Gyenesis 44
44
Josef No Dwetɛ Kɔɔpow
1Na Josef hyɛɛ ne fie somfo no dɛ, Fa edziban dodowara a nkorɔfo no botum asoa hyehyɛ hɔn nkotoku mu, na fa nyimpa biara ne sika hyɛ no kotoku ano. 2Na fa mo kɔɔpow no, mekyerɛ me dwetɛ kɔɔpow no, hyɛ hɔn mu kakraba no no kotoku mu, nye n’eburow sika no. Na ɔyɛɛ dɛ mbrɛ Josef kae no ara. 3Enyim tsetsewee ara na wogyaa nkorɔfo no kwan, hɔn nye hɔn nsoasopɔnkɔ. 4Na wofii kurow no mu kɔree, na wonnyae nndur ekyirekyir no, Josef see ne somfo no dɛ, Soɛr, tsiw nkorɔfo no; na sɛ eto hɔn a, se hɔn dɛ, ɔyɛ dɛn ntsi na hom dze bɔn etua papa kaw yi? 5Ana nnyɛ iyi na mo wura nom ano, na ɔdze hyɛ nkɔm ma ɔba mu no bi? Hom ayɛ bɔn dɛ hom ayɛ dɛm adze yi. 6Na ɔtoo hɔn, na ɔkaa nsɛm yi kyerɛɛ hɔn. 7Na wɔsee no dɛ, ɔyɛ dɛn ntsi na mo wura ka nsɛm a ɔtse dɛm yi? Nyankopɔn mpa ngu dɛ wo nkowaa bɛyɛ dɛm adze yi. 8Hwɛ, sika a yehun no hɛn nkotoku mu no, yɛdze sanee fii Keenan asaase do brɛɛ wo bio: ɔbɛyɛ dɛn na yebowia dwetɛ anaa sika wɔ wo wura ne fie? 9Wo nkowaa hɛn mu biara a ibohu no wɔ no hɔ no, ma onwu, na hɛn so yɛbɛyɛ mo wura nkowaa. 10Na ɔsee dɛ, Nna afei wɔmma ɔnyɛ dɛ mbrɛ hom aka yi ara: nyia wobohu no no hɔ no ɔbɛyɛ m’akowaa; na hom dze, hom nndzi so. 11Nna wɔyɛɛ no ntsɛm, na nyimpa biara soɛɛ no kotoku too famu, na nyimpa biara saan no kotoku ano. 12Na ɔhwehwɛe, ofitsi panyin no do, na ɔdze kɛpeem kakraba no do: na wohun kɔɔpow no wɔ Benjamin no kotoku no mu. 13Nna wosunsuaan hɔn ntar mu, na obiara dze n’adze soaa n’asoasopɔnkɔ, na wɔsanee kɔr kurow no mu. 14Na Juda nye no nuanom no baa Josef fie; nna ɔda ho wɔ hɔ: na wɔhwehwee famu wɔ n’enyim. 15Na Josef see hɔn dɛ, Ebɛnadze na hom ayɛ yi? Ana hom nnyim dɛ nyimpa a ɔtse dɛ emi yi mubotum dɛ mehyɛ nkɔm ma ɔba mu bi a? 16Na Juda see dɛ, Yɛnse mo wura dɛn? Yɛnka dɛn anaadɛ yerudua dɛn asan hɛnho? Nyankopɔn eyi wo nkowaa hɛn emumuyɛ edzi: hwɛ, yɛyɛ mo wura no nkowaa, hɛn nye nyia wohun kɔɔpow no wɔ ne nsamu nyinara. 17Na Josef see dɛ, Nyankopɔn mpa ngu dɛ mebɛyɛ dɛm: nyia woehu kɔɔpow no wɔ ne nsamu no, ɔnoara na ɔbɛyɛ m’akowaa; na hom dze, hom nkɔ hom egya nkyɛn wɔ asomdwee mu.
Juda Serɛ Ma Benjamin
18Nna Juda piin Josef nkyɛn, na ɔsee dɛ, Ao mo wura, meserɛ wo, ma w’akowaa nka asɛm kor wɔ mo wura n’asomu, na mma wo bo mmfuw w’akowaa: osiandɛ tserɛ woara nye Farao. 19Mo wura bisaa no nkowaa dɛ, Ana hom wɔ egya, anaa nua bi? 20Na yebuaa mo wura dɛ, Yɛwɔ egya, akɔdaa bi, na no nkɔdaa ba kakraba bi; na no nua ewu na ne ba a aka ara nye no nko, na n’egya dɔ no. 21Na esee wo nkowaa dɛ, Wɔnkɛfa no mbrɛ me, ma monhwɛ no. 22Na yɛsee mo wura dɛ, Abofra no fi n’egya nkyɛn a ɔnnkɛyɛ: na sɛ ofi n’egya nkyɛn a, n’egya bowu. 23Na esee wo nkowaa dɛ, Gyedɛ hom nua kakraba no nye hom ba, ɔno hom nnkohu m’enyim bio. 24Na ɔbaa dɛ yɛkɔr w’akowaa, m’egya nkyɛn no, yɛkaa mo wura ne nsɛm no kyerɛɛ no. 25Na hɛn egya see dɛ, Hom nkɔ bio nkɔtɔ edziban kakra mbrɛ hɛn. 26Na yɛsee dɛ, Yɛkɔ a ɔnnkɛyɛ: gyedɛ hɛn nua kakraba no ka hɛn ho, ɔno yɛbɔkɔ: osiandɛ sɛ hɛn nua kakraba no nnka hɛn ho a, ɔno yennkohu banyin no n’enyim. 27Na w’akowaa, m’egya no see hɛn dɛ, Homara hom nyim dɛ me yer woo mba beenu maa me: 28na baako fii me nkyɛn kɔree, na mesee dɛ, Ampaara wɔatsetsew no mu, na munnhun no ara na ɔdze ebodu ndɛ yi: 29na sɛ hom yi oyi so wɔ me nkyɛn, na mbusu bi ba no do a, ɔno hom dze mo gon nam awerɛhow mu bɔkɔ nda mu. 30Dɛm ntsi afei sɛ mokɔ w’akowaa, m’egya ne nkyɛn, na sɛ abofra no nnka hɛn ho a, ɔnam dɛ n’akoma da abofra no ho dodow ntsi, 31sɛ ohu dɛ abofra no nnka hɛn ho a, ɔno obowu: nna wo nkowaa dze w’akowaa, hɛn egya no, no gon nam awerɛhow mu akɔ nda mu. 32Na w’akowaa midzii abofra no ho egyinamu maa m’egya dɛ, Sɛ mammfa no mammbrɛ wo a, ɔno mibedzi so wɔ m’egya n’enyim daa. 33Dɛm ntsi afei, meserɛ wo, ma w’akowaa mindzi abofra no ananmu menyɛ mo wura ɔsomfo; na ma abofra no nye no nuanom nkɔ. 34Na mibesi no dɛn na makɔ m’egya nkyɛn, ber a abofra no nnka mo ho? Bɛyɛ na mehu mbusu a ɔbɛba m’egya no do.
Mfantse Bible © Bible Society of Ghana, 2011.