JOHANA 4
4
1RĨRĨA Mwathani aakĩmenyire atĩ Afarisai nĩmaiguĩte atĩ Jesu nĩagĩaga arutwo aingĩ kwĩ Johana o na akamabatithia 2(no ti Jesu we mwene wabatithanagia, nĩ arutwo ake), 3hĩndĩ ĩo akiuma Judea, agĩcoka rĩngĩ Galili. 4Na no kinya atuĩkanie bũrũri wa Samaria. 5#Kĩam 33.19; Josh 24.32.Agĩgĩkinya itũũra rĩa Samaria rĩĩtagwo Sukaru, rĩĩ gũkuhĩ na gĩthaka kĩrĩa Jakubu aaheire mũriũ Jusufu; 6na nĩkuo gĩthima kĩarĩ, kĩrĩa kĩa Jakubu. Nake Jesu agĩgĩikara thĩ gĩthima-inĩ kĩu, o ũguo aatariĩ, nĩ kũnoga nĩ gũthiĩ. Kwarĩ ta thaa thita. 7Na mũtumia wa kũu Samaria agĩũka gũtaha maĩ; nake Jesu akĩmwĩra atĩrĩ, He maĩ nyue. 8Nĩ gũkorũo arutwo ake nĩmaathiĩte itũũra-inĩ thĩinĩ kũgũra irio. 9#Ezar 4.1-5; Neh 4.1,2.Nake mũtumia ũcio wa Samaria agĩkĩmũũria atĩrĩ, Nĩ atĩa tondũ wa’hoya maĩ, ũkĩrĩ Mũyahudi, na niĩ ndĩ mũtumia wa Samaria? (Amu Ayahudi matitonyaine na andũ a Samaria.) 10Nake Jesu agĩcokia akĩmwĩra atĩrĩrĩ, Ũngĩrĩ kũmenya kĩrĩa kĩheanagwo nĩ Ngai, na ũkamenya ũyũ nũ ũrakwĩra, He maĩ nyue, nĩwe ũngĩamũhoya, nake nĩangĩakũhe maĩ me muoyo. 11Nake mũtumia akĩmwĩra, Mũthuri ũyũ, wee ndũrĩ na kĩndũ gĩa gũtaha nakĩo, narĩo irima nĩ iriku; ũkĩrutĩte kũ maĩ macio me muoyo? 12Anga ũrĩ mũnene gwĩ ithe witũ Jakubu, ũrĩa watũheire irima rĩrĩ, na agĩtũũra anyuaga maĩ marĩo we mwene, o na ariũ ake, na mahiũ make? 13Nake Jesu agĩcokia akĩmwĩra atĩrĩ, Mũndũ o wothe ũnyuĩte maĩ maya nĩarĩcoka kũnyota rĩngĩ; 14no rĩrĩ, mũndũ o wothe ũnyuĩte maĩ marĩa ngamũhe niĩ, ndarĩ hingo akanyota, o rĩ, o rĩ; maĩ marĩa ngamũhe niĩ magatuĩka gĩthima kĩa maĩ thĩinĩ wake gĩa gũtherũkaga gĩkĩrehage muoyo wa tene na tene. 15Mũtumia akĩmwĩra atĩrĩ, Mũthuri ũyũ, ta he maĩ macio, ndigage kũnyota, na ndigage gũũka o gũkũ gũtaha.
16Nake Jesu akĩmwĩra, Thiĩ, ũgete mũthuriguo, mũũke nake. 17Mũtumia agĩcokia akĩmwĩra atĩrĩ, Ndirĩ na mũthuri wakwa niĩ. Nake Jesu akĩmwĩra atĩrĩrĩ, Nĩwoiga wega woiga ndũrĩ na mũthuri waku; 18amu wanagĩa na athuri aku atano, na ũrĩa mwĩ nake rĩu ti mũthuriguo; ũguo ũrĩ kuuga ma. 19Nake mũtumia akĩmwĩra atĩrĩ, Mũthuri ũyũ, nĩndona wĩ mũnabii. 20Rĩu-rĩ, maithe maitũ maahoyagĩra Ngai kĩrĩma gĩkĩ; na inyuĩ muugaga atĩ Jerusalemu nokuo andũ maagĩrĩirũo nĩ kũhoyagĩra. 21Nake Jesu akĩmwĩra atĩrĩrĩ, Mũtumia ũyũ, ĩtĩkia ũguo ngũkwĩra: atĩrĩ, kwĩ hingo ĩroka mũtakahoyagĩra Ithe witũ kĩrĩma gĩkĩ, kana o Jerusalemu. 22Inyuĩ mũhoyaga ũrĩa mũtoĩ; ithuĩ tũhoyaga ũrĩa tũũĩ, amu-rĩ, ũhonokio nĩ wa kuuma kũrĩ Ayahudi. 23No kaĩ kwĩ hingo iroka, o na rĩu no nginyu, arĩa ahoi kũna makahoyaga Ithe witũ na roho na mamũhoyage na ma, amu nĩ ta acio Ithe witũ acaragia matuĩke a kũmũhoyaga. 24Ngai nĩ roho, nao arĩa mamũhoyaga, no mahoyage na roho na mahoyage na ma. 25Nake mũtumia akĩmwĩra atĩrĩ, Nĩnjũĩ Mesia nĩagoka (ũrĩa wĩtagwo Kristo); we oka, nĩagatwĩra maũndũ mothe wega. 26Jesu akĩmwĩra atĩrĩ, Niĩ ngũkwarĩria, nĩ niĩ ũcio.
27Gwakinya hau, arutwo ake magĩũka; magĩkĩgega maakora akĩaria na mũndũ-wa-nja; no gũtirĩ woririe, Ũkwendaga kĩ? kana akĩũria, Mũkwaragia nake nĩkĩ? 28Nake mũtumia agĩgĩtiga ndigithũ yake, agĩthiĩ agĩtonya itũũra, akĩĩra andũ, 29Ũkai, mũkone mũndũ wanjĩra maũndũ makwa mothe o marĩa ndaneka! nĩangĩgĩtuĩka nĩwe Kristo hihi? 30Nao makiumagara, makĩgwata gũthiĩ kũrĩ we.
31Mũira wa moke, arutwo nĩ kũmũringĩrĩria maamũringĩrĩirie arĩe, makiuga, Rabii, ndũrĩe irio. 32Nowe akĩmera atĩrĩrĩ, Ndĩ na irio cia kũrĩa mũtoĩ ũhoro wacio. 33Tondũ ũcio arutwo makĩũrania atĩrĩ, Kaĩ kwĩ mũndũ ũmũreheire gĩa kũrĩa? 34Nake Jesu akĩmera atĩrĩrĩ, Irio ciakwa nĩ njĩkage ũrĩa ekwenda, ũrĩa wandekirie, ngarĩkie wĩra wake. 35Mũtiugaga, Gũtigairie mĩeri ĩna, magetha makinye? Ndamwĩra atĩrĩ, Tiirai maitho, mũbare mĩgũnda, muone atĩ o na rĩu nĩyerũhĩte, kũgethwo. 36Ũrĩa ũgethaga nĩagwataga mũcara, na agacokanĩrĩria irio cia kũhirũo muoyo-inĩ wa tene na tene, mũhandi na mũgethi magĩkenanĩre hamwe. 37Amu nĩho ũhoro ũtuĩkĩire wa ma, ũrĩa wĩragwo, Ũmwe ahandaga, na ũngĩ akagetha. 38Niĩ ndamũtũmire mũkagethe kĩrĩa mũtanogeire; nĩ angĩ maanenogia makĩruta wĩra, na inyuĩ mũkagetha nĩ ũndũ wa wĩra wao.
39Na kũu itũũra rĩu Asamaria aingĩ makĩya kũmwĩhoka nĩ ũndũ wa kiugo kĩa mũtumia ũcio, akiugaga atĩrĩ, Nĩanjĩrire maũndũ makwa mothe o marĩa ndaneka. 40Nao Asamaria acio maakinya harĩ we magĩkĩmũringĩrĩria aikare kũu kwao: akĩnina mĩthenya ĩĩrĩ kuo. 41Na andũ angĩ aingĩ kũrĩ acio magĩĩtĩkia nĩ ũndũ wa ciugo ciake; 42magĩkĩĩra mũtumia ũcio atĩrĩ, Rĩu tũtiĩtĩkĩtie nĩ ũndũ wa kwaria gwaku: amu nĩtwĩiguĩrĩire, tũkamenya ũyũ ti-itherũ nĩwe Mũhonokia wa kĩrĩndĩ.
43Mĩthenya ĩo ĩĩrĩ yathira akiuma kũu agĩthiĩ Galili. 44#Mat 13.57; Mar 6.4; Luk 4.24.Amu Jesu we mwene nĩoigire atĩ mũnabii ndekĩrĩirũo kwao. 45#Joh 2.23.Na aakinya Galili, Agalili makĩmũgwata ũgeni, nĩ gũkorũo nĩmonete maũndũ marĩa mothe ekire e Jerusalemu hĩndĩ ĩrĩa ya gĩathĩ, tondũ nĩmaathiĩte gĩathĩ kĩu o nao.
46 #
Joh 2.1-11. Agĩgĩkinya rĩngĩ Kana ya Galili, kũrĩa aatũmire maĩ matuĩke ndibei. Na kũu kwarĩ mũndũ mũnene, mũrũwe arũarĩire Kaperinaumu. 47Ũcio aaigua atĩ Jesu nĩoimĩte Judea agoka Galili, agĩthiĩ kũrĩ we, akĩmũhoya atherere akahonie mũrũwe, tondũ nĩehĩirũo mũno. 48Nake Jesu agĩkĩmwĩra atĩrĩ, Mwaaga kuona ciama na morirũ, mũtirĩ hingo mũgetĩkia. 49Mũnene ũcio akĩmwĩra, Mũthuri ũyũ, ndũũke tũtherere mwana wakwa atanakua. 50Nake Jesu akĩmwĩra atĩrĩ, Thiĩ wee; mũrũguo e muoyo. Nake mũndũ ũcio agĩĩtĩkia ũguo Jesu aamwĩrire, agĩĩthiĩra. 51Na e njĩra agĩtherera, agĩtũngwo nĩ ngombo ciake, ikĩmwĩra atĩ mũrũwe arĩ o muoyo. 52Agĩgĩciũria nĩ thaa ciigana aatigire kwĩhĩrũo. Igĩkĩmwĩra atĩrĩ, Ira thaa mũgwanja nĩrĩo ũhiũhu wa mwĩrĩ ũramũtigire. 53Ithe agĩkĩmenya no thaa ĩrĩa Jesu aramwĩrire, Mũrũguo e muoyo: nake mwene agĩĩtĩkia, o na andũ ake othe. 54Kĩu nakĩo nĩkĩo kĩama gĩa kerĩ kĩrĩa Jesu ekire arĩkĩtie kuuma Judea agathiĩ Galili.
©Bible Society of Kenya, 2019