩ mwoiga atĩ nĩ niĩ we. 71Magĩkiuga atĩrĩ, Kaĩ tũgũgĩcoka kwenda ũira ũngĩ wa kĩ? Nĩ gũkorũo ithuĩ ene nĩtweiguĩra ũhoro uumĩte kanua gake mwene.
©Bible Society of Kenya, 2019