Gyenesis 45
45
Josef Da Noho Edzi Kyerɛ No Nuanom
1 #
Ndwu 7.13
Nna afei Josef hyɛ noho do a ɔnnyɛ yie, wɔ hɔn a wogyinagyina ne nkyɛn no nyinara hɔn enyim; na ɔkaa mu dɛ, Wɔmma nkorɔfo nyinara mfi me nkyɛn mfi. Na aber a Josef riyi noho edzi akyerɛ no nuanom no, nna obiara nngyina ne nkyɛn. 2Na ɔmaa ne ndze do sui: na Egyptfo no tsee, na Farao fiefo tsee. 3Na Josef see no nuanom no dɛ, Emi nye Josef; ana m’egya da ho tse ase? Na no nuanom no enntum emmbua no; osiandɛ hɔn ho popoe wɔ n’enyim. 4Na Josef see no nuanom no dɛ, Meserɛ hom, wompin me nkyɛn. Na wopinii. Na ɔsee dɛ, Emi nye hom nua Josef a hom tɔɔn no baa Egypt no. 5Na afei mma ɔnnyɛ hom yaw, na mma hom bo mmfufuw hom ho so, dɛ hom tɔɔn me baa ha: osiandɛ Nyankopɔn na ɔsomaa me ma midzii hom enyim kan, ama maabɛgye nkwa. 6Osiandɛ ɔkɔm esi asaase yi do mfe ebien nye yi: na mfe enum so aka a adɔw nye buber so nnyi mu. 7Na Nyankopɔn somaa me ma midzii hom enyim kan ama maabɔkora edzinkaa bi ama hom wɔ asaase do, na medze ɔgye kɛsenara agye hom nkwa. 8Dɛm ntsi afei, nnyɛ hom bi na wɔsomaa me wɔ ha, na Nyankopɔn a: na ɔayɛ me Farao n’egya, na ne fi nyinara wura na Egypt asaase nyinara do panyin. 9#Ndwu 7.14 Hom nka hom ho nkɔ m’egya hɔ, na wɔnkɛse no dɛ, Mbrɛ wo ba Josef se nye yi, Nyankopɔn ayɛ me Egypt nyinara wura: bra me nkyɛn, mma nnkyinkyim: 10Na bɛtsena Gosen asaase do, na bɛn me, ɔwo, nye wo mba, nye wo mbanananom, nye wo nguan, nye w’anantwi, nye dza ewɔ nyinara: 11na mobɔhwɛ wo wɔ hɔ; na aka ɔkɔm mfe enum so; bɛyɛ na ehia, ɔwo, nye wo fidua, nye dza ewɔ nyinara. 12Na hwɛ, hom enyiwa tua, na mo nua Benjamin so n’enyiwa tua, dɛ m’ano na ɔrekasa kyerɛ hom yi. 13Na hom nkɛka m’enyimnyam a mowɔ no wɔ Egypt nyinara no ho asɛm nkyerɛ m’egya, na dza hom ehu no nyinara; na hom nyɛ ntsɛm nkɛfa m’egya mbra ha. 14Na ɔbaar no nua Benjamin no kɔn, na osui; na Benjamin so sui wɔ no kɔn ho. 15Na ɔfefeew no nuanom nyinara hɔn ano, na ɔdzedze hɔn mu sui: na n’ekyir no no nuanom no nye no kasae.
16Na wɔtsee nka wɔ Farao fie dɛ, Josef no nuanom aba: na Farao nye no nkowaa enyi gyee papa. 17Na Farao see Josef dɛ, Se wo nuanom no dɛ, Iyi na hom nyɛ: hom mfa ndzɛmba nsoasoa hom mbowa no, na hom nkɔ, hom nsan nkɔ Keenan asaase do; 18na hom nkɛfa hom egya nye hom fifo, na hom mbra me nkyɛn: na mebɛma hom Egypt asaase no mu dza oye, na hom bedzi asaase no do ndzepa. 19Afei se hɔn dɛ, iyi na hom nyɛ; hom mfa ntseaseanam wɔ Egypt asaase do nkɛfa hom mbofraba, nye hom yernom na hom egya ma wɔmbra. 20Eso mma hom mma hom ndzɛmba ho nnhia hom; na dza oye wɔ Egypt asaase do nyinara yɛ homdze. 21Na Israel ne mba no yɛɛ dɛm: na Josef maa hɔn ntseaseanam, dɛ mbrɛ Farao hyɛe no ara, na ɔmaa hɔn kwan mu edziban. 22Ɔmaa hɔn nyinara ntar nsakyerho nkorkor; na Benjamin dze, ɔmaa no ndwetɛbona ahaasa, nye ntar nsakyerho enum. 23Na dza ɔdze kɛmaa n’egya nye yi; nsoasopɔnkɔ du a wɔsoso Egypt ndzɛmba pa, nye nsoasopɔnkɔber du a wɔsoso eburow, nye boodoo, nye edzidzidze a n’egya bedzi no wɔ kwan mu. 24Nna ogyaa no nuanom no kwan, na wosii mu na ɔsee hɔn dɛ, Hom nhwɛ mma hom aannka yaw wɔ kwan mu. 25Na wofii Egypt kɔree, na wɔbaa hɔn egya Jakob nkyɛn wɔ Keenan asaase do. 26Na wɔkaa kyerɛɛ no dɛ, Josef da ho tse ase, na ɔno nye Egypt asaase nyinara do panyin. Na bobor boor no, osiandɛ ɔanngye hɔn enndzi. 27Na wɔkaa Josef ne nsɛm a ɔkaa kyerɛɛ hɔn no nyinara kyerɛɛ no: na aber a ohun ntseaseanam a Josef maa wɔdze kɔree dɛ wɔmfa nkɛfa no no, nna hɔn egya Jakob n’akoma tɔɔ ne yamu: 28na Israel see dɛ, ɔdɔɔ so ma me; me ba Josef da ho tse ase: mobɔkɔ mekohu no ana mewu.
Mfantse Bible © Bible Society of Ghana, 2011.